Goranboy rayon "Qarasüleymanlı kənd sakini Nazım Orucov (ad şərtidir) tərəfindən "DogruXeber.az" redaksiyasına məlumat daxil olmuşdur.

Məlumatda bildirilir ki, "2000-ci ildən bəri keçmiş İcra başçısının müavini Ceyhun Həsənovun əmisi Namazov Yaşa Məhəmməd oğlu kəndin örüş sahəsi olan 21 hektar ərazini mənimsəyib, yarısını ərik bağı saldırıb, yarısını da buğda, yonca üçün əkin sahəsi edib. Kənd sakinlərini əraziyə buraxmır. Camaat mal-qarasını otarmağa yer tapmır. Vaxtilə qardaşı oğlunun icra hakimiyyətindəki yüksək vəzifəsinə güvənəndən kənd sakinlərinin gözünü qorxudub. Ceyhun Həsənov vəzifədən çıxsa da, "xof"u hələ də sakinlərin ürəyində qalır. Ona görə heç kim Yaşa Məhəmməd oğlu Namazova bu barədə nəysə deməyə risk etmir."

Yeri gəlmişkən, qeyd edək ki, sakinlərin sözlərinə görə Yaşa Namazovun qardaşı oğlu olduğu deyilən keçmiş müavin Ceyhun Həsənov "müavin olduğu vaxtlarda özünə xeyli sərvətlər toplayıb, bir deyil, bir neçə biznes qurub. Hətta, deyilənə görə şəxsi dəyirmanı, ticarət mərkəzi, bir neçə dükanları və sair saymaqla bitməyən xeyli sayda müxtəlif şəxslərin adına özəl iaşə obyektləri var və demək olar ki, hamısını icarəyə verib, icarədən gələn gəlirləri ilə dünyanın səfasını sürməkdədir".

Yeganə gəliri 3-4 baş mal-qarası olan binəva kəndlilər də heyvanların yemlərini təmin etmək üçün dəridən-qabıqdan çıxırlar. Haqları olan örüş sahəsi də 22 ildir Yaşa Namazovun "sərəncamındadır".

Adam deyir, "Burda mənəm, Bağdadda kor xəlifə ".

P.S: Qeyd edək ki, Qarasüleymanlı kənd sakininin dedikləri barəsində aidiyyatı üzrə Goranboy şəhər bələdiyyəsinin də açıqlamasını almaq üçün şəhər bələdiyyəsinin sədri Şəmsi Əliyevə zəng etdik.

Şəmsi bəy 21 hektar torpağın Namazov Yaşa Məhəmməd oğlunun pay torpağı olduğunu dedi.

21 hektar pay torpağı!

Sakinlərin örüş sahəsi iddiasına isə belə açıqlama gətirdi ki, "Ola bilsin sakinlər Yaşanın oğlu Müşfiq Namazovun idarəçiliyinə verilən 3 hektar örüş sahəsini deyirlər ", dedi.

- 'Kəndin örüş sahəsi kiminsə idarəçiliyinə necə verilə bilər ?" sualımıza isə, bələdiyyə sədri Şəmsi Əliyev rişxəndlə - "Olur, ay xanım, siz qanunlara diqqətlə baxın, olur. Mən də görmüşəm o sənədləri "- dedi.

Biz, "Tamam, sizin də bu cavabınızı olduğu kimi dərc edərik və barəsində araşdırmalar aparılması üçün aidiyyatı qurumlara rəsmi müraciətlər göndərəcəyik", dedik və sağollaşdıq.

Şəmsi bəy isə sağollaşmadan öncə "3 hektardır, ola bilər aşağı-yuxarı olsun, amma 3 hektardır" -deyib, sonra sağollaşdı.

Qeyd - 1: Əldə etdiyimiz digər məlumata görə, Yaşa Namazovun camaat arasında "mənim arxamda o durub" dediyi, qardaşı oğlu Ceyhun Həsənov Yaşanın ögey qardaşının oğludur və hazırda soyuq münasibətləri var. Hətta, deyilənə görə küsülüdürlər.

