Prezident İlham Əliyev Counz Robert Qərinin “Dostluq” ordeni ilə təltif edilməsi haqqında sərəncam imzalayıb.

Sərəncamla Azərbaycan neft sənayesinin inkişafında xidmətlərinə görə BP şirkətinin Azərbaycan, Gürcüstan və Türkiyə üzrə regional prezidenti Counz Robert Qəri “Dostluq” ordeni ilə təltif edilib.

Mənzil İnşaatı Dövlət Agentliyinin (MİDA) Yasamal Yaşayış Kompleksində (YYK) ötən həftənin sonunda satışa çıxardığı 815 mənzilin seçiminin nəticələri yenidən ləğv edilib. Dövlət Təhlükəsizliyi Xidməti (DTX), MİDA və “ASAN Xidmət”in birgə bəyanatında “ağıllı” sistemin kiberhücuma məruz qaldığı bildirilib.

Deyirlər ki, satışdan əvvəl dövlət orqanlarının informasiya sistemlərində texniki problemlər aşkarlanıb - onlar əlavə yüklənməyə səbəb olub. Nəticədə, elektron satışın tarixi təxirə salınmalı olub, çünki bu, seçimin nəticələrinə təsir edə bilər.

Amma məsələnin araşdırılması daha maraqlı mətləbləri üzə çıxarıb. DTX hadisə ilə bağlı araşdırmalara başlayıb və müəyyən edib ki, Elektron Hökumətin İnkişafı Mərkəzinin “Asan Login” sisteminə, ölkə hüdudlarından kənarda qlobal hostinqlərə məxsus İP ünvan diapazonlarından istifadə etməklə irimiqyaslı kiberhücum edilib.

Elektron ticarətə kimin müdaxilə etdiyi hələlik məlum deyil. Sadəcə olaraq deyirlər ki, kiberhücumların kanalları tam müəyyən edilib və bloklanıb. Faktla bağlı DTX-nın Baş İstintaq İdarəsində Cinayət Məcəlləsinin 273.4-cü (sosial əhəmiyyətli infrastruktur obyektlərinin kompüter sisteminə və ya kompüter məlumatlarına qanunsuz müdaxilə) maddəsi ilə cinayət işi açılıb, həyata keçirilən istintaq və əməliyyat-texniki tədbirlər davam etdirilir.

“Əgər dövlət qurumuna kiberhücum olduğu rəsmən təsdiqlənərsə, aydındır ki, burada Xüsusi Rabitə və İnformasiya Təhlükəsizliyi Dövlət Xidmətinin məsuliyyəti də var”. DİA.AZ xəbər verir ki, bunu Azərbaycan İnternet Forumunun prezidenti Osman Gündüz məsələni AYNA-ya şərh edərkən bildirib.

Onun fikrincə, hadisəyə səbəb “Asan Login” sisteminə kütləvi DDoS hücumlarının və kiber müdaxilələrin zərərsizləşdirilməsi üçün vaxtında tədbirlərin görülməməsidir: “Hesab edirəm ki, DDoS təhlükəsi əvvəlcədən nəzərə alınsaydı, sözügedən strukturun peşəkarlıq səviyyəsi, ən pis halda “Asan Login” və ya MİDA-da xarici trafikin qarşısını almaq üçün kifayət edərdi. Ümid edirəm ki, məsul şəxslər bütün bunları başa düşərək gələcək üçün qabaqlayıcı tədbirlər görəcəklər”.

Mütəxəssis xatırladıb ki, bundan əvvəl dövlət başçısının fərmanı ilə mühüm qurumların kibertəhlükəsizliyi ilə bağlı tədbirlər təsdiq edilib: “Məncə, aidiyyəti qurumlar dövlət qurumlarının, o cümlədən kritik qurumların təhlükəsizliyini qorumaq üçün səylərini artırmalıdır”.

