11 Yanvar 2023-cü ildə "uşaq bağçalarında ölü canlar" başlıqlı məqalə dərc etmişdik. Məqalənin yükü o qədər güclü olmuşdur ki, həmin vaxt rüşvət müqabilində bağçaya təyin olunmuş müdirə geri çağırıldı. Həmin yazının sonuncu abzasını oxucularımıza yenidən təqdim edirik.
Gündəlik Bakı olaraq gələcəyimiz olan uşaqların problemi ilə bağlı ciddi araşdırmalarımız davam edir və yaxın zamanda belə bağça biznesmenlərinin adını açıqlayacağıq. İndi Təhsil Nazirliyinə verilmiş bağçalara əvvəllər katibə işləmiş şəxslər kuratorluq edir. Bağ qonşularını 30 min manat müqabilində bağçalara müdir təyin etdirirlər. Amma ixtisaslı kadrlar, imtahandan keçən şəxslər kənarda qalır. Bu məsələlərdən gərək ölkə başçısının xəbəri olsun ki, sonra nazir Emin Əmrullayev hərəkətə keçsin-və ya Bakı Baş Təhsil İdarəsinin rəhbəri?
Hamı bilsin, həyat yoldaşı polisdən qovulan şəxsin bu gün hansısa pullar müqabilində bağça müdirəsi təyin olunmasına görə, əziyyət çəkən Şıxəliyevlərə demək istəyirik ki, pulunuzu hədər yerə xərcləməyin. Həmin şəxsin o vəzifədə işləməsi qeyri mümkündür.
Buyurun, 9 ay öncə, yazılmış bir məqalənin araşdırılması üçün yaxın tarixə ekskurs edək. Bəli, biz yazmışdıq ki, heç bir imtahan vermədən, təhsil aldığı müəssisənin rəhbər mövqe tutmasına mane olan diplom, əvvəllər katibə işləmiş kurator, polisdən qovulmuş həyat yoldaşı, ən əsası isə rəfiqəsi olan bağ qonşusu. Kimdir bunlar?
Gəlin araşdırmalarımızı bir az da dəqiqləşdirək. Söhbətin kimdən getdiyini oxucularımıza daha dəqiq çatdıraq.
Əmr verilir Təhsil Nazirliyində, əmr hazırlanır Bakı Şəhər Baş Təhsil İdarəsində, rəy verilir əvvəllər katibə işləmiş kuratorun bağında. Budur, Elm və Təhsil Naziri Emin Əmrullayev 9 ay bundan öncə, alınmayan bir işi öz əmri ilə təsdiqləyir. Qarabağ qazisinin, ön cəbhədə döyüşən zabitin övladını 191 saylı məktəbin qarşısında boynu bükük qoyan Elm və Təhsil Nazirliyi heç bir imtahan vermədən, təhsili direktor vəzifəsini daşımağa yararsız olan bir şəxsə Nəsimi rayonu Eşitmə Qabiliyyəti Pozulmuş Uşaqların Respublika İxtisaslaşdırılmış Uşaq Bağçasında müdir vəzifəsini 3 aylıq həvalə edirlər. Bilinmir bağçanın müdirəsi qeyri-qanuni olaraq, imtahansız-filansız bağ qonşusu, əvvəllər katibə işləmiş, indi isə kurator olan Məfkurə xanım tərəfindən, vasitəçilik edilərək təyin olunmuş Nailə Məmmədovadır, yoxsa polisdən qovulmuş həyat yoldaşı.
3 gündür adı gedən bağçanın müdirə vəzifəsi həvalə olunmuş Nailə Məmmədova artıq qapıları bağlayıb, qəbulları arxa qapıdan edir. Ən maraqlısı odur ki, həmin bağçanı Nailə Məmmədovanın həyat yoldaşı Fərahim Məmmədov idarə edir.
Baxın, bütün kollektiv (fəhləni çıxmaq şərti ilə) qadınlardan ibarətdir. Amma qadın kollektivində hər hansı bir vəzifəsi olmayan yad bir kişinin, həmin kollektivin mətbəxindən, foyesindən, hətta ayaqyolusundan istifadə etməsi Elm və Təhsil Naziri Emin Əmrullayevin və Bakı Şəhər Baş Təhsil İdarəsinin rəisi Mehriban Vəliyevanın nəzarətindən qaçmamalıdır.
Bu gün görəsən Elm və Təhsil Naziri Emin Əmrullayev və Bakı Şəhər Baş Təhsil İdarəsinin rəisi Mehriban Vəliyeva heç bir imtahan verməyən Nailə Məmmədovanı Nəsimi rayonu Eşitmə Qabiliyyəti Pozulmuş Uşaqların Respublika İxtisaslaşdırılmış Uşaq Bağçasında müdir vəzifəsinə necə təyin edib? Nailə Məmmədovanın hansı göstəriciləri həmin bağçada imtahan verərək yüksək bal toplayan müəllimələrdən üstündür?
Hamı açsın qulağını eşitsin Emin Əmrullayev bu təyinat haqqında bütün məlumatları detallı şəkildə biləcəkdir. Kimsə kiminsə qabağında 30 min dəfə əyilməsindən asılı olmayaraq, kimin adının çəkilməyindən asılı olmayaraq, Şıxəliyevin dostunun kimin adamı olmasından asılı olmayaraq, bu məsələ baş tutmayacaq.
P.S. Bu məsələdə Xəyalə xanımın da xəbəri olub. Amma Xəyalə xanıma bir məsələni çatdırmaq istəyirəm ki, güvəndiyiniz şəxsin yaxın adamları da bağça müdirəsidir. Onu da bilirik. Onu da bilirik ki, onların vasitəsilə çox yerə təzyiq göstərirsiniz, amma bilmirsiniz ki, günün birində həmin zabitin rəhbərliyinə yazılı şəkildə müraciət oluna bilər. Addan istifadə etməyin zamanı çoxdan keçib, Xəyalə xanım. Ardı var. //gundelik-baku.com//