Belə çıxır ki, Yaşa Namazov camaatın gözünü qorxutmaq üçün, yalan danışaraq, Ceyhun Həsənovun nüfuzundan sui-istifadə edib.
Hər halda bütün məlumatlar redaksiyamıza kəndin sakinləri tərəfindən göntərilib.

Qeyd - 2: Məsələnin araşdırılması və barəsində lazımi tədbirlər görülməsi üçün "DogruXeber.az" olaraq, aidiyyatı qurumlara göndərilməsi üçün tərəfimizdən müraciətlər hazırlanır.

Sonda isə hansı örüş torpaqları hansı halda kimlərə icarəyə verilə bilər, bu barədə qanunun müvafiq maddəsini Şəmsi bəyin diqqətinə çatdırmağı özümüzə borc bildik

AZƏRBAYCAN RESPUBLİKASININ TORPAQ MƏCƏLLƏSİ
Maddə 16. Örüş, otlaq və biçənək üçün torpaq sahələrinin istifadəsinin xüsusiyyətləri

1. Yay və qış otlaqları, örüş və biçənək sahələri mülkiyyətində və istifadəsində mal-qara olan hüquqi və fiziki şəxslərə verilir. Dövlət mülkiyyətində olan yay və qış otlaqları dövlət qoyunçuluq təsərrüfatlarının ehtiyacları da nəzərə alınmaqla, müvafiq icra hakimiyyəti orqanlarının qərarı ilə inzibati-ərazi vahidlərinin istifadəsinə verilir.

2. Yay və qış otlaqları bələdiyyələrin qərarı əsasında qoyunçuluğun inkişafı üçün bələdiyyə mülkiyyətində olan müəssisələrə istifadəyə, digər hüquqi və fiziki şəxslərə isə yalnız icarəyə verilir.

3. Bələdiyyələrin mülkiyyətində olan torpaqlardan əhalinin mal-qarası üçün örüş sahələri ümumi istifadəyə ayrılır, ehtiyat torpaq fondunda qalan örüş və biçənək sahələri qanunvericiliklə müəyyən edilmiş qaydada isə hüquqi və fiziki şəxslərin icarəsinə verilir. [16]

4. Ümumi istifadədə olan örüş sahələri əhalinin istifadəsinə müddətsiz verilir.

Yay və qış otlaqları, habelə bələdiyyə ehtiyat fondunun örüş və biçənək sahələri hüquqi və fiziki şəxslərin icarəsinə, bir qayda olaraq, on ildən on beş ilədək verilə bilər. Örüş, otlaq və biçənək sahələrinin icarə müddəti başa çatdıqda, müqavilə qanunvericiliklə müəyyən edilmiş qaydada keçirilən torpaq hərracı və ya müsabiqəsi nəticəsində uzadıla bilər. Yay və qış otlaqlarının, örüş və biçənək sahələrinin istifadəçilərinin və icarəçilərinin mal-qarasının sayı iki dəfədən çox azaldıqda, yaxud heyvanlar tamamilə ləğv edildikdə və ya onların mülkiyyətçisi dəyişdikdə icarə müqaviləsinə və istifadə haqqında qərara qanunvericiliklə müəyyən olunmuş qaydada yenidən baxılır.

Mövzuya təkrar qayıdacağıq.

Redaksiyamız hər kəsin söz haqqını tanıyır.

DogruXeber.az

Babək rayon Tumbul kəndindəki "Daş Məhsulları Sənaye Kompleksi" MMC-yə aid zavodun bir qrup işçisi, əmək hüquqlarının pozulduğunu deyirlər.

DİA.AZ qeyd edir ki, şikayətçilərin "Gündəlik Naxçıvan"a bildirdiyinə görə, onlar istirahət və bazar günləri işləməyə məcbur edilirlər. Gün ərzində 8 saatdan artıq işlədilən fəhlələr, zavodda təhlükəsizlik və digər tədbirlərin görülməməsindən də şikayətçidirlər. MMC, əvvəllər Rza Talıbovun nəzarətində olan "Gəmiqaya" Holdinqə məxsus olub. Bir müddət öncə isə MMC, holdinqin əlindən alınıb.

