Xəbər verdiyimiz kimi, Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan “Avropa siyasi birliyi” Zirvə Toplantısında iştirak etmək üçün Praqaya səfər ediblər.

Prezidentlərin “Azadlıq radiosu”nun jurnalisti ilə maraqlı dialoqu olub. Belə ki, İlham Əliyev jurnalistin təmsil etdiyi media orqanının adını eşidərkən zarafatla “Bunlar “SOROS”çulardır. Tanımıram sizi. “SOROS”a salam söylə bizdən. “SOROS”a de ki, biz burada da qardaşıq” deyib.

İlham Əliyev daha sonra jurnalistin suallarını cavablandırıb.

Jurnalistin “Nikol Paşinyan deyir ki, Azərbaycan Qarabağ erməniləri ilə danışıqlar aparmalıdır” sualına Prezidentin cavabı belə olub:

“Qarabağ erməniləri bizim vətəndaşlarımızdır, biz onlarla nə vaxt danışacağımızı özümüz bilərik. Bilirsiniz ki, bu gün görüş olacaq: Şarl Mişel, Emmanuel Makron, Paşinyan və mən. Bu görüşün nəticələri ümid edirəm ki, müsbət olacaq, irəliləyiş olacaq".

Baş prokuror yanında Korrupsiyaya qarşı Mübarizə Baş İdarəsinə daxil olmuş vətəndaş müraciətləri əsasında həyata keçirilmiş təxirəsalınmaz əməliyyat-axtarış tədbirləri nəticəsində Lənkəran Rayon İcra Hakimiyyəti başçısı Aparatının Memarlıq və Tikinti şöbəsinin müdiri – baş memar Abdullayev Elgün Əzizulla oğlu və Lənkəran Şəhər Rayonlararası Psixiatriya xəstəxanasının şöbə müdiri Nuriyev Nəsrəddin Şahrza oğlu xidməti vəzifələrinin icrası ilə bağlı vətəndaşlardan rüşvət alarkən cinayət başında yaxalanıb.

Bu barədə Baş Prokurorluq məlumat yayıb. Məlumata görə, əməliyyat tədbirləri ilə Elgün Abdullayevin qeyd olunan vəzifədə işləyərkən rayon ərazisində yerləşən torpaq sahələri üzərində tikilmiş fərdi-yaşayış evi və qeyri-yaşayış sahələri ilə bağlı sənədləşmənin aparılmasına, eləcə də həmin sahələrin layihələrinin rəhbərlik etdiyi şöbədə təsdiq edilməsi üçün ona müraciət etmiş ayrı-ayrı vətəndaşlardan müxtəlif məbləğlərdə rüşvət tələb edərək almasına dair əsaslı şübhələr müəyyən edilmişdir.
Eləcə də, həyata keçirilmiş əməliyyat tədbirlərinin digər istiqaməti üzrə rayonlararası Psixiatriya xəstəxanasının şöbə müdiri Nəsrəddin Nuriyevin qeyd olunan vəzifədə işləyərkən vətəndaşa xəstəliklə əlaqədar epikrizin təqdim edilməsi, eləcə də məzmununa bilə-bilə saxta məlumatlar daxil etdiyi tibbi sənədlərin həmin şəxsə əlillik dərəcəsinin təyin edilməsi məqsədilə müvafiq elektron sistemə göndərilməsi müqabilində ona müraciət etmiş sonuncunun qohumundan rüşvət almasına dair əsaslı şübhələr müəyyən edilmişdir.
İş üzrə toplanmış kifayət qədər sübutlar əsasında Cinayət Məcəlləsinin müvafiq maddələri ilə cinayət işləri başlanmış, Elgün Abdullayevə həmin Məcəllənin 311.3.2 (rüşvət alma- təkrar törədildikdə) maddəsi ilə ittiham elan edilməklə barəsində məhkəmənin qərarı ilə həbs qətimkan tədbiri, Nəsrəddin Nuriyevə isə 311.1 (rüşvət alma) və 313-cü maddələri (vəzifə saxtakarlığı) maddələri ilə ittiham elan edilməklə yaşının çox olmasını nəzərə almaqla barəsində məhkəmənin qərarı ilə ev dustaqlığı qismində əsas, vəzifədən kənarlaşdırma qismində əlavə qətimkan tədbiri seçilmişdir.
Hazırda təqsirləndirilən şəxslərin eyni xarakterli əməllərindən zərər çəkən çoxsaylı vətəndaş müraciətlərində göstərilən digər xüsusatlar ətrafında əməliyyat-istintaq tədbirləri davam etdirilir.
Qeyd edilən şəxslərin qanunazidd əməllərinə məruz qalmış vətəndaşlardan Baş Prokurorluğun “961” Çağrı mərkəzinə, Baş prokuror yanında Korrupsiyaya qarşı Mübarizə Baş İdarəsinin “161-Qaynar xətt” əlaqə mərkəzinə, eləcə də sosial şəbəkələrdəki səhifələrinə müraciət etmələri xahiş olunur.

