“Əksər MTK binalardakı internet xidmətinin təşkili ilə bağlı açıq-aşkar haqsız rəqabət mühiti formalaşdırıblar. “Bir bina bir provayderindir” prinsipi ilə işləyirlər”.

Bunu Azərbaycan İnternet Forumunun rəhbəri Osman Gündüz sosial şəbəkə hesabında yazıb.

O qeyd edib ki, provayderlər heç nədən çəkinmirlər: “Nə qədər inanılmaz olsa da, reallıq odur ki, adi bir MTK rəhbəri o nəhənglikdə Antiinhisar Dövlət Xidmətindən çəkinmir. MTK-lar yeni yaşayış binasını təhvil verməzdən öncə yalnız bir provayderi dəvət edərək separat sövdələşmə edirlər. Bu sövdələşmə ilə adətən hər bir müştəriyə görə MTK sahibi provayderdən 2 manat alır. Vəssalam. Bununla da MTK sahibi provayder və ya kabel operatoru qarşısında öhdəlik götürür ki, həmin binaya yer-göy dağılsa da başqa provayderi buraxmayacaq”.

O. Gündüz qeyd edib ki, bununla da həmin binada yalnız bir provayderin xidmətini almaq imkanı yaranır və orada yaşayanların seçim imkanları süni şəkildə məhdudlaşdırılır, xidmətin keyfiyyəti üçün stimul formalaşmır: “MTK-lar bu cür haqsız davranışla həm də provayderlər arasında sərbəst və azad rəqabəti pozmuş olurlar. Antiinhisar Dövlət Xidmətinin, RİNN-in və digər aidiyyəti qurumların bundan xəbəri varmı? Əlbəttə, var. Lakin bunun qarşısını almaq üçün heç bir real addımlar müşahidə olunmur. Antiinhisar Dövlət Xidməti və RİNN monitorinq aparmalıdır. Yeni yaşayış binalarındakı internet inhisarçılığının, haqsız rəqabətin qarşısını almaq üçün ciddi ahtiinhisar tədbirləri görülməlidir. Problemi kökündən həll etmək üçün qanunvericilikdə müvafiq dəyişikliklər edilməlidir”.

Osman Gündüzün sözlərinə görə, yeni tikilmiş yaşayış kompklekslərində, biznes mərkəzlərində öncədən ən azı 3 provayderin və ya kabel operatorun fəaliyyəti üçün imkanlar yaradılmalıdır. Binaların istismara verilməsindən öncə digər kommunal xidmətlərin təhvilində olduğu kimi, aidiyyəti qurum, məsələn, RİNN binanın telekommunikasiya infrastrukturuna münasibət bildirməlidir. Antiinhisar Dövlət Xidməti bu qaydaları pozan MTK sahiblərinə qarşı sərt tədbirlər görməlidir.

Bu məktəb ziyalı yeri deyil. Ziya sözü işıq deməkdir. Uşaq gəlib işıqlı yerdə, yaxşı mühitdə təhsil almalıdır. Gördüyünüz kimi burada o şərait yoxdur.

Bu sözləri Aranlı kəndinin sakinlərindən biri deyir.

İmişli rayon Aranlı kəndinin Yusif Sadatxanov adına 1 saylı orta məktəbi qəzalı vəziyyətdədir.

Məktəb istifadə müddətini çoxdan başa vurub. Pəncərələri sınıq-salxaqdır, divarları uçub-tökülür, döşəmə və tavan çöküb. 1972-ci ildən fəaliiyyət göstərən məktəbin hazırkı vəziyyəti tədris üçün yararlı deyil.

Məktəbdə iki növbəli tədris sistemində 420 şagird təhsil alır.

Aranlı sakinləri deyirlər ki, “Övladlarımız qəzalı vəziyyətdə olan bu məktəb binasında elmin sirlərini öyrənməyə çalışırlar. Məktəbin tavanı uçmaq təhlükəsi ilə üz-üzədir. Qışda yağış-qar suları birbaşa sinif otaqlarına axır. Bu da şagirdlərin təhsil almasına, dərsə davamiyyətinə təsir edir. Odur ki, aidiyyatı qurumların ya məktəbi təmir etməsini, ya da yenidən tikilməsi üçün hərəkətə keçməsini istəyirik”.

Kənd sakini Tofiq Kərimov: “Bu məktəb 1972-ci ildə tikilib. 1980-ci ilə qədər məktəbdə fasilələrlə təmir işləri aparılıb. O vaxtdan sonra məktəbə baxan olmayıb. İndi məktəb bərbad haldadır. Döşəməsi çöküb, pəncərələri sınıqdır. İş o yerə çatıb ki, yağış yağanda sinif otağında gölməçələr yaranır. Şagirdlər oturmağa yer tapmırlar. Tədris ili başlayıb. Uşaqlarımız bu il də təmirsiz məktəbdə oxuyacaqlar. Xahiş edirik məktəbimizin köməyinə çatasınız”.

Kənd sakini Məhəmməd Xammədov: “Məktəblə bağlı giley-güzarımız var. Uşaqlarımız məktəbə gedib oxuya bilmirlər. Əslində müəllimlərdən narazı deyilik, yaxşı dərs keçirlər, siniflər bərbaddır. Özünüz görürsünüz, şüşələr yox, döşəmə yox. Qapılar pis vəziyyətdədir, sinif otaqlarından üfunət iyi gəlir. 5 yaşında uşaq burda xəstəlik tuta bilər. Vəzifəli şəxslərdən məktəbin təmirinə kömək etmələrini xahiş edirik. Uşaqlarımız gələcəyin əsgərləridir. Bu şəraitdə təhsil alan oğul vətəni qorumağa gedəcək”.