Daş sexində fəhlə işləyən B. Ağayev deyir ki, zavodda əl dəyişəndən sonra işçilər sevinib ki, artıq hər şey qaydasına düşəcək. Şikayətçi deyir ki, onların sevinci çox çəkməyib:
"Bir neçə gün öncə gəlib, "Gəmiqaya" yazılan lövhəni apardılar. Dedilər ki, bura artıq Rza Talıbovun deyil. Sevindik ki, bizim də hüquqlarımız bərpa olunacaq, insan kimi işləyəcəyik. Ancaq, hər şey əksinə oldu, qaydalar biraz da sərtləşdirildi. Dedilər ki, heç nə dəyişməyəcək. Bizi əvvəlki kimi şənbə və bazar, bayram günləri işlədirlər. Həmin günlər işə gəlməyənlərin maaşından kəsirlər. Əvvəl bizimlə necə davranırdılar, indi də elə. Sözün qısası, bizi qul kimi işlətməkdə davam edirlər".
Işçilər bayram və istirahət günləri çalışdıqları üçün, ikiqat əməkhaqqı tələb edirlər:
"Bizim bütün əmək hüquqlarımız pozulur. 180 nəfər bizim sexdə, 70 nəfər də Nehrəmdəki sexdə işləyir. İkisində də eyni vəziyyətdir. Biz tələb edirik ki, əmək müfəttişliyindən gəlib, baş çəksinlər, maraqlansınlar və bizim hüquqlarımızın bərpa olmasına yardımçı olsunlar".
Məsələyə münasibət öyrənmək üçün, zavodla əlaqə saxlamaq mümkün olmadı. Zavod rəhbərliyinin də mövqeyini işıqlandırmağa hazırıq.

Azərbaycan Respublikasının Prezidenti İlham Əliyev “Bakı KOB evi”nin açılışında iştirak edib.

Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov paytaxtın Nərimanov rayonunda yerləşən “Bakı KOB evi” barədə dövlətimizin başçısına məlumat verdi.

Bildirildi ki, sayca 3-cü olan “Bakı KOB evi”nin ümumi sahəsi 11 min 262 kvadratmetrdir. Üçmərtəbəli binanın ilk iki mərtəbəsi sahibkarlara xidmət göstərilməsi, üçüncü mərtəbə isə işçi heyət üçün nəzərdə tutulub. “Bakı KOB evi” gün ərzində beş min sahibkara xidmət göstərmək potensialına malikdir. Binada yaradılmış görüş, təlim, startap, mediasiya otaqları və konfrans zalı da sahibkarların xidmətində olacaq.

“Bakı KOB evi”ndə sahibkarlara 29 dövlət qurumu tərəfindən 150-dən çox, 20 özəl qurum tərəfindən isə 100-dən çox adda xidmətlər göstəriləcək. Sahibkarlar fəaliyyət üçün zəruri olan biznesin qeydiyyatı, lisenziya və icazələrin alınması, biznes planın hazırlanması, güzəştli maliyyə vəsaitlərinə çıxış, vergi, gömrük, kommunal xidmətlərə qoşulma, bank, sığorta və digər məsələlərlə bağlı “Bakı KOB evi”nə müraciət edə bilərlər. Bununla yanaşı, “Bakı KOB evi”ndə yaradılmış Beynəlxalq Ticarət, İnkişaf və Logistika Zonasında gömrük və idxal-ixrac əməliyyatları ilə bağlı geniş spektrli xidmətlər də təqdim ediləcək.