Bir gün eşidərsiz Rafil də köçdü...Kürdəxanıya...

Ağcabədi Rayon İcra Hakimiyyətinin başçısı Rafil Hüseynov barəsində yazmağa nə həvəs var, nə də maraq...
Sadəcə, onun barəsində yayılan sonuncu informasiya bizi məcbur elədi ki, yenə bu adama bəzi mətləbləri başa salaq. Deməli son məlumata görə, Rafil Hüseynov əkin sahəsini suvarmaq üçün ona müraciət edən Ağdamlı məcburi köçkünə deyib ki... Torpağınız işğaldan azad olunub, rədd olun gedin öz rayonunuza... Və sonra icra başçısının göstərişi ilə Ağdamlı məcburi köçkünə 5 sutka həbs verilib... Su tələb edən Ağdam sakininin sözlərinə görə, torpaq sahəsini suvarmaq üçün Ağcabədi Rayon İcra başçısına şikayət üçün gedib, ancaq onun özünü 5 sutkalıq həbslə cəzalandırıblar: “Ağcabədi rayon Sarıcalı kəndində qardaşımın 5, mənim də 5 hektar bələdiyyə torpağımız var. Müqavilə ilə ildə min manat da vergi veririk. Qarabağ kanalı vasitəsi ilə torpağımızı suvarırdıq. Ağcabədi Rayon Su Kanal İdarəsinin nümayəndəsi Ağayev Ceyhun bizə su vermirdi. Dəfələrlə ona haqsızlıq etdiyini demişəm. Özlərinə məxsus olan torpaqları suvarırlar, ancaq bizə su vermirlər. Bir neçə dəfə də deyib ki, arxamda icra başçısı durur, sənə su verməyəcəm.
Yeri gəlmişkən, Ceyhun Ağayev Sarıcalı kənd icra nümayəndəsi Ağayev Arifin əmisi oğludur”. Şikayətçinin sözlərinə görə, Ağcabədi Rayon İcra Hakimiyyətinin başçısı Rafil Hüseynov qəbulda ona “rayonunuz işağldan azad olunub, rədd olub gedin öz rayonunuzu əkin” deyib: “Mən icra başçısından su istədim, dedim ki, torpağım susuzluqdan yanır. Problemləri onun nəzərinə çatdırdım. İcra başçısı məni nəzərdə tutaraq göstəriş verdi ki, ona 5 sutka həbs verin. Dediyi kimi də oldu. Mənə 5 sutka həbs verdilər”.
Fikir verdinizmi, Su kanalın rəisi ilə icra nümayəndəsi əmiuşağı, əmioğludurlar, icra başçısı da bunların dalında dayanıb, yəni rayon bir dəstə adamın əlində əsir-yesirdir. Bəli, məhz əsir-yesir. Əgər belə olmasaydı, Rafil Hüseynov su istəyən vətəndaşa 1 dəqiqədə 5 sutka həbs verdirə bilməzdi.
İkincisi, Rafil Hüseynov məcburi köçkünə deyir ki, rədd ol get öz rayonuna... Onda adamdan soruşarlar ki, sən Ağcabədidə nə ...., sən də get Bərdəyə öz rayonuna... Sən Ağdamlıya deyirsən ki, rədd ol Ağcabədini tərk elə...Bəs sən niyə 30 ildir yapışmısan kreslodan, sən də get də... Masallallıda icra başçısı işləyəndə köhnə qəbristanlığı traktorla dağıdıb obyektlər tikib satdın...Bunu Allah sənə bağışalamayacaq... Ağcabədidə ən münbit torpaqları ələ keçirmisən, Novxanıda 10 milyon dəyərində villan, şəhərin neçə yerində mənzilin və s. Ağcabədidə bütün dövlət qurumlarını, fermerləri aylığa otuzdurmusan... Bir qadın fermer sənə rüşvət vermədiyi üçün həbsxanaya saldırdın... Ağcabədidə şəhidin atasına kəllə atmağın barədə bütün ölkə danışır... Oğlunun əməlləri isə əsl rüsvayçılıqdır, alnınızda qara ləkədir, Rafil Hüseynov... Bütün bunları qoyaq bir kənara... Vallah, incimə bizdən, Rafil Hüseynov. Səni görəndə hamının yadına Aşıq Alının sözləri düşür.. Yetmişi aşırmısan, səksəni xırdalayırsan...Qulaqların eşitmir, gözlərin tor görür, başın əsir...oturanda kreslodan dura bilmirsən...Yəni bu qədər kresloya yapışmısan..? Çıx get, qoy Ağcabədi camaatının canı dincəlsin, sənin əlindən beziblər... Vallah bir az da davam eləsə, Aşıq Alı demişkən, səni köçürdəcəklər Kürdəxanıya... İndi özün seçim elə...
P.S. Bu yaxınlarda sosial şəbəkələrdə Rafil Hüseynovla bağlı bir kadr gördüm. Ay Rafil Hüseynov, artıq idarəçiliyi bacarmırsan, zor deyilki. //gundelik-baku.com//