Kənd sakini Mədət İmanov: “Məktəb 1972-ci ildən fəaliyyət göstərir. Mən özüm 2-ci sinifə bu məktəbdə başlamışam. Məktəbin görüntüsünə şahid oldunuz, bərbad vəziyyətdədir. Bu məktəb ziyalı yeri deyil. Ziya sözü işıq deməkdir. Uşaq gəlib işıqlı yerdə, yaxşı mühitdə təhsil almalıdır. Gördüyünüz kimi burada o şərait yoxdur. Aidiyyatı qurumlardan kəndimiz üçün yeni məktəb tikilməsini xahiş edirik”.

Məktəbin direktoru Anar Ələkbərov da məsələyə münasibət bildirdi. Məktəbin qəzalı vəziyyətdə olması barədə aidiyyatı qurumlara məlumat verildiyini, yaxın zamanlarda yeni məktəb binasının tikintisinə start veriləcəyini bildirdi.

Anar Ələkbərov: Məktəbin vəziyyəti ilə bağlı aidiyyatı qurumlara məlumat verilib. Məktəbin yeni binasının tikintisi 2022-2023-cü ilin fəaliyyət planına salınıb. Regional Təhsil İdarəsinin əməkdaşları məsələyə yerində baxış keçirdilər, 2023-cü ildə yeni məktəb binasının tikiləcəyi barədə söz verdilər. Hələ ki, tədrisimizə köhnə binada davam edəcəyik. Heç bir təmir işləri aparılmayıb. Məktəbdə hazırda 420 şagird təhsil alır.

Biz də öz növbəmizdə Aranlı kənd məktəbinin gələcək taleyi ilə bağlı məlumat almaq üçün Elm və Təhsil Nazirliyi Mil-Muğan Regional Təhsil İdarəsinə üz tutduq. Bizi qurumdan Tədrisin Keyfiyyəti Sektorunun müdiri Mahir Zahidov qarşıladı. Bildirdi ki, Aranlı kəndinin qəzalı məktəbinin yenisi ilə əvəz olunması növbəti ilin tədbirlər planına daxıl olunub.

Rəsmi qurumun sözcüsü: 2019-2023-cü illər üçün regionların iqtisadi inkişafı üzrə dövlət proqramında həmin məktəbin tikintisi nəzərdə tutulub. Buna müvafiq olaraq 2023-cü ildə İmişli rayon təhsil sektoru üzrə Aranlı kənd 1 saylı tam orta məktəbin 528 yerlik binasının tikintisi nəzərdə tutulmuşdur. Şagirdlərimizin müasir tipli məktəbdə təhsil almaları üçün hər çür şərait yaradılacaq. Əlavə olaraq qeyd edim ki, yeni tədris ilində yeni məktəbin tikintisinə qədər məktəbdə olan qəzalı vəziyyəti nəzərə alaraq carı təmir nəzərdə tutulub. Şagirdlərin normal şəraitdə təhsil almaları üçün müəyyən şərait yaradılacaq.

Görünüşə görə Aranlı məktəbliləri növbəti tədris ilini də qəzalı məktəbdə oxumalı olacaqlar. Verilən vədlərə əməl olunacaq, ya yox, bunu da gələcək göstərəcək.

Məsələni diqqətdə saxlamağı özümüzə borc bilirik.

Belediyye.net

Laçının mərkəzində Azərbaycan bayrağını qaldıran İlham Əliyev diqqətçəkən məqamlara da toxundu. Bu, həm də bəzi məsələlərin birinci şəxs tərəfindən təsdiqi baxımından önəmlidir.

Azərbaycan Ermənistan ərazisinə müdaxilə etməyib

İlham Əliyev bəyan etdi ki, Azərbaycan işğal dövründə Ermənistanın irəli çəkdiyi dövlət sərhədinə çıxıb.

- Ermənistan “sərhəd” dediyi yerdə heç bir müəyyənləşmə işi aparmayıb: bu, Azərbaycan torpaqlarında işğalın davam edəcəyi inamından irəli gəlirdi, hesab edirdilər ki, Qarabağ və Zəngəzur işğalda qalacaq;
- Delimitasiyası aparılmadan sərhədin haradan keçdiyini heç kim iddia edə bilməz;

Prezident bununla həm xaricdən, həm daxildən səslənən “Azərbaycan Ermənistana təcavüz edib” iddiasına cavab verdi, eyni zamanda, problomin yeganə həll yolunun delimitasiya prosesinin reallaşması olduğuna diqqət çəkdi.

Delimitasiya hansı xəritələrlə aparılacaq?

Prezidentin çıxışı delimitasiya məsələsində Bakının XX əsrin xəritələrinə istinad etmək planını bir daha təsdiq edir: söhbət XX əsrin əvvəlindən başlayaraq, müxtəlif adlar altında Ermənistana verilən Azərbaycan torpaqlarından gedir və rəsmi Bakı bunun təsdiqi üçün əvvəlki dövrün xəritələrini də masaya daşıyır;

Bu, Zəngəzur dəhlizi də daxil olmaqla Azərbaycanın tarixi torpaqlarına qayıdış strategiyasında önəmlidir: Qazaxın 7 kəndi, Naxçıvanın Kərki kəndi və “otlaq-əkin sahələri” adı ilə ermənilərə “bağışlanan” ərazilərin qaytarılması da bu prosesdə həllini tapa bilər;

Əliyev bəyan edir ki, mövcud xəritələr kimin hansı torpaqda yerləşdiyini göstərir, bu baxımdan, delimitasiya aparılmadan heç kim Azərbaycanı ittiham edə bilməz.

