Əmək və Əhalinin Sosial Müdafiəsi Nazirliyi ünvanlı dövlət sosial yardımı ilə bağlı Milli Məclisdə səslənən ittihamlara cavab verib.
Nazirlikdən Sputnik Azərbaycan-ın sorğusuna cavabda bildirilib ki, son illər aparılan sosial islahatların hədəflərindən biri də ünvanlı dövlət sosial yardımına əlçatanlığın daha da artırılması olub. Bu məqsədlə müvafiq qanunvericilikdə bir sıra dəyişikliklər edilib, ünvanlı sosial yardımın təyinatı şərtləri xeyli yumşaldılıb:
"Məsələn, artıq ailənin götürdüyü kredit ünvanlı sosial yardım almaq hüququna baxılan zaman gəlir kimi nəzərə alınmır və yardım təyinatına maneə yaratmır. Yaxud sosial yardım üçün müraciət edən ailənin adambaşına düşən kommunal və rabitə xərclərinin cəminin orta aylıq məbləğinin ölkə üzrə yaşayış minimumuna nisbəti əvvəllər 10 faizdən çox olmamalı idisə, son illər bu nisbət 15 faizə çatdırılıb. Həmçinin ailənin sosial yardımın təyin olunmasına və ya məbləğinin dəyişdirilməsinə səbəb ola biləcək hallar barədə tam və düzgün məlumat verməsi və sosial yardım təyin edildikdən sonra gəlirlərində dəyişiklik baş verdikdə bu barədə məlumat verməsi üçün müəyyən olunan müddət 5 iş günündən 15 iş gününə qədər uzadılıb. Eyni zamanda, ünvanlı sosial yardım üçün müraciət edən zaman ailədən tələb olunan məlumatların sayı əhəmiyyətli dərəcədə azaldılıb və artıq həmin məlumatlar müvafiq elektron informasiya bazalarından əldə olunur və s.".
Həmçinin qeyd edilib ki, hazırda ölkəmizdə 73 min aztəminatlı ailənin 320 minədək üzvü aylıq ünvanlı dövlət sosial yardımla təmin edilir:
"Ailənin adına pay torpağının olması heç də ona ünvanlı sosial yardım təyinatına maneə yaratmır. Lakin həmin pay torpağı ilə bağlı aylar üzrə ardıcıl məcburi dövlət sosial sığorta ödənişləri edilməlidir".
“Ünvanlı dövlət sosial yardımın alınması üçün müraciət edilməsi, onun təyin olunması, verilməsi və verilməsindən imtina edilməsi Qaydaları”nın 3.7.4-cü maddəsinə əsasən ailənin mülkiyyətində və ya istifadəsində nəqliyyat vasitəsi olduqda (dövlət tərəfindən reabilitasiya məqsədləri üçün verilmiş nəqliyyat vasitələri istisna olmaqla) isə ailəyə ünvanlı sosial yardımın təyin olunmasından imtina edilir" - qurumdan bildirilib.
Qeyd edək ki, ünvanlı dövlət sosial yardımının (ÜDSY) verilməsi şərtləri Milli Məclisdə yenidən müzakirələrə səbəb olub. Milli Məclisin ötən iclaslarından birində parlamentin Regional məsələlər komitəsinin sədri Siyavuş Novruzov deyib ki, ünvanlı sosial yardımın miqdarı və verilməsi şərtləri dəyişdirilməlidir:
"Biz neçə illərdir ünvanlı sosial yardım veririk. İndiyə qədər ortaya çıxaran yoxdur ki, ünvanlı sosial yardımın effekti necə olub. Bunu davam etmək lazımdırmı? Ya bunun miqdarı artırılmalıdırmı?".
Deputat bildirib ki, bununla bağlı parlamentdə dinləmə keçirilsə, yaxşı olar:
"15 ilə yaxındır ki, Azərbaycanda 150 milyondan 300 milyona qədər bu məsələyə vəsait sərf olunur. Bəlkə, ünvanlı sosial yardımın qaydalarında dəyişiklik olmalıdır ki, daha effektiv olsun. Birinə deyirlər "adına köhnə sovet maşının var, sənə yardım düşmür", yaxud "adına torpaq sahəsi var, sənə yardım düşmür".
ÜDSY şərtləri dəyişdirilməlidir!
Millət vəkili Fazil Mustafa Sputnik Azərbaycan-a açıqlamasında bildirib ki, ÜDSY-nın verilməsi şəxsin sosial vəziyyəti araşdırılmaqla təyin olunmalıdır. Sənədlə bunun müəyyən olunması, müəyyən problemlərə səbəb olur:
"Həqiqətən də xeyli sayda insan adına gəlir gətirməyən mənbələrin əziyyətini çəkir, sosial yardım ala bilmir. Amma ÜDSY-nın hədəfi maddi sıxıntı içərisində yaşayan insanlara dövlətin dəstək göstərməsidir. Ona görə də, ÜDSY şərtləri dəyişməlidir".
Deputatın sözlərinə görə, indiyədək ÜDSY-ni mənimsəmə faktları olurdu. Son illər isə bu problemlər aradan qalxsa da, ÜDSY-nin verilmə şərtlərinin sərtləşdirilməsi ehtiyacı olan insanların dövlətin bu qayğısına əlçatanlığını azaldıb. Ona görə də ÜDSY-nin verilmə şərtlərinə yenidən baxılmalıdır.
İqtisadçı ekspert Natiq Cəfərli isə Sputnik Azərbaycan-a açıqlamasında bildirib ki, ÜDSY-nin verilməsi qaydaları insanları əksər hallarda bu qayğıdan məhrum edir.
"90-cı illərdə aldığı avtomobilə görə sosial yardımdan məhrum olur"
"Bu qaydalar yeni təsdiqlənməyib. 90-cı illərdə kiminsə aldığı avtomobil, kiçik torpaq sahəsi adında qalır. Amma bu əmlaklar ondan istifadə edilmədiyi halda belə ÜDSY-nin verilməsinə mane olur. Bu qaydalar üzündən insanlar ehtiyacları olsa belə ÜDSY ala bilmirlər. Sözügedən qaydaları dəyişmək üçün Milli Məclis təşəbbüslə çıxış etməlidir. Qaydalara dəyişiklikləri səsverməyə çıxarmaqla məsələni bir günə həll etmək olar" - ekspert deyib.
O əlavə edib ki, ölkədə minlərlə insan bu qaydalara görə haqları çatan ÜDSY almaqdan məhrum olublar. Bu məsələni hər dəfə Milli Məclisdə müzakirə etməklə bu problem həll olunmayacaq. Bu məsələni həll etmək Milli Məclisinin səlahiyyətindədir.
ÜDSY-dən hansı hallarda imtina edilir?
Qeyd edək ki, Ünvanlı dövlət sosial yardımının (ÜDSY) təyin edilməsindən aşağıdakı hallarda imtina edilir:
- "Ərizə-bəyannamə"də qeyd edilmiş məlumatların yoxlanılması zamanı məlumatlarda uyğunsuzluq aşkar olunduqda;
- sosial yardım üçün müraciətdən əvvəlki ardıcıl gələn 12 (on iki) ay ərzində ailənin orta aylıq gəliri hər bir ailə üzvü üçün ehtiyac meyarlarının məcmusuna bərabər və ya ondan yuxarı olduqda;
- sosial yardım üçün müraciətdən əvvəlki ardıcıl gələn 12 (on iki) ay ərzində respublika üzrə təsdiq edilmiş yaşayış minimumunun 12 mislindən çox məbləğdə alqı-satqı etdikdə;
- ailənin mülkiyyətində və ya istifadəsində nəqliyyat vasitəsi olduqda (dövlət tərəfindən reabilitasiya məqsədləri üçün verilmiş nəqliyyat vasitələri istisna olmaqla);
- ailənin əmək qabiliyyətli, işləməyən üzvü Nazirliyin tabeliyində Dövlət Məşğulluq Agentliyinin struktur bölməsi tərəfindən təklif olunmuş iki münasib işdən imtina etdikdə (bu halda ailənin sosial yardım hüququna onun təkrar müraciəti əsasında 1 (bir) aydan sonra baxılır);
- ailənin adambaşına düşən kommunal və rabitə xərclərinin cəminin orta aylıq məbləği ölkə üzrə təsdiq olunmuş yaşayış minimumunun 15 (on beş) faizinə bərabər və ya ondan yuxarı olduqda;
- ailənin mülkiyyətində müxtəlif ünvanda 2 və daha çox eyni təyinatlı daşınmaz əmlak olduqda.
ÜDSY-nin məbləği nə qədərdir?
Məlumat üçün bildirək ki, orta aylıq gəlirləri hər bir ailə üzvü üçün ehtiyac meyarının məcmusundan aşağı olan ailə aztəminatlı ailə sayılır. Ünvanlı dövlət sosial yardımının təyin edilməsi məqsədilə 2023-cü il üçün ehtiyac meyarının həddi 246 manat məbləğində təsdiq edilib.
Dövlət Sosial Müdafiə Fondundan Sputnik Azərbaycan-a verilən məlumata görə, 2023-cü ilin sentyabr ayında orta hesabla bir ailəyə ödənilən ÜDSY-nin məbləği 26,9 faiz artıb. Beləliklə, ötən ilin sentyabr ayında orta hesabla bir ailəyə ödənilən ÜDSY-nin məbləği 376,8 manat idisə, cari ilin müvafiq dövründə bu məbləğ artaraq 478,4 manat olub. Sosial yardım ayda bir dəfə aztəminatlı ailənin təmsilçisinin adına olan kart hesabına mərkəzləşdirilmiş şəkildə tam məbləğdə və nağdsız qaydada ödənilir.
Sosial yardımın məbləği ailə tərəfindən ardıcıl gələn 2 ay müddətində kart hesabından götürülmədikdə, sosial yardımın verilməsi dayandırılır və ailənin sosial yardım almaq hüququna təmsilçinin müraciəti əsasında yenidən baxılır.

