Rəqəmsal İnkişaf və Nəqliyyat Nazirliyinin və “Aztelekom” MMC “İTTNET“ MMC-nin işlərini yoxlamalıdır

Ötən həftə Rəqəmsal İnkişaf və Nəqliyyat Nazirliyinin və “Aztelekom” MMC tərəfindən internet xidmətinin keyfiyyətinin artırılması üzrə layihələr çərçivəsində Ağdam rayon kəndlərində ilk GPON (Gigabyte Passive Optical Network) şəbəkəsinin qurulması ilə bağlı məlumat vermişdik.

Həmin məlumatda qeyd etmişdik ki, hazırda Ağdam kəndlərində GPON (Gigabyte Passive Optical Network) şəbəkəsinin qurulmasına “İTTNET“ MMC şirkəti həyata keçirir.

AzFakt.com-un əldə etdiyi məlumatda bildirilir ki, Ağdam rayonunun kəndlərində GPON layihəsini həyata keçirən "İTTNET" MMC şirkəti korrupsiya hallarına yol verib. Belə ki, şirkət rəhbərliyinin Ağdam rayonun Xındırıstan, Üçoğlan, Paşabəyli, Aşağı Yüzbaşlı, Yuxarı Yüzbaşlı, Çıraqlı, Bənövşələr, Səfərli, Alibəyli, Zəngişalı, Baharı kəndlərində GPON layihəsi çərçivəsində intenet kabellərinin çəkilişi zamanı istifadə olunan dirəklərin bir hissəsinin mənimsənildiyi bildirilir. Məlumatda kəndlərdə internet kabelləri üçün basdırılan dirəklərin məsafə arası 80-100 metrə yaxındır. Əslində isə layihədə bu məsafə 30-40 metr göstərilib.

AzFakt.com-a daxil olan məlumatda qeyd edilir ki, bir çox kəndlərdə daxili küçələrə internet kabellərinin paylanılması üçün 75-lik dirəklər basdırılmayıb. Bu dirəklərin "İTTNET" MMC tərəfindən mənimsənildiyi iddia edilir.

"İTTNET" MMC-nin Ağdam kəndlərində yol verdiyi korrupsiya əməllərinə şirkətin GPON Layihəsinin qurulması üzrə rəhbəri Arif Fərzəliyev adlı şəxsin rəhbərlik etdiyini qeyd etmişdik. Arif Fərzəliyevin dirəklərin basdırılması və kabellərin çəkilişi zamanı görülən işləri 2 dəfə şişirtdiyi deyilir. Belə ki, çəkilişdə işləyən işçilər sənəddə aldıqları vəsaitdən 2 dəfə artığına qol çəkərək, kartlarına vurulan həmin vəsaiti sonradan Arif Fərzəliyevə qaytarıblar.

Hazırda "İTTNET" MMC layihə çərçivəsində Ağdam rayonun Əfətli, Çəmənli və Mirəşelli kəndlərində internet kabelləri üçün dirəklərin basdırılması işinə başlayıb.

Ümid edirik ki, Rəqəmsal İnkişaf və Nəqliyyat Nazirliyi və “Aztelekom” MMC “İTTNET“ MMC-nin Ağdam rayon kəndlərində GPON (Gigabyte Passive Optical Network) şəbəkəsinin qurulması işlərini ciddi şəkildə yoxlayıb, lazımi tədbirlər görəcək.

Bildirək ki, "İTTNET" MMC şirkətinin direktoru Cəbrayıl Abbasov adlı şəxsdir.

Məsələ ilə bağlı araşdırmamız davam edir.

Qarşı tərəfin mövqeyini dərc etməyə hazırıq.

Azfakt.com

Eks deputat Hacı Salayev “Milli Fədailər Hərəkatı”nın qurucusu Fuad Muradova zəng edərək onu təhqir edib, ağır söyüşlər söyüb.

Bu barədə Fuad Muradov özünün facebook səhifəsində məlumat yayıb.

Fuad Muradov yaydığı məlumatda bildirir ki, Hacı Salayev ona zəng edərək ağır söyüşlər söyüb. Onu da qeyd edək ki, Hacı Salayevin Fuad Muradovun ailəsini, yaxınlarını küçə söyüşləri ilə təhqir edən səs yazısı da sosial mediada paylaşılıb.

Musavat.com məsələ ilə bağlı Fuad Muradovla əlaqə saxlayıb. F.Muradov bildirdi ki, vəkilləri ilə məsləhətləşmələr aparır və eks deputat Hacı Salayevlə bağlı hüquqi müstəvidə addımlar atacaq: “Adam 2 dönəm deputat olub və ağzının danışığını bilmir. Söyüş söyür, acizliyini göstərir. Hüquq-mühafizə orqanlarına müraciət etdim, vəkillərlə məsləhətləşib məhkəmə müstəvisində də Hacı Salayevi dediyi sözlərə görə cavab verməsini tələb edəcəyik. Bu adamı çağırıb tonunu aşağı salmalıdırlar. Yoxsa ki, ölkədən qazandığı, xaricə daşıdığı pulların havası onu yaman yoldan çıxarıb, azdırıb”.

