“Dağlıq Qarabağın Azərbaycanlı İcması”nın yeni binası “Qərbi Azərbaycan” İcmasının balansına verildiyindən bu bina tam boşaldılıb.

DİA.AZ bildirir ki, Gununsesi.info-nun özəl mənbədən əldə etdiyi xəbərə görə, Şuşa Şəhər İcra Hakimiyyətinin aparatı başda olmaqla, deputat Tural Gəncəliyevin rəhbəri olduğu “Qarabağa Dönüş” İctimai Birliyi Bakının Nərimanov rayonu, Gülarə Qədirbəyova 9 ünvanıdan çıxarılıb.

Uzun illərdir ki, həmin binada əyləşən Şuşanın icra başçısı Bayram Səfərov da Seyid Yəhya Bakuvi küçəsində yeni binaya köçüb.

Xatırladaq ki, 2 gün əvvəl Prezident İlham Əliyevin də ziyarət etdiyi bu binada bir sıra təmir işləri görülüb və ora “Qərbi Azərbaycan” İcmasının balansına verilib.

Prezident İlham Əliyev Xalq artisti, Bakı Musiqi Akademiyasının rektoru Fərhad Bədəlbəyli haqqında Sərəncam imzalayıb.

Sərəncama əsasən, Azərbaycan musiqi mədəniyyətinin inkişafında uzunmüddətli səmərəli fəaliyyətinə görə Fərhad Şəmsi oğlu Bədəlbəyli “Şərəf” ordeni ilə təltif edilib.

Qeyd edək ki, sabah Fərhad Bədəlbəylinin 75 yaşı tamam olur.

Dekabr ayının 26-da saat səhər 9 radələrində Bərdə rayonu ərazisində Laçın rayon sakini Cavid Xurşudovun və polis baş serjantı Vüsal Əbdüləzimovun idarə etdiyi “Mercedes” markalı avtomobillər toqquşub.

DİN-in Mətbuat Xidmətinin Bərdə regional qrupundan bildirilib ki, nəticədə hər iki sürücü müxtəlif dərəcəli bədən xəsarətləri alaraq xəstəxanaya çatdırılıblar. Faktla bağlı Bərdə Rayon Polis Şöbəində araşdırma aparılır.

Sabiq səhiyyə naziri Oqtay Şirəliyevin oğlu "Azərsığorta” şirkətinin (Azərbaycan Dövlət Kommersiya şirkəti) rəhbərliyindən istefa verib.

AzadMedia.az "Qaynarinfo"ya istinadən xəbər verir ki, bu ilin aprel ayında "Azərsığorta"nın sədri Fərhad Adıgözəlovun müşaviri təyin olunan Murad Şirəliyev bu vəzifəsindən getməli olub. O, öz istəyi ilə işdən azad edilib.

Qeyd edək ki, Murad Şirəliyev 2000-2015-ci illərdə "Kapital Bank” ASC-nin İdarə Heyətinin üzvü və sədr müavini, 2015-ci ildən 2018-ci ilə kimi isə "Azərbaycan Beynəlxalq Bankı” ASC-də İdarə Heyəti sədrinin müavini vəzifəsində çalışıb. O, ABB-dəki vəzifəsindən də istefa vermişdi.

Londonun Foley küçəsində eyniadlı elit restoranda iki nəfərlik ortabab nahar 70-100 funt sterlinqə (150-220 manata) başa gəlir. Bahalı restoranın sahibələri Müdafiə nazirinin müavini – Əlahiddə Ümumqoşun Ordu Komandanı Kərəm Mustafayevin qızlarıdır. Bu haqda jurnalist Cavanşir Həsənli məlumat yayıb. Dediyinə görə, restoran Londonda fəaliyyət göstərən iki şirkət – FOLEY’S RESTAURANT LIMITED və onun törəməsi olan LONDON GASTRONOMY GROUP LTD tərəfindən idarə olunur. Restoran 2017-ci generalın qızlarının adına rəsmiləşdirilib. //Reportyor.info//

Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinin dəvəti ilə MDB dövlət başçılarının iclasında iştirak etmək üçün dekabrın 26-da Sankt-Peterburq şəhərinə işgüzar səfərə gedib.

Sankt-Peterburq şəhərinin Pulkovo-2 hava limanında dövlət başçısını Sankt-Peterburq şəhərinin qubernatoru Aleksandr Beqlov, Leninqrad vilayətinin qubernatoru Aleksandr Drozdenko və digər rəsmi şəxslər qarşılayıblar.