Bu gün Bakı şəhər sakini – Səbail rayonu, Bünyad Sərdarov küçəsi 17, mənzil 22 ünvanında yaşayan Təmrazova Aliyə Həsən qızının başına gələnlər barədə sosial şəbəkədəki səs yazısına qulaq asanda adamın yazmağa, deməyə sözü qalmır.
Min ildən çoxdur ki, deyirik ki, cənnət anaların ayağı altındadır.
Bəs doğma oğlu, özü də yüksəkçinli dövlət məmuru olan, hazırda Dövlət Gömrük Komitəsində ( DGK ) çalışan Həsən Soltanzadə niyə doğma anasına cəhənnəm əzabı yaşadır..?
Ananın dediklərindən bəlli olur ki, oğlu Həsən Soltanzadə ilə 2010-cu ildən problemləri var. Sonda Səbail Rayon Məhkəməsi qərar verib ki, oğlu ona əməliyyat üçün 7100 manat ödəsin. Amma oğlu məhkəmə qərarına əməl etmir.
Media üzərindən apardığımız araşdırma zamanı bəlli oldu ki, oğul ( əgər ona oğul demək olarsa ) Həsən Soltanzadə qanunsuz yolla doğma anasını dəlixanaya saldıraraq onun var-dövlətinə sahib çıxıb, evindən külli miqdarda pul və qızıl-ziynət əşyalarını oğurlayıb.
Aliyə Təmrazova dəfələrlə sabiq Baş prokuror Zakir Qaralovun, Fövqəladə hallar naziri Kəmaləddin Heydərovun, Dövlət Təhlükəsizlik Xidmətinin sabiq rəisi Mədət Quliyevin və digər məmurların qəbulunda olub. Amma anaya kömək edən olmayıb.
Əksinə, ana deyir ki, Zakir Qaralovun qəbulunda olarkən o məni təhqir elədi.
Aliyə Təmrazova başına gələn müsibətlərdən, o cümlədən yaşadığı evin qarşısından oğurlanıb, zorla psixiatriya xəstəxanasına aparılması, orada saxlanıldığı üç gün ərzində evinin sənədlərinin, qızıl-zinət əşyalarının oğurlanmasına görə 4 yaşından təkbaşına böyütdüyü yeganə oğlu, Dövlət Gömrük Komitəsinin istintaq idarəsinin müstəntiqi Həsən Sultanzadənin günahkar olduğunu deyir. Aliyə xanım deyir ki, Həsən Sultanzadəyə havadarlıq edənlər olmasaydı, indiyədək onun doğma anasına qarşı elədikləri cəzasız qalmazdı.
Yeri gəlmişkən, Həsən Sultanzadə hüquq-mühafizə orqanlarında çalışan dostları vasitəsilə qəbula gedən anasını təhqir etdirir, hətta orada ona zor tətbiq edərək 2-ci dəfə dəlixanaya aparırlar.

Hətta Həsən Sultanzadənin 3-cü dəfə anasını zorla dəlixanaya aparması cəhdi alınmayıb.
68 yaşlı ana xüsusən Səbail rayonunun keçmiş prokuroru Şirxan Adıgözəlovu günahlandırır: “Ikinci dəfə mənim tam sağlam olduğum həkim rəyi ilə sübut edildiyi halda, yenə də küçədən oğurlanıb dəlixanaya aparılmağımda bu adamın rolu olub. Çoxsaylı müraciətlərimə baxmayaraq, onun əməlinə hüquqi qiymət verilmir.
Bu dəfə ”dəlixana əməliyyatı” da baş tutmayandan sonra Həsən Sultanzadə 18 sentyabr 2014-cü il tarixli məktubla Kəmaləddin Heydərova müraciət edib ki, üçüncü dəfə dəlixanaya yerləşdirilməyim üçün ona yardım etsin”.
68 yaşlı qadın onu qanunsuz olaraq dəlixanaya salanlar və bu müddətdə evindən oğurluq edənlərin cəzalandırılmasını tələb edir.
Bütün bu əzablardan sonra ana Aliyə Təmrazova Prezident İlham Əliyevə müraciət edərək pozulmuş hüquqlarının bərpası, cinayətkarların cəzalandırılması üçün dövlət başçısından kömək istəyir.
Burada deyirlər...sözün bitdiyi yer...
P.S. Bir ananın can deməsi üçün bütün varından, yoxundan çıxan övladlar var. Bir ananın yaşından asılı olmayaraq, bircə saat artıq yaşaması üçün canını belə qurban verən övladlar tanıyıram. Övladları üçün bütün məşəqqətlərə dözən analar əlbəttə ki var. Ən kobud misal isə, bir ana söyüşünə görə, ömürlük həbsxanada çürüyən övladlar tanıyıram. Onu da deyim ki, analar, atalar və övladlar heç vaxt kateqoriyalara bölünmürlər. Ögey və ya doğma olsalar belə. Amma bir məsələ var, bəzən belə deyirlər. Filankəs filankəsin ögey oğludur, filankəs filankəsin ögey anasıdır. Görəsən, Aliyə Təmrazova hansı analardandır? Və ya Həsən Soltanzadə hansı övladlardandır? İstər ana üçün, istər oğul üçün bir məsləhətimiz var. Nə qədər ki, günahlarınız sizinlə o dünyaya getməyib, tövbə edərək barışın. Dünya malı müqəddəs deyildir, müvəqqətidir. //gundelik-baku.com//

Qubadlı Rayon İcra Hakimiyyətinin keçidriyi tender müsabiqəsinin qalibi “Construction Group Of Pearl” MMC olub.

DİA.AZ Yeniavaz.com-a istinadla xəbər verir ki, Qubadlı RİH yaşıllaşdırma işlərinə görə “Construction Group Of Pearl” MMC-yə 138 min 473 manat ödəyəcək.
Xatırladaq ki, Qubadlı şəhəri 25 oktyabr 2020-ci ildə işğaldan azad edilib. Bu barədə Prezident İlham Əliyev tvitter sosial şəbəkəsində (indi “X”) ilk dəfə açıqlama vermişdi. Daha sonra rayonun kəndləri işğalçılardan azad edildi.
Qubadlı RİH-nin rəsmi internet saytında da qeyd edildiyi kimi, hazırda RİH-nin ünvanı Sumqayıt şəhəri, İnşaatçılar qəsəbəsində yerləşir.
Qubadlı Rayon İcra Hakimiyyətinin yaşıllaşdırma üçün aldığı ağac və güllərin siyahısını təqdim edirik:

Nizamnamə kapitalı 20 manat olan “Construction Group Of Pearl” MMC-nin hüquqi ünvanı Abşeron rayonu, Xırdalan şəhəri, Quşçuluq Yaşayış Massivi, ev 19-cu küçə, döngə 2, ev 24-də yerləşir. Şirkətin qanuni təmsilçisi Babayev Ramin Ramiz oğludur.

P.S. Görünür, başçı rayonun azad olunduğunu, orda böyük quruculuq işləri planlanıldığını hələ bilmir...