Vətəndaş Hüseynova Sevda Gəray qızı yaşadığı evin mülkiyyət hüququnu təsdiq edən sənədi almaqda çətinliklə üzləşib.

Bu barədə "Unikal"a müraciət edən S. Hüseynova bildirib ki, o Bakı şəhəri, Müslüm Maqomayev küçəsi ev 89 ünvanında yerləşən 2 mərtəbəli fərdi yaşayış evində qalır:

"Artıq 3 ildir ki, evin mülkiyyət hüququnu təsdiq edən sənədi İçərişəhər Dövlət Tarixi-Memarlıq Qoruğu İdarəsindən ala bilmirəm. Məsələ ilə bağlı 2019-cu ildə məhkəmə prosesi baş tutub. Lakin Qoruq İdarəsi məhkəmənin sorğusuna cavab olaraq idarədə sözügedən ünvanla bağlı məlumatın olmamasına dair məhkəməyə cavab təqdim edib.

Buna baxmayaraq, 2020-ci ilin yanvar ayının 24-də İdarənin Orxan adlı əməkdaşı sözügedən ünvana məxsus olan sənədi bizə rəsmi görüş zamanı nümayiş etdirib. Bundan sonra ərizə yazaraq həmin sənədin sürətini əldə edə biləcəyimi dedilər. Lakin İdarənin 5 fevral 2020-ci il tarixli cavab məktubunda həmin sənədin konfendensial olduğu və mənə məxsus olmaması haqqında cavab məktubu təqdim edilib.

Daha sonra Həqiqətin aydınlaşdırılması məqsədilə Mülkün kimin adına olması haqqında idarəyə əlavə sorğularla müraciət olunub. Lakin idarə bu dəfə də sorğuya düzgün cavab təqdim etməkdən yayınıb. Belə ki, sözügedən qurum mülkün kimin adına olması haqqında yox, həmin mülkün pasportunun hansı mühəndis tərəfindən tərtib olunması haqqında təkrar cavab məktubları təqdim edib", - deyə o qeyd edib.

"Unikal"

Azərbaycanda çap mediasında ciddi dəyişikliklər aparılır. Xəbər verdiyimiz kimi, ötən ay Prezident İlham Əliyevin fərmanı ilə çap mediası subyektinin təsisçisi ola bilən dövlət orqanlarının (qurumlarının) siyahısı təsdiqlənib.

Ölkə başçısının müvafiq fərmanından sonra sözügedən siyahıda yer almayan dövlət qurumlarının təsisçisi olduğu çap mediası subyektlərinin taleyi məsələsi gündəmə gəlib. Belə ki, fərmanda yalnız 10 dövlət qurumunun adı əks edilib:

1. Prezidentinin İşlər İdarəsi, 2. Elm və Təhsil Nazirliyi, 3. Ədliyyə Nazirliyi, 4. Müdafiə Nazirliyi, 5. Daxili İşlər Nazirliyi, 6. Mədəniyyət Nazirliyi, 7. Dövlət Sərhəd Xidməti, 8. Dövlət Neft Şirkəti, 9. Milli Elmlər Akademiyası, 10. Dövlət İmtahan Mərkəzi.