Təshil nazirinin müavini Muxtar Məmmədov özünə Şüvəlan qəsəbəsində 3 mərtəbəli villa tikdirib.

DİA.AZ xəbər verir ki, bu barədə Faktemdia.az məlumat yayıb.

Geniş həyətyanı sahəyə sahib olan villada yaşayışın olmadığı iddia edilir.

Nazirlikdən sözügedən məsələnin onların səlahiyyətinə daxil olmadığı bildirilərək, yayılan məlumata münasibət bildirilməyib.

Qeyd edək ki, Muxtar Məmmədov 2005-2013-cü illərdə Xarici İşlər Nazirliyində çalışıb və ikinci katib vəzifəsinədək yüksəlib.

2013-cü ildən isə Təhsil Nazirliyində çalışır. Nazirliyin Beynəlxalq əməkdaşlıq şöbəsində sektor müdiri, müdir müavini və şöbə müdiri vəzifələrində işləyib. 2018-ci ilin yanvar ayından isə Aparat rəhbəri vəzifəsini müvəqqəti icra edirdi. Hazırda o, təhsil nazirinin müavini vəzifəsini yerinə yetirir.

Zorla əllərindən alınaraq Şərurlu İsfəndiyara hədiyyə edilən restoranı Pənahov qardaşları geri ala biləcəkmi?

Valyuta.az-a Naxçıvanda baş verməyən, amma Naxçıvanla, daha doğrusu Vasif Talıbovun oğlu Rza Talıbovun biznesi ilə bağlı daha bir xəbər daxil olub.

Bu dəfə mövzu uzun müddət adı müxtəlif qalmaqallarla hallanan "Flamingo" restoranıdır. Söhbət restoranın əsl sahiblərindən - "Laba" ləqəbi ilə tanınan Sədərək Gömrük Komitəsinin keçmiş rəhbəri Mübariz Pənahov və onun qardaşı Səfər Pənahovun əlindən zorla necə alınmasından gedir.

Mənbəmiz bildirir ki, Mübariz Pənahov və Vasif Talıbov arasında münasibətlərin gərginləşməsinin əsl səbəbkarı "Şərurlu İsfəndiyar" kimi tanınan İsfəndiyar Axundov olub. "Laba" Sədərək Gömrük Məntəqəsində "Şərurlu İsfəndiyar"ı sıxışdırdığı və maşınlarının gömrükdən keçməsini qadağan etdiyi vaxt, sonuncu bunun qisasını almaq üçün fürsət axtarır. Nəticədə "Laba"nın yanındakı etibarlı adamlardan birini pulla ələ alır. Və həmin adam İsfəndiyara məlumat sızdırır.

Bir müddət sonra "Flamingo" restoranında iki qardaş arasında elə bir söhbət olur ki, bu söhbət hər iki qardaşın gələcək taleyinə təsir edir. Səfər Pənahovun Vasif Talıbov və qardaşı Məhərrəm Talıbov haqqında Mübariz Pənahovla etdiyi söhbətin səsyazısı "Şərurlu İsfəndiyar"a təqdim edilir. Həmin söhbət zamanı Səfər Pənahov Məhərrəm və Vasif Talıbovları ağır söyüşlərlə təhqir edir.

"Şərurlu İsfəndiyar" səs yazısını Vasif Talıbovun stolunun üstünə qoyur. Nəticədə "Laba" və Vasif Talıbov arasındakı düşmənçiliyin də əsası qoyulur. Bundan sonra Səfər Pənahov heç bir günahı olmadan həbs olunur. Mübariz Pənahov isə vəzifəsindən çıxarılır.

"Flamingo" restoran bir qəpik ödənilmədən qardaşların əlindən alınır və xidmətləri müqabilində "Şərurlu İsfəndiyara" hədiyyə edilir. "Şərurlu İsfəndiyar" isə Sədərək Gömrüyündəki maşınlarının daha bol qazanc gətirməsi naminə böyük addım atır. O, "Flamingo" restoranını Rza Talıbova hədiyyə edir.