Azərbaycanda deyirlər ki, təhsil yox səviyyəsindədir və ya yox dərəcəsindədir. Əslində mən bu sözə o vaxtlar o qədər də əhəmiyyət vermirdim, düşünürdüm ki, sözdü də kimsə atıb ortalığa. İndi isə bu qənaətə gəldim ki, bu heç də elə-belə deyilmiş söz deyil. Bu, həqiqətən də belədir. İndi deyəcəksiniz ki, sənin fikrini dəyişdirən nə oldu? İndi mən danışım siz də qulaq asın.
Bəli, Bu gün Azərbaycanda təhsil yox səviyyəsindədir. Bunun də səbəbi təhsilin başında duranların təhsildən bixəbər olmasıdır. Doğurdan da təhsilin başında duran nadan, savadsız, təhsildən bixəbər olanda, təhsilimiz də bu gündə olacaq da. Nə isə, keçim əsas məsələyə.
Bir gün eşitdim ki, Sumqayıt şəhərində yerləşən Evdə Fərdi Təhsil Mərkəzinə Sevda Əliyevanı direktor əvəzi kimi yüksək bir vəzifəyə qoyublar. Şok keçirməyin nə demək olduğunu mən bu xəbəri eşidəndə öyrəndim. Quruyub qaldım, öz-özümə düşündüm ki, normal insanlarla ünsiyyətdə olmağı bacarmayan Sevda xanım, görəsən sağlamlığı məhdud olan şagirdlərlə necə ünsiyyət quracaq? İki ilə kimi bu vəzifə kürsüsündə oturan bu xanımın yadda qalan tək bir yaxşı işi olmadı. Əksinə müəllimlərdən hər ay müəyyən miqdarda pul tələb etdi, müəllimlərin maaş kartlarına qədər əl uzatdı. Hətta Regional Təhsil İdarəsi tərəfindən keçirilən yoxlama zamanı da bu məktəbdə onlarla möqsan aşkarlandı. Lakin yenə də xanım öz çirkin əməllərindən əl çəkmədi. Necə deyərlər, dəyirman bildiyini edir, çak-çuku baş ağrıdır. Beləcə Sevda xanım öz işinə davam etdi. Və bu işlədiyi müddətdə də direktor kimi təsdiq olunmaq üçün min yola əl atdı. Rüsvət təklif etdi, müəyyən şəxslərə vəzifə təklif etsə də müraciət etdiyi şəxlərin heç biri ona köməklik etmədi. Yanına gələn jurnalistlərə də müəyyən miqdarda pul verərək özü barədə məqalələr hazırlatdı, fəxri fərmanlar, diplomlar yazdırdı. Və bununla da özünü bəzi şəxlərin gözünə soxmağa çalışdı. Lakin onun bu niyyəti də baş tutmadı. Heç cür direktor kimi təsdiq oluna bilməyən Sevda xanım bir gün oturduğu kürsüdən qaldırıldı və bu da bir çoxlarının ürəyindən xəbər verdi. Müəllim kimi fəaliyyətini davam etdirməyə başlayan Sevda xanım mənə maraqlıdır ki, görəsən sağlamlığı məhdud olan bu şagirdlərə heç olmasa nəsə öyrədə bildimi? İnanmıram, axı bu xanımın özü nə bilir ki, şagirdinə də nə öyrətsin?!
İki il yuxarıda adını çəkdiyim məktəbə Sevda Əliyeva adlı bir xanım direktorluq edib. Məktəbə ayaq basdığı gündən ancaq pul yığıb. Sevda Əliyeva məktəbə gələnə kimi 500 manata 30 saat dərs alınıbsa, Sevda xanım isə gələndən sonra bu qiymət kəllə çarxa qalxıb. 30 saat dərsə 1500, 36 saat dərsə 2000 manat tələb edib, kimin pulu var verib dərsini alıb. Kimin pulu yoxdursa, deyib ki, sizə dərs düşmür. Xanım özü deyirmiş ki, «mən bura elə-belə gəlməmişəm, məni bura göndəriblər, nazir kimdir mənə göstəriş verə? Mənim arxamda icra başçısı Zakir Fərəcov və təhsil şöbəsinin o zamankı müdiri Arzu Alızadə durub, nə edirəm onların tapşırığıyla edirəm».
Sevda Əliyeva dərsləri satıb pulunu zamankı Təhsil Şöbəsinin müdiri Arzu Alızadə ilə bölürmüş. Müəllimlərdən pul yığaraq saytlara, jurnallara verib özü barədə tərif yazıları yazdırıb. Sonra da müəllimlərə deyirmiş ki, hər sayta ayda 200 manat pul verirəm ki, məktəbə dəyməsinlər. Sevda Əliyeva 2 il direktor olduğu vaxtda bir dəfə də dərs keçməyib, məktəbdə oturub ancaq valideynlərə zəng edib deyib ki, «filan müəllimədən imtina edin, yoxsa uşağınız gələn il tibbi komissiyadan keçməyəcək». Tibbi pedaqoji komissiyanın müdiri ilə əlbur olub dediyi ilə razılaşmayan valideynləri də incidib, uşaqlarını məktəbdən uzaqlaşdırmaqla hədələyib. Bu cür yollarla dərsləri müəllimlərdən alıb əvəzetməyə çıxarıb pulunu özünə götürüb. Sevda Əliyeva bu 2 ildə o qədər qanun pozuntusu edib ki, artıq boğaza yığılmış müəllimlər nə edəcəklərini bilməyiblər. İş o yerə çatıb ki, xanım direktorəvəzi məktəbin savadlı müəllimlərini heçə sayaraq başqa məktəblərin müəllimələrini çağırıb ki, gəlin pul verin, sizə dərs verim. Bazar günü məktəblər bağlı olsa da, Sevda Əliyeva dərs bölgüsü eliyib, müəllimlər haqsızlığa etiraz edəndə də, özünə nəsə edib qanını müəllimlərin üstünə tökəcəyini deyir. Bax bu dəhşətdir, bu şəkildə işləyən direktorəvəzini görəsən hansı yaxşı keyfiyyətinə görə gətirib 21 saylı tam orta məktəbə direktorun baş müavini vəzifəsinə qoyublar?
Maraqlıdır, təhsildən bixəbər bir xanımı bu gün də Sumqayıtda uğurları ilə ön sıralarda olan bir məktəbə baş direktor müavini vəzifəsinə irəli çəkiblər. Özü də direktor müavinlərinin baş direktor müavini. Adamın lap əti tökülür, hansı ağılla təhsildən bixəbər olan bu xanımı belə bir məktəbə direktor müavinlərinin baş direktor mavini qoyublar bilmədim. Bir də ki, onu qoyan və quyulan bilər.
Xanım yəqin ki, təhsil aləminə diplomunu alandan sonra gəlib. Hardan baxsaq 25 bəlkə də 30 ildir. Bu uzun müddət ərzində bu xanımın əslində təhsildən bixəbər olduğu göz qabağındadır. Çünki nə dərs cədvəli qura bilir, nə də başqa bir iş bacarır. Bu xanım ancaq pul qazanmağın, varlanmağın yollarını axtarmaqla məşğuldur. Gözü həmişə onun, bunun əlində olan Sevda xanım uğurlarıyla respublikada ön sıralarda olan 21 saylı orta məktəbi ində başı üstə çevirməyə gəlib və çevirəcək də. Maraqlıdır ki, Regional Təhsil İdarəsinin müdiriyyəti hara baxır, zərrə qədər savadı olmayan bu xanımı hansı haqla, hansı biliyinə görə gətirib belə bir məktəbə rəhbər vəzifəyə qoyub, anlamadım.
Bəli, təhsilimiz baş ayaqdı. Bu baş ayaqlığın da səbəbi çox yəqin ki, Sevda Əliyeva kimilərdir. Ona görə də təhsilimiz bu gün bərbad haldadır. Məktəblərdə bu gün dərs keçirilmir, xüsusən də 10 və 11-ci siniflərdə. Oxumaq istəyən, ali təhsil almaq istəyən bütün şagirdlər özəl dərs alırlar, məşğələlərə gedirlər. Səbəbi də məlumdur. Bunun da səbəbkarı Sevda Əliyeva kimi müəllimlərin təhsil sahəsinə rəhbərlik etməsidir. Mən inanıram ki, bu məqalə ictimailəşəndən sonra Regional Təhsil İdarəsi və əlaqədar təşkilatlar bu barədə bir ölçü götürəcəklər.

Yuxarıdakı yazını aymediacompany.az saytı paylaşıbdı. Sevda xanım da öz sosial media hesabından kimlərisə təhqir edib hədələyən tərzdə paylaşımlar edibdi. Oxucularımıza maraqlı olar deyə həmin paylaşımları da təqdim edirik.

Qarşı tərəfi də dinləməyə hazırıq. //aktualxeber//

Ağdam rayonu Bəhmədli kənd sakini və hazırda Yevlax rayonunda məskunlaşmış Şölə Qarayeva bildirir ki, 2005-ci ildə bələdiyyə sədri Sǝrlan Musayevə ödəniş edərək, 24 sot torpaq alıb.

DİA.AZ xəbər verir ki, həmin dövrdə torpağın 12 sotunun sənədləri ona verilsə də, qalan 12 sot icarə müqaviləsi əsasında verilib.

Onun sözlərinə görə, sonradan həmin torpağın sahibi Anar adlı şəxs ortaya çıxaraq torpağın ona aid olduğunu və yerində tikilmiş evin sökülməsini tələb edib. Daha sonra isə vətəndaşı məhkəməyə verib.