Diqqətə çatdırıldı ki, KOB evləri sahibkarlara dövlət və biznes xidmətlərinin mərkəzləşdirilmiş qaydada təqdim edildiyi vahid məkandır. Burada xidmətlər operativlik, şəffaflıq, nəzakətlilik və rahatlıq prinsipləri əsasında həyata keçirilir. Biznes xidmətlərinin bir məkanda toplanması, vaxta və xərclərə qənaət, operativlik KOB evlərinin əsas üstünlükləridir.
Hazırda fəaliyyətdə olan Xaçmaz və Yevlax KOB evlərində indiyədək sahibkarlara 170 mindən çox xidmət göstərilib ki, bu xidmətlərin 165 mindən çoxu dövlət-biznes (G2B), 9 minə yaxını isə biznes-biznes (B2B) xidmətləridir. Sahibkarların KOB evlərinin xidmətlərindən məmnunluq göstəricisi 98 faizdir.

Qeyd edək ki, Azərbaycanın davamlı iqtisadi inkişafının təmin edilməsində sahibkarlığın, xüsusilə kiçik və orta biznesin rolunun artırılması Prezident İlham Əliyevin rəhbərliyi ilə həyata keçirilən sosial-iqtisadi siyasətin prioritet istiqamətlərindəndir. Ölkəmizdə özəl sektorun inkişafı sahəsində həyata keçirilən sistemli tədbirlərin davamı olaraq dövlətimizin başçısının 2017-ci il 28 dekabr tarixli Fərmanı ilə İqtisadiyyat Nazirliyinin tabeliyində Kiçik və Orta Biznesin İnkişafı Agentliyi (KOBİA) yaradılıb.

KOBİA tərəfindən sahibkarlara informasiya, məsləhət, təlim-tədris, maraqların müdafiəsi, bazarlara və maliyyə resurslarına çıxışın yaxşılaşdırılması, dövlət və özəl qurumlarla əlaqələndirmə və digər istiqamətlərdə dəstək və xidmətlər göstərilir. Bu dəstək və xidmətlər KOBİA-nın ölkənin müxtəlif şəhər və rayonlarını əhatə edən geniş infrastruktur şəbəkəsi - KOB dostları, KOB inkişaf mərkəzləri və KOB evləri vasitəsilə həyata keçirilir. Belə ki, KOB inkişaf mərkəzləri KOB-ların biznes biliklərini artırmaq üçün ödənişsiz olaraq informasiya, məsləhət, təlim və biznes planın hazırlanması xidmətlərini təklif edir. Ölkənin regionlarında KOB-ların maraqlarının müdafiəsi, lazımi dəstək və xidmətlərə çıxışı 38 şəhər və rayonda fəaliyyət göstərən “KOB dostu” şəbəkəsi vasitəsilə reallaşdırılır.

Bundan başqa, KOBİA tərəfindən mikro və kiçik sahibkarlıq subyektlərinə onları innovasiya fəaliyyətindən əldə etdikləri gəlirlər üzrə mənfəət və gəlir vergisindən 3 il müddətinə azad edən “Startap” şəhadətnaməsi verilir, daxili bazar araşdırmasının aparılmasına, təhsil, elm, tədqiqat və dəstək layihələrinə maliyyə dəstəyi göstərilir, onların ödənişsiz olaraq sərgilərdə iştirakına və ticarət şəbəkələrinə çıxışına dəstək təmin olunur.

AFFA İntizam Komitəsi “Qarabağ” və “Neftçi”nin Gənclər Liqasında çıxış edən komandalarının futbolçularını cəzalandırıb.

Ağdam klubunun oyunçusu Emil Binyətzadə “Sabah”la görüşdə qeyri-idman hərəkətinə görə qırmızı vərəqə aldığı üçün 1 matçlıq diskvalifikasiya olunub.

“Neftçi”nin üzvü Aslan Şirinovun cəzası daha ağır olub. O, “Qəbələ” ilə keçirilən qarşılaşmanın ardından hakimin qərarına etiraz etdiyindən, ikinci sarı vərəqə alıb. Şirinov ardından hakimlərin və AFFA-nın ünvanına təhqiredici ifadələr işlətdiyi üçün komandasının qarşıdakı 4 oyununu buraxmalı olacaq.