Fuad Muradov deyib ki, Hacı Salayev onu ölümlə hədələyib, buna görə də artıq hüquq mühafizə orqanlarına rəsmi müraciət edib. Onun şikayəti Qazax Rayon Polis idarəsi tərəfindən qeydə alınıb. F.Muradov onu da bildirib ki, Salayevin yaxınları qaba güc vasitəsi ilə ona fiziki planda xəsarət yetirməyi də planlaşdırıblar.

Musavat.com Hacı Salayevin Azərbaycan vətəndaşı Fuad Muradovu təhdid və təhqir edən səs yazısını senzuradan keçirərək oxuculara təqdim edir. Səs yazısının orijinalını redaksiyamıza F.Muradov təqdim edib.Sfera.az

Fövqəladə hallar naziri, general-polkovnik Kəmaləddin Heydərov Lənkəran Şəhər İcra Hakimiyyətinin başçısı Taleh Qaraşovun oğlunun rəhbəri olduğu idarəni iki quruma ayırıb.

DİA.AZ bildirir ki, Qaynarinfo-nun əldə etdiyi məlumata görə, polkovnik Seymur Qaraşov Fövqəladə Halların Xəbərdar Edilməsi və Daxili Təhlükəsizlik Baş İdarəsinin rəisi vəzifəsindən azad edilib. Qurum iki hissəyə bölünüb və yerində Fövqəladə Halların Xəbərdar Edilməsi İdarəsi və Daxili Təhlükəsizlik Baş İdarəsi yaradılıb.

Kəmaləddin Heydərovun müvafiq əmri ilə polkovnik Seymur Qaraşov Daxili təhlükəsizlik Baş idarəsinin rəisi təyin edilib.

Fövqəladə Halların Xəbərdar Edilməsi İdarəsi və Daxili Təhlükəsizlik Baş İdarəsi sabiq rəisi, polkovnik Sahib Rzayev isə Fövqəladə Halların Xəbərdar Edilməsi İdarəsinin rəisi təyin olunub.

Xatırladaq ki, ötən ay Seymur Qaraşov Kiçikhəcmli Gəmilərə Nəzarət və Sularda Xilasetmə Dövlət Xidmətinin rəis müavini vəzifəsindən azad olunaraq, nazirliyin Fövqəladə Halların Xəbərdar Edilməsi və Daxili Təhlükəsizlik Baş İdarəsinin rəisi təyin edilmişdi.

Binəqədi rayonu, Mir Cəlal küçəsində 9 mərtəbəli binanın qarşısındakı ağaclar kəsilib.

"Azərbaycan Reallığı" xəbər verir ki, ağacların yerində obyekt tikiləcək. Maraqlıdır ki, Bakı Şəhər İcra Hakimiyyəti Yaşıllaşdırma Təsərrüfatı Bırliyi baş verənlərə göz yumur.

Binəqədi rayonu, Mir Cəlal küçəsində 9 mərtəbəli binanın 1-ci mərtəbəsinin qarşısındakı ağaclar "yaşıl terror"a məruz qalıb. Redaksiyamıza daxil olan məlumata görə, sözügedən evin qarşısında yeni bir obyekt tikilməsi gözlənilir. Bu səbəbdən də həmin ağaclar kəsilərək yeri genişləndirilir. Çünki "qonşudan qalma geri" prinsipi ilə o sırada daha bir obyekt öz yerini tutacaq.

Ötən yazımızda oxşar halın Yasamal rayonunda yaşandığı barədə məlumat vermişdik.

Həmin yazıda qeyd edilirdi ki, baş verənlər Bakı şəhəri Yaşıllaşdırma Təsərrüfatı Birliyinin keçmiş direktoru Həsrət Əmrahovun dövrünə təsadüf edir və o, elə bu əməllərinə görə tutduğu vəzifədən azad edilib. Hazırda onun səlahiyyətlərini müavini Mirdamət Seyidov icra edir.

Görünən odur ki, cənab Seyidov Həsrət Əmrahovdan fərqlənmir. Binəqədidə ağacların kəsilməsi məhz onun direktor əvəzi olduğu vaxtdan başlayıb. Redaksiyamıza daxil olan məlumatlarda həmçinin iddia edilir ki, kəsilən ağacların yerində obyekt tikmək istəyən Həbib adlı şəxsdir.

O mətbuatda Sabunçu Rayon İcra Hakimiyyətinin başçısı Adil Vəliyevin sağ əli və rayon ərazisində tikintiyə nəzarət edən şəxs kimi göstərilib.

Bir müddət əvvəl mediada bu şəxsin korrupsiya cinayətinə görə həbs edildiyi barədə məlumatlar yayılıb. Ətrafda yaşayan sakinlər redaksiyamıza baş verənləri əks etdirən foto və videolar da göndərib.

Həmin görüntülərdəki çalaların yerində ağaclar olub və kəsilib.

Sözügedən görüntüləri təqdim edirik:

Qarşı tərəfin mövqeyini işıqlandırmağa hazırıq.