Şikayətçi deyir ki, məhkəmələrdə süründürməçiliyə məruz qalıb üstəlik məhkəmə bildirişi ona proses olub bitdikdən sonra gəlib.

Vətəndaş dia.az vasitəsilə ölkə rəhbərliyinə və aidiyyatı qurumlara müraciət edərək, ona köməklik göstərilməsini xahiş edir.

Hər kəsə məlumdur ki, ölkəmizdə iqtisadiyyatın sürətli inkişafı, əhalinin sosial-mədəni həyat səviyyəsinin yaxşılaşdırılması, təbii ehtiyatlardan səmərəli şəkildə istifadə olunma, ekoloji tarazlığın qorunub saxlanılması və s. kimi məsələ və problemlərin həlli, bu gün də dövlət-hakimiyyət orqanlarının diqqət mərkəzində saxladığı məsələlərdəndir. Ona görə də son illər ekologiyaya, təbiəti mühafizəyə və təbii ehtiyatlardan səmərəli şəkildə istifadəyə dair bir sıra normativ hüquqi aktlar qəbul olunmuş, təbiətin qorunması və sağlamlaşdırılması istiqamətində mühüm praktiki addımlar da atılmışdır. Bütün bunlara baxmayaraq, redaksiyamızın elektron poçtuna göndərilən foto-şəkillərə, daxil olan məlumatlara diqqət yetirdikdə bəlli olur ki, hal-hazırda bənzəri olmayan formada “ekoloji terror” Bərdə şəhəri, S. Zöhrabbəyov küçəsində yeni tikilən hotelin qarşısındakı ərazidə baş verib. Yəni, heç bir halda ekoloji tələblərə əməl olunmadan ərazidə çoxlu sayda iri gövdəli şam ağacları kəsilmiş və həmin sahədə yalnız şam ağaclarının kötük hissələri qalmışdır. Ümumi mənzərəyə diqqət yetirib belə qənaətə gəlmək olar ki, ərazidə iri gövdəli şam ağaclarının kəsilməsi hansısa işbazların maraqlarına cavab verir ki, həmin şəxslər belə bir formada addımlarını atırlar.

Faktdır ki, ağaclar hansısa dövlət əhəmiyyətli layihələr həyata keçirilərkən Azərbaycan Respublikası Nazirlər Kabinetinin “Yaşıllıqların götürülməsi qaydası” haqqında təlimata uyğun olaraq, aidiyyatı dövlət qurumlarının rəsmi icazəsi əsasında kəsilə bilər. Bir xatırlamanı yada salq ki, illər öncə Ulu Öndər Heydər Əliyev ağacların qanunsuz kəsilməsi ilə bağlı konkret mövqeyini ortaya qoymuş və o, “Bir ağacı kəsən, sanki mənim bir qolumu kəsir” demişdi. Hətta, həmin vaxtlarda Ümummilli Lider Ekologiya və Təbii Sərvətlər Nazirliyinin rəhbərliyinə bu məsələ ilə bağlı xüsusi tapşırıqlarını da vermişdi. Vaxtilə ümummilli lider Heydər Əliyev onu da demişdi ki, “Təbiətə zərər vuranlar, ağac kəsənlər, təbiəti çirkləndirənlər, korlayanlar cəmiyyətimizin, hamımızın düşmənidir”. O halda sual oluna bilər ki, görəsən Bərdə şəhəri, S. Zöhrabbəyov küçəsində yeni tikilən hotelin qarşısındakı ərazidə ağacları kütləvi şəkildə kəsənlər, Ümummilli Lider Heydər Əliyevin kəlamlarını unudublarmı ki, onlar olmazın formada “ekoloji terror” törədirlər? Unutmaq olmaz ki, bir ədəd ağac təqribən 30-40 ilə əmələ gəlir və hansısa şəxs həmin ağacı şəxsi məqsədini həyata keçirmək naminə kəsirsə, deməli oksigen mənbəyini də məhv etmiş olur. Məsələnin düşündürücü tərəfi ondan ibarətdir ki, media nümayəndələri yaşıl ağacların kəsilməsi faktlarını ictimailəşdirərkən, yerlərdə bu kimi işlərə cavabdehlik daşıyanlar problemlərin varlığına hansısa formada don geydirməyə çalışırlar. Yəni, həmin şəxslər çalışırlar ki, qol qoyduqları qanunsuzluq əməllərinə görə “sudan quru” çıxmağa çalışsınlar. Yəqin ki, baş verən bu cür qanunsuzluqlara həm Bərdə RİH Aparatı, həm də ərazi üzrə Regional Ekologiya və Təbii Sərvətlər İdarəsi tərəfindən müəyyən “don geydiriləcək”.

Xatırladaq ki, Cinayət Məcəlləsinin 259-cu maddəsi qanunsuz ağac kəsilməsi ilə bağlıdır ki, bu Məcəllənin 259.1-ə əsasən hansısa şəxs ağac və kolların qanunsuz kəsilməsi işlərini həyata keçirərsə, həmin şəxs 5000-7000 manat məbləğində cərimə cəzasına və ya 2 ilədək müddətdə islah işlərinə cəlb oluna bilər. Eyni zamanda həmin şəxsin azadlığı 2 ilədək müddətə məhdudlaşdırıla, yaxud da 2 ilədək müddətə azadlıqdan məhrumetmə cəzasına məhkum oluna bilər. Odur ki, hər bir ağacın qorunması, yaşıllıqların salınması ilk növbədə, hər kəsdən vətəndaşlıq borcu tələb edir. (Atvxeber.az)

Mövzuya qayıdacağıq. Bizi izləyin.

Paytaxtın Həsən bəy Zərdabi küçəsi ilə Akim Abbasov küçəsinin kəsişməsində yerləşən «Üç Tac» (el arasında «Tri korona» kimi tanınır — red.) yaşayış kompleksi «İlin dörd fəsli» şirkəti tərəfindən inşa edilib və Bakı şəhərində ilk yenitikili binalardan hesab olunur. Tikiliş tarixi 2000-ci illərin lap əvvəllərinə təsadüf etsə də, son dövrə qədər həmin yaşayış kompleksinə nə qaz verilib, nə də mülkiyyət haqqında çıxarış. Son vaxtlara qədər binalarda qaz və çıxarış olmadığı üçün, demək olar ki, heç kim evini sata bilmirdi. Aydın məsələdir ki, qazı və çıxarışı olmayan mənzilə alıcılar yaxın durmaq istəmirlər. «Üç tac» yaşayış kompleksinin tikildiyi ərazi bir az narahatlıq yaradır. Kompleksin həyət tərəfinin qarşısı məşhur «qanlı göl»dür. Və həyətdəki meydançadan 5 metr irəlidə uçurum var. İnsanlar təbii fəlakət zamanı bu binaların davam gətirib-gətirməyəcəyi barədə tərəddüd edirlər.

Amma sonda tədricən qaz və “kupça” məsələsinin düzəldiyi deyilir. Di gəlin görək, qaz niyə yox imiş. O binalardan ev almaq istəyənləri heç bu sual düşündürübmü? Bəlkə qazın verilməməsinin başqa, daha dərin problemlə əlaqədardır? O problemin özü həllini tapıbmı?

Məsələ burasındadır ki, son vaxtlara kimi binanın Fövqəladə Hallar Nazirliyi (FHN) tərəfindən təhvil alınmadığı deyilirdi. Kompleksə qaz və mülkiyyət haqda çıxarış verilməməsi bu səbəblə əlaqələndirilirdi. FHN-in Tikintidə Təhlükəsizliyə Nəzarət Dövlət Agentliyindən KİV-ə verdiyi belə bir məlumat dərc olunmuşdu: “Həmin bina FHN-in Tikintidə Təhlükəsizliyə Nəzarət Dövlət Agentliyinin müayinəsindən keçib. Orada çatışmayan cəhətlər ekspertizaya verilib. Müvəqqəti qaz almaq üçün onlar arayışı götürə bilərlər. Qaldı ki, binanın təhvilinə, o bina təhvilə getməyib. Çünki müayinə vaxtı iradlar olub. Onlar aradan qalxmalıdır ki, kompleks təhvilə getsin”.

Təxmin etmək olar ki, sözügedən binalara qaz da müvəqqəti verilib. Nazirlik rəsmiləri «Üç Tac» kompleksinin tikintisində hansı iradların olduğu barədə isə açıqlama vermək istəməyiblər. Bu məqaləmizin qayəsini təşkil edən məsələ də budur ki, yaşayış kompleksində həll olunması heç cür mümkün olmayacaq problem var. Söhbət o problemdən gedir ki, FHN bəlkə də xəbərsizdir və Nazirliyin tikinti şirkətinə tutduğu iradlar sırasında yer almayıb.