Maraqlıdır ki, bütün bunlar Beynəlxalq Kibertəhlükəsizlik Gününə həsr olunmuş iki günlük tədbir ərəfəsində baş verir. Sentyabrın 21-22-də bu sahədə ən böyük şirkətlərdən biri olan PROSOL tərəfindən ikinci dəfə toplantı keçiriləcək. Tədbirdə İsrail, Türkiyə, ABŞ, Ukrayna, Latviya, BƏƏ şirkətləri, eləcə də “Nozomi”, “CheckPoint”, “SocRadar”, “Crowdstrike”, “Palo Alto Networks”, “Avnon Group”, “Nubs Group”, “Agritask”, “Pyramid”, “Analitika”, “Bax Təhlükəsizlik”, MONT, “Elcore”, “Bakotech”, “Softprom” kimi qlobal və regional şirkətlərin kiber ekspertləri bir araya gələcəklər.

Yeri gəlmişkən, əvvəllər məsul məmurlar daha çox tanış arqumentlər gətirirdilər. MİDA-nın aparat rəhbəri Fərman Qurbanlı izah edib ki, ötən dəfə olduğu kimi, bu dəfə də güzəştli mənzil sisteminə elektron müraciətlər gözlənildiyindən çox olub. Nəticədə sistem həddən artıq yüklənib və sonda güzəştli mənzillərin satışı yenidən “donub”.

Lakin Elektron Hökumət Mərkəzinin direktor müavini Mehdi Cavadov bildirib ki, güzəştli mənzil sisteminin 20 minə yaxın potensial istifadəçisi var: “İstifadəçilərin təxminən 50%-nin satışda iştirak edəcəyi gözlənilirdi. Yeni ssenaridə sistemdə 20 mindən çox istifadəçinin iştirakı ilə yükləmə testləri aparılıb. Bütün sınaqlar uğurla tamamlanmışdı. Bunlar əvvəlki satışlarda olduğu kimi standart prosedurlar idi. İstənilən halda biz ən qısa zamanda araşdırma aparıb, nəticələrini yaxın vaxtlarda ictimaiyyətə çatdıracağıq”.

Bu və digər elektron portallarda əvvəllər də nasazlıqlar olub. Amma, bir qayda olaraq, istifadəçilərin həddindən artıq axını səbəbindən “ağıllı” sistemlər təşkilatçıları uğursuzluğa düçar edirdi və üçüncü şəxslərin müdaxiləsi nəticəsində daha öncə də elektron ticarətinin nəticələri tamamilə ləğv edilmişdi.

Onların hamısı Cinayət Məcəlləsinin 273.3.1 və 273.3.2 (kompüter sisteminə və ya kompüter məlumatlarına qanunsuz müdaxilə) maddələri ilə təqsirləndirilib. İstintaq təsdiqləyib ki, pul mükafatı müqabilində təcavüzkarlar güzəştli mənzillərin alınması üçün xüsusi proqram təminatı hazırlayıblar.

Elektron sistemin əsas məqsədi vətəndaşların müraciətlərinə baxılmasında şəffaflıq və operativliyi təmin etməklə, güzəştli ipoteka kreditorları üçün bərabər şəraitə nail olmaq, mənzillərin seçilməsi və alınması prosedurunun sadələşdirilməsidir. Amma məhz bu məqamlar çoxlu mübahisələrə səbəb olur.

Daha əvvəl bildirilib ki, güzəştli şərtlərlə mənzil alan digər vətəndaşlar da onu yüksək qiymətə təklif edərək qazanc əldə etməyə çalışırlar və belə məqamlar layihənin sosial mahiyyəti ilə bağlı suallar yaradır. Bundan əlavə, bir çox ehtiyacı olan insanlar, o cümlədən evsiz ailələr bu cür güzəştlərə uyğun olmadıqlarından, “güzəştli mənzil” sisteminin imkanlarında kənarda qalırlar.

“Lənkəran Yol Tikinti” ASC-nin sədri Raqib Məmmədov Haftoni meşəsinə birləşik 150 hektar meşə sahəsini məhv etməkdədir.

AzToday.az xəbər verir ki, Lənkaran asfalt zavodunun sahibi “Asfalt Raqib” ləqəbli şəxsin meşə sahəsini məhv etməyini daim gündəmdə saxlayan “Ecofront” fəallarına 100 min rüşvət təklif olunub.

Bu barədə Eko akstivist Cavid Qara məlumat verib.