Valyuta.az

Bakı (Az 1072) Nərimanov rayonu, Aşıq Alı küçəsi, ev7/19,mən.,141- ünvanda yaşayan Məmmədova Gülsüm Əsgər qızı tərəfindən ölkə rəhbərliyinə müraciət ünvanlanıb. Bir nüsxəsi də DİA.AZ-a daxil olan müraciətdə deilir:

"Çox hörmətli cənab Prezident! Son 27 il ərzində Naxçivan Muxtar Respublikasında Talıbov Vasif və Məhərrəm qardaşlarının törətdiyi cinayətlərin sayı-hesabı yoxdur desək yanılmarıq. Bu dəstənin əlindən əziyyət çəkən Naxçıvanda yaşayan minlərlə ailələrdən biri də bizim ailəmiz olub. Belə ki, 1957-ci ildə Naxçivan şəhərində anadan olmuş həyat yoldaşım Məmmədov Vahid Rza oğlu 1984-cü ildə Heydər Əliyev prospekti 17-də tikilib istifadəyə verilmiş "Təbriz" hotelinin yanındakı "Təbriz" restoranında 1983-cü ildən 1989-cü ilə kimi əsas işçisi kimi sənədləşdirilərək işləmiş, daha sonra isə1990- 2003-cü ilin dekabrın 26-dək tək sahibi olmuşdur. Vahid "Təbriz" restoranını yenidən qurmuş, bütün lazım olan avadanlıqlarla, mebellərlə, xalçalarla tam təchiz etmişdir. 1993-cü ilədək restoran kimi fəaliyyət göstərsə də, 1994-2004-cü ilədək bu restoran Naxçivan şəhərində ən böyük ( 600 yerlik ) şadlıq evi kimi də fəaliyyətini davam etdirmişdir.
Vahidin restoranı 1990-1993-cü illər ərzində Ulu Öndərin şəxsi tapşırığı əsasında Naxçivana gəlmiş rəsmi qonaqlara da xüsusi xidmətlər göstərmişdir, tədbirlərin keçirilməsinə şərait yaratmışdır. Bunun üçün Vahid müəllim Almaniyadan dəyəri 20000 dollara olan xüsusi çılçıraqlar, İrandan ən böyük ölçülü, bahalı xalılar, Rusiyadan böyük gücə malik generatorlar, avadanlqlar gətirib şadlıq evini zənginləşdirmişdir. Elə həmin şadlıq evində Vasif Talıbovun bacısının, qardaşının da toy məclisləri təşkil edilmişdir. Lakin çox təəsüflər olsun ki, 2003-cü ilin dekabrın 26-da növbəti toy mərasiminin keçirilməsinə hazırlıq görüldüyü zaman Vasif Talıbovun qardaşı Məhərrəm Talıbov bir dəstə qolu zorlu qoçularla şadlıq evinə daxil olaraq işləri dayandırmış və şəxsi heyətin dərhal restoranı tərk etmələri tələb olunmuşdur. Qapılar içəridən bağlanmış və Məhərrəmin 10 nəfərlik quldur dəstəsi soyğunçuluğa başlamışdır. Yəni, seyfdə olan bütün sənədlər, pul, şəxsi əşyalar yağmalanmış və bu günə qədər qaytarılmamışdır. Elə həmin günü quldur dəstəsi restoranın bütün qapılarının kilidlərini dəyişmiş, mühafizəni gücləndirmişlər. Təlaşa düşən restoran işçilərinə və kimsəyə heç bir açıqlama vermədən zoraçılıqla şadlıq evini ələ keçirmişlər.
Xatırladaq ki, uzun müddət Vahid Məmmədov "Təbriz" restoranını işlətdiyinə görə Naxçıvanda o "Təbriz Vahid" ləqəbilə tanınırdı. Belə bir zoraçılıq və əmlakının Talıbovlar tərəfindən ələ keçirilməsindən sonra 2004-cü ilin əvvəlində ona edilən müxtəlif təzyiqlərdən sonra Vahid Məmmədov evini-eşini tərk edərək Naxçivandan Bakıya köçməli olmuşdur. Bu dəhşətli hadisədən sarsılan Vahid ürək əməliyyatı keçirmiş, şəkər xəstəliyinə tutulmuşdur. Vahidə təzyiqlə onun Naxçivanda yerləşən ata yurdu olan evini də məcbur edib dəyər dəyməzinə satdırmışlar ki, bir daha Naxçivana qayıtmaq fikrinə düşməsin. 2016-cı ilin əvvəlində Vahid qəfil olaraq 59 yaşında dünyasını dəyişmişdir.
Çoxhörmətli, cənab Prezident Bir daha nəzərəinizə çatdırmaq istəyirik ki, ailəmizin büdcəsi və uzun müddət sahibkarlıq fəaliyyəti zamanı əldə etdiyi və qurub yaratdığı "Təbriz" restoranının genişləndirlməsi, təchizatı, işçilərin saxlanması, təmiri, və s. işlərin görülməsi üçün qurub yaratdığı bir obyektin Talıbov Vasif və Məhərrəm tərəfindən heç bir səbəb göstərilmədən zoraçılıqla əlindən alınması ailəmizə məxsus şəsxi mülkiyyətə qəsb hesab olunur. Və Sizdən çox xahiş edirik ki, "Təbriz" - indiki "Zümrüd" restoranının simasız quldurlardan alınaraq ailəmizə qaytarılması üçün DTX rəisi cənab Əli Nağıyevə göstəriş verəsiniz ki, məsələ yerində araşdırılsın və bu illər ərzində ailəmizə dəymiş ziyan tam ödənilməklə, obyekt ailəmizin mülkiyyətinə qaytarılsın. Əvvəlcədən ailəmizin adından minnətdarlığımızı bildiririk".