Bu günlərdə “Dəryaz” qəzeti redaksiyasına adının çəkilməyini istəməyən keçmiş inşşatçı məlumat verib ki, “Üç tac” yaşayış kompleksinin tikintisində işləyib və şahidi olub ki, kompleksin birinci korpusunun birinci mərtəbəsində qeyri-yaşayış obyektinin geniş zalında layihə üzrə betondan inşa edilməli olan orta dirək qoymaq memarın yadından çıxıb. İş başa çatandan az sonra baxıblar ki, birinci mərtəbənin tavanı çökməyə başlayıb. Gecə ilə ustaları gətiriblər. Domkrat (qaldırıcı vasitə) köməyi ilə yenidən dəmir konstruksiyanın tətbiqi ilə süni dayaq düzəldiblər. Konstruksiyanın boşluqlarını doldurub üstünü də suvaqlayıblar. Bu isə o deməkdir ki, orta ballıq zəlzələ olsa, binanın çökməyəcəyinə zəmanət yoxdur. Çünki illər uzunu konstruksiyanın hazırlandığı dəmir çürüyüb. Üstəgəl, layihə üzrə hazırlanan beton dirəklər titrəyişlər zamanı özü “rəqs etməli” və seysmik dalğaların təsirini “söndürməliydi”. Süni dayaqda isə belə xüsusiyyət yoxdur.

Öyrəndik ki, sözügedən kompleksi inşa edən şirkət mənsublarından biri – Vilayət adlı şəxs hazırda paytaxtın Nərimanov rayonunda Gold Baku Greative Group şirkəti adı ilə hündürmərtəbəli bina inşa etməkdədir. Onunla zəngləşib məsələyə münasibətini öyrənməyə çalışdıq. Gözlədiyimiz kimi, təkzib etdi və bildirdi ki, binalar 20 ildir orda dayanıb. Həmçinin qeyd etdi ki, “siz jurnalistsiniz, mühəndis deyilsiniz”. Əlavə etdi ki, onunla Nərimanovdakı ofisində görüşüb fikir mübadiləsi apara bilərik, bütün suallarımıza cavab verməyə hazırdır. Ünvana çatdığımızda ilk əvvəl Vilayət bəyin yerində olmadığını eşitdik. Özünə zəng vurub gəldiyimizi dedikdə, göz həkiminin yanında olduğunu dedi və gözləməyimizi tapşırdı. Təxminən bir saata kimi gözləyəndən sonra növbəti zəngimizə cavab vermədi. Sonra ona məlum olmayan başqa nömrədən zəng etdik. Dəstəyi başqa adam götürdü. Nə istədiyimizi soruşdu. Vilayət bəy tərəfindən dəvət olunduğumuzu dedik. Bildirdi ki, guya Vilayət bəyin telefonu dünəndən ondadır. Biz həmin şəxsin açıq-aşkar yalan danışdığını bilsək də, geri durmadıq. Etiraf etməli oldu ki, hər ikisi – o da, Vilayət bəy də ofisdədirlər, yuxarı – ikinci mərtəbəyə qalxmağımızı tapşırdı. Həmin şəxs (bəlkə də Vilayət bəyin biznes şəriki) elə ilk görünüşündən lovğa, təkəbbürlü adam təsiri bağışladı. Bizi Vilayət müəllimin kabinetinə müşayiət elədi. Özümüzü təqdim elədik. Vilayət bəyin istəyi ilə jurnalist vəsiqəmizi masanın üstünə qoyduq ki, tanış olsunlar. İlk baxışda ehmal, səmimi adam təəssüratı bağışlayan Vilayət bəylə elə söhbətə yeni başlamışdıq ki, şəriki müdaxilə edib bildirdi ki, şirkət “Üç tac” yaşayış kompleksini deyil, onun həndəvərindəki binaları tikib, guya ünvanı səhv gəlmişik. Biz bir daha xatırlatdıq ki, Vilayət bəy haqqqında söz açdığımız binaları məhz işlədiyi şirkətin inşa etdiyini etiraf edib. Vilayət bəy də susmaqla razılığını bildirdi. Elə bu vaxt kabinetə pəzəvəng cüssəli, qarayanız bir kişi daxil oldu. Vilayət bəy onu şirkətin arxitektoru kimi təqdim etdi. Hərçənd, həmin adam özünü elə ilk andan bizim suallarımızı cavablandırmağa hazır olan arxitektor kimi deyil, sanki bir “reket” kimi aparmağa başladı: “Mən Mətbuat Şurasının üzvüyəm, sizi “qara siyahı”ya saldıracam…” Ona izah etməyə çalışdıq ki, sualımıza cavab axtarmağa gəlmişik, Mətbuat Şurasının bu məsələyə dəxli yoxdur. İkinci addımında həmin şəxs adının Hidayət Əsgərov olduğunu, özününsə “Adiloğlu” Nəşriyyatının direktoru olduğunu, həm də tikinti şirkətində arxitektor işlədiyini dedi. Biz haqqında eşitdiyimiz məşhur naşir Hidayət Əsgərovun belə “razborkalara” gedə bilməyəcəyi qənaətindəydik. Üçüncü adddımında isə “naşir-memar-reket” bütün hədləri aşaraq jurnalist vəsiqəmizi götürüb qonşu otağa qaçdı və sənədlərin şəklini telefonla çəkməyə çalışdı. Səs-küyə şirkətin daha bir neçə əməkdaşı tökülüşüb gəldilər. Bu arada katibə də özünü haraya yetirib son nöqtəni qoydu, O bildirdi ki, biz, o binanı 20 ildir təhvil vermişik.» İki nəfər bizim on nəfərə qarşı durduğu həmin situasiyada onların hər cür mərdimazar ssenariyə hazır olduqlarını müşahidə edib polisin “102” qaynar xəttinə zəng vuracağımızı bildirdik. Yalnız bu xəbərdarlığımızdan sonra vəsiqəmizi özümüzə qaytardılar, həmçinin hədə-qorxu gəlməkdə davam etdilər.

Xatırlatmağa dəyər ki, “İlin Dörd Fəsli” tikinti şirkəti istehsal fəaliyyətinə 1998- cı ildə başlayıb. O, çoxmənzilli və fərdi yaşayış evlərinin, müxtəlif təyinatlı obyektlərin tikintisində, eləcə də obyektlərin təmiri, interyer dizaynı, landşaft layihələşdirilməsi xidmətləri sahəsində ixtisaslaşmışdır. “İlin Dörd Fəsli» MMC-dən yuxarı instansiyalara indiyədək çoxsaylı şikayətlər ünvanlanıb. Həmin şikayətlərin də bir çoxu mətbuatda dərc olunub. Məsələn, Abşeron rayonu Masazır qəsəbəsində yerləşən «Yeni Bakı» Yaşayış Kompleksinin sakinləri bildirirlər ki, şirkət şəhərcikdə qanunsuz olaraq qurduğu komendant sistemi vasitəsi ilə hər ay sakinlərdən vəsait toplayır. İstədikləri məbləği ödəməkdən imtina edənlərin mənzilinə elektrik verilməsi tikinti şirkəti tərəfindən dayandırılır. Yığılan kommunal ödənişlər müqabilində qəbz adı altında VÖEN-siz kağız parçaları verilir. Yığdıqları pulları hara, necə xərclədikləri barədə hesabat vermirlər. Mənzil alarkən sakinlərdən qaz, işıq və su sayğacları üçün əlavə olaraq 700 manat vəsait tələb edilib.

Bütün bunlar azmış kimi bir müddət əvvəl söz yayıldı ki, “İlin Dörd Fəsli” Məhdud Məsuliyyətli Cəmiyyətnin (MMC) adı və təşkilati-hüquqi forması dəyişdirilib. Gah deyirlər “İDF-Mənzil Servis” Mənzil Tikinti Kooperativi olub, gah da deyirlər “Avropa-servis” MTK olub. Sakinlər bu dəyişiklikləri şirkətin vergidən yayınmaq üçün çıxardığı “ayının min oyunu” hesab edirlər. Çünki MMC kimi mənzil satışında dövlət büdcəsinə müəyyən məbləğdə vergi köçürülməlidir, ancaq MTK-da bu öhdəlik yoxdur. Həmçinin bildirilir ki, şirkət rəhbərliyi sakinlərə girov saxladığı eskiz lahiyə və protokoldan çıxarış vermək lazım gələndə onlardan qanunsuz ödənişlər tələb edir. Yaşayış massivlərində telefon, televiziya, internet kimi xidmətlər də şirkətin monopoliyasındadır. Digər provayderləri şəhərciyə yaxın buraxmırlar. Sakinlərə deyirlər ki, bizim burada qalıb sizə xidmət göstərməyimiz üçün müqaviləyə imza atmasanız, sənədlərinizi verməyəcəyik.

O da bildirilir ki, tikinti şirkəti narazılıq edən sakinlərin müdafiəsinə qalxan hüquqşünasları da öz tərəfinə çəkib işlədir.