Bəs digər çap subyektlərinin aqibəti nə olacaq? Onlar bağlanacaqmı?

Bu qərarın mahiyyətini saytımıza şərh edən media məsələləri üzrə ekspert, hüquqşünas Ələsgər Məmmədli qeyd edib ki, fərmanın məqsədi əslində bu il qüvvəyə minmiş “Media haqqında” qanunun 59-cu maddəsinin tələbləri çərçivəsindədir, onu təmin etmək məqsədi daşıyır: “Qanunun 59-cu maddəsində qeyd olunur ki, siyahısı müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilən orqanlar (qurumlar), Milli Məclis, Konstitusiya Məhkəməsi və Ali Məhkəmə istisna olmaqla, digər dövlət orqanları (qurumları) çap mediası subyektinin təsisçisi ola bilməzlər. Məhz bu qurumların siyahısı Prezident İlham Əliyevin 17 sentyabr tarixində imzaladığı fərmanda yer alıb”.

Ekspert qeyd edib ki, bu fərman onu göstərir ki, bu günə qədər rayon İcra Hakimiyyətlərinin təsis etdiyi və ya “saxladığı” bir çox media qurumlarının legitimliyi qalmır.

MEDİA Agentliyin Kommunikasiya Şöbəsinin müdiri Səidə Şəfiyeva vurğulayıb ki, qeyd edilən siyahıda adları göstərilməyən mərkəzi və yerli icra hakimiyyəti orqanları tərəfindən bu günədək təsis edilmiş qəzetlərin redaksiyaları öz qərarları əsasında təsisçi dəyişikliyi həyata keçirməklə fəaliyyətlərini davam etdirə bilərlər: ““Media haqqında” Qanunun tələblərindən biri kimi çap mediası subyekti təsis edə bilən dövlət orqanlarının sayının məhdudlaşdırılması özəl media subyektlərinin rəqabət qabiliyyətinin artırılması və onların biznes strukturu kimi formalaşdırılması istiqamətində dövlətin atdığı növbəti addımdır”.
O, bildirib ki, məhdud sayda dövlət orqan və qurumunun çap mediası subyekti təsis etmək hüququna malik olması dövlətin mediaya təsir imkanlarını minimuma endirərək media subyektlərinin azad bazar iqtisadiyyatı şəraitində bərabərhüquqlu tərəflər kimi fəaliyyət göstərməsinə imkan yaradır.

“Qafqazinfo”

"Təəssüf ki, son dövrlər orta məktəblərdə analoji xoşagəlməz durumlar vüsət alıb. Bu isə onu deməyə əsas verir ki, orta ümumtəhsil müəssisələrində tədrisin keyfiyyəti olduqca aşağıdır".

Bu sözləri "Sherg.az"a təhsil üzrə ekspert Elçin Əfəndi Bakının 48 saylı məktəbində şagirdlərin sinif otağında yemək bişirməsi ilə bağlı danışarkən deyib. Onun sözlərinə görə, artıq beyinlərdə elə bir fikir formalaşır ki, şagirdlərin məktəbə gedib-gəlmə səbəbləri sonda sadəcə müvafiq dövlət sənədinin əldə olunmasından ibarətdir:

"Demək olar ki, respublikanın əksər məktəbində sözügedən mənzərə ilə bağlı faktlar mövcuddur. Ölkədə 1 milyon 600 mindən çox şagird təhsil alır. Onların hər biri fərqli psixologiyadadır. 9-10-11-ci siniflərin əksəriyyəti isə məktəblərdə olmurlar. Dərslərdə iştirak edənlər də məhz bu kimi hallara yol verən fərdlərdir. Onların oxumağa meyilləri yoxdur. Daim dərsləri bölməyə, nizam-intizam qaydalarını pozmağa cəhd göstərirlər. Bu cür davam etməklə yenilik əldə oluna bilməz. Şagirdlərin uyğunsuz hərəkətləri, kənara çıxma hallarına yol vermələri xoş mənzərə təsiri bağışlamır".