Bakı Şəhər Yaşıllaşdırma və Təsərrüfatı Birliyinin sabiq direktoru Həsrət Əmrahovun çalışdığı dövrdəki əməlləri - qanunsuz olaraq ağacların kəsilməsi barədə xəbər vermişdik.

Bu dəfə Həsrət Əmrahov işlədiyi dövrdə aldığı bahalı avtomobil barədə məlumat verəcəyik.

DİA.AZ bildirir ki, 32gun.az-ın əldə etdiyi məlumata görə, sabiq direktor “Land Rover Discoveri” avtomobili alıb.
Avtomobil H.Əmrahovun vəzifə başında olduğu vaxt - 14.02.2022 -ci il tarixdə rəsmi olaraq qeydiyyata alınıb.
Həmin tarixdən bugünədək avtomobil Bakı şəhəri, Nəsimi rayonu, Tiblisi prospekti, 1058 məhəlləsi ev 34 a menzil 8 ünvanında qeydiyyatda olan 30.01.1970 ci il təvəllüdlü Əmrahova Aytən Nüsrət qızının adınadır.

Saytımıza verilən digər məlumata görə, Həsrət Əmrahov rəis işlədiyi dövrdəki sürücüsünü də özü ilə aparıb.
Maraqlısı bundadır ki, həmin sürücü idarə tərəfindən əvvəlki qaydada maaşla təmin olunur.
Bunua da indiki onun müavini olmuş 69 yaşlı “pensioner” rəis Mirdamət Seyidov göz yumur.
Xatırladaq ki, BŞİH-in başçısı Eldar Əzizovun əmrinə əsasən, bu ilin mart ayında Həsrət Əmrahov tutduğu vəzifədən azad edilib.
Hazırda Həsrət Əmrahovu onun müavini olmuş 69 yaşlı Mirdamət Seyidov əvəzləyir. Direktor səlahiyyətlərinin icrası ona həvalə edilib.

Bildirək ki, Land Rover Discoveri” avtomobilinin bazar qiyməti təxminən 100 min manatdan çoxdur.