Ermənistan delimitasiya prosesinin XX əsrin xəritələri əsasında aparılmasına razılaşmalıdır, ya da Azərbaycan bu xəritələrə istinadən praktiki addımlar atacaq. Burada diqqətçəkən məqamlardan biri Prezidentin xəritələrdən “SSRİ dövrünün” yox, “XX əsrin və ondan əvvəlki dövrün xəritələri” olaraq bəhs edir. Bu o deməkdir ki, Azərbaycan SSRİ qurulmamışdan öncəki dövrün xəritələrini də masada prioritet sənəd olaraq təqdim edib və bu, Zəngəzurun Ermənistana verilməsi məsələsini də rəsmi şəkildə aktuallaşdırır.

Sentyabr əməliyyatının nəticəsi

Prezidentin çıxışı əməliyyatın üç mühüm nəticəsinin olduğunu deməyə əsas verir:

Birincisi, Azərbaycan ordusu öz torpağında mövqelər tutub: bu, həm də əməliyyatdan sonra ordumuzun geri çəkildiyinə dair iddialara cavabdır;

İkincisi, əldə edilən mövqelər bütün sərhəd boyunca həm hərbi üstünlük, həm də vizual nəzarət imkanı verir: Azərbaycan əsgəri ermənilərin mümkün təxribatlarını, ümumiyyətlə sərhəd boyunca istənilən addımını izləyə, addımlarını buna əsasən ata biləcək;

Üçüncüsü, bu mövqelər Ermənistanın mühüm kommunikasiya xətlərinə nəzarət imkanı da yaradır;

Üçtərəfli razılaşmaların icrası qaçılmazdır

Prezident Ermənistanın 10 noyabr razılaşmasının icrasından yayındığını bəyan etdi:

- Erməni qoşunlar Qarabağdan tam çıxarılmayıb;
- Zəngəzur dəhlizinin açılması ilə bağlı heç bir praktiki iş aparılmır;

Mümkündür ki, Azərbaycan bu iki məsələnin icrası istiqamətində praktiki addımlar atsın. Əliyev Ermənistana mesaj verdi ki, növbəti cavab tədbirləri daha ağır olacaq və onların güvəndiyi qüvvələrin Bakıya heç bir təsir imkanı yoxdur.

Azərbaycan liderinin fikirləri Ermənistan üçün “yol xəritəsi” də hesab edilə bilər: 10 noyabr razılaşması icra edilməli – erməni qoşunlar Qarabağdan tamamilə çıxarılmalı, Zəngəzur dəhlizində işlər başlanmalıdır; Sərhədin delimitasiyası XX əsrin xəritələrinə uyğun aparılmalıdır; Bakının təqdim etdiyi 5 prinsip əsasında sülh sazişinin imzalanmasının alternativi yoxdur;

Asif Nərimanlı

Tovuz rayonu, Vahidli kənd sakini, şəhid və Qarabağ veteranı anası Həsənova Ceyran Məhəmməd qızı Prezident İlham Əliyevə şikayət ərizəsi yazıb.

DİA.AZ bildirir ki, bir surətini də Gununsesi.info-ya təqdim edən şəhid anası müraciətində tarixi abidə kompleksinin qanunsuz yolla satılmasından bəhs edir.

Həmin şikayəti olduğu kimi təqdim edirik:

Nəzərinizə çatdırıram ki,kəndimizin Qala Düzü adlanan ərazisində yerləşən abidə kompleksi Nazirlər Kabinetinin 02 avqust 2001-ci il tarixli, 132 saylı qərarı ilə yerli əhəmiyyətli arxeoloji abidə kimi dövlət qeydiyyatına alınmışdır və inventar nömrəsi 6045, 6046 və 6050-dir.
Orta əsrə aid olan həmin tarixi abidələr bir neçə ildir ki, Tovuz Rayon İcra Hakimiyyətinin başçısı Məmməd Məmmədov tərəfindən saxta yolla, rəhmətə getmiş bələdiyyə sədrinin imzasıyla əvvəlki tarixə rəsmləşdirilərək, saxta hərrac yolu ilə satılıb. Çünki hökumətin qərarı ilə dövlət qeydiyyatına alınmış tarixi abidə hərraca çıxarıla bilməz. Əslində RİH-nin başçısı Məmməd Məmmədov həm də burada şərikdir.

Bu ərazi Tovuzçay su anbarının kənarında yerləşdiyinə görə burada otel, pivnoy, qumarxana və s. inşası nəzərdə tutulub. Ərazidə hörgü məftillərlə çəpərləmə işləri aparılıb, ağır texnika ilə abidələrin əksər hissəsi məhv edilib. Eyni zamanda bildirirəm ki, Azərbaycan Milli Elmlər Akademiyasının Arxeologiya və Etnoqrafiya institutunun əməkdaşları qeyd olunan ərazidə təkrar araşdırma aparmış və araşdırmanın ilk günündə orta əsrə aid yaşayış evi tapılmışdır.

Nəzərinizə çatdırıram ki, Şəhərgah adlı həmin tarixi abidələr əvvəlcə saxta cinayət yolu ilə Mirzəyey Həsən adlı şəxsə satılıb.

Belə ki, guya hərrac komissiyasında torpaq müsabiqəsi keçirilib və qərar qəbul olnub, bu barədə əlimizdə rəsmi, lakin saxta məzmunlu məktub da var. Çoxsaylı şikayətlərimizdən sonra, Tovuz RİH-nin başçısı Məmməd Məmmədovun təsiri altından çıxa bilməyən, başlarını itirən aidiyyəti qurumlar həmin tarixi abidələrin indi də Süleymanova Rasimə İsgəndər qızına məxsus olduğunu bildirirlər. Maraqlıdır ki, həmin şəxs Vahidli kənd sakini deyil.

Eyni zamanda bildirirəm ki, həmin ərazidə bizim qədim qəbiristanlığımız və məsçidimiz yerləşir. Mənim şəhid oğlum da həmin qəbiristanlıqda uyuyur. Həmin ərazini, taixi abidələrimizi və şəhid məzarının kənarını saxta hərraca çıxarıb satanların nə özləri, nə də yaxınları, nə vətən müharibəsində iştirak edib, nə də şəhid veriblər.