Dənizi hasarlamağa kim bunlara icazə verib..? Dənizə yaxın oturmaq üçün 20 manat, bir az aralı 10 manat... Yazıya giriş olaraq onu qeyd edək ki, istirahət özü bir mədəniyyətdir. Loru dildə desək, istirahət etməyi bacarmayan millət normal işləyə də bilməz. Sözün qısası, son illər paytaxt Bakıda və regionlarda xeyli sayda istirahət mərkəzləri, hotellər açılıb. Amma və lakin bunların çoxu qanunsuz yolla faəliyyət göstərirlər. Belə ki, hansısa iş adamı gedib dövlət təbiət qoruğu olan meşənin 5-6 hektar ərazisini zəbt edib orada istirahət kompleksi tikir. Yaxud hansısa məmur-biznesmen Xəzər dənizinin sahilini hasarlayıb orada restoran, hotel, istirahət mərkəzi yaradır...
Dənizin hasarlanması və digər məsələlərlə bağlı vaxtilə Ulu Öndər müşavirələrin birində çox kəskin və sərt çıxış etmişdi...və demişdi ki, bu hasarlar təcili sökülməlidir...dəniz və onun sahili xalqa məxsusdur... Sözün qısası, bir çox oliqarx məmurlar neçə illərdir ki, Xəzər dənizinin sahillərini özəlləşdirib hotellər, istirahət kompleksləri tikib milyonlar qazanırlar. Belə istirahət mərkəzlərindən biri də "SUNSET" istirahət mərkəzidir. Novxanı qəsəbəsində, Xəzər dənizinin sahilində yerləşən "SUNSET" istirahət mərkəzi ilə bağlı media üzərindən xırda araşdırma zamanı bəlli oldu ki, hansısa kişi istirahət mərkəzindəki hotelə gələrək öz arvadını başqa bir kişi ilə tutub və onu boğaraq öldürüb... Deməli, xəbərdən bəlli olur ki, bura hotel, istirahət mərkəzi deyil, əsl əxlaqsızlıq yuvasıdır...
Bu istirahət mərkəzi həm də evlərə və ofislərə birbaşa yeməklər çatdırır. Amma müştərilərin çoxu deyir ki, bunların yeməkləri çox baha, amma keyfiyyətsizdir, hətta zəhərlənmələr olur... Təsəvvür edirsiniz, bu istirahət mərkəzinin özünün PULLU ÇİMƏRLİYİ var. Bəli, Xəzərin sahilini hasarlayaraq özünə şəxsi çimərlik yaradıb və pul qazanır.
Bu istirahər mərkəzindən şikayətçi olan vətəndaş deyir ki, Novxanıdakı “Sunset” istirahət mərkəzinə daxil olarkən mühafizəçi avtomobilimi saxladı və pul ödəyəndən sonra buraxdı:
"Sunset" çox baha istirahət mərkəzidir. Təsəvvür edin, sadəcə stol və stul götürmək 20 manatdır. Gerisini özünüz düşünün… Hovuzda üzmək, "lejanka” və s. öz qiyməti var....yemək, su və ya çay istəsən, bunun da təbii ki, haqqını ödəməlisən. Və üstəlik əgər avtomobilini istirahət mərkəzinin həyətində saxlamaq istəyirsənsə, bunun üçün mütləq "stoyanşik"ə "hörmət" etməlisən. Bu istirahət mərkəzində tualet pulu, geyinib-soyunma otağı ayrı-ayrılıqda hər biri 50 qəpikdir. Əgər dənizə bir qədər yaxın oturmaq istəsən, 20 manat ödəməlisən, bir qədər içəridə olan çətirli stolların qiyməti 10 manatdır. Yox, əgər pulsuz istirahət etmək istəyirsənsə, ya dənizin kənarına ədyal salıb oturmalısan, ya da istirahət mərkəzinin girəcəyində olan ümumi restoranda əyləşməlisən. Bu, istirahət mərkəzlərində qiymət nisbətən ucuzdur. Məsələn, 1 çaynik çay 3 manat, qutab 50 qəpik, tikə kabab (3 tikə) 6-8 manat, toyuq kababı (3 tikə) 5 manat, salatlar 3 manat, kartof qızartması bir pay 3 manat, saciçi 15-20 manatadır. Biz hələ burada siqaret, tum, su satanlardan danışmırıq. Bu istirahət mərkəzinin qazanxanasında baş verən partlayış nəticəsində xeyli insan yaralanıb və ağır zədə alıb. Sözün qısası, Dövlət qurumları "SUNSET" istirahət mərkəzində ciddi yoxlamalar aparmalıdır. //gundelik-baku.com//

“İki ildən çoxdur ki, heç bir yerdə işləmirəm. Bugünədək işlə təmin olunmamışam. Ailəliyəm, iki övladım var. Çox ciddi şəkildə şəxsi evə-mənzilə ehyiyacım var. Amma nə evlə, nə ev tikdirmək üçün torpaq sahəsi ilə, nə də mənzillə təmin olunmuşam. Bilmirəm dədrimi kimə deyim, qulaq asan yoxdur”.

Bunları biləsuvarlı Qazimiz, Aprel döyüşlərinin və İkinci Vətən Müharibəsinin iştirakçısı Şamxal Hüseynov dilə gətirib.

Qeyd edək ki, Şamxal Hüseyn oğlu Hüseynov 1988-ci ilin oktyabr ayının 28-də Biləsuvar rayonunun Çaylı kəndində sadə bir ailədə dünyaya gəlib. Ailənin dörd övladından, iki qardaşdan biridir. 1995-2006-cı illərdə Əlimərdan Hüseynov adına Çaylı kənd 1 saylı orta məktəbdə oxuyub. Orta məktəbi bitirdikdən bir müddət sonra, 2007-ci ildə həqiqi hərbi xidmətə, Vətənin keşiyinə yollanıb.