Qeyd edək ki, Bakının 48 saylı məktəbində şagirdlərin sinif otağında yemək bişirməsi ilə bağlı görüntülər yayılıb. Müəssisədən verilən məlumata görə, həmin videogörüntü ötən tədris ilində çəkilib. Məsələdən xəbər tutan məktəb rəhbərliyi müvafiq tədbirlər görüb, sinif rəhbəri, valideyn və uşaqlarla söhbətlər aparılıb. Sinif rəhbəri dəyişdirilib. Videonu çəkən şagird isə sinifdə qaldığı üçün ötən dərs ilinin sonunda məktəbdən çıxıb.

Müdriklər deyir ki, hər kəs öz dilinin altında gizlənib, ağzını açıb danışan kimi hər şey bəlli olur. Bu müdrik kəlamı belə də ifadə etmək olar: Hər kəs öz tərcümeyi-halında gizlənib. Ona görə də Gündəlik-Bakı olaraq kimdən yazırıqsa, mütləq onun tərcümeyi-halını diqqətlə təhlil edirik, onun karyerasına nəzər salırıq. Bu günkü “qəhrəman”ımız bir neçə ay öncə vəzifəsindən azad edilən, polis işçisinə "Sən nə qanmaz adamsan" deyən, Dövlət Gömrük Komitəsinin sabiq sədri, Səfər Mehdiyevdir.

Səfər Mehdiyev 1973-cü ildə Naxçıvanda anadan olub. Rəsmi tərcümeyi-halında yazılıb ki, orta məktəbdən sonra həqiqi hərbi xidmətdə olmuşdur. Səfərin orta məktəbi bitridiyi 1990-91-ci illər Qarabağda qanlı müharibənin getdiyi illər olub. Görəsən, Səfər harada, hansı cəbhədə qulluq edib..? Və neçənci illərdə..? Niyə Səfər tərcümeyi-halında bunu gizlədir..? İkincisi, yazır ki, Səfər orta məktəbdən sonra Nehrəm kəndində "kolxoz"da fəaliyyətə başlamışdır. O illərdə "kolxoz"lar artıq ləğv olunurdu. Görəsən, Səfər "kolxoz"da nə işində çalışıb..? Həm də rəsmi tərcümeyi-halında orta məktəbdən sonra həqiqi hərbi xidmətdə olduğu yazılır. Bəlkə, Səfər "kolxoz"la hərbi xidməti səhv salır..? Deməli, Səfər savadsız şagird olub ki, dünyanın düz vaxtında nəinki ali məktəblərdən birinə, heç texnikuma da qəbul olunmayıb. Bəs necə oldu ki, bu savadsız Səfər bir neçə il sonra Türkiyənin Egey Universitetinin Beynəlxalq İqtisadi Əlaqələr fakültəsini bitirdi ? Kolxoz hara, Egey universiteti, Beynəlxalq İqtisadi əlaqələr hara..? Axı, elementar məntiq deyilən bir anlayış var. Hətta texnikuma girə bilməyən biri necə oldu ki, Türkiyədə universitetə daxil ola bildi..? Bu hələ harasıdır..? Nehrəm "kolxoz"undan Türkiyəyə “uçan” Səfər oranı bitirən kimi Dövlət Gömrük Komitəsində yüksək vəzifəyə təyin olunub. Vallah, belə möcüzəli kadr təyinatları ancaq bizdə ola bilər. Və bir müddət sonra bu adam DGK sədrinin müavini, sonra birinci müavini təyin edilib. Nəhayət 2018-ci ildə DGK-nın sədri vəzifəsinə təyin olunub. Və gömrük xidməti general-polkovnik rütbəsi qazanıb, hətta Allah qoymasa, “Vətənə xidmətə görə” ordenin TAM KAVALERİ olub. Deyirəm nə yaxşı Səfər Mehdiyev MARŞAL olmayıb.