Əlavə olaraq bildirirəm ki, Tovuz rayon Vahidli kənd Bələdiyyəsinin sədri Sədi Rüstəmov Vahidli kəndi ərazisində bütün torpaqları öz yaxın qohumlarının hər birinə 200 manat pul verərək onların adına, rəhmətə getmiş bələdiyyə sədrinin saxta imzasıyla rəsmləşdirib, sonra isə kənar şəxslərə, rayonun imkanlı şəxslərinə satib ki, bu da ciddi qanun pozuntusudur. Bildirirəm ki həmin ərazi Tovuzçay su anbarının kənarıdır və həmin torpaqların bir başa kənar şəxslərə satılması mümkün olmadığına görə bu saxta əməliyyatlar aparılmışdır. Həmin torpaqlar saxta kadastr sənədləri ilə satılıb. Həmin alqı-satqıların Ədliyyə Nazirliyinin Bələdiyyələrlə iş Şöbəsinə hesabatı verilməyib. Çünki banka heç bir rüsum ödənilməyib. Sədi Rüstəmov isə bildirir ki, gedin prezidentinizə nə qər istəyirsiniz şikayət edin, mənim prezidentim Tovuz RİH-nin başçısı Məmməd Məmmədovdur, bizə tarixi abidə lazım deyil.

Mən bir vətəndaş olaraq yaxşı dərk edirəm ki, Mehriban xanım tarixi və mədəni irsimizin qorunması yolunda uzun illərdir ki, uğurlu fəaliyyət göstərərək xalqımızın qədim mədəniyyətə malik bir xalq olduğunu bütün dünyaya sübut etdi. Tovuz RİH-nin başçısı Məmməd isə taixi abidələrimizi yaxın adamlarının adina saxta cinayət yolu ilə rəsmləşdirərək mənimsəyıb və həmin ərazidən əl çəkmir, tarixi abidələrimizi qəsdən dağıdır və Qarabağda tarixi abidələrimizi dağıdan düşmənlərimizlə bunların heç bir fərqi yoxdur.

Cənab prezident!

Sizdən xahiş edirəm ki, mənim müraciətimin Respublika Baş prokurorluğunda araşdırılmasını,tamahkarlıq məqsədilə abidələrimizi məhv edən Tovuz RİH-nin başçısı Məmməd Məmmədov və Vahidli Bələdiyyəsinin sədri Sədi Rüstəmov haqqında tədbir görülməsini təmin etdirəsiniz.

Həsənova Ceyran Məhəmməd qızı
Şəhid və Qarabağ veteranı anası

Prezident İlham Əliyev Laçın şəhəri, 2 nömrəli tam orta məktəb binasının layihələndirilməsi, əsaslı təmiri və bərpası ilə bağlı tədbirlər haqqında sərəncam imzalayıb.

Sərəncamın mətnini təqdim edirik:

1. Laçın şəhəri, 2 nömrəli tam orta məktəb binasının layihələndirilməsi, əsaslı təmiri və bərpası məqsədilə Azərbaycan Respublikasının 2022-ci il dövlət büdcəsində işğaldan azad olunmuş ərazilərin yenidən qurulması və bərpası üçün nəzərdə tutulan vəsaitdən Azərbaycan Respublikasının Elm və Təhsil Nazirliyinə ilkin olaraq 800,0 (səkkiz yüz) min manat ayrılsın.

2. Azərbaycan Respublikasının Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin etsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

4. Bu Sərəncam imzalandığı gündən qüvvəyə minir.

***

Prezident İlham Əliyev Laçın rayonu, Zabux kənd tam orta məktəb binasının layihələndirilməsi, əsaslı təmiri və bərpası ilə bağlı tədbirlər haqqında sərəncam imzalayıb.

Sərəncamda deyilir:

1. Laçın rayonu, Zabux kənd tam orta məktəb binasının layihələndirilməsi, əsaslı təmiri və bərpası məqsədilə Azərbaycan Respublikasının 2022-ci il dövlət büdcəsində işğaldan azad olunmuş ərazilərin yenidən qurulması və bərpası üçün nəzərdə tutulan vəsaitdən Azərbaycan Respublikasının Elm və Təhsil Nazirliyinə ilkin olaraq 300,0 (üç yüz) min manat ayrılsın.

2. Azərbaycan Respublikasının Maliyyə Nazirliyi bu Sərəncamın 1-ci hissəsində göstərilən məbləğdə maliyyələşməni təmin etsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

4. Bu Sərəncam imzalandığı gündən qüvvəyə minir.

RealMedia.az xəbər verir ki, artıq bununla ikinci dəfədir ki, icra başçısı yaşadığı (kirayə qaldığı) evi dəyişir. Xatırladaq ki, icra başçısı son günlərə qədər Beyləqanlı iş adamı kimi tanınan Q. Qəhrəmanova məxsus evdə kirayə qalıb. Və iş adamı ilə də yaxın münasibətləri olub. RealMedia.az-ı məlumatlandıran mənbə iddia edir ki, bu dəfə icra başçısının evdən çıx(arıl)ması bir qədər sensasialıdır.
Bildirilir ki, son vaxtlar Baş prokurorluq (KQMBİ) tərəfindən daxil olmuş şikayət əsasında Beyləqan rayonunda apardığı araşdırmalar və bu araşdırmalar zamanı aşkarlanmış korrupsiya cinayətləri ilə faktı ilə bağlı Beyləqan rayon icra hakimiyyətinin başçısına və ayrı-ayrı vəzifəli şəxsləri barədə başlanılmış cinayət işi ilə əlaqədardır. Belə ki, Baş prokurorluq tərəfindən icra başçısına və ayrı-ayrı vəzifəli şəxslər barəsində açılmış cinayət işindən sonra ev sahibi Q. Qəhrəmanov icra başçısını ona məxsus kirayə yaşadığı evdən qovub.
Məsələnin maraqlı tərəfi isə ondan ibarətdir ki, sən demə, icra başçısı Asif Ağayev həm də qaldığı mənzilin kirayə haqqını da vermirmiş. Bunu isə icra başçısına yaxın şəxslər bildirirlər.
Və qeyd olunur ki, bir aydan sonra Asif Ağayevin Beyləqana icra başçısı təyin olunmasının 4 ili tamam olacaq. İcra başçısı kirayə qaldığı müddətlərdə bir dəfə də olsun kirayə haqqını ödəməyib. İcra başçısının 23500 manat kirayə pulu borclu olduğu da bildirilir. Bilgilərə görə icra başçsı ayı 500 manata kirayə qalırmış.
Mənbə iddia edir ki, hazırda icra başçısı köçmək istədiyi yeni evi təmir etdirir.
Diqqətimizi çəkən məqam isə icra başçısının hansı məhləyə, məhz nə üçün o məhləyə köç etməsidir. Bu barədə isə eksklüziv olaraq növbəti günlərdə yazacağıq.
RealMedia.az