2008-ci ilin mart ayının 15-də Azərbaycan Silahlı Qüvvələrinin Təlim-Tədris Mərkəzində Gizirlik kursuna daxil olub və 9 aydan, Gizirlik kursunu bitirdikdən sonra təyinatla Naxçıvan Muxtar Respublikasına (NMR) göndərilib. Bir neçə il NMR-də hərbçi-Gizir kimi xidmət etdikdən sonra 2015-ci ilin yanvar aylnın 10-da Füzuli rayonu istiqamətində yerləşən “N” saylı hərbi hissəyə göndərilib, orada tank komandiri kimi fəaliyyətə başlayıb. 2016-cı ilin Aprel döyüşlərində iştirak edib-Lələtəpə istiqamətində.

Eyni zamanda, bir peşəkar hərbçi, bir Vətən sevdalısı kimi 44 günlük Vətən Müharibəsinə qatılıb və və döyüşlərin ilk günündə, sentyabrın 27-də, günorta, təxminən saat 3 radələrində Cəbrayıl rayonunun Nüzgar kəndi istiqamətində ağır yaralanıb, axşam saat 6-7-cən döyüş meydanında yaralı vəziyyətdə qalıb.

Üzü, bədəni yanıb, gözündən qəlpə yarası alıb. Sonra onu döyüş meydanından çıxararaq, təcili xəstəxanaya, oradan isə Bakı şəhərində yerləşən Hərbi Hospitala göndəriblər. Həmçinin, M.Ə.Əfəndiyev adına 2 saylı Şəhər Klinik Xəstəxanası və 5 saylı Şəhər Klinik Xəstəxanasında müalicə-müayinə olunub. Hərbi Hospitalda iki dəfə gözündən əməliyyat olunub. Sonra səhhəti ilə bağlı ona 3-cü qrup əlillik təyin olunub, Ordudan təxris edilib.

Müharibədən öncə 3-cü dərəcəli “Qüsursuz xidmətə görə” və “Azərbaycan Silahlı Qüvvələrinin 100 illiyi (1919-2018)” yubiley medalları, müharibədən sonra isə “Cəsur döyüşçü”, “Cəbrayılın azad olunmasına görə”, o cümlədən “Vətən müharibəsi iştirakçısı” medallarına layiq görülüb. Şamxalın digər qardaşı da hərbçidir, 2016-cı ildən Azərbaycan Ordusunda xidmət edir. 35 yaşlı Şamxal həm də ailəli, iki övlad-bir qız və bir oğlan atasıdır.

Və özünün də qeyd etdiyi kimi, hazırda da heç bir yerdə işləmir, işlə təmin olunmayıb. Həmçinin, özünün, ailəsinin şəxsi evi-mənzili yoxdur, valideynləri ilə bir yerdə yaşayır. Eyni zamanda, ev-mənzil tikmək üçün torpaq sahəsi də verilməyib. Onun çox ciddi şəkildə həm işə, həm də şəxsi evə-mənzilə ehtiyacı var.

Qazimiz isə çıxış yolu kimi təklif irəli sürür ki, Biləsuvrada olmasa belə, yaxın rayonlardan birində qazilər, şəhid ailələri üçün çoxmərtəbli bina tikilsin və həm Şəhid ailəri, həm də Qazilər orada mənzillə təmin olunsun…

“Bu təklifimi bir neçə dəfə səsləndirmişəm. Biləsuvarda tikmirlər, heç olmasa, yaxınlıqdakı rayonlardan, boş ərazilərdən birində Şəhid və Qazi ailələri üçün çoxmərtəbəli bina tiksinlər və oradan həm bizlərə-qazilərə, həm də şəhid ailələrinə ev-məzil versinlər. Bununla da problem həll olunsun. Çünki bir çox qazilərimiz kimi mənim də şəxsi evə-məzilə ehtiyacım var. Ötən müddətdə hər yerə müraciət etsəm də, müraciətimə cavab verən yoxdur. Bir çox yerlərdə qazilərimiz torpaq sahəsi ilə təmin olunsalar da, bizdə elə hey deyirlər ki, boş torpaq yoxdur. Yaxşı onda nə edim, nə edək? Nə vaxtacan gözləyim, gözləyək? Səhhətim də yerində deyil, dözə bilmirəm…Bir daha qeyd edirəm ki, həm evə, həm də işə ciddi ehtiyacım var. Artıq aidiyyatı qurumlar, şəxslər boş vədlər verməkdən əl çəkib, bu məsələyə bir əncam etsinlər!” //yenisabah.az//

“Deryaz.az” saytının sadiq oxucuları, eləcə də Ağstafa rayon təhsil ictimaiyyəti yaxşı xatırlayarlar ki, bir ara Ağstafa Rayon Təhsil Şöbəsinin müdiri Mədət Zeynalovun korruptiv siyasətini tənqid edirdik və bu yarıtmaz siyasətə ortaq etdiyi işçilərindən Afaq Mustafayeva və əri Bayram Bayramov cütlüyünü də qınamışdıq. Bundan sonra fakt qarşısında qalaraq özü ortaya çıxmayan Mədət Zeynalov, cütlüyü qabağa verərək üstümüzə yeritdi və bir ara Afaq Mustafayeva tərəfindən Dövlət Təhlükəsizlik Xiudməti adından təhdid olunduq. Telefonda özünü Dövlət Təhlükəsizlik Xidmətinin işçisi kimi təqdim edən Afaq Mustafayevanın yalanının üstü açılıb. Redaksiya olaraq bununla əlaqədar yaxın günlərdə məhkəməyə müraciət etmək qərarına gəlmişik.