Təsəvvür edirsiniz, harada, neçənci illərdə hərbi qulluqda olduğu bəlli olmayan birisi az vaxtda general-polkovnik rütbəsinə yüksəlib. Səfər Mehdiyev cəmiyyətin yaddaşında rüşvətxor və korrupsioner biri kimi qaldı. Bu hələ harasıdır..? Səfər Mehdiyev həmçinin yerlipərəstlikdə və diskriminasiyada ittiham olunur. Belə ki, komitənin 4.000 əməkdaşının 1400-ündən çoxu Səfər Mehdiyevin doğulduğu Nehrəm kəndindəndir. Təsəvvür edirsiniz, Dövlət Komitəsinin az qala yarısı eyni kənddən və Səfər Mehdiyevin özünün və arvadının qohumları olub. Bəli, 2022-ci ildən başlayaraq DGK-da bir neçə dəfə xüsusi əməliyyatlar keçirildi, generallar, vəzifəli şəxslər saxlanıldı. Və indi növbə Səfər Mehdiyevin özünə çatıb. Bütün proqnozlar onu göstərir ki, yaxın zamanda Səfər Mehdiyev həbs olunacaq. Səfər Mehdiyev bir il öncə özündən razı halda açıqlama verəndə ki, əgər DGK-da 1 FAİZ rüşvət və inhisar halı olsa, istefa verməyə hazıram. Gündəlik-Bakı olaraq o vaxt yazdıq ki, istefa vermək sənin “razmerində” olan məsələ deyil. Ümumiyyətlə, DGK-dakı rüşvət və korrupsiyanın miqyası milyonlarla ölçülürdü.
Təsəvvür edirsiniz, ölkədən çıxarılan əlvan və digər metalların kodunu dəyişməklə, yəni xammalı hazır məhsul kimi qeydə almaqla Səfər Mehdiyev milyonlar qazanıb. Amma dövlət büdcəsinə dəfələrlə artıq ziyan dəyib. Səfər Mehdiyevin Nehrəmdəki, Qusardakı, Şamaxıdakı, Mərdəkandakı, Badamdardakı villalarının, Milli Onkologiya Mərkəzinin yanında supermarketinin, mərasim zallarının, Gömrük Komitəsinin Hospitalının yanındakı diş klinikasının dəyəri ən azı yüz milyon yox ee, milyard deməkdir. Biz hələ Şahbuz rayonunda dağların arasındakı malikanədən danışmırıq. Səfər Mehdiyevin Nehrəmdəki 350 hektarlıq üzüm bağlarının məhsulu şərab üçün istifadə olunur. Səfər Mehdiyevin qardaşı Kazım Mehdiyev üzümçülük təsərrüfatını idarə edir. Səfər Mehdiyevin bacısı oğlu Fərman Əliyev Dövlət Gömrük komitəsinin əməkdaşı, digər bacısı oğlu Əli İsmayılov avtomobillərin gömrük rəsmiləşdirilməsi idarəsinin (rastamoşka) əməkdaşı, digər bacısı oğlu Məhərrəm İsmayılov Gömrük Komitəsi mobil rabitə xidmətinin əməkdaşı idi. Gömrük Komitəsinə işə qəbula, KADRO məsələsinə Səfər Mehdiyevin qayınatası Qulu Tarquliyev rəhbərlik edirdi. Xalası oğlu Vüsal Nuruyev Sınıq körpü gömrük postunun rəisi, Səfər Mehdiyevin bacısının 3 kürəkəni, bacısı oğlu, qaynatası, bacanağları, bibisi və dayısı uşaqları, bir sözlə, 70-ə yaxın qohumu gömrük xidmətində işləyirdi. Qayınları Əli, Zeynal, İlham Tarquliyevlər də məhz Səfər Mehdiyevin sayəsində Bakıda sahibkarlıq fəaliyyəti ilə məşğuldurlar. Çox rahatlıqla xarici ölkələrdən istədikləri qədər mal gətirirlər. Sizcə belə adamlara sərf edərmi ki, sıravi vətəndaşlar ayda bir neçə dəfə xaricdən nələrsə gətirsinlər?
Məsələn, onun Gündüz adlı bacanağı “Babək” və “Orxan-SS” şirkətlərinin sahibidir. O, Hindistandan ölkəmizə idxal olunan camış ətlərinin monopolistidir. Bu gün Gündüzdən başqa heç kim Azərbaycana dondurulmuş ət və ət məhsulları gətirə bilməz. Bu ət inhisarını isə ona bacanağı Səfər Mehdiyev hədiyyə edib. Bəli, Səfər Mehdiyev bu boyda biznes imperiyasını DGK-dan qazandığı yüz milyonların hesabına əldə edib.
Yəqin ki, yaxın zamanda Səfər Mehdiyevin TİFAQ-ını dağıdacaqlar.
P.S. Bu gün bütün monopolislərə qarşı mübarizə aparılmalı və azad ticarət rəqabəti hökmən yaradılmalıdır. //gundelik-baku.com//