Odur ki, “Dəryaz” qəzeti olaraq, üzümüzü aidiyyati qurumlara — hüquq-mühafizə və cinayət təqibi orqanlarına, Fövqəladə Hallar Nazirliyinə tutub xahiş edirik: Məqalədə ehtiva olunan məlumat üzrə xüsusi komissiya təşkil edib yoxlama aparılsın, “Üç tac” yaşayış kompleksinin inşaatında buraxılmış və sakinlərin həyatına təhlükə vəd edən səhvlər müəyyənləşdirilsin, onlara yol vermiş vəzifəli şəxslər məsuliyyətə cəlb olunsun, lazım gəldiyi təqdirdə sakinlərin təxliyyəsi təmin edilsin.

P.S. Qeyd edək ki, “İlin Dörd Fəsli” Məhdud Məsuliyyətli Cəmiyyətnin indiki sədri Elşən Musayevdir. Biz onunla əlaqə saxlamaq üçün instaqramda yerləşdirdiyi 050)-224-40-60 nömrəli mobil telefona zəng vurub qarşı tərəfin də mövqeyini öyrənmək istədik. Özünü şirkətin mühasibi Ağaşirin kimi təqdim edən şəxs bildirdi ki, «bilirsiniz bina nə vaxt tikilib? Ondan sonra Bakıda zəlzələ də olub. İndiyə kimi bina dağılmayıbsa indi də, dağılmaz. Mən Vilayət adda adam tanımıram, boş- boş şeylərə görə də vaxtımı alırsınız.

Məqalədə adları keçən şəxslərin də, mövqüyini dərc etməyə hazırıq.

Mövzunu davam etdirəcəyik
Deryaz.az

«Təzadlar» bu mövzuya bir dəfə 2017-ci ildə, sonralar isə düz 2 il əvvəl- 2021-ci ilin avqustunda toxunmuşdu. Söhbət 2014-cü ildə Prezident Sərəncamı ilə dövlət büdcəsindən təmizlənməsinə 2 milyon manat (həmin illərin kursu ilə təxminən 2,3 milyon dollar) vəsait ayrılmış Zığ gölünün ətrafında gedən sövdələşmələr və ya danışıqlardan, mənasız müzakirələrdən gedir.

***

Əslində, bu mövzuya yenidən toxunmağımıza səbəb Ekologiya və Təbii Sərvətlər Nazirliyinin yenidən bu məsələyə qayıtmasıdır. Axı yadımdadır ki, Zığ gölünə hələ 2014-cü ildə Prezident Sərəncamı ilə 2 milyon manat pul ayrılmışdı və Suraxanı rayon İcra Hakimiyyətinin illik hesabatında gölün artıq tərtəmiz olduğu, ətrafının yaşıllaşdırıldığı, bir sözlə, xalqın istifadəsinə verildiyi bildirilirdi.

Bəs indi bu nə məsələdir? «Təzadlar»ın əməkdaşları Suraxanı RİH-nin həmin hesabatına istinad edib kameralarla Zığ gölünün pişvazına çıxmışdır… Gördüklərimiz bizi məyyus etdi. Gölün «qanı qara» idi, üzü kimi. Çünki suyun üzündə qapqara mazut və kanalizasiya sularının çirkabı üzürdü, qaz-ördək, qağayı, yaxud çöl qazları, durnalar… yox…

***

Nə isə. Keçək mətləbə: bu günlərdə isə ekologiya və təbii sərvətlər nazirin müavini Vüqar Kərimov “Xəzər Xəbər”ə Zığ gölünün son durumu ilə bağlı məlumat verirdi. Deyirdi ki, ətraf ərazilərdən axıdılan çirkab suları göldə ekoloji vəziyyəti tamamilə korlayıb. Vüqar Kərimovun sözlərinə görə, çirkəlnməyə məruz qalan gölün reabilitasiyası 2021-ci ildə Ekologiya və Təbii Sərvətlər Nazirliyinə tapşırılıb. Nazir müavini onu qeyd edirdi ki, aiddiyəti qurum tərəfindən gölə axıdılan çirkab sularının qarşsısını almaq üçün layihə hazırlanır. Sitat: «…gölün ekoloji vəziyyətinin yaxşılaşdırılması üçün nazirlik tərəfindən layihənin hazırlanması yekunlaşıb. Ümumilikdə 291 hektar ərazidə bərpa işlərinin aparılması nəzərdə tutulub. Layihənin icrası dövlət investisiya, dövlət özəl əməkdaşlığı və nazirliyin öz hesabına həyata keçiriləcək. Ərazidə müxtəlif təyinatlı obyektlərin tikintisi də planlaşdırılır… Gölün sahəsinin 40 hektara qədər kiçildilməsi orada işlərin daha rahat görülməsinə imkan yaradacaq…» və s.

2 milyon manatın qeyb olduğu göldə «qaz vurub qazan doldurma» yarışı, yoxsa…

Qayıdıram 9 il geriyə: 15 oktyabr 2014-cü il. Prezident İlham Əliyev Böyükşor və Zığ gölləri ilə bağlı FƏRMAN imzalayır. Dövlət başçısı "Böyükşor gölünün ekoloji vəziyyətinin yaxşılaşdırılması, mühafizəsi və istifadəsi sahəsində əlavə tədbirlər haqqında" 26 dekabr 2013-cü il tarixli fərmanında və "Zığ gölünün ekoloji vəziyyətinin yaxşılaşdırılması, mühafizəsi və ondan istifadə sahəsində əlavə tədbirlər haqqında" 15 oktyabr 2014-cü il tarixli sərəncamında dəyişiklik edir. Fərmana əsasən, adları çəkilən göllərlə bağlı səlahiyyətlər İqtisadiyyat Nazirliyindən alınaraq Ekologiya və Təbii Sərvətlər Nazirliyinə verilir. İqtisadiyyat Nazirliyi göllərə aid bütün sənədləri və məlumatları bir ay müddətində Ekologiya və Təbii Sərvətlər Nazirliyinə təhvil verməli, Nazirlər Kabineti isə bu fərmandan irəli gələn məsələləri həll etməli idi...

Bakı Dövlət Universiteti alimlərinin də Zığ gölünə gözü düşüb və…

Mən hələ onu demirəm ki, Bakı Dövlət Universitetinin (BDU) Ekologiya və torpaqşünaslıq fakültəsinin Ekoloji kimya kafedrasında Zığ gölünün ekoloji vəziyyətini və ətraf mühitə təsirini öyrənmək üçün tədqiqat işi də aparılıb. Tədqiqat Ekoloji kimya kafedrasının dosenti Təranə Əliyevanın “Abşeron göllərinin ekoloji-kimyəvi göstəricilərinin tədqiqi və iqlim dəyişmələri fonunda onların dəyişmə dinamikasının proqnozlaşdırılması” mövzusunda dissertasiya işi əsasında həyata keçirilib. Zığ gölünün ərazisindən götürülmüş nümunələrin (göl suyu, dib çöküntüsü, çirkab suları, torpaq) fiziki-kimyəvi parametrləri, xüsusilə ağır metalların və üzvi çirkləndiricilərin yol verilən miqdarı ilə analiz nəticəsində əldə olunan miqdarı müqayisəli təhlil olunub. Mediada yayımlanmış məlumatdan sitat: «…Tədqiqatın əsas məqsədi Zığ gölü və ətraf əraziləri ekoloji cəhətdən təhlükəsiz əraziyə çevirməkdir. Hazırda Zığ gölünün bərpası üzrə layihələndirmə işləri aparılır. Daha sonra gölün suyunun təmizlənməsinə başlanılacaq. Gölün ekoloji bərpası layihəsi iki mərhələdə həyata keçiriləcək. Eyni zamanda yüz ildən artıq müddətdə göl dibinə yığılmış çirkli çöküntülərin çıxarılması və zərərsizləşdirilməsi işləri görüləcək. Tədqiqatın nəticələri Ekologiya və Təbii Sərvətlər Nazirliyinə təqdim olunacaq və Zığ gölü də daxil olmaqla digər Abşeron göllərinin təmizlənməsi və bərpasında istifadə ediləcək….».

Zığ gölünün ətrafı abadlaşdırılır???