Nə isə, bu günlərdə redaksiyamıza daxil olan məlumata görə, Afaq Mustafayevanı var-dövlətə sahib edən başqa müstəsna qabiliyyətləri də varmış. Zira o, təhsil idarəsində operator, yaxud, katibə işləməklə o qədər pulu qazana bilməzdi. Nə özü, nə də Qaçaq Kərəm adına orta məktəbdə təsərrüfat müdiri işləyən əri Bayram Bayramov maaşlarını neçə ay üst-üstə yığsalar belə sürdükləri 20 min dollarlıq 77-FB- 970 nömrəli, “Hunday Santafe” markalı avtomobili, bir evləri ola-ola, digərini də Ağstafa şəhərinin mərkəzində halal pulla ala bilməzdilər.

Yeni evdə yeni avtomobil. Xeyirli olsun

Deyilənə görə acığınıza birini də təzəlikcə Bakıdan alıblarr. Ağlınıza başqa şey gəlməsin, Afaq Mustafayevanın sələmçiliklə məşğul olmasına dair əsaslı şübhələr müəyyən olunub. Belə ki, redaksiyamıza zəng vuran Eyyubova Siranuş Cəbrayıl qızı deyir ki, özü Böyük Vətən müharibəsi əlilinin qızıdır. Ailəsi Qarabağ savaşında iki şəhid verib. Onun sözlərinə görə, Afaq Mustafayeva Qazax bazarında şirniyyat satan anası Fazilə xanım ilə birgə sələmçiliklə məşğuldur, faizlə borc verir. Afaqın anası Fazilədən qızıl girovu qarşılığında 800 (səkkiz yüz) manat borc pul götürüb. Fazilə xanım deyib ki, pul Afaqındır. Sonrakı iki il yarım müddət ərzində hər ay 10 faiz olmaqla, aylıq 80 (səksən) manat pul ödəyib. Sonra ödənişində çətinlik yaranıb. Bunu görən Fazilə xanım Siranuşdan borcun əsas məbləğini geri istəyib, deyib ki, qızı ev almaq istəyir. Siranuş xanım borcu birdəfəyə deyil, hissə-hissə qaytara biləcəyini deyib. Çünki həmin ərəfədə şəhid xəbərini eşidən həyat yoldaşı infarkt keçiribmiş, xəstəxanaya düşübmüş. Sonra hər ay əsas borcdan 100 (bir yüz) manat qaytarmağa başlayıb. Axırıncı yüz manatı verəndə qızılını geri istəyib. Bu vaxt Fazilə ona qızılı yaddan çıxarıb evdə qoyduğunu deyib. Halbuki, təkcə brilyant qaşlı saatın qiyməti 3500 (üç min beş yüz) manat edirmiş. Aralarında mübahisə yaranıb, Fazilə və həyat yoldaşı onu küçə söyüşləri ilə təhqir etməyə, gah Afaqın qardaşı ilə, gah da qaynı ilə hədələməyə başlayıblar, atın quyruğuna bağlayıb sürütdürəcəklərini deyiblər. Ən nəhayət, qızılı girov götürdüklərini danıblar. Bundan sonra Siranuş xanım onları polisə şikayət edəcəyini deyib. Cavabında polisi saymadıqlarını (yumşaq ifadədir) bildiriblər. Görünən odur ki, polis də Afaq Mustafayevanın və yaxın qohumlarının əlində girinc qalıb. Çünki Siranuş Eyyubovanın zinət əşyaları geri qaytarılmayıb.

Kim zəmanət verə bilər ki, Afaq Mustafayevanın anası vasitəsilə sələmə verdiyi pullar Regional Təhsil İdarəsi tərəfindən dəfələrlə töhmət verilən müdiri Mədəd Zeynalovun pulları deyil?!

Siranuş xanım redaksiyamız vasitəsilə hüquq — mühafizə orqanlarına müraciət edərək qızıllarının geri qaytarılması üçün aidiyyatı qurumlardan imdad diləyir.

P.S. Bayram Bayramovun 2011-ci ildə avtoqəzada dünyasını dəyişən mərhum qardaşı Nəsib Bayramovun seyfində olan qızıllarının və pulların aqibəti necə oldu? — Növbəti məqaləmizdə…

Mövzuya qayıdacağıq.