Bundan başqa, “ağ-qaralar”dan Bəhruz Qurbanlı həmin görüşdə qırmızı vərəqə aldığı üçün 2, “Qəbələ”nin oyunçusu Ravil Qafarov isə 1 matçlıq cəzaya məruz qalıblar.

Prezident İlham Əliyevin iqtisadi sahədə başlatdığı islahatlar artıq böyük vəzifəli məmurların kurasiya etdiyi şirkətlərə də çatıb.

Əldə etdiyimiz məlumata görə illərdir səlahiyyətlərindən, əllərindəki inzibati resurslardan istifadə edərək büdcədən maliyyələşən layihələri müxtəlif formalarla yaxın ətraflarının, dost-tanışlarının adlarına rəsmiləşdirdikləri şirkətlərə ötürən məmurların barədə ciddi araşdırmalar başlanılıb.

Artıq bir neçə qurumdan ibarət yaradılan komissiyalar şübhəli fəaliyyət göstərən, böyük məbləğli layihələri icra edən şirkətlərin siyahısını hazırlamaqla məşğuldur.

Əldə etdiyimiz məlumata görə bir neçə ildir ki, dövlət büdcəsindən ayrılan milyonlarla dəyəri olan layihələri həyata keçirən “Colosium Engineering Consulting Company” MMC-dir.

Belə ki, 2016-cı ildə yaradılan bu şirkətin əslində Prezident Administrasiyasında yüksək vəzifədə çalışan şəxsə məxsus olduğu iddia edilir.

Məhz bu yüksək vəzifəli məmurun şəxsi əlaqəlari vasitəsilə də illərdir ki, milyon manatlarla dəyəri olan büdcədən formalaşan tikinti layihələrənin “Colosium Engineering Consulting Company” MMC-yə verildiyi deyilir.

Bir neçə vaxtdır ki, Prezidentin iqtisadi şəffaflığı artırmaq barədə İqtisadiyyat naziri Mikayıl Cabbarova verdiyi xüsusi tapşırıqdan sonra böyük vəzifəli məmurların “kassasına” çevrilən bu tip şirkətlərə daha dövlət layihələrinin verilmədiyi, indiyədək icra olunan layihələrin isə araşdırıldığı bildirilir.

Bu şirkətlərin araşdırılmaqlarına səbəb isə görülən işlərin qiymətlərinin dəfələrlə şişirdildiyi, real bazarla uyğunluq təşkil etməməsidir.

“Colosium Engineering Consulting Company” MMC-nin indiyədək bir sıra nazirlik və icra hakimiyyətləri ilə gördükləri işlərin də yaxın zamanlarda yoxlanacağı deyilir.

Şirkətin Prezident Administrasiyasındakı yüksək vəzifədə çalışan hamisinin isə baş verən proseslərə müdaxilə edə bilmədiyi vurğulanır.

Bu barədə araşdırmalarımız davam edir.

Qarşı tərəf mövqe bildirə bilər.

Mənbə: azfakt.com

İsmayıllıda Yeni il tədbirində biabırçı hadisə baş verib. Reportyor.info bildirir ki, 31 dekabr axşam saat 22:00-da Yeni il tədbiri planlaşırıdılıb. Təşkilatçı İsmayıllı rayon Mədəniyyət Mərkəzi olub və bayram tədbiri də həmin mərkəzin qarşısında baş tutmalıymış. Tədbir rayon səviyyəli keçirilməsi nəzərdə tutulsa da, təşkilatçı heç bir iş görməyib. Saat 22:00-da başlayacaq tədbir baş tutmayıb. Tədbirə yığışanlar Niva markalı avtomobildə mahnı səsləndirməklə tədbirə başlayıblar. Ardından maşının və telefonun işığında bir neçə müğənni mahnı ifa edib.
Həmin vaxt Mədəniyyət Mərkəzinin direktoru Araz Şəmdinli tədbirə gəlib. İşçilərdən biri tədbirin belə biabırçı olmasına etiraz edib. Tərəflər arasında mübahisə yaranıb. Ardından dava başlayıb. Araz Şəmdinli həmin işçini söyüb. Onu bıçaqlamaq istəyib. Mədəniyyət Mərkəzinin və İsmayıllı Regional Mədəniyyət İdarəsinin işçiləri olayın qanla bitməsinə mane olsalar da, yekunda xətasız ötüşməyib. İşçilər bıçağı Araz Şəmdinlinin əlindən alan zaman bıçaq onun qoluna girib. Məsələni ört-basdır etmək üçün A.Şəmdinlini xidməti otağına aparıblar. Otağa daxil olan A.Şəmdinli otaqdakı bütün avadanlıqları yerə çırpmaqla sıradan çıxarıb. Hətta otağın divarındakı mərhum Prezident Heydər Əliyevin portretini də yerə çırparaq sındırıb.
Məsələdən sonra Araz Şəmdinlinin qoluna bir neçə tikiş qoyulduğu deyilir. A.Şəmdinli diqqətdə qalmamaq üçün təhsil məzuniyyətinə çıxıb.