Bu məlumat isə lap maraqlıdır. Belə ki, bir müddət əvvəl (2023-cü ildə) yenə də mediada belə bir məlumat yayıldı ki, «Xətai rayonunda yerləşən Zığ gölü və ətrafı abadlaşdırılır. Əhalinin istirahəti üçün 300 hektara yaxın ərazidə infrastruktur qurulacaq. Bu haqda bu gün, 1 mart tarixində məlumat verilib. Bir neçə ay əvvəl Zığ gölü ərazisində antisanitar bir vəziyyət hökm sürürdü. Hazırda təxliyə kanalı açılıb və gölün Xəzər dənizi ilə əlaqəsi bərpa edilib, ərazidəki antisanitar vəziyyət isə tam şəkildə təmizlənib. Gölün ekoloji vəziyyətinin yaxşılaşdırılması, mühafizəsi və ərazinin abadlaşdırılması üçün ölkə başçısının sərəncamı ilə işlər Ekologiya və Təbii Sərvətlər Nazirliyinə həvalə edilib. Gölün təmizlənməsi üçün ərazidə xaricdən alınan xüsusi qurğular quraşdırılır. Təqribən 110 hektara yaxın su hövzəsinin suyunun texniki su səviyyəsinə çatdırılması, orada olan ağır metalların xüsusi reagent və avadanlıq vasitəsilə təmizlənməsi, bundan əlavə, Zığ gölünün ətrafında uzun illər toplanıb qalmış tullantıların təmizlənməsi, torpağın əvvəlki vəziyyətə qaytarılması, əkinə yararlı vəziyyətə salınması nəzərdə tutulub. Göl və mühafizə zonası tam təmizləndikdən sonra əhalinin asudə vaxtını səmərəli keçirməsi üçün burada lazımi şərait yaradılacaq…».

Gölün indiki real vəziyyətini gördüyümüzdən isə adam bunları oxuduqca az qalır havalansın…

Yuxarıdakı xəbəri oxuyan kimi gölün ətrafında yaşayan sakinlər ora axışıblar, yazılanların doğru olduğunu gözləri ilə görməyə tələsiblər. Amma…

***

Dövlət Ekoloji Ekspertiza Agentliyi idarə heyətinin sədri Mirsalam Qənbərov daha uzağa gedərək mediaya deyir: «…Abşeron yarımadasında 9 əsas göl var. Böyükşor gölü kimi, Zığ gölündə də məqsəd qurudulma yox, sağlamlaşdırılma olmalıdır… Hədəf gölləri o çırkab mənbəyindən xilas etməkdir. Düşünürük ki, bizim həyata keçirdiyimiz reabilitasiya tədbirləri nəticəsində gölün bərpası ətrafında yaxşı ekoloji infrastruktura layiq mənzərə yaradılacaq”.

Cənab Qənbərovun xəbəri yoxdur ki, Zığ gölünə 2014-cü ildə 2 milyon pul ayrılıb və göl artıq «tərtəmizdir, ətrafı yaşıllıqlara qərq olub» və s.

***

11 May 2022-ci ildə isə rəsmi mətbuatda belə bir məlumat yayımlandı ki, Zığ gölünün təmizlənməsi məqsədilə ərazidə inşa edilən qurğunun mart-aprel aylarında tam işə düşməsi hədəflənir…». Üstündən 1 il 5 ay ötüb, amma və lakin!

***

2018-ci ilin mart ayında isə “Təmiz Şəhər” ASC-nin İdarə Heyətinin sədri Etibar Abbasov KİV-ə bildirir ki, neft və tullantılarla çirklənən Zığ gölünün ətrafı tamamilə abadlaşdırılacaq və həmin ərazidə əyləncə mərkəzi, istirahət kompleksi yaradılması da gündəmə gələ bilər: «Bu proses payızda (yəni, guya artıq 5 ildir bitib.Red.) bitəcək və daha sonra gölün suyunun təmizlənməsinə başlanılacaq…».

***

İndi isə Zığ gölü ətrafında rəsmilərin yuxarıda qeyd edilən yanlış informasiya paylaşımlarına son qoymaq və yaddaşları itiləmək üçün Prezidentin 15 oktyabr 2014-cü il tarixli «Zığ gölünün ekoloji vəziyyətinin yaxşılaşdırılması, mühafizəsi və ondan istifadə sahəsində əlavə tədbirlər haqqında» olan Sərəncamını olduğu kimi təqdim etməyə məcburuq. 9 il əvvəl imzalanmış həmin Sərəncamda deyilirdi: «Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan Respublikası Prezidentinin 2014-cü il 17 yanvar tarixli 232 nömrəli Sərəncamı ilə təsdiq edilmiş "2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın həyata keçirilməsi üzrə Tədbirlər Planının 1.4-cü bəndinin icrası, habelə Bakı şəhəri ərazisində yerləşən Zığ gölünün bərpası, mühafizəsi və ondan istifadə sahəsində idarəetmənin təkmilləşdirilməsi məqsədi ilə qərara alıram:

Zığ gölündən (irəlidə - Göl) istifadə və onun mühafizəsi sahəsində idarəetmə Azərbaycan Respublikasının Ekologiya və Təbii Sərvətlərvə SənayeNazirliyinə həvalə edilsin.
Azərbaycan Respublikasının Ekologiya və Təbii Sərvətlərvə SənayeNazirliyi:
2.1. Gölün (onun mühafizə zonasının) bərpasını (o cümlədən Gölün (onun mühafizə zonasının) istehsalat və məişət tullantılarından təmizlənməsini), mühafizəsini, ekoloji vəziyyətinin yaxşılaşdırılmasını və gələcəkdə ondan səmərəli istifadəni təmin etsin, habelə Gölün qorunub saxlanmasına nəzarəti həyata keçirsin;

2.2. bu Sərəncamın 3-cü və 4-cü hissələrində nəzərdə tutulmuş işlərin idarə olunmasını təmin etsin;

2.3. bu Sərəncamdan irəli gələn digər məsələləri həll etsin.

"Azərsu" Açıq Səhmdar Cəmiyyəti və Azərbaycan Respublikasının Dövlət Neft Şirkəti Gölə (onun mühafizə zonasına) tullantı sularının təmizlənmədən axıdılmasının qarşısını almaq üçün zəruri tədbirlər görsünlər.
Bakı Şəhər İcra Hakimiyyəti Gölə (onun mühafizə zonasına) istehsalat və məişət tullantıları atılmasının, Göl səthinin kiçilməsinə səbəb olan kənardan torpaq gətirilib yayılmasının qarşısının alınmasını təmin etsin.
Azərbaycan Respublikasının Nazirlər Kabineti:
5.1. üç ay müddətində Gölün (onun mühafizə zonasının) hüdudlarını dəqiqləşdirsin;

5.2. Azərbaycan Respublikası Ekologiya və Təbii Sərvətlər və Sənaye Nazirliyinin əsaslandırılmış hesablamalarına uyğun olaraq, bu Sərəncamın 2.1-ci bəndində və 3-cü hissəsində nəzərdə tutulmuş işlərin maliyyələşdirilməsini təmin etsin;

5.3. Azərbaycan Respublikası Prezidentinin aktlarının bu Sərəncama uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etsin;

5.4. Azərbaycan Respublikası Nazirlər Kabinetinin normativ hüquqi aktlarının bu Sərəncama uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin;

5.5. mərkəzi icra hakimiyyəti orqanlarının normativ hüquqi aktlarının bu Sərəncama uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

5.6. bu Sərəncamdan irəli gələn digər məsələləri həll etsin.

Azərbaycan Respublikasının Ekologiya və Təbii Sərvətlər Nazirliyi Gölə aid bütün sənədləri və digər məlumatları bir ay müddətində Azərbaycan Respublikasının İqtisadiyyat və Sənaye Nazirliyinə təhvil versin.
Azərbaycan Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Sərəncama uyğunlaşdırılmasını təmin edib Azərbaycan Respublikasının Nazirlər Kabinetinə məlumat versin.
İlham ƏLİYEV,

Azərbaycan Respublikasının Prezidenti

Bakı şəhəri, 15 oktyabr 2014-cü il, № 774».

Zığ gölünün bəxti açılır və Prezident səxavətlə 2 milyon manat vəsait ayırır...

(Davamı var) //tezadlar.az//

Uzun illərdir ki, rəhbər sarıdan şansı üzünə gülməyən Şəmkir rayonunda narazı sakinlərin sayı günbəgün daha da artır.

Aylar öncə susuzluqdan əziyyət çəkən Şəmkir sakinləri dərdlərini götürüb, "DogruXeber.az" informasiya agentliyinə üz tutur, agentliyin tabeliyində fəaliyyət göstərən "Kanal14" YouTube kanalının canlı efirində çarəsizliklərdən gileylənirdilər. Su problemi yaşayan və redaksiyamıza müraciət edən Şəmkir sakinləri problemin həlli istiqamətində nə rayonu Milli məclisdə təmsil etməli olan millət vəkilinin, nə də rayon icra hakimiyyətinin heç bir addım atmadığını da dəfələrlə bildirmişdilər.