Xatırladaq ki, hələ iki il bundan əvvəl Fəyyaz Ələkbərov adlı şəxs MİDA yaşayış kompleksindən ev almaq istəyərkən fırıldaqla üzləşdiyini bildirirdi. Şikayətçinin sözlərinə görə, Əli Hüseynov adlı şəxs ondan və daha 8 nəfərdən 10 mindən çox pul alaraq yoxa çıxmışdı. O iddia edirdi ki, Əli Hüseynovun qardaşı Kamil Hüseynov bir neçə mənzil tikinti kooperativinin sahibi, həmçinin dövlət orqanlarından birində səlahiyyətli şəxs olduğundan polis bu işi düzgün araşdırmır. Araşdırmalardan bəlli olur ki, Əli Hüseynov və qardaşları tikinti sektorunda bir neçə şirkətə sahibdirlər. O, 2007-ci ildə dövlət qeydiyyatına alınan “Əlihüseyn” MMC-nin qanuni təmsilçisidir. Qardaşı Kamil Hüseynov isə “Akkord Azər-Yurd” MMC-nin sahibi, “Azər-Yurd” MMC-nin və “Deutsche Fassaden Technologien” MMC-nin direkoru olub. Dövlət Şəhərsalma və Arxitektura Komitəsinin saytında 2019-cu ildə Kamil Hüseynova “Çinar” MTK adından tiktinti aparması üçün icazə alındığı qeyd olunur. Digər qardaş Vaqif Hüseynov isə 2007-ci ildə qeydiyyata alınan “KOMBARO-AZERLAND” MMC-nin qanuni təmsilçisi, 2005-ci ildə qeydiyyata alınan “DİZAYN” MTK-nın direktoru olub.
Aktualxeber.az-a daxil olan məlumata görə hələ “Akkord”da əvvəlcə istehsalat departamentinin direktoru, sonra isə rəhbər işləyən zaman Kamil Hüseynov tərəfindən milyonlarla dövlət vəsaiti mənimsənilib. “Azərişıq” ASC-nin sədri Vüqar Əhmədovun müşaviri olan Kamil Hüseynov bu gün öz qanunsuz əməllərini orada davam etdirməkdədir. Redaksiyamıza müraciət edən İntiqam İsmayıloğlunun qanuni təmsilçisi də “Azər-Yurd” MTK-dan və Kamil Hüseynovdan şikayətçidir. Onun əlində qüvvəyə minmiş məhkəmə qərarı olsa da K.Hüseynovdan onlara çatacaq 135.270 manat pulu 10 ildir ki, ala bilmirlər. Ümidvarıq ki, əlaqədar orqanlar vaxtında lazımi tədbirlər görəcək və vətəndaşlara dəyən maddi ziyan da ödəniləcəkdir.
Qarşı tərəfi də dinləməyə hazırıq. //Aktualxeber.az//

Lerik meşələrində “Qırmızı Kitab”a düşmüş agaclar kəsilib və bu qanunsuz əməl Lənkaran Regional Meşə Təsərrüfatı Mərkəzinin səlahiyyətli şəxsləri tərəfindən gizlədilib.

DİA.AZ AzToday.az-a istinadla xəbər verir ki, belə bir iddia ilə Lerik sakinləri çıxış ediblər.

İddialara görə, Lənkəran Regional Meşə Təsərrüfatı Mərkezinin Gürdəsər Meşəbəyiliyinin 23 saylı meşə dolayinda Lerik rayonunun Hamarmesə kənd sakini Muradov Əliheydər bu ilin may ayında palıd cinsindən beş ədəd, vələs cinsindən bir ədəd, fıstıq cinsindən bir ədəd olmaqla cəmi 8 ədəd ağacı kəsərkən meşə gözətçisi Mürşudov Hafiz tərəfindən yaxalanmış və tədbir görülməsindən ötru Mərkəžə məlumat vermişdir.