Son günlər təhsil sistemindəki neqqativlər sanki bir-birinin ardından ictimailəşdiyindən elə bil təsəvvür də yaranır ki, bu bir kampaniyadır... Əslində həqiqətən də belədir. Baş verənlərə verilən ictimai reaksiyalardan anlaşılan budur ki, həqiqətən də bu bir kampaniyadır... Kampaniyanın başlıca hədəfi və məqsədi isə təhsildəki eybəcərliklərin kökünü birdəfəlik kəsmə istəyidir...

15 sentyabrdan dərslər start götürdü... sanki problemlər də başladı. DİA.AZ-a daxil olan müraciətdə isə bir məktəb direktorunun özünə qurduğu XUDMANİ ŞƏBƏKƏdən bəh edilir.

Söhbət hansısa bir əyalət məktəbindən getmir. Bakıda yerləşən 211 saylı orta məktəbdə baş verənlərə nəzər saalıb təftiş etəsələr, gərəkən cəzanı isə bütün Azərbaycan məktəblərinə KƏSSƏLƏR, o zaman təhsildə bütün problemləri asanlıqla dəf edə bilərik...

Çünki 211 saylı məktəbdə baş verənlər bütün məktəblərdə müşahidə olan problemlərin toplusudur, desək, yanılmarıq... Yəni bu məktəbdə direktor Həcər xanım elə bir şəbəkə qurub ki, onun incəliklərini öyrənib önləyici tədbirləri bütün lorta məktəblərə eyni uğurla tətbiq edə bilərik...

DİA.AZ-a danışan şikayətçilərin ümumi iddialarından belə anlaşılır ki, 211 saylı orta məktəbin direktoru Həcər xanım Mahmudova, onun qara kassası Şəfəq xanım Balıyeva və digərləri əslində bu gün Azərbaycan təhsili adına utancverici bir mexanizmanın sıradan detalları kimi fəaliyyətdədirlər.

Təbii ki, bu fikirlərimiz adlarını çəkdiyimiz şəxslərin şəninə toxuna bilər... Bu, amma hələ Harasıdır? İş hələ irəlidədir və adları çəkilənlər hələ çox olacaq...

ŞƏN məsələsinə gəlincə isə, bu xanım və bəylər illərdir ki, Azərbaycan təhsilinin evini yıxdıqları zaman fikirləşməli idilər... Düşünməli idilər ki, nəhayətdə onların etdikləri ictimailəşə bilər.

Buna isə biz borcluyuq...

DAHA ƏTRAFLI MƏLUMATI TƏQDİM EDƏCƏYİK... Bir orta məktəbdə nələr baş verə bilər... Nələr baş verir... görəcəksiniz...

Bəri başdan bildiririk ki, özünü qarşı tərəf kimi hiss edən bütün tərəflərin mövqelərini böyük məmnuniyyətləı dinləməyə hazırıq...

Elə isə gözünüz bizdə olsun...

Lənkəran şəhərinin zibil poliqonu köhnə Bakı-Astara yolunun yaxınlığında, rayonun Göyşaban kəndinin ərazisindədir. Poliqonun ərazisi 5 hektardan çoxdur. Yerli sakinlərin deməsinə görə, 40 ildən çoxdur ki, şəhərin və ətraf kəndlərin məişət tullantıları ora gətirilir.