Müdafiə Nazirliyinin Maliyyə və Büdcə İdarəsinin sabiq rəisi, general-mayor Nizami Məmmədov və onunla birlikdə mühakimə olunan 3 nəfərin – Hərbi Hava Qüvvələrinin (HHQ) maliyyə xidmətinin sabiq rəisi, polkovnik Cəlal Kazımov, Quru Qoşunların maliyyə idarəsinin rəisi Bayram Bayramov və bu idarənin zabiti Vüsal Əlizadənin işi üzrə məhkəmə istintaqı başlayıb. Onların işinə Bakı Hərbi Məhkəməsində hakim Fikrət Əliyevin sədrliyilə baxılır.

Sentyabrın 22-də məhkəmədə prokuror ittiham aktını elan edib. İttiham aktında iddia olunur ki, Müdafiə Nazirliyi sistemində korrupsiya sxemi qurulub. Həmin sxemə əsasən, nazirliyin tabeliyindəki hərbi hissələr, hospital, təhsil müəssisəsi və s. qurumlar üçün ərzaq, əşya alışı zamanı qiymətlər şişirdilib. Büdcədən ayrılan vəsait şişirdilmiş rəqəmlərə uyğun olub. Tenderlərdə qalib elan edilmiş şirkətlərin hesabına da həmin vəsaitlər köçürülüb. Şirkətlər artıq vəsaitləri sonradan geri qaytarıb. Qaytarılan vəsaitlər də mənimsənilib.

2017-2022-ci illər ərzində bu yolla ümumilikdə 143 milyon manat mənimsənildiyi iddia olunur.

İttihama əsasən, Müdafiə Nazirliyinin tabeliyindəki qurumlar üçün ərzaq məhsulları “Azersun” şirkətindən alınır. İstintaq zamanı ortaya çıxıb ki, təkcə ərzaq qiymətlərinin şişirdilməsindən “Azersun”a pul köçürmələri nəticəsində 20 milyon vəsait mənimsənilib. Bundan başqa, “Avtoqrant” şirkətilə əməkdaşlıq nəticəsində 180 min manat yeyintiyə yol verilib.

Həmçinin arzaq və avadanlıq alışı zamanı şişirtmə nəticəsində Mərkəzi Hərbi Hospitalda 5 milyon, Ali Hərbi Məktəbdə 8 milyon, Cəmşid Naxçıvanski adına hərbi liseydə 2 milyon pul mənimsənildiyi iddia olunur.

General Nazimi Məmmədov bundan əlavə, Müdafiə Nazirliyinin keçmiş Baş Qərargah rəisi Nəcməddin Sadıqovun göstərişilə nazirliyin Satınalmalar və Təchizat İdarəsi, Mənzil-İstismarı İdarəsinin rəislərilə əlbir olub, ümumilikdə 6 milyon manat mənimsəməkdə ittiham olunur.

İttihama münasibət bildirən general-mayor Nizami Məmmədov özünü qismən təqsirli bilib. O deyib ki, Satınalmalar və Təchizat İdarəsi, eləcə də Mənzil-İstismar İdarəsilə bağlı 6 milyonluq mənimsəmə epizodunu qəbul eləmir.

“Mən 12 milyonu qəbul eləyirəm, o ziyanı da ödəmişəm”, – Nizami Məmmədov əlavə edib.

Digər təqsirləndirilən şəxslər də özlərini qismən təqsirli bildiklərini deyiblər. Onlar ittihamda rəqəmlərin şişirdildiyini vurğulayıblar.

Məhkəmədə Cəlal Kazımovun vəkili müvəkkili haqqında cinayət işinə xitam verilməsi barədə vəsatət qaldırıb. O bildirib ki, cinayət işindəki sübutlar ziddiyyətlidir, əsassızdır. Hakim isə cavabında deyib ki, prosesin gedişində sübutlar araşdırılıb qiymət veriləcək.

Digər təqsirləndirilən Vüsal Əlizadənin vəkili isə məhkəmənin qapalı keçirilməsi barədə vəsatət qaldırıb. Deyib ki, təqsirləndirilən şəxslərin qapalı iclasda ifadə verməsi məqsədəuyğun olar ki, deyilənlər sosial şəbəkələrdə yayılmasın.

Bu vəsatət heç müzakirə olunmadan məhkəmənin qapalı keçirilməsinə qərar verilib.

Müdafiə Nazirliyinə daxil qurumlar üçün ərzaq və avadanlıqların alışı zamanı yeyintilərlə bağlı Dövlət Təhlükəsizliyi Xidmətinin (DTX) İstintaq Baş İdarəsində aparılan araşdırmalara 177 nəfər cəlb olunub.