Əlavə olaraq da qeyd edək ki, tədbirdən sonra Prezidentin Yeni il təbriki olmalı imiş və həmin təbrik rayon mərkəzindəki və Mədəniyyət Mərkəzinin tabeçiliyində olan monitorda nümayiş etdirilməli idi. Lakin Prezidentin çıxışı 3 dəfə yarımçıq qalıb. Məlum olub ki, monitorun müəyyən detalları Mədəniyyət Mərkəzinin rəhbər şəxsləri tərəfindən sökülərək satılıb.

Mənbə jurnalist Zaur Qənbərov

Reportyor.info

Bir vaxtlar rayon camaatının ən sevimli məkanı olmuş, hazırda isə unudulmuş, dağılmış və bərbad vəziyyətə düşmüş kinoteatrdan danışacağıq. Söhbət Kürdəmir rayonunun mərkəzində yerləşən - dahi şəxsiyyət Nizami Gəncəvinin adını daşıyan kinoteatrdan gedir.

Acınacaqlı vəziyyətdə olan kinoteatrın mövcud vəziyyətini öyrənmək üçün əməkdaşlarımız adı çəkilən məkanda olub və müəssisənin bərbad vəziyyətə düşməsinin səbəblərini öyrənməyə çalışıblar.

DİA.AZ Bizim.Media-ya istinadla xəbər verir ki, Kürdəmirdəki Nizami adına kinoteatr 1960-cı ildə istifadəyə verilib.

O vaxtdan kinoteatr rayon sakinlərinin kiçikdən-böyüyə - hamının sevimli məkanına çevrilib.

Fəaliyyətə başlayandan hər gün burada dörd seans olmaqla, yerli və xarici filmlər nümayiş olunub, müxtəlif tamaşalar göstərilib. Gün ərzində minlərlə rayon sakini klubun təqdim etdiyi xidmətlərdən istifadə edib.

Klassik memarlıq üslubunda birtipli layihə əsasında tikilmiş və 250 tamaşaçı yerlik olan kinoteatr vaxtilə şəhərin görünüşünə xüsusi gözəllik bəxş edirdi. Klub 32 il rayon sakinlərinə xidmət etdikdən sonra 1992-ci ildə müxtəlif səbəblərdən fəaliyyətini dayandırıb.

Təəssüflər olsun ki, bir vaxtlar şəhər sakinlərinin bilet üçün növbəyə durduğu və sevərək baxdığı film və müxtəlif layihələrə tamaşa etdikləri bu məkan hazırda insana sanki dağıdılmış, tərk edilmiş və talan edilmiş bir məkanı xatırladır.

Klubda çəkiliş apardığımız vaxtda da zalda oturacaqların olmadığını, qapı pəncərələrin söküldüyünü və taxta parçaları ilə qapadıldığını, eləcə də kinoteatrın işıqlanması üçün istifadə edilən böyük çilçıraqların olmadığının da şahidi olduq. Gördüyümüz mənzərədən belə qənaətə gəlmək olar ki, klubun illər öncə fəaliyyətinin dayandığını fürsət bilən “işbazlar” müəssisəyə aid olan əşyaları, invertarları oğurlayaraq mədəniyyət ocağını talan ediblər.