Poliqon tullantılarla qalaqlanıb. "AzadlıqRadiosu"nun əməkdaşı ərazidə olarkən zibillik üç-dörd yerdə yanırmış. Tüstü ətrafa yayılıb. Orada mal-qara, donuzlar olub...

Zibilliyin hasarı yoxdur, hər yer açıqdır, onu digər yerlərdən kanallar ayırır. Yaxınlıqda gözətçi budkası diqqəti cəlb edir. Lakin o, danışmaq istəməyib.

"Oradan gələn zəhərli tüstüdən evdə qala bilmirik"
Göyşaban kənd sakini Füzuli Məmmədov deyib ki, zibil poliqonu xəstəlik mənbəyinə çevrilib: "Oradan gələn zəhərli tüstüdən evdə qala bilmirik, xüsusən axşam çağı. Biabırçılıqdır. Həmişə belədir. Dəfələrlə müraciət etmişik, gəlib baxış keçirdiblər. Tüstünün altındayıq. Üfunət qoxusu da bir tərəfdən. Ölmüş itlər, mal cəmdəkləri, nə istəsən orada tapmaq olar. Başqa yer versinlər köçək burdan".

Kəndin digər sakini Qəşəng Əkbərova isə deyib ki, illər keçir, problem həllini tapmır: "Kəndimizdə xəstələr var. Tüstünün əlindən həyətə düşə bilmirlər. Həyətlərdə uşaqlar var, hərə bir cür xəstə. Təmiz hava yoxdur. Avtobusla bazara gələndə pəncərəni bağlayırıq ki, tüstü içəriyə girməsin. Bir çarə qılsınlar".

"Dedilər ki, investisiya proqramı var..."
Adının çəkilməsini istəməyən Lənkəran şəhər sakininin sözlərinə görə, problem dəfələrlə müzakirə olunub: "İcra hakimiyyətinin tədbirində olmuşam. Bu məsələ müzakirə olundu. Poliqon dolub, yerini dəyişməlidirlər. Dedilər ki, investisiya proqramı var, zavodun tikilməsi orada nəzərdə tutulub. Söhbət ondan gedir ki, müasir tələblərə cavab verən yeni zibil poliqonun tikintisi böyük vəsait tələb edir. Lənkəran şəhərinin 50 min əhalisi var. Ətraf kəndlərlə birlikdə əhalinin sayı 60 min nəfərə çatır. Bu zibillik yaşayış evləri ilə əhatə olunub. Bizim üçün utancverici haldır".

Lənkəran şəhər Mənzil İstismar və Kommunal Müəssisələr İdarəsinin müdiri Emin Şahzadənin deməsinə görə də, bu sahəyə investisiya qoyulandan sonra məsələ həllini tapacaq.

Lənkəran şəhər İcra Hakimiyyəti başçısının müavini Vüqar Məmmədov isə yerli mətbuata bildirib ki, ərazidə məişət tullantılarını utilizasiya etməkdən ötrü regional zavodun tikilməsi məsələsi investisiya proqramına salınıb.

Göyşaban kənd sakini Füzuli Məmmədov isə, hələlik, vədlərə bir qədər şübhə ilə yanaşır. Deyir ki, onlara söz yox, iş lazımdır. //AzadlıqRadiosu//

YAP-nın Xaçmaz rayon təşkilatının sədri Məhəmməd Balaqadaşov Xaçmazda özü üçün yeni yanacaq doldurma məntəqəsi inşa etdirir.

AMİA.AZ xəbər verir ki , həmin obyekt Xaçmaz-Quba yolunun 3-cü km də, rayonun Armudpadar kəndi ərazisində yerləşir.

Tikintisinə bir neçə ay bundan öncə başlanılan obyektin özül hissəsindəki işlər artıq yekunlaşmaq üzrədir.

Qeyd edək ki, partiya sədrinin həmin obyekti Xaçmazda tanınmış bir dövlət qulluqçusu ilə şərikli tikdirdiyi bildirilir.