Mərkəzin direktor müavini Elşad Şukürov və Gurdəsər Meşəbəyiliyinin meşəbəyisi hadisə yerində olaraq Əliheydər Muradov tərəfindən qanunsuz kəsilmiş ağaclarin dib kötülləri Elşad Sükurova məxsus damga ilə damgalanmis, müvafiq akt tərtib edərək vətəndaş tərəfindən dövlət meşə fonduna vurduğu ziyanı əsassız şəkildə (vəzifəsindən sui-istifadə edərək) vətəndaşin cinayətini bilə-bilə gizlədərək 15 manat ziyan hesablayıb. Beləki, vətəndaş tərəfindən kəsilmiş ağacların həcminin nirx qiyməti dužgün hesablanmamiş və Azərbaycan Respublikasinin Nazirlər Kabinetinin 30 yanvar 2019-cu il tarixli 30 nomrəli qərarın 7 saylı əlavəsində nəzərdə tutulmuş agaclarin və kollarin kəsilməsi nəticəsində vurulmuş zərərə görə odənişləri tətbiq etməmişdir:

Ən əsası Elşad Şukurov bilir ki, 5 ədəd kəsilmiş şabalidyarpaq palıd agaci Azərbaycan Respublikasinin “Qırmızı Kitabı”na daxil edildiyinə görə, həmin 30 Saylı qərarın 7 sayli əlavəsinin qeyd hissəsinin 3 bəndinə əsasən “Qırmızı kitab”a daxil edilmiş ağacların qanunsuz kəsilməsi nəticəsində vurulmuş zərər 7 saylı əlavədə goştərilən cədvəlin ikinci sütunundaki məbləğ 5 dəfə artırılmaqla hesablanır.

Mütəxəssislərin hesablamalarına görə, yuxarıda qeyd olunmuş qanunsuz kəsilmiş ağaclar üçün 30 sayli qərara əsasən dəymiş ziyan 1400 manat, ağacların həcminə görə ziyan 250 manat olmaqla cəmi 1650 manat olduğu halda Elşad Şukürov vətəndaşın qanunsuz əməllərini bilərəkdən ört-basdır edib.

Səslənən iddialara görə, qarşı tərəfin də mövqeyini dərc etməyə hazırıq.

Sakinlər tərəfindən redaksiyamıza adıçəkilən hadisənin görüntüləri təqdim olunub, həmin görüntüləri təqdim edirik:

Ötən ilin sonlarında dövlət uşaq bağçalarının yerli icra hakimiyyətlərindən alınaraq Təhsil Nazirliyinin tabeliyinə verilməsi barədə imzaladığı sərəncam, cəmiyyətdə məktəbəqədər təhsil müəssisələrinin fəaliyyətində köklü dəyişikliklər olacağına inam yaratmışdı. Çünki bağçaların icra hakimiyyətlərinin tabeliyində olduğu bu on ildə məktəbəqədər təhsil müəssisələrində baş verən özbaşınalıqlar və qanunsuzluqlar sadalamaqla bitməzdi. Ancaq bir ilə yaxın zaman göstərdi ki, bu sahədə ciddi dəyişiklik yoxdur.
Bir müddət öncə Təhsil Nazirliyinin məktəbəqədər təhsil səviyyəsi (uşaq bağçaları) üzrə apardığı monitorinqlər başa çatıb. Artıq 1 680 bağçada ilkin vəziyyətin necə olması barədə məlumatlar var. Rəsmi məlumata görə, bu müddət ərzində xeyli sayda bağça müdirləri işdən azad edilib, haqqında araşdırma aparılan şəxslər də var. Bununla bağlı cumhuriyyet.az-a daxil olan məlumatda bildiilir ki, monitorinq aparılan bağçalardan biri də Bakının Binəqədi rayonu, 9-cu mikrorayon, M.Cəlal küçəsi 53 ünvanında yerləşən 238 saylı körpələr evidir.

Məlumatlı mənbə bilirir ki, bağçada monitorinq zamanı ərzaq təminatı, ərzaq və mətbəxin saxlanılma vəziyyəti, tədris vəsaitlərinin təminatı, uşaqların davamiyyətinin təşkili, sənədləşmənin aparılması, sanitar-gigiyena qaydalarına əməl olunması və digər sahələrdə ciddi nöqsan və çatışmazlıqlar aşkar olunub. Amma maraqlıdır ki, monitorinq keçirilən günlərdə bağça müdirəsi Rəfiqə xanlmın kabab qonağlığına tutulan nazirlik nümayəndələri bu məsələlərin üstündən sükutla keçiblər.

Məlumat üçün bildirək ki, 14 ildir 238 saylı bağçaya rəhbərlik edən İsgəndərova Rəfiqə Cəbrayıl qızı 1961-ci il təvəllüdlüdür və pensyia yaşına yaxınlaşır. Mənbənin bildirdiyinə görə, öz postunu yaxlnlarına təhvil vermək istəyən müdirə bağçada bir neçə ştata yaxın adamlarını yerləşdirib. Bu şəxslərin fəaliyyəti, bağçadakı ərzaq əməliyyatları ilə bağlı növbəti yazımızda. //cumhuriyyet.az//

Azad edilmiş torpaqlara qayıdış başlayır. Zəngilan rayonu ilk sakinlərini artıq qəbul edib. Viran qalmış yurd yerlərində otuz ildən sonra kəndlər, şəhərlər salınır.

Bəs məskunlaşma yerlərinin salınması zamanı dövlət qurumları büdcə vəsaitlərini şəffaf və ədalətli xərcləyirmi? Söhbət yerli və xarici şirkətlərin işlərin görülməsinə müsabiqəsiz cəlb olunmasından, hətta məmurların işləri tələskənliyə salıb, öz ailə şirkətlərinə ötürməsindən gedir.

Ağdam, Cəbrayıl, Zəngilan, Laçın, Kəlbəcər, Füzuli və Xocavənd rayonlarında 21 yaşayış məntəqəsinin şəhərsalma əsaslandırılmasının hazırlanması üzrə müqavilələr bağlanıb.

Şəhərsalma əsaslandırılması - tikinti obyektinin yerləşdirilməsi üçün hazırlanan planlaşdırma sənədidir.

Müsabiqəsiz bağlanan 22 müqavilə

Dövlət satınalmalarının vahid internet portalında yerləşdirilən məlumatlarda göstərilir ki, kəndlərin şəhərsalma əsaslandırılma sənədinin hazırlanması üzrə elan bu resursda yerləşdirilməyib. Başqa sözlə, 2 dövlət layihə institutu, 4 özəl Azərbaycan və 1 Türkiyə şirkəti ilə ümumi dəyəri 11 milyon 304 min manat olan 22 müqavilə müsabiqə keçirilmədən bağlanıb.