İddia olunanlarla bağlı dia.az olaraq qarşı tərəfi də dinləməyə hazırıq...

Xəbər verildiyi kimi dekabrın 23-də İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti dövlət satınalmalarında ciddi qanun pozuntusu ilə əlaqədar Baş Prokurorluğa müraciət edib. Buna səbəb isə müxtəlif dövlət qurumlarından daxil olmuş yekun protokollar təhlil edilərkən elektron satınalma vasitəsilə keçirilmiş açıq tenderlərdə iştirak üçün bəzi dövlət orqanları adından təqdim edilən sənədlərin sahibkarlar tərəfindən saxtalaşdırılmasına dair əsaslı şübhələr müəyyən edildiyi göstərilir.

Qeyd edək ki, Dövlət Xidmətinin yaydığı məlumatda son dövrlər mətbuatın gündəmindən düşməyən onlarla şirkətin adı çəkilir. Hansı ki, elə mətbuatda Dövlət Xidmətinin adlarını hallandırdığı MMC-lərin dövlət məmurlarına ya dolayısı ilə, ya da birbaşa bağlılığı barədə konkret faktların olduğu barədə məlumatlar açıqlanıb. Amma nədənsə Dövlət Xidməti satınalmaların dövlət qurumları tərəfindən deyil, sahibkarlar tərəfindən saxtalaşdırıldığını ortaya çıxarıb.

İstehlak Bazarına Nəzarət Dövlət Xidməti tərəfindən yayılmış bu xəbərdən sonra Aktualinfo.org-a tamamilə fərqli məlumatlar daxil olub. Belə ki, verilən məlumatllarda satınalmaların çoxunun dövlət qurumları ilə sahibkarların əvvəlcədən razılaşmaları əsasında keçirildiyi bildirilir. Buna sübut kimi isə illərdir fəaliyyət göstərən, maddi texniki bazaları olan şirkətlərin satınalmalarda iştirakının müşkülə çevrilməsi, amma yeni dövlət qeydiyyayına alınmış bir nəfərə məxsus şirkətlərin bir neçə ay ərzində onlarla satınalmaların qalibi olması göstərilir. Bununla bağlı son diqqət çəkən MMC-nin fəaliyyətini araşdırdıq.

Şəmkir rayon İcra Hakimiyyəti başçısını Dəllər qəsəbə inzibati ərazi dairəsi üzrə nümayəndəliyinin Sarıtəpə kəndində mövcud fərdi yaşayış evlərinin damlarının cari təmiri işlərinin satın alınması üzrə keçirdiyi kotirovka sorğularının nəticələri dekabrın 23-də açıqlanıb. Dövlət satınalmalarının vahid internet portalına yerləşdirilmiş məlumata görə nümayəndəlik “MM İNŞAAT GROUP” Məhdud Məsuliyyətli Cəmiyyəti ilə 32 857.8 manat məbləğində satınalma müqaviləsi bağlayıb.

Açıq mənbələr üzərindən apardığımız araşdırmalar zamanı məlum oldu ki, MMC satınalmalarda iştirak etmək üçün heç bir kriteriyaya cavab vermir. “Dövlət Satınalmaları Haqqında” Azərbaycan Respublikası Qanununun tələblərinə isə ümumiyyətlə uyğun gəlmir. Belə ki, MMC-nin müvafiq sahədə peşəkarlığını, təcrübəsini, ixtisas göstəricilərini, texniki və maliyyə imkanlarını, işçi qüvvəsini, idarəetmə səriştəsini, etibarlığını təsdiqləyən heç bir məlumat yoxdur. Amma dövlət satınalmalarının vahid internet portalına yerləşdirilmiş məlumata görə sözügedən MMC son səkkiz ayda ayrı-ayrı dövlət qurumları tərəfindən keçirilmiş 13 müsabiqənin qalibi olub. Ümumi olaraq 484 439 manat məbləğində dövlət sifarişi alıb. Kimə məxsusdur bu MMC?