Biznes yoxsa dövlətçilik idealarının təbliği?

Xatırladaq ki, Məhəmməd Balaqadaşov Xaçmazın keçmiş icra başçısı Şəmsəddin Xanbabayevin YAP-nın Xaçmaz rayon təşkilatının sədri vəzifəsindən azad olunduqdan sonra həmin vəzifəyə gətirilib. Vəzifəyə təyin edildikdən sonra isə o hakim partiyanın ideoloji və dövlətçilik ənənələrinin təbliğatı ilə məşğul olmaq əvəzinə biznes platformalarının genişləndirilməsi ilə məşğul olur. YDM –nin inşa edildiyi yer isə sahibkarlıq təyinatlı iaşə obyektlərinin tikilməsi üçün uyğun deyil.

Qeyd edək ki, həmin ərazi vaxtı ilə fərdi vətəndaşa məxsuz yaşayış evi olub. Obyektin tikintisi üçün lazım olan rəyin Dövlət Şəhərsalma və Arxitektura Komitəsindən necə alındığı isə olduqca müəmmalıdır. Bir müddət öncə Məhəmməd Balaqadaşov barəsində onun ləğv edilmiş MTN-in Baş İstintaq İdarəsinin həbsdə olan keçmiş rəisi ilə əlaqələrini, daha doğrusu “Çoban Bulağı” istirahət mərkəzini əhatə edən şərikli biznesini əks etdirən məlumatlar yayılmışdı. Bundan əlavə, əvvəllər vergi işçisi olmuş Məhəmməd Balaqadaşov sonralar MTN generalı ilə, eləcə də Prezident Adminstrasiyasının rəhbərinin kürəkəni ilə qəfil biznes ortaqlığına sahib olub.

P.S. Sözü gedən YDM-də Məhəmməd Balaqadaşovun şərikli biznes sahiblərinin kimliyi barədə isə növbəti yazımızda bəhs edəcəyik.

Qarşı tərəfində mövqeyini dərc etməyə hazırıq… //AMİA.AZ//

Mən sizin bütün faktlarnızı bilirəm, Bakı metropolitenini əxlaqsız yuvasına döndərmisiniz. Özünüz də Fövqəladə Hallar Nazirliyində baş verənlərə gülürsünüz. Amma burada vəziyyət ondan da betər gündədir. Bunlardan metropoliten rəisinin xəbəri var?

"Azərbaycan Reallığı" xəbər verir ki, bu sözləri Bakı metrosunun Ulduz stansıyasında təmizlikçi işləyən və hal-hazırda qanunsuz olaraq işdən azad olunmuş Xanbabayeva Sevil deyib. O, jurnalistlərdən onun başına gətrilən haqqsızlıqın ictimailəşdirilməsini xahiş edib.

O videoçıxışı zamanı qeyd edir ki, metroda 10 işçinin 9-nu Rafel adlı şəxsın 3 millyonluq bağına göndərirlər, orada onun dəyəri yüzminlərlə olan ağaclarını əkib-becərirlər. Bir ağacın qiyməti 4 min manatdır.

Mən süpürgəçi işləyirəm, əzab-əziyyətlə övlad böyüdürəm, indi də süpürgəmi əlimdən almaq istəyirlər. Bu işdə məni çox görürlər. Bir işçi 3-4 adamın işin görür, amma işçiyə dəyər vermirlər.

Mən bilmirəm bunlara nə etmişəm.

Mənə zülüm edirlər, səsmi çıxara bilmirəm ki, bala böyüdürəm, bala oxuduram, bütün övladlarmın yükü mənim çiynimdədir. Gedib-gəlib məni şantaj edirlər. Xahiş edirəm bütün jurnalistlərdən və qələm əhlindən. Mənə kömək edin, çıxılmaz durumdayam deyə sonda Sevil Xanbabayeva bildirib

"Azərbaycan Reallığı", adı çəkilən qarşı tərəfin mövqeyini dərc etməyə hazırdır.

Daha ətraflə videoda

AZƏRBAYCANREALLIĞI.COM