Hökumət adından bu müqavilələrin bağlanmasını Dövlət Şəhərsalma və Arxitektura Komitəsi öz tabeliyindəki quruma – Ərazi Tikinti-Planlaşdırma Mərkəzinə həvalə edib. Qurum Şuşa rayonunun Daşaltı kənd yaşayış məntəqəsinin salınmasının şəhərsalma əsaslandırılması işlərini "Feniks-AA” MMC-yə təqdim edib.

İkinci Qarabağ müharibəsinədək bu kənddə ermənilər yaşayırdı. Kənd hərbi əməliyyatların episentrində olub və bu səbəbdən bir çox tikili ziyan çəkib. Layihənin sentyabr ayının sonunadək hazırlanması üçün şirkətə 250 min manat ödənilib.

Aydın Aydınlı "Feniks-AA” şirkətinin direktorudur. 27 yaşlı şirkət rəhbəri Dövlət Şəhərsalma və Arxitektura Komitəsinin sədr müavini İlqar İsbatovun oğludur.

"Dövlət satınalmaları haqqında" qanunun 13.2.1-ci maddəsində qeyd olunub ki, satınalma prosedurlarında iştirak edən iddiaçının nümayəndəsi və ya vəzifəli şəxsi ilə birbaşa qohumluğu, təsisçilik və asılılıq münasibətləri olan şəxslər satınalan təşkilatın təmsilçisi, məsləhətçisi və satınalmalarla əlaqədar digər vəzifələrin icraçısı ola bilməzlər. Bu, dövlət satınalmalarında maraqların ziddiyyəti sayılır.

"Feniks-AA” şirkəti 2001-ci ildən bəri tikinti və layihə şirkəti kimi çalışır.

İlqar İsbatov 2008-ci ilədək, yəni - Dövlət Şəhərsalma və Arxitektura Komitəsinin Bakı Dövlət Layihə İnstitutunun direktoru vəzifəsinə təyin olunanadək bu şirkətə rəhbərlik edib.

Şirkətin direktoru vəzifəsini bir müddət Valeh Eyvazov tutub. O, Dövlət Şəhərsalma və Arxitektura Komitəsinin 2021-ci ildə formalaşdırılan 11 nəfərdən ibarət İctimai Şurasının üzvüdür. Lakin memar kimi deyil, "Demokratiyanın İnkişafı Problemləri Mərkəzi” İctimai Birliyinin təmsilçisi kimi bu şurada təmsil olunub.

Məlum olur ki, layihələndirmə işləri üzrə bağlanan müqavilələrin 3-ü şura üzvlərindən daha birinə aidiyyatı olan şirkətə qismət olub.

Toğrul Bayramov Komitənin İctimai Şurasının üzvüdür. Memardır. Keçən ilin iyun ayanda qeydiyyatda keçən "Bureau Mühit” MMC-nin direktorudur. Amma 2021-ci ilin sentyabrında Şuraya bu qiyafədə deyil, "Ulduz İnformasiya Kommunikasiya Texnologiyaları Sahəsində Maarifləndirmə” İB-nin nümayəndəsi kimi seçilib.

Dövlət Şəhərsalma və Arxitektura Komitəsinin işğaldan azad olunmuş ərazilərdə bir neçə yaşayış məntəqəsinin memarlıq simasının və obrazının müəyyən edilməsi məqsədilə 2021-ci ilin iyul-avqust aylarında təşkil etdiyi memarlıq müsabiqəsi "Qədim Qarabağın yenilənən siması” adlanırdı.

Yenicə yaradılan "Bureau Mühit” şirkətinin memarlar komandası müsabiqəyə çıxarılmış altı kənddən dördü üçün təkliflər təqdim edib. Bunlar: Laçının Şəlvə kəndi, Cəbrayılın Xudafərin qəsəbəsi, Kəlbəcərin Zar kəndi və Füzulinin Horadiz kəndi idi. Münsiflər heyəti bu layihələri mükafat fondu 5 min və 3 min manat olan 1-ci və 2-ci yerlərə layiq görüb. Bir neçə ay sonra, 2022-ci ilin aprel ayında isə bu yaşayış məntəqələrindən 3-nün – Şəlvə, Zar və Xudafərin kəndlərinin şəhərsalma əsaslandırılmasının hazırlanması üçün "Bureau Mühit” şirkətinə 848 min manat ödənilib.

Kəndlərin lahiyələndirilməsinə qeyri-şəffaf yolla cəlb edilən şirkətlərdən biri də "Qala Group” MMC-dir.

"Qala Group” şirkəti öz internet səhifəsində dövlətin satınalma portalına istinadən bildirir ki, o, "yaşayış məntəqələrinin salınmasının şəhərsalma əsaslandırılması ilə bağlı elan etdiyi 13 açıq tenderə yekun vurub və "Qala Group” şirkəti bu tenderlərdən 4-nü qazanıb”. Hərçənd elə həmin portaldaca yazılır ki, bu satınalmaların əsasını təşkil edən satınalma müsabiqəsi (elanı) Dövlət Satınalmalarının Vahid Elektron Portalında yerləşdirilməyib.

Şirkət Laçın rayonunun Güləbird, Zəngilanın Cahangirbəyli, Məmmədbəyli və Cəbrayıl rayonunun Horovlu kənd-qəsəbələrinin şəhərsalma əsaslandırılmasının hazırlanması üçün 1 352 369 manat vəsait alıb.

"Qala Group” şirkətinin sahibi Orxan Mustafayev işadamıdır. Birləşmiş Ərəb Əmirliklərində qurduğu "İdeal Consept Holding” şirkətlər qrupuna "Qala Group”la yanaşı, "Sabah Residence” tikinti şirkəti də daxildir.