Deryaz.az

Redaksiyamıza Xaçmaz rayon sakini Cəbiyeva Validə Eldar qızının, Azərbaycan Qida Təhlükəsizliyi Agentliyinin sədri Qoşqar Təhməzliyə ünvanlanmış növbəti müraciəti daxil olub. Sayqılı oxucularımıza da məlum olduğu kimi Validə xanım bu istiqamətdəki müraciətlərində Azərbaycan Qida Təhlükəsizliyi Agentliyinin Quba-Xaçmaz Regional Bölməsində işləyən oğlunun sektor müdiri tərəfindən təhqir olunub, döyülməsindən və bu hadisəyə rəhbərliyin susmasından, heç bir araşdırma aparılıb, müvafiq ölçü götürülməməsindən bəhs edir. Artıqm mövzu ilə bağlı bu beşinci müraciətdir ki, ictimailəşdiririk. Sonuncu yazı “Qoşqar Təhməzlinin eşitmək istəmədiyi ANA HAYQIRTISI!: Bu hadisələr məhz Sizin Agentlikdə baş verir…-TƏFƏRRÜAT” adlanırdı.
Bu arada biz də “Yenixeber.org” olaraq maraqlı reaksiyalarla qarşılaşdıq… Validə xanımın müraciətlərində yer alan iddialarla bağlı adları hallanan tərəfləri, eləcə də Azərbaycan Qida Təhlükəsizliyi Agentliyinin mövqeyini öyrənmək istədik. (Zatən ilk müraciətdən buna çalışırdıq. Red.) Bu ayın 10-da qurumun mətbuat xidmətinin təklif etdiyi elektron poçtlara hörmətli Qoşqar Təhməzlinin adına sorğu ünvanladıq. O gün bu gün, bu dövlət qurumundan heç bir cavab gəlmir(?)

Mətbuat xidmətinin rəhbəri bizimlə telefon söhbətində sorğumuzun İnformasiya təminatı və innovativ hallar şöbəsinin müdiri Mansur Piriyev tərəfindən cavablandırılmalı olduğunu bildirdi və onunla əlaqə saxlamağımızı təklif etdi. Hörmətli Mansur müəllimdən də bir söz eşidə bilmədik. Mobil telefonuna dəfələrlə zəng etsək də…

Əslində Azərbaycan Qida Təhlükəsizliyi Agentliyinin də, ayrı-ayrı məsul şəxslərinin də vətəndaş etirazına, media sorğusuna susması, sayqısızlığı təəccübülü deyil. Bu başqa bir yazımızın mövzusu olsun, hələlik isə Validə xanımın növbəti müraciətini oxuyun:

Ay AQTA-nın rəhbəri cənab Qoşqar Təhməzli,
artıq 8 aydır ki, Azərbaycan Qida Təhlükəsizliyi Agentliyinin rəhbərliyi – yəni Siz Agentliyin Quba-Xaçmaz Regional Bölməsində, keçmiş iş yerində iş otağında işçilərin gözü qarşısında sektor müdiri tərəfindən oğlumun təhqir edilməsini və sonunda yumruqla vurulmasını “araşdırıb” nəticəyə gəlib, qərar qəbul edə bilmirsiniz!!!
Məhkəmə qətnaməsi ilə təsdiq olunmuş bu fakta Agentlik nədənsə(?) heç cür inana bilmir ki, bilmir! Agentliyin rəhbərliyi 8 aydır ki, bu neqativ hadisəni araşdırıb, qurtara bilmir. Mən aylardır ki, hətta bu eybəcər hadisənin baş verməsini belə Agentliyə “sübut edə bilmirəm”. Agentliyin rəhbərliyi gözlərini yumub, qulaqlarını qapayıb, mən də aylardır sübut etməyə çalışıram ki, “qatıq ağdır”. Günümüzə, güzəranımıza baxın! Bu cür soyuqqanlı, etinasız, vətəndaşlara biganə kadrlar biz sadə vətəndaşların taleyi və əsəbləri ilə oynayırlar!!!
Maraqlıdır, Agentliyin rəhbərliyi vətəndaşların müraciətlərinin hamısınamı belə etalon, standart və namüəyyən cümlə birləşmələri ilə cavablandırırlar?! Agentliyin bütün işçilərimi bu formada kodlaşdırılıb? Nə olardı ki, işçilərinizi proqramlaşdırarkən bir azacıq da duyarlılıq, ədalətlilik qatqısı da əlavə edərdiniz! Maraqlıdır, siz işçilərinizi rəhbər vəzifələrə təyin edərkən, onlar necə aşınmalara məruz qalırlar ki, bu yerləri mənimsəyən şəxslər vəzifəyə keçən kimi tabeliyindəki işçilərə qənim kəsilirlər, onları təhqir etməkdən zövq alırlar?!
Cənab Qoşqar Təhməzli, siz rəhbər vəzifəyə təyin etdiyiniz kadrlarınıza əlavə olaraq döymək, söymək sertifikatımı verirsiniz? Həmin “sertifikata” əsaslanaraqmı bu kadrlarınız tabeliyindəki işçilərə qəddarlıq edirlər? Bəlkə bizim – sadə vətəndaşların xəbəri yoxdur. Bəlkə doğrudan da kadrlarınıza belə sertifikat verirsiniz? Əksinədirsə, bəs niyə onlar – rəhbər kadrlarınız – Quba – Xaçmaz Regional Bölməsinin rəisi Zaur Fərzəliyev, sektor müdiri, inzibati şöbənin müdiri Elçin Rüstəmov-lar tabeliklərində olan işçilərin alçaldılmasına, təhqir olunmasına adi hal kimi münasibət göstərirlər? Rəhbər işçinin tabeliyindəki işçini təhqir edib, döyməsinə münbit şərait yaradır, döyən sektor müdirini müdafiə edib, döyülənə isə əlavə olaraq mənəvi əzab verməkdən zövq alırlar? Siz niyə hansısa məsələn “Eqometr” şkalası ilə təyin etdiyiniz rəhbər kadrların mənəmlik eqolarını ölçmürsünüz?! Bu kadrların eqolarını ölçən hansısa “Eqometr” cihaz ixtira olmuş olsa, yəqin ki, həmin cihazın şkalası yüklənmədən partlamaq həddinə gəlib çata bilərdi. Bu rəhbər kadrlarda belə fikir formalaşıb: “tabeliyindəki işçiləri təhqir etmək, hətta döymək olar. İşçinin həddi nədir müdirinə cavab qaytarsın, hüquqlarını, şərəfini müdafiə etsin”!
Bu vəzifəli kadrların gözlərini xüsusi linza ilə elə qapayıblar ki, özlərindən olmayan, vəzifəcə aşağıda işləyən işçilərə 2-ci dərəcəli mənsublar kimi baxırlar. Görəsən hansı sehr, qüvvə bu haqsız sahiblərin gözlərindən bu əyri linzaları qoparacaq?! Bəlkə onda “dəmir qapı bilər ki, taxta qapı nə çəkir”!!!
P.S.: Cənab Qoşqar Təhməzli, zəhmət olmasa, oğlumun sizin rəhbərlik etdiyiniz AQTA-nın Quba-Xaçmaz Regional Bölməsində 28.12.2022-ci il tarixində iş vaxtı, iş yerində döyülməsinə cavabdeh şəxslərin cəzalandırılması tələbi ilə əlaqədar göndərdiyim müraciət – şikayətlərə cavab verərkən 8 aydan bəri yazdığınız “araşdırırıq” kəlməsindən istifadə etməyin. Mümkünsə, bundan belə cavab verərkən işçilərinizi əlavə söz ehtiyatı ilə zənginləşdirib, proqramlaşdırın. Belə də cavablarınız Sizin baxış açınızdan daha rəngarəng olar. //Yenixeber.org//