Onun sözlərinə görə, eko fəallar rüşvət təklifindən imtina ediblər:

“Bir-neçə həftə öncə Haftonidəki meşə söhbətinə görə, “yüz min, iki yüz min, nə qədər lazımdır deyin” deyə rüşvət təklif etdilər. Təbii ki, rədd etdik. Uşaqlar yerindəcə rədd ediblər. Mənə danışdılar, mən isə əsəbimdən partlayırdım ki, bu şərəfsizlər pulla hər şeyi əldə edə biləcəyini fikirləşir. Biz harda səhv etmişik ki, bunlar belə cəsarət tapıblar.

Qəbul edib sadəcə susmağımızı gözləyirdilər. Heç kəsin də xəbəri olmazdı. Hətta hərdən bir yazardım ki, Haftonidə o vaxt meşə qırıldı, cəmiyyət yetərincə kömək etmədi deyə qarşısını ala bilmədik.

İndi təsəvvür edin, ya pula ya da hədə qorxu ilə çıxıb deyirəm ki, “dostlar bütün paylaşımlar yalan idi, Haftonidə meşə məhv edilməyib. Yalan danışmışam.” Meşəni qıran qırdıran qalardı qıraqda mənim cındırımı çıxarardız, haqlı olaraq.

Pul da yaxşı şeydir, təhlükəsiz düşmənsiz həyat da. Amma vicdan da yaxşı şeydir, ləyaqət də yaxşı şeydir”.

Qeyd edək ki, Ekologiya və təbii sərvətlər naziri Muxtar Babayevin əmri ilə sözugedən meşə sahəsinin icarə müqaviləsi ləğv olunmuşdu. Amma hazırda meşə sahəsində işlərə başlanılıb…

Naxçıvanda MAXE-lərin (müddətdən artıq həqiqi hərbi xidmət hərbi qulluqçusu) işə qəbulu üçün beş min manat rüşvət tələb olunduğu bildirilir.

DİA.AZ xəbər verir ki, bu haqda "Gündəlik Naxçıvan"a bir qrup hərbçi məlumat verib.

Onlar deyir ki, bu sahə general-polkovnik Kərəm Mustafayevin nəzarətindədir və alınan rüşvət birbaşa ona çatdırılır. Kərəm Mustafayev Naxçıvan Əlahiddə Ümumqoşun Ordusunun komandanı, eyni zamanda müdafiə naziri Zakir Həsənovun müavinidir.

MAXE-lər bildirir ki, hərbi hissədə yer və yaxud vəzifə dəyişməyin qiyməti isə müvafiq olaraq fərqlənir. N saylı hərbi hissədə qulluq edən S. A. deyir ki, onlardan əlavə rüşvət ala bilmək üçün müxtəlif üsullardan istifadə edirlər:

"Ötən il kreditə girib, beş min manat rüşvət verib, MAXE düzəlmişəm. Neçə ildi işsiz idim, düşündüm ki, eybi yox, bir dəfə borca girim, ömürlük işim olar. Bir il keçməmiş məni göndərdilər uzaq bir rayona. Ailəli adamam, hər gün səhər 5-də durub evdən çıxıram, bir də gecə qayıdıram. Vaxtım yollarda keçir, maaşımın yarısı taksilərə, yarısı da kreditə gedir. Tək mən deyiləm, yerdəyişməni qəsdən edirlər ki, əlavə gəlir mənbəyi yaransın. Şərurlunu Culfaya, culfalını Şahbuza və.s göndərirlər. Kərəm Mustafayevin hər bir hərbi hissədə öz adamları var. Yerdəyişmədən sonra yaxınlaşır ki, 3 min manat versən öz yerinə qaytararıq. Çoxları ailədən ayrı qalmasın deyə, razılaşır. Onlardan biri mənə təklif etdi ki, məbləği versəm, əvvəlki yerimə qaytara bilər. Yoxsa, ömürlük burada çürüyəcəm. İndi əlavə borc axtarıram ki, öz rayonuma, ailəmin yanına qaytarsınlar".

Adının çəkilməsini istəməyən digər MAXE bildirir ki, kəşfiyyat bölüyünə dəyişilmək üçün ondan 2500 manat rüşvət alıblar:

"Mən özüm kəşfiyyata həvəsliyəm. Vətəni daha yaxşı qorumaq üçün kəşfiyyatçı kimi xeyir verəcəyimi düşündüm. Müraciət etdim, rüşvət istədilər. Nə var ki, bu bölümdə aylıq maaş biraz artıqdı. Borc alıb, rüşvəti verdim. Çünki kəşfiyyatçı olmaq mənim arzum idi. İkinci Qarabağ müharibəsində iştirak etmişəm, ölümə getmişəm, kəşfiyyatçı kimi mühüm işlər görmüşəm. Bunlar ölümə göndərmək üçün də adamdan rüşvət alırlar".