2022-ci ilin əvvəlində DTX əməkdaşlarının keçirdiyi əməliyyat nəticəsində Nizami Məmmədov və onunla birlikdə mühakimə olunan 3 nəfərlə yanaşı, Müdafiə Nazirliyinin bir xeyli başqa vəzifəli şəxsləri də məsuliyyətə cəlb olunub. Onların da hazırda məhkəməsi davam edir.

Yeyinti nəticəsində dövlətə dəymiş ziyanın təxminən 40 milyon manatının istintaq dövründə təqsirləndirilən şəxslər tərəfindən ödənildiyi bildirilir.

Təqsirləndirilən şəxslərdən biri – Müdafiə Nazirliyinin Satınalmalar və Təchizat İdarəsinin keçmiş rəisi Məlikməmməd Qurbanov öz məhkəməsində bildirmişdi ki, şirkətlərə artıq ödənilən pullar geri qaytarılarkən Baş Qərargah rəisi Nəcməddin Sadıqova çatırdı. Sonradan həmin pulların hansı istiqamətə gedəcəyinə isə onun özü qərar verirdi.

Təqsirləndirilən şəxslərə qarşı Cinayət Məcəlləsinin 179.4 (xüsusilə külli miqdarda mənimsəmə) və 313-cü (vəzifə saxtakarlığı) maddələrilə ittiham irəli sürülüb. Bu maddələrdə 14 ilə qədər azadlıqdan məhrumetmə cəzası nəzərdə tutulub. //meydanTV//

Patrul.az-a illərdir Lənkəran meşələrinin bir şəxs tərəfindən talanması ilə bağlı məlumat ünvanlanıb.

İddiaçın sözlərinə görə Lerik rayonu Bırkandul kənd sakini Hüseynov İltifat Sərhəng oğlu artıq 20 ildir Lənkəran meşələrini talayır, meşədən topladığı çox saylı taxta materiallarını satır.

"Ekalogiya nazirliyinin, polis əməkdaşlarının, prokurorluq və məhkəmə əməkdaşlarına təhqirlər ünvanlayaraq - heçkim mənə heçnə edə bilməz, mən heç kimdən qorxmuram, qorxsaydım 20 ildir meşədən ağac oğurlamazdım, hər gün tırlarla material satmazdım."

"Yaz səsimi apar ver söydüyüm adamlar, gör onlardan kiminsə hünəri çatır mənə nəsə desin?!"

Hüseynov İltifatın bu kimi ifadələr işlədərək heç kimdən qorxmadığını deyən iddiaçı, təqdim etdiyimiz video görüntünün də ona aid olduğunu deyir:

Bir neçə il öncə alimlərin mənzil probleminin həlli istiqamətində addımlara başlanıldı.

Ancaq bu sahədə tədbirlərə baxmayaraq, hazırda da mənzil problemi olan alimlər var. Həmin alimlərdən biri, AMEA-nın Nəsimi adına Dilçilik İnstitutunun Nəzəri dilçilik şöbəsinin müdiri, filologiya elmləri doktoru İdris Abbasov öz “Facebook” səhifəsində bu sahədə yaşadığı mövcud problemlə bağlı fikirlərini bildirib.

Qeyd edib ki, AMEA-nın Nəsimi adına Dilçilik İnstitutunun Baş direktoru, professor Nadir Məmmədli AMEA prezidenti akademik İsa Həbibbəyli ilə birgə 2 həftədir ki, institiutun 54 yaşlı şöbə müdiri, bir sıra xəstəliklərdən əziyyət çəkən professor İdris Abbasova yataqxanada həvəslə yer axtarırlar:

“Bu, şəraitsiz yataqxana onsuz da 33 il şəraitsiz yataqxanalarda, kirayələrdə təskinlik tapmış, ağır şəraitdə elmi araşdırmalarına ara verməmiş İdris Abbasovun qətlinə aparan yoldur”.