Klubun vaxtilə xidmətlərindən istifadə etmiş rayonun yaşlı nəslinin nümayəndələri ilə həmsöhbət olduq.

Onların bu klub haqqında olan təəssüratlarını dinlədik. Rayon sakinləri bu klubun vaxtilə rayon camaatının ən sevimli məkanı olduğunu bildirdilər və bu kinoteatrın yenidən bərpa olunaraq istifadəyə verilməsinin istər yaşlı, istərsə də gənc nəsil üçün vacib amil olduğunu bildirdilər.

Hazırda Mədəniyyət Nazirliyinin balansında olan kinoteatrın acınacaqlı vəziyyətinin səbəblərini öyrənmək üçün üz tutduq Kürdəmir Regional Mədəniyyət İdarəsinə. İdarənin rəis müavini Vaqif Alıyev bildirdi ki, vəziyyətdən xəbərdardırlar və bununla bağlı Mədəniyyət Nazirliyinə artıq müraciət edilib.

Müraciətə əsasən binaya baxış keçirilib. Qurum rəsmisi onu da bildirdi ki, əslində “Nizami” kinoteatrı qəzalı vəziyyətdə olan bina deyil, sadəcə istismar müddətindən artıq işlənib və yenidən qurulmasına ehtiyacı olan binadır.

Bu gün binadan istifadə etmək qeyri mümkündür. “Nizami” kinoteatrı 1960-cı ildə sovet dönəmində əhaliyə kino xidməti göstərilməsi üçün tikilmiş yeganə kino müəssisəsidir.

Uzun illər istismar olunub. 1991-92-ci illərdə AXC-Musavat hakimiyyəti müddətində həmin binada görülmüş işlər dayandırılıb və bina əslində tarmar olunub, sıradan çıxarılıb. Sonralar da binanın bərpası istiqamətində “Azərkino” video birliyinin tərkibində olanda heç bir addım atılmayıb.

“Nizami” kinoteatrı hazırda Kürdəmir regional Mədəniyyət idarəsinin balansındadır. Binanın əsaslı yeniudənqurmaya ehtiyacı var. Əvvəllər də dəfələrlə müraciət olunub, bu məsələ isə öz həllini tapmayıb. Bu yaxınlarda binanın əsaslı yenidənqurulması ilə bağlı Respublika Mədəniyyət Nazirliyinə müraciət olunub və məsələyə müsbət cavab verib. Binaya baxış keçrilib.

Yəqin ki, yaxın vaxtlarda binanın əsaslı şəkildə yenidən qurulması məsələsi gündəmə gətiriləcək və müəssisə öz təyinatı üzrə istifadə üçün əhalinin istifadəsinə veriləcək.

Aidiyyəti qurumlar həmişə olduğu kimi, yenə söz veməklə işlərini bitmiş hesab edirlər. Ümid edək ki, dahi şəxsiyyətin adını daşıyan bu məkan əsaslı təmir olunar və yenidən rayon sakinlərinin sevimli məkanına çevrilər.

Mövzunu diqqətdə saxlayacağıq.

Naxçıvan Ali Məclisinin sabiq sədri Vasif Talıbova məxsus “Gəmiqaya Holdinq”in adı dəyişdirilib.

APA-nın əldə etdiyi məlumata görə, artıq şirkət bu gündən “Arkoz Holdinq” adını daşıyacaq.

Faktı APA-ya şirkətdən təsdiqləyiblər.

Eyni zamanda, “Gəmiqaya Holdinq”in Vasif Talıbovdan alındığına dair məlumatlar da var. Belə ki, hazırda şirkətdə sənədləşmə işlərinin aparıldığı və bu gün şirkətə Bakıdan rəhbər təyin ediləcəyi bildirilir.