Ölkənin ictimai-siyasi həyatında baş verən dəyişiklikləri və həmin dəyişiklikləri şərh edən kütləvi informasiyaları izləyən vətəndaşlar yaxşı başa düşürlər ki, uzun illər Xəzər Rayon İcra Hakimiyyətinin başçısı vəzifəsində işləmiş Gülağa İslamov 2019-cu ilin fevralında öz kreslosunu birinci müavini Elşən Salahova təhvil verəndə daha əvvəl Xəzər rayon Mənzil Kommunal Təsərrüfatı Birliyi sədri vəzifəsinə gətirdiyi qardaşı Böyükağa İslamovu sələfinə “bərk-bərk” tapşırmış, Şüvəlanda bələdiyyə sədri işləyən oğlu İlham İslamova da “toxunulmçazlıq statusu” qazandırmışdı. Sadiq oxucularımız xatırlayarlar, bu mövzuda əvvəllər qələmə aldığımız “Böyükağa İslamov zibili “Seyid Məhəmməd əli ilə” pula çevirir” sərlövhəli məqaləmizdə yada salmışdıq ki, hazırki icra başçısı Elşən Salahovla Böyükağa İslamovun işbirliyi çoxdan var və bu gün də davam edir: “Əvvəllər bu birlik rayon ərazisində boş torpaq sahələrinin satılmasına və qanunsuz tikililərin rəsmiləşdirilməsinə nəzarət edirdilər. İndi isə Xəzər rayonu ərazisində satılası torpaq sahəsi qalmadığından, onlar dövlət vəsaitlərinin çıxdaş edilməsi ilə məşğuldurlar. Böyükağa İslamovun rəhbəri olduğu Xəzər rayon Mənzil Kommunal Təsərrüfatı Birliyi hər il satınalmalar yolu ilə Xəzər rayonunda asfalt örtüyünün təmir işlərinə, maşın və mexanizmlərin, xüsusi texnikaların, avadanlıqların, təsərrüfat mallarının satınalınmasına və abadlaşdırma işlərinin görülməsinə külli miqdarda dövlət vəsaiti ayırır”.

Ötən məqalədə hətta 2020-2021-ci illərdə baş tutmuş bəzi satınalma sövdələşmələrini sadalayıb Böyükağa İslamovun tender qutularından qalib çıxarılan işbaz ortaqları sırasında keçmiş Əmək və Əhalinin Sosial Müdafiəsi naziri, hazırda oliqarx Füzuli Ələkbərovun “İmprotex” Şirkətlər Qrupuna aid olan firmaların çoxluq təşkil etməsinin altı cızılmışdı.