Qarabağda görüləcək işlərə cəlb olunan digər yerli şirkət "BİMD” QSC-dir. Şirkət "Overall Management Group” şirkətlər qrupuna daxildir. Qrupun təsisçisi Orxan Məstanovdur. Qrupa daxil olan "CONCO” QSC müharibədə Gəncə şəhərinə atılan raket zərbələri nəticəsində dağıdılan binaların bərpası üçün Ərazi Tikinti-Planlaşdırma Mərkəzindən və Dövlət Tikinti və Arxitektura Komitəsindən ümumi dəyəri 11 098 913 manat olan 4 müqavilə alıb. Bu müqavilələr də tender qanunvericiliyinə əməl etmədən, birbaşa bağlanılıb.

"BİMD” QSC Füzulinin Pirəhmədli və Dədələr, Kəlbəcərin Zarlar və Yanşaq kəndlərinin şəhərsalma əsaslandırılmasının hazırlanması üçün dövlət büdcəsindən 1 530 000 manat alıb.

Qarabağda layihələndirmə işlərinə cəlb olunan şirkətlərdən biri də Türkiyənin "Rem Mimarlik Dekorasyon Restorasyon Proje Ve Taahhut Hizmetleri Ltd.” şirkətidir. O yerli şirkətlərdən daha çox iri məbləğdə müqavilələr almağa nail olub. Türkiyə şirkəti Xocavənd rayonunun Hadrut qəsəbəsinin və ətraf kəndlərin bərpa və yenidənqurulmasının şəhərsalma əsaslandırılmasının hazırlanması üçün Ərazi Tikinti-Planlaşdırma Mərkəzindən 2 242 000 manat, Tuğ və ətraf kəndləri ilə bağlı eyni işin icrasına görə 2 124 000 manat vəsait alıb. İşlərin icrası üçün ayrılan müddət sentyabr ayında tamamlanır.

Qarabağda aparılan işlərin tender qanunvericiliyinə əməl olunması səviyyəsi barədə prezident İlham Əliyev də çıxışında münasibət bildirib:

"Biz hər şeyi planlı şəkildə edirik. Əlbəttə ki, tələsirik, amma, eyni zamanda, tələskənliyə yol vermirik. Bütün tender prosedurları keçməlidir, şəffaflıq tam təmin edilməlidir, orada heç bir inhisarçılıq olmamalıdır. Açıq tender prosedurları təmin edilir və ediləcək. İctimaiyyətə müntəzəm olaraq məlumat verilməlidir və veriləcək”.

İqtisadçı-ekspert Rəşad Həsənov deyir ki, dövlət satınalmaları ilə bağlı qanunların icrasına nəzarət edilmir deyə problemlər yaranır: "Azərbaycanda ən geniş yayılmış qanun pozuntusu ondan ibarətdir ki, bilərəkdən layihələrin icra müddətinin başlanma tarixi gecikdirilir və son anda vaxt məhdudiyyəti adı altında həmin layihələr birbaşa satınalma yolu ilə heç bir rəqabət, şirkətin özünün maddi-texniki bazasının, təcrübəsinin qiymətləndirilməsi aparılmadan öz benefisiarlarına layihələrin ötürülməsi prosesi baş verir”.

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin Dövlət satınalmalarına nəzarət şöbəsinin müdiri Əhməd Həsənov AbzasMedia-ya deyib ki, işğaldan azad olunmuş ərazilərdə yaşayış məntəqələrinin layihələndirilməsi üzrə işlərin tender yolu ilə deyil, birbaşa müqavilə əsasında satın alınmasına prosesin yubanacağı əsas götürülməklə icazə verilib. Onun sözlərinə görə, Ərazi Tikinti-Planlaşdırma Mərkəzi dövlət satınalmalarına nəzarət edən quruma bir mənbədən satınalma üçün deyil, artıq imzalanmış ikitərəfli müqavilələrə razılıq üçün müraciət edib.

Ərazi Tikinti-Planlaşdırma Mərkəzi layihələri hazırlayan şirkətlərin seçimi üçün müsabiqələrin keçirilməməsi, "bir mənbədən” üsulu tətbiq etməklə bağlanan müqavilələrin qiymətinin müəyyən olunması, eləcə də şirkətlərin seçim meyarları, bağlanan müqavilələrdə maraqlar toqquşmasına dair informasiya sorğusuna cavab verməyib.

İşğaldan azad olunmuş ərazilərdə şəhərsalma sənədlərinin hazırlanmasının planlaşdırılması, razılaşdırılması prosesində Dövlət Şəhərsalma və Arxitektura Komitəsinin iştirakı barədə informasiya sorğusu da cavabsız qalıb.

"BİMD” QSC və "Feniks-AA” MMC-nin rəhbərliyi layihələndirmə işləri üzrə bağlanmış müqavilələrin şübhəli məqamlarına dair informasiya sorğusuna cavab verməyib. "Qala Group” şirkətinin rəhbərliyi isə bu sorğudakı sualları sifarişçi təşkilata ünvanlamağı məsləhət görərək, cavabdan yayınıb.

Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov bildirib ki, Qarabağ iqtisadi rayonunda 2040-cı ilə qədərki üç mərhələdən ibarət olan bərpa planının ilk mərhələsinin 2026-cı ildə yekunlaşdırılması nəzərdə tutulub. Birinci mərhələyə Ağdam, Füzuli şəhər mərkəzlərinin, Hadrut, Suqovuşan qəsəbələrinin və 32 kəndin bərpa prosesi daxildir.

Qarabağın sakinləri yurdlarına qayıtmağa başlasalar da, bu bərpa və şəhərsalmanın hansı şərtlərlə, necə aparıldığından xəbərsiz saxlanılırlar.

Araşdırma: AbzasMedia