Məsələ ilə bağlı AMEA-nın Nəsimi adına Dilçilik İnstitutunun Nəzəri dilçilik şöbəsinin müdiri, filologiya elmləri doktoru İdris Abbasov Cebhe.info-ya açıqlamasında bildirib ki, AMEA rəhbərliyi bu yaşında, problemli səhhəti ilə ona yataqxanada yaşamağı təklif edir:

“Bu gün səhər də mənimlə əlaqə saxlayıb, təhdid fonunda “niyə yazmısan?” dedilər. Bildirdim ki, mən hər şeyə hazıram, faktlar ortadadır. Bildirmişəm ki, mənlə bərabər siz də yataqxanada yaşamağınız şərtinə razıyam. Bir həftə AMEA rəhbərliyi orada qalsın, sonra onlar getsin, mən qalım. Ancaq onlar bu şərtlə razılaşmırlar. O zaman məni ölümə göndərirlər? Mən həyatımın 15 ilini həmin yataqxana şəraitində yaşamışam. Həmin vaxt dözmüşəm, orqanizmim gənc idi, ancaq indi tab gətirə bilmirəm.

Kimsə Ədəbiyyat və yaxud Dilçilik İnstitutunda bir elmlər doktoru, professor göstərə bilərmi ki, onların evi yoxdur, səfalət içində yaşayırlar? Elə bir alim yoxdur. Bəs onlar o pulları haradan alırlar? Onlar mənə misal gətirir ki, Akademiyada çalışan Yasəmən Qaraqoyunlunun da evi yox idi. Mən mətbuatdan xəbər tutmuşdum ki, o, ölkə rəhbərliyinə səslənib. Niyə institutun direktoru bu işdə günahkar olmur, yeyib-dağıdan “alimlər şəbəkəsi”si günahlandırılmır? Fırıldaqçı alimlərin əksəriyyətinə baxsaq, hansının şəraiti bizim şəraitimiz kimidir? Bunu görmək mümkün deyil. Son zamanlar Dilçilik İnstitutunda kitab istehsalına başlayıblar.

Bu biabırçılıqdır. Direktor mənə deyir ki, gələndən hamının kitabını dərc edir, hörmət edir. Mən sual verdim ki, siz bu “yaxşılıqları” nəyin hesabına edirsiz? Bunları dövlətin vəsaitləri hesabına edirsiz və o pulları çox yalnış yerə xərcləyirsiniz. Dərc olunan o kitabların məzmununu yoxlayaq, görək nədən ibarətdir. Siz o elmsizliyə dövlətin vəsaitini niyə xərcləyirsiz? O vəsaiti verib bir neçə alimin kirayə haqqını ödəmək olar. Gəlsinlər, mənim də işimi, onların da işini ortaya qoyaq görək nə iş görüblər. Mənim prinsipim bundan ibarətdir. Xəstəxanaya göndərmək əvəzinə məni ailəmlə yataqxanaya göndərirlər”.

Alimin iddiaları ilə bağlı AMEA-nın mətbuat xidmətinə sorğu ünvanlasaq da, cavab verilməyib.

Xatırladaq ki, bir neçə il öncə Abşeron rayonunun Saray qəsəbəsində Azərbaycan Milli Elmlər Akademiyasının (AMEA) əməkdaşları üçün tikiləcək ilk yaşayış kompleksinin – “Alimlər şəhərciyi”ndə (Science City) təməlqoyma mərasimi keçirilmişdi. İlk binanın inşasının 2 ilə başa çatdırılması, Şəhərcikdən ümumilikdə 1928 nəfər alimin mənzil alması planlaşdırılırdı. Lakin sonra həmin mənzillərin ödənişli olduğu məlum oldu. Azərbaycan Milli Elmlər Akademiyasından (AMEA) isə bildirilmişdi ki, hazırkı bazar qiymətlərinə baxanda qiymətlər optimal qoyulub. 7 hektarlıq ərazidə reallaşdırılacaq bu layihə çərçivəsində, ümumulikdə 18 bloklu binanın tikilməsi və 1928 mənzilin istifadəyə verilməsi nəzərdə tutulur.

Bunlardan 50 mənzil birbaşa satış üçün nəzərdə tutulub. AMEA əməkdaşları üçün nəzərdə tutulan mənzillər bir, iki və üç otaqlıdır. Həmin mənzillərin 1 kvadrat metri üçün nəzərdə tutulan ödəniş 370 manatdır. Amma 3 il müddətində ödənişlə 1 kvadrat metrin qiyməti 470 manatdır. Eyni zamanda, 3 il müddətində ödənişlə verilən mənzillər üçün ilkin ödəniş 2 119 manat, aylıq ödəniş isə 794 manatdır. Onu da qeyd edək ki, 2021-ci ildə “Alimlər şəhərciyi” yaşayış kompleksinin bir binası tikilib hazır olsa da, sakinlərin yerləşməsi ilə bağlı problem yaşanırdı.

Cebhe.info