Naxçıvan Əlahiddə Ümumqoşun Ordunun mətbuat xidmətindən hərbçilərin iddiaları ilə bağlı suallara cavab vermək istəmədilər.

Hazırda Bakı Hərbi Məhkəməsində mühakimə olunan ləğv olunmuş Milli Təhlükəsizlik Nazirliyinin İstintaq Baş İdarəsinin sabiq rəisi Mövlam Şıxəliyev özünün son sözündə məhkəmədə sensasion açıqlama verib.

Gununsesi.info-nun xəbərinə görə, prosesdə Prezidentin İşlər İdarəsinin Kənd təsərrüfatı müəssisəsinin keçmiş direktoru İbrahim Zeynalovun ailəsindən alınan 8 milyon dolların necə alınması zamanı general bildirib ki, həmin vəsait deputat Ziyad Səmədzadəyə çatıb.

Mövlam Şıxəliyevin bu fikirlərini onun tabeliyində çalışmış polkovnik Yasin Məmmədov da təkrar edib.

Qeyd edək ki, 8 ay MTN-in təcridxanasında saxlanandan sonra buraxılan Zeynalov müflis olub, xeyli vaxtdır ki, vaqonda yaşayır.

O, MTN işində zərərçəkmişlərdən biridir. Məhkəmədə də bildirib ki, 2014-cü ildə sifarişlə həbs olunmuşdu. Ailəsindən 10 milyon istəyib, 8 milyon alandan sonra onu buraxıblar. Qohum-əqrəbası nələri varsa, satıb, onu buraxdırıblar.

“Sifarişlə atamı tutdular, başımıza oyun açdılar”
Oğlu İlqar Zeynalov məhkəmədə deyib ki, 8 milyonu düzəldib, televizor qutusunda MTN binasının yaxınlığında atasının işini aparan müstəntiq Yasin Məmmədova verib: “Ziyad Səmədzadənin atamla işbirliyi vardı. Onun vasitəsilə bankdan 3.5 milyon kredit götürülmüşdü. Bu pula görə atamla arası dəydi. Sifarişlə atamı tutdular, başımıza oyun açdılar. Qardaşım, bacım, anam rəhmətə getdi. Atamla bu gün rayonda vaqonda yaşayırıq…”.

Keçmiş müstəntiq Məmmədov da, onun rəisi olmuş Şıxəliyev də indi deyir ki, Zeynalovlar ailəsindən alınan pul deputata verilib.

Hətta general Şıxəliyev çıxışında narazılıq edib ki, bu məsələ ilə əlaqədar onları ittiham edən prokurorluq niyə o pulun kimə çatdığını araşdırmayıb: “Səmədzadəni niyə dindirməyib?“Bu məsələnin MTN-ə aidiyyəti yox idi. O pulların da şəxsən Ziyad Səmədzadəyə çatdırılması haqda məlumatım vardı…”

Keçmiş MTN vəzifəliləri son sözlərində bildirib ki, onları müxtəlif adamları qanunsuz həbs edib, pullarını, əmlaklarını əllərindən almaqda ittiham edirlər: “Halbuki, MTN-in İstintaq Baş İdarəsində cinayət işlərinin başlanması, kiminsə haqqında həbs qərarı üçün məhkəməyə təqdimat verilməsi, şəxsin həbsdən buraxılması kimi məsələlər birbaşa Baş prokuror və birinci müavininin nəzarətində olub. Hətta belə bir qanunsuzluq olubsa belə, buna görə prokurorluq rəhbərliyi məsuliyyət daşıyır. Rəis olduğum idarədə istintaq olunan cinayət işlərinə birbaşa Zakir Qaralov, Rüstəm Usubov nəzarət edirdi. Qanunsuzluq olubsa belə, onlar istintaqa nəzarət edən vəzifəli şəxs kimi görüb, aradan qaldırmalıydılar. Niyə eləməyiblər? Onlar istintaqda da, məhkəmədə də dindirilmədi, bu məsələlərə aydınlıq gətirilmədi”.