Kommersiya qurumunun hüquqi şəxslərin dövlət reyestrinə daxil edilmiş məlumatlarında “MM İNŞAAT GROUP” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Kiçik Sahibkarlıqla İş üzrə Baş İdarəsində 26.11.2021-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanının BAKI ŞƏHƏRİ NƏRİMANOV RAYONU, N. NƏRİMANOV, ev 5D, qanuni təmsilçisinin isə Ağayev Mirkamal Əhməd oğlu olduğu göstərilir.

MMC Şəmkir rayonunda fərdi yaşayış evlərinin damlarının cari təmiri, Sabirabad şəhərində yaşayış binalarının əsaslı təmiri, Biləsuvarda yaşayış binalarının əsaslı təmiri işləri, Beyləqanda mənzil fondunun əsaslı təmiri, Bərdədə qeyri yaşayış binalarının əsaslı təmiri, Lənkəranda Reabilitasiya Mərkəzinin inzibati binasında cari təmir, Gədəbəydə xəstəxananın tikili və avadanlıqların cari təmiri, Ağsu xəstəxanasında sair torpaq, tikili və avadanlıqların cari təmir işləri kimi müsabiqələrin qalibi olub. Bəs bu MMC adıçəkilən rayonlarda aldığı sifarişləri necə həyata keçirir? Bir birindən yüz kilometrlərlə aralı olan bu rayonlarda iş görməyə MMC-nin maddi texniki bazası varmı? Həmin işləri rayonlarda, yerli sahibkarlar həyata keçirə bilməzmi? Qeyd etdiyimiz kimi texniki imkanları və işçi qüvvəsi olmayan MMC-nin qalib olması satınalmalarda qiymətlərin şişirdilməsi üçündür.

Əldə etdiyimiz məlumatlara görə MMC rəhbərləyi kotirovka sorğusunu keçirən dövlət qurumu ilə əvvəlcədən danışığa gedir. Rayonlarda yaşayış binalarının, evlərin damlarının, mənzil fondunun təmiri işləri demək olar ki, aparılmır. Aparılsa da kosmetik işlər görülür. Vəsaitlərin müəyyən hissəsi “otkat” olaraq qaytarılır. Qalan vəsaitə kosmetik işləri görmək üçün hər rayonda kifayət qədər günəmuzd işləyən fəhlə tapmaq mümkündür. MMC rəhbərliyi də dövlət sifarişlərini məhz bu üsulla həyata keçirir. Yəni heç bir sosial ödəniş etmətdən, vergi vermədən.

“MM İNŞAAT GROUP” Məhdud Məsuliyyətli Cəmiyyətinin qanuni təmsilçisi Mirkamal Ağayevin adına daha bir MMC-də var. Bu MMC isə ötən il, dövlət qeydiyyatına alındıqdan cəmi iki ay sonra satınalma müsabiqəsinə qatılıb və iki ay ərzində 4 kotirovka sorğusu üzrə ümumi olaraq 132 484 manat məbləğində dövlət sifarişi alıb.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “MM İNŞAAT COMPANY” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Kiçik Sahibkarlıqla İş üzrə Baş İdarəsində 17.08.2021-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanının BAKI ŞƏHƏRİ, YASAMAL RAYONU, XAQAN DADAŞOV, ev 30, m. 1, qanuni təmsilçisinin isə Ağayev Mirkamal Əhməd oğlu olduğu göstərilir.

Göründüyü kimi bir nəfərin qanuni təmsilçisi olduğu iki MMC son bir il ərzində dövlətdən 616 923 manat məbləğində sifariş alıb. Burada bəzi suallar ortaya çıxır. 2021-ci ildə 4 satınalmanın qalibi olan “MM İNŞAAT COMPANY” MMC nədən 2022-ci ildə heç bir satınalmanın qalibi olmayıb? Nədən Mirkamal Ağayev 2022-ci ildə birdən-birə “MM İNŞAAT GROUP” MMC-yə üstünlük verib? Çünki MMC-nin qalibi olduğu satınalmalarda şəffaflıq olmayıb, bir çoxu saxtalaşdırılıb. Ona görə də “MM İNŞAAT GROUP” MMC-yə keçib.

Odur ki, Antiinhisar və İstehlak Bazarına Nəzarət Dövlət Xidməti bu MMC-lərin fəaliyyətlərini də araşdırsa lap yaxşı olardı. MMC-lərin hansı məqsədlər üçün yaradıldığı üzə çıxardı. “Otkat” üçün, yoxsa…

Aktualinfo.org