Qeyd edək ki, “Gəmiqaya Holdinq" Naxçıvan Ali Məclisinin sabiq sədri Vasif Talıbova məxsus olub. Onun oğlu Rza Talıbov uzun müddət “Gəmiqaya Holdinq"in prezidenti olub.

APA

Hacıqabulun Talış kəndinin sakinləri kənd daxili yolların bərbad vəziyyətindən şikayətçidirlər.

Kəndin yolları yayda toz-dumandan, qışda zığ-palçıqdan keçilməz olur. Məlumata görə, son günlər yağan yağışlar səbəbindən su və palçıq gölməçələri yaranıb, yollar yenidən keçilməz olub.

Demək olar ki, Talış kəndinin yollarının palçığı qurumur. Yağıntıdan sonrakı günlərdə də palçıqlı yollar maneə yaratmaqda davam edir. Palçıqlı yollar evlərin sıx olduğu, dar məhəllələrdə olduğundan yaşayış üçün xüsusilə çətinlik yaradır.

“2500 nəfərə yaxın sakinin yaşadığı bu kənddə vəziyyət o yerə çatıb ki, məktəblilər divarlara söykənərək yolları keçməli olurlar. Yaranmış anormal, arzuolunmayan hal nəinki məktəblilərin piyada dərsə getməsinə, həmçinin avtomobillərin də hərəkətinə mane olur. Yaşlıların bu yollara çıxmasından isə danışmaq mümkün deyil”, sakinlər bildirir.

Sakinlər dəfələrlə yaranmış vəziyyətlə bağlı aidiyyatı qurumlara müraciət etsələr də, baxan olmadığını deyirlər. Bildirirlər ki, qış mövsümü yeni başlayıb, ancaq vəziyyət indidən acınacaqlıdır.

Öz hesablarına yolları bir neçə dəfə təmir etdirən sakinlər bələdiyyənin də yaxın durmamasından narazılıq edirlər. Aidiyyatı qurumun məsələni sükutla izləməsinin yolverilməz olduğunu hesab edirlər.

Talış sakinləri ara yolların bərbad vəziyyəyi ilə bərabər zibil probleminin mövcudluğunu da qeyd ediblər. Kənddə zibil konteyneri olmadığından zibillər ətrafa dağılır, zibilliyə toplaşan küçə itlərinin təhlükə mənbəyinə çevrilməsini də qaçınılmaz edir.

Məsələyə aydınlıq gətirmək üçün üz tutduq Talış kənd bələdiyyəsinə. Bələdiyyə sədri Adişirin Nəzərov nahar fasiləsində olduğu üçün suallarımızı telefon danışığında cavabladı. Bələdiyyə sədri məsələnin həlli üçün fondda vəsait olmadığını bildirdi.

DİA.AZ mövzu ilə bağlı Belediyye.net-in sujetini təqdim edir:

Bir müddət əvvəl,Bakı Şəhəri üzrə Təhsil İdarəsinə (BŞTİ) müdir müavini vəzifəsinə təyin edilən Anar Məmmədovun, elə həmin idarənin müdiri Mehriban Vəliyevanı əvəzləyəcəyi gözlənilirmiş.Həmin ərəfədə, Bakı Şəhəri üzrə Təhsil İdarəsi müdirinin vəzifəsindən azad edildiyinə dair yayılan xəbərlər təsadüfdən qaynaqlanmayıb.

Faktinfo.az saytının əldə etdiyi məlumata görə,bununla bağlı elm və təhsil naziri Emin Əmrullayev əmr imzalamağa hazırlaşırmış.Lakin nazir son anda Anar Məmmədovu ilk əvvəl, BŞTİ-nin müdir müavini vəzifəsinə təyin etməyi məqbul bilib.Bu amil əsas verir ki,Anar Məmmədov bir müddət sonra Mehriban Vəliyevanın yerinə təyin olunsun.

Qeyd edək ki, Anar Məmmədov 2017-2022-ci illərdə Heydər Əliyev adına Müasir Təhsil Kompleksinin direktor müavini olub.

Faktinfo.az