Çıxışının sonunda general ona bəraət verilməsini tələb edib.

Gununsesi.info

Göyçay rayonu, Qaraməryəm kənd sakini Babayev Arzu Vidadi oğlu tərəfindən “Hürriyyət”in redaksiyasına şikayət məktubu daxil olub. Saytımız vasitəsilə prezident İlham Əliyevə müraciət edən şikayətçinin məktubunu olduğu kimi dərc edirik:

“Hörmətli Prezident!

Yazaraq Sizi məlum etmək istəyirəm ki, Göyçay Rayon Mərkəzi Xəstəxanası publik hüquqi şəxsin direktoru Yaşar Əhmədov məndən 4000 (dörd min) manat möbləğində rüşvət almışdır. Belə ki, bu ilin iyul ayında bacım Şəfiyeva Könül Vidadi qızının işlə təmin edilməsi üçün direktor Yaşar Əhmədovun qəbuluna getdim. Ona "Bacımgilin ailə vəziyyəti yaxşı deyil, xəstəxanada işlə təmin olunmasını xahiş edirəm", - dedim. O isə mənə bildirdi ki, "Hazırda vakansiyalar yoxdur, bir tərəfdən də şəhid ailələri və qazilər bizdən iş tələb edir, rəhbərliyin göstərişinə əsasən ilk növbədə onları işə götürməliyik".

Beləliklə, onunla biraz həmsöhbət olandan sonra, "Bəs mən bacımın işləməsi üçün necə edə bilərəm?", - dedim. Nəhayət, mövzu pul məsələsinə gələn zaman “aşı görüb, oxuduğu Quranı” unudan molla sayağı birdən-birə dəyişməyə başladı. Halbuki bayaqdan özünü şəhid ailələrinin, qazilərin işlə təmin olunması uğrunda fədakarlıq edən məmur qismində göstərməyə çalışırdı. Dərhal mənə "İki gündən sonra gələrsən, bu haqda daha ətraflı danışarıq", - dedi. Mən də öz növbəmdə dediyi vaxtda yenidən qəbuluna getdim.

İlk öncə 6000 (altı min) manat lazım olduğunu söyləsə də, axırda 4000 (dörd min) manatla razılığa gəldik və mən istədiyi məbləği ona təqdim etdim. 10 gün müddət ərzində bacımın işlə təmin ediləcəyinə söz verdi. Lakin vəd etdiyi müddət başa çatsa da o, sözünü tutmadı. Bu, minvalla iş uzanmağa başladı. Hətta Yaşar Əhmədov 19 avqust 2022-ci il tarixdə Göyçay RMX-da vətəndaş qəbulu keçirən İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyevin qəbuluna girməyimə belə mane oldu. "Sənə deyirəm 2 günə həll edəcəm, məgər mənə inanmırsanmı?", - deyərək avqust ayının 21-nə, 21-də isə 28-nə, gah da ondan 3 gün sonraya söz verdi. Bir də gedib maraqlandım ki, məzuniyyətə çıxıb. 15 sentyabrda isə məzuniyyətdən qayıtdığını eşidib yenidən onun qəbuluna getdim. Sonuncu variant olaraq "Ştatı yoxlamalar aparıb, səbrli ol, hər şey düzələcək" deməkdən başqa söz tapa bilmədi. Mənə bəlli oldu ki, o, yalan danışır. Məhz ona görə də verdiyim 4000 (dörd min) manat pulu özümə geri qaytarmasını tələb etdim. Bu zaman direktor Yaşar Əhmədov məni DTX əməkdaşı olan Vüsal Hümbətovla hədələməyə başladı. "Vüsal müəllimə bircə kəlimə xəbər verərəm, səni itirər", - dedi.

Hörmətli Prezident!