Bir halda ki, yazılanlar, deyilənlər əsasında hüquq-mühafizə, cinayət təqibi orqanları tərəfindən heç bir tədbir görülmədiyindən, Xəzər Rayon Mənzil-Kommunal Təsərrüfatı Birliyi tərəfindən xidmət olunan ərazilərdən yığılaraq daşınan məişət tullantılarının və çirkab mayenin həcminin “şişirdilməsi”, zibil meydançalarıın ətrafının mişar daşı ilə hörülməsi, əhəng məhlulu ilə ağardılması, konteynerlərin təmiri işlərinə artıq pul silinməsi davam etdirilir. Küçələrdəki yaşıllıq zolağının ərazisində bulaqların ventilləri istismar müddəti bitmədən sıradan çıxmış kimi göstərilərək kağız üzərində tez-tez yenisi ilə “dəyişdirilir”. MKTB-nin işçilərinə alınmış kimi göstərilən və toplam dəyəri iri məbləğlərlə ölçülən müxtəlif ləvazimatlar, avadanlıqlar və xüsusi geyimlər heç də onların hamısına paylanılmır. Birliyin su maşınları ilə хidməti ərazilərin, məcburi köçkünlərin, idarə və təşkilatların on minlərlə ton içməli su ilə təmin edildiyi göstərilsə də, yayda aparılan müşahidələrdən bəlli olub ki, çox vaxt su maşınlarla satılır. Birliyin balansında olan çoxmənzilli hündürmərtəbəli yaşayış binalarının dam örtüklərinin “əsaslı təmiri”, binaların girişlərində “təmir-bərpa işləri”, binaların fasadının, girişlərinin və pilləkən qəfəslərinin “emulsiya ilə rənglənməsi”, hər birinin giriş qapılarının və pilləkən qəfəslərindəki pəncərələrin “yenisi ilə əvəz olunması”, pillələrin “aqlay daşı ilə üzlənməsi”, “alaq otlarının təmizlənməsi”, “ağacların gövdələrinin ağardılması”, “mənzillərin tüstü bacalarının və havadəyişmə kanallarının təmizlənməsi” adı altında xeyli vəsait “xırıd edilir”. Qeyri-qanuni bağ-bağçaların, kiçik torpaq sahələrinin, inşa edilmiş qaraj və kiçik ölçülü tikililər sökülməsində də vətəndaşlara münasibətdə ayrı-seçkilik edilir, rüşvət aldıqları şəxslərin qanunsuz tikililərinə əl vurmurlar.

Böyükağa İslamovun bu müstəvidə işlərinin rəvan getməsi üçün “əldən – ayaqdan gedən” əsas əlaltısı isə MKTB-nin sanitar-təmizlik sahəsinin rəisi Mirzə Məhəmməddir. Yeri gəlmişkən, hər iki vəzifəli şəxsin binada kabinetləri üz-üzədir. Bu sadaladığımız və digər məsələlərlə bağlı suallara aydınlıq gətirmək üçün hər ikisinin qəbuluna düşüb münasibətlərini öyrənməyə çalışmışıq. Sahə rəisi faktlara izahat verməkdənsə, gileylənməyə, daha əvvəlki kimi qazancın omadığından şikayətləndi: “Mən kiməm ki, pul da yeyəm? Mənə düşən qəpik-quruşdu” dedi və sonra da Böyükağa İslamovun qərar tutduğu üzbəüz kabinetin qapısını göstərdi. Qəbuluna düşdüyümüz Böyükağa İslamov özündənrazı halda kreslosunu yerində sağa-sola fırlatmaqla bir daha ədalı tərzdə nümayiş etdirmiş oldu ki, vəzifə ona qardaşından, qardaşına isə sanki atalarından miras qalıb. Bununla belə o da “ay keçən əyyam, olasan indilər” əhvalı ilə əvvəlki daha gəlirli dövranı nostalji hisslərlə xatırlayıb daha böyük tikələri həzm edən “yuxarıdakıların” qarasına deyindi.

Mövzuya qayıdacağıq.

Deryaz.az

Müdafiə Nazirliyinin Maliyyə İdarəsinin sabiq rəisi, general-mayor Nizami Məmmədovun da ittiham olunduğu cinayət işi üzrə istintaqın ona aid hissəsi yekunlaşdırılıb. İşin N.Məmmədova aid hissəsi ayrılaraq baxılması üçün Bakı Hərbi Məhkəməsinə göndərilib.

DİA.AZ bildirir ki, bu barədə "AzPolitika.info"-ya sabiq generalın vəkili Rəşad Mirmehdizadə bildirib.

Vəkil həmçinin qeyd edib ki, Dövlət Təhlükəsizliyi Xidmətində aparılan cinayət işi üzrə istintaq müddətində müvəkkili və digər təqsirləndirilən şəxslər tərəfindən ümumilikdə 40 milyon manata yaxın vəsait dövlət bübcəsinə ödənilib və bu proses davam edir.

"Barəsində məhkəməyə göndərilən 128 cild cinayət işi ilə Nizami Məmmədov ağır sağlamlıq durumu ilə əlaqədar çox çətinliklə tanış ola bilib və bəzi vəsatətlər verib. Hazırda Bakı Hərbi Məhkəməsində məhkəmə baxışının başlanılması gözlənilir" - deyə, R.Mirmehdizadə qeyd edib..

Qeyd edək ki, bir müddət əvvəl Dövlət Təhlükəsizliyi Xidmətində başlamış silsilə araşdırmalar üzrə Müdafiə Nazirliyinin maliyyə strukturlarında mənimsəmə faktları müəyyən edilib

Yüksək çinli maliyyə xidmət rəisləri ilə yanaşı Müdafiə Nazirliyinin Maliyyə İdarəsinin rəisi, general-mayor Nizami Məmmədov da xüsusilə külli miqdar mənimsəmə cinayətlərində ittiham edilərək həbs edilibdir.