Bundan əlavə, valideynlərindən miras qalan evini adına sənədləşdirmək istəyən və 6 ildən çoxdur ki, aidiyyatı üzrə yerli idarələrin süründürməçiliyi üzündən hələ də buna nail ola bilməyən Ofeliya xanımın da "Kanal14" ün canlı efirindəki müraciətindən sonra biz Şəmkir rayon İcra Hakimiyyətinin mövqeyini öyrənmək üçün dəfələrlə rəsmi internet saytında yer alan telefon nömrələrinə zəng etdik, amma həftələrlə dəstəyi qaldıran olmadı. Email ünvanına rəsmi sorğu göndərdik, aylardır ki, cavab yoxdur. Bütün bunlar Şəmkirin gənc İcra başçısı Rəşad Tağıyevin sanki, "fəaliyyətini dondurması" təsirini bağışlayır.

Bu gün isə Şəmkir rayonunun Tatarlı kənd sakini - 1994-cü ildə həyat yoldaşı İntizam Alıyev və 2016-cı ildə aprel döyüşlərində oğlu Vüsal Alıyevi vətən uğrunda şəhid verən Şahnaz Alıyeva "DogruXeber.az" rəhbərliyinə müraciət edib. Şahnaz xanım 2012-ci ildən bəri ev növbəsinə durduğunu, 11 ildir növbə gözlədiyini deyir.

Rayonunun təmsilçisi - millət vəkilini tanımadığını deyən şəhid anası, eyni zamanda şəhid xanımı Şahnaz Alıyeva haqqı olan mənzillə təmin olunmasında ona kömək etmələri üçün Şəmkir rayon icra hakimiyyətinə də dəfələrlə müraciət etməyə çalışdığını, icra başçısının onu qəbul etmədiyini deyir.

Qeyd edək ki, "DogruXeber.az" olaraq, xanımın müraciəti ilə bağlı aidiyyatı üzrə Əmək və Əhalinin Sosial Müdafiəsi Nazirliyinə və Şəmkir rayon İcra Hakimiyyətinə göndərilməsi üçün tərəfimizdən rəsmi sorğular hazırlanır.

Növbəti günlərdə mövzuya təkrar qayıdacağıq və aidiyyatı qurumların da sorğumuza verəcəkləri (əgər versələr) cavabı diqqətinizə çatdıracağıq.

Redaksiyamız hər kəsin söz haqqını tanıyır.

DogruXeber.az

Neçə müddətdir ki, ölkənin QHT sektorunda bir təlatüm müşahidə olunmaqdadır. Əsasən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sədri Azay Quliyevin ünvanına səslənən ittihamlarla müşaiyət olunan bu proses müəyyən bir dönəmlik səngimiş kimi göründü. DİA.AZ bildirir ki, amma son açıqlamasında "Heç bır məsələ sakitləşməyib" deyən İctimai Siyasi Proseslər və Beynəlxalq Araşdırmalar Mərkəzinin (İSBAM) sədri Samir Adıgözəlli olduqca ağır ittihamlar səsləndirməklə sözügedən prosesi yenidən canlandırmış olub.

"Cəmiyyətdən, dövlətdən, prezidentdən gizlədilən həqiqətləri bır-bır üstünün açılmasına çalışacağam" deyən İSBAM sədri eyni zamanda hüquq-mühafizə orqanlarını da açıqladığı faktların araşdırılmasına dəvət edir.

DİA.AZ Samir Adıgözəllinin növbəti ittiham dolu açıqlamasını təqdim edir:

"Atalar yaxşı deyib ki, utanmasan oynamağa nə var ki?
Biz demək olar ki, hər gün QHT Agentliyi ilə bağlı müxtəlif QHT sədrləri, eləcə də mən konkret faktlar səsləndirir, bu qurumdakı özbaşınalığı, nəzarətsizliyi, qanunsuzluğu, korrupsiya faktlarını açıb ortaya qoyuruq.
Hər biri ilə bağlı bir nümunə göstərməyim kifayətdir:
1. Qanunsuzluq – 1 QHT-yə 2 dəfə irihəcmli qrant vermək (halbuki qaydalara görə qadağandır),
2. Korrupsiya faktları – icraçı direktora yaxın olan bir neçə QHT-yə yüksək məbləğli qrantın Müşahidə Şurasının qərarı olmadan ayrılması (məndə dəqiq fakt var, hətta PA-nın xəbəri də yoxdur). Neçə dəfə səsləndirsəm də bir nəfər PA-dan gəlib soruşmur ki, ver o faktı baxaq. Hətta müqavilələri belə həmin QHT-lərdən əldən etmişəm,
3. Siyasi dələduzluq – Şuşada guya “Heydər Əliyevin Şuşa sevgisi” tədbirinin keçirildiyinə dair rəsmi sənədlər olduğu halda, İqtisadiyyat Nazirliyini aldadaraq həmin vəsaitin mənimsənilməsi. Bunu başqa adla mənimsəsəydiniz bəlkə susmaq olardı ki, ehtiyacınız var. Amma Ulu Öndərin adından belə dələduzluq Cənab Prezidentə xəyanətdir. Bu məsələni Cənab Prezidentdən gizlətsələr də bir vicdanlı adam tapılacaq ki, bu barədə məlumatı çatdırsın.
4. Nəzarətsizlik və özbaşınalıq – ofisdə suşi, pamada və krem reklamları çəkən kim, kofe falına baxan kim və s.
5. Trolluq – heç olmasa özünüzü müdafiə etməyə elə şəxslər seçin ki, bu hakimiyyətə müxalif şəxslər olmasın. Bununla bağlı da faktlar kifayət qədərdi. Sadəcə sizə nəzarət edən olsaydı, çoxdan yola salardılar.
Bu gün Aygün Əliyeva ciddi şəkildə qorunur, onunla bağlı neqativ heç bir informasiyanın yuxarı ötürülməsinə imkan verilmir, hətta ölkə rəhbərliyinə Agentlikdə baş verən neqativ hallar düzgün çatdırılmır.
Kimin arxası varsa onlar həmişə qorunur, bunun artıq şərhə ehtiyacı yoxdur.
Bütün bunları təsadüfi yada salmadım. Bu qədər iradlar bildirilməsinə baxmayaraq, Agentliyin fəaliyyətində irəliləyiş yoxdur.
Qrant elanının hazırlanması və verilməsini hələ də QHT sektorunda inqilabi dəyişiklik kimi cəmiyyətə sırayırlar.
Amma QHT Agentliyi (bundan sonra Qadın Komitəsi yanında QHT Agentliyi) bir az öz Nizamnaməsinə diqqət yetirsə vətəndaş cəmiyyətinə faydalı ola bilər.
Xatırlatmaq istəyirəm ki, Agentliyin Nizamnaməsinin 2.1-ci bəndində aşağıdakı fəaliyyət istiqamətləri göstərilib:
2.1.1. müvafiq sahənin inkişafını təmin etmək;
2.1.2. müvafiq sahədə dövlət siyasətinin formalaşdırılmasında və həyata keçirilməsində iştirak etmək;
2.1.3. dövlət-özəl və qeyri-hökumət təşkilatları arasında əməkdaşlıq mexanizmlərini inkişaf etdirmək və təşviq etmək;
2.1.4. dövlət və cəmiyyət üçün əhəmiyyət kəsb edən məsələlərə dair qeyri-hökumət təşkilatlarının irəli sürdükləri layihələrin mövzularını qiymətləndirmək və onlara dair rəy vermək;
2.1.5. qeyri-hökumət təşkilatlarının ictimai nəzarət sahəsində fəaliyyətini təşviq etmək;
2.1.6. qeyri-hökumət təşkilatlarının beynəlxalq əməkdaşlıq əlaqələrini inkişaf etdirmək;
2.1.7. dövlət büdcəsinin vəsaiti hesabına ayrılan qrantlardan qeyri-hökumət təşkilatları tərəfindən təyinatı üzrə istifadə olunmasına nəzarətin həyata keçirilməsində iştirak etmək;
2.1.8. qeyri-hökumət təşkilatlarına məlumatlandırma, konsultativ, metodiki, maliyyə yardımı göstərmək.
Qrant vermək, məlumatlandırma sessiyası keçirməkdən başqa nə iş görülür?
Bir QHT-nin özəl sektordan maliyyə alması üçün hansı işləri görmüsüz? Rəhbərliyə həmin yerdə boş hesabat verirsiniz?
QHT-lərin beynəlxalq əlaqələrini inkişaf etdirmək məsələ isə lap gülməlidir. Bunlar hələ öz əlaqələrini qura bilmir, o da qalsın QHT-lərin beynəlxalq əlaqələrini.
Heç olmasa Türkiyədən, Qazaxıstandan, ən pis halda Özbəkistandan ekspertlər dəvət edin sizə beynəlxalq əlaqələr qurmaqda, QHT-lərə necə dövlət dəstəyi həyata keçirməkdə təcrübə öyrətsinlər.
Çox məsələyə toxunmaq olar, amma bunları dedikcə kimlərsə prinsipə düşüb sizi daha çox öz çətirinin altına alır".

Məsələ ilə bağlı dia.az olaraq bütün maraqlı tərəfləri dinləməyə hazırıq...