Nəzərinizə çatdırım ki, bacım 1982-ci il təvəllüdlü Şəfiyeva Könül Vidadi qızı 2013, 2019-cu illər ərzində yaşadığımız Göyçay rayonu Qaraməryəm Kənd Sahə Xəstəxanasında sosial məzuniyyətdə olan bir qadının əvəzinə qeydiyyatçı vəzifəsində işləmişdir. Bir övladı var, hazırda özü və həyat yoldaşı heç yerdə işləmir. Maddi durumları olduqca acınacaqlıdır. Direktor Yaşar Əhmədov bacarmadığı və ya etmək istəmədiyi işə görə yalandan vəd verərək məndən rüşvət almışdır. Bildiyiniz kimi, bu əməl Azərbaycan Respublikasının CM-nin 311-ci maddəsinə (Rüşvət alma), eyni zamanda həmin Qanunun 178.2.3.-cü maddəsində qeyd olunmuş "Şəxs tərəfindən öz qulluq mövqeyindən istifadə etməklə törədildikdə" əsas verir. Mənimlə kobud danışması, haqsız olduğu halda özünü haqlı çıxarmağa çalışması və məni hüquq mühafizə orqanlarının yüksək vəzifəli məmuru ilə hədələməsi CM-nin 182-ci maddəsinə, onun vəzifə səlahiyyətlərini aşması CM-nin 309-cu maddəsinə əsas verir.

Sizdən çox xahiş edirəm, şikayətim obyektiv araşdırılsın, məndən mənimsənmiş 4000 (dörd min) manat pul (rüşvət) özümə geri qaytarılsın, direktor Yaşar Əhmədov isə qanunun müvafiq maddələri ilə məsuliyyətə cəlb olunsun. Sizə öncədən öz minnətdarlığımı bildirirəm”.

Hurriyyet.az

Redaksiyadan: Qarşı tərəfin mövqeyini dərc etməyə hazırıq.

“Tədris ili başlayıb, ancaq məktəblərin çoxunda hələ də təmir işləri yarımçıqdır. Bir neçə ay əvvəl başları sökdükləri dam örtüklərini naməlum istiqamətə daşımağa qarışdı, dam örtüklərini gec düzəltdilər, yağış sinif otaqlarının içərisinə yağdı. Normal vəziyyətdə olan məktəblər də bərbad günə qaldı, hələ də tam düzəldilməyib”.

DİA.AZ xəbər verir ki, Astaranın bir qrup sakini Meydan TV-yə ünvanladıqları şikayətdə belə deyir. Onlar danışırlar ki, bu ilin aprelində Təhsil Nazirliyindən rayonun kəndlərindəki səkkiz məktəbin dam örtüyünün yenilənməsiylə bağlı göstəriş verilib.

Yeni tikilmiş dörd məktəbin və köhnədən fəaliyyət götərən daha dörd məktəbin dam örtüyü sökülüb. Sökülmüş dam örtükləri vaxtında yeniləri ilə əvəz olunmadığına görə, aprel-may aylarında yağan leysan yağışlar məktəblərin yuxarı mərtəbələrini tamamilə bərbad vəziyyətə salıb. Siniflərdəki stol-stul və mebellər, kompüterlər, dərs vəsaitləri yağış sularının altında qalıb. Mayın sonlarında dam örtükləri düzəldilsə də, keyfiyyətsiz olduğundan əvvəlki qəzalı dam örtüyündən fərqlənməyib.

Söhbət Şahağacı kəndindəki 1 saylı, Pensər kəndindəki 2 saylı, Astaradakı 3 saylı, Şiyəkəran kəndindəki 2 saylı məktəblərdən gedir.
“Rinə və Deqədi kənd məktəblərinin də dam örtükləri sökülmüşdü. Məktəblərin təmirə ehtiyacı yox idi, məsələn, Rinə kəndindəki məktəb yeni tikilmiş məktələrdən idi”, – şikayətçilər deyib..
Şiyəkəran kənd sakinləri isə deyir, kənddəki məktəbdə yarımçıq qalmış təmirlə bağlı heç bir iş görülmür:

“Səkkiz məktəbin dam örtüyünü eyni vaxtda sökdülər. Bizim məktəb də içərisində. Sonra da gözlədilər ki, material verilsin. Bir aydan sonra tələsik örtməyə başladılar. Söküntü ilə yeni örtüyün vurulması bir ay çəkdi və sinif otaqları yağış altında qaldı. Nəticədə keyfiyyətsiz iş qoydular ortaya. İndi yağış yağanda sinif otaqları suya qərq olur. Partalar, digər mebellər, dərs ləvazimatları, elektronika vasitələri, divarlardakı elektrik xətləri sıradan çıxıb. İdman zalının üstü isə hələ də açıq qalıb”.
Şikayətçilərin sözlərinə görə, məktəbin dam örtüyünün təmirinə ümumiyyətlə ehtiyac olmayıb:

“Kəndimizdəki məktəbin dam örtüyü “nejavika” materialından və metal konstruksiyalı, möhkəm idi. Sökülməmişdən əvvəl Yanğından Mühafizə İdarəsinin göstərişi ilə dam örtüyü içəri tərəfdən bütövlükdə taxta və şiferlərlə birlikdə əhənglənmişdi. Dəyişdirilməsinə ehtiyac yox idi. Dağıdıb tökdülər, xeyli də fəhlə gətirib işlətdilər, minlərlə manat pul sildilər. Nəticədə möhkəm dam örtüyü keyfiyyətsizi ilə əvəz olundu. Eləcə də digər məktəblərin dam örtüyünün dəyişdirilməsinə ehtiyac yox idi. Məktəblərin bəziləri yeni tikilib, bəzilərinin dam örtükləri yeni dəyişdirilmişdi”.
Astara Rayon İcra Hakimiyyətindən məsələ ilə bağlı Lənkəran-Astara Regional Təhsil İdarəsiylə əlaqə saxlamağı məsləhət görüblər. Elxan Nəcəfovla əlaqə saxlanılmağa çalışılsa da, o, zənglərə və “Whatsapp” üzərindən yazılan ismarıclara cavab verməyib. Təhsil Nazirliyinin İctimaiyyətlə əlaqələr sektorunun müdiri Cəsarət Valehov da eyni cür davranıb. Zənglərə, xəttə olduğu halda “Whatsapp” üzərindən yazılanı ismarıclara cavab verməyib.

Yeni 2022/2023-cü tədris ili başlar-başlamaz məktəblərdə şagirdlərin valideynlərindən müxtəlif adlarla qanunsuz pul yığımına start verilib. Abşeron rayonunun Masazır qəsəbəsindəki 3 saylı tam orta məktəbdə də həmçinin.

Redaksiyamıza daxil olmuş məlumata görə, 3 saylı məktəbdə birinci siniflər 28 nəfər şagirddən komplektləşdirilməli olduğu halda, Mətanət müəllimənin sinfində adı başqa siniflərdə gedənlərlə birgə 40-a yaxın şagird oturur. Bütün yaxşı hesab olunan müəllimlərin siniflərində vəziyyət belədir. Zəif hesab edilən müəllimlərin siniflərində isə orta hesabla 15 şagird olur, digərlərinin adları bir sinifin jurnalında getsə də, özləri başqa sinifdə “yaxşı müəllimdən” dərs alırlar. Məlumatda qeyd olunur ki, valideyn öz uşağına belə imtiyaz qazandırmaq üçün məktəbin direktor əvəzi Xəyalə Hacıyevaya 300 manat pul verməlidir.

Etibarlı mənbə bildirir: “Təşkilatçı işləyən Məleykə xanım heç bir pedaqoji ixtisası olmadığı halda iki sinifin qeyri — qanunu sinif rəhbəridir. Direktor müavinlərinin də hərəsi iki sinifin qeyri — qanuni sinif rəhbəridirlər. Kitabxana müdiri Vəfa xanım kitabları pulla satır. Deyir “mən yetim uşaq böyüdürəm, əcəb eyləyirəm”. Direktor müavini Əhmədova Fəxrənisə hamıdan tələb edir ki, kim dərslərinin cədvəldə ardıcıl düşməsini istəyirsə, 100 (bir yüz) manat verməlidir. Acınacaqlı vəziyət odur ki, bunu pedeqoji şurada direktorun yanında acıq aydın elan edib. Heç nədən utanmadan, cəkinmədən məktəbi bazara döndərib. Kitabxanaçıya, laboranta, bir necə texniki işcilərə də sinif rəhbərliyi verilib, müəllimlərin adına yazılır. Qeyri-qanuni pulları Fəxrənisə yıgır, imtiyazları, vəzifələri paylayır. Bütün dərslər pulla satılıb. Xəyalə xanım dərs ilinin sonunda bütün XI sinif şagirdlərindən 200 manat pul yıgdı. Hələ attestatı yazmaq ucun yığılan pullar bir yana. Evdə təhsilə laborant göndərilir, pul müəllimə yazılır, alınıb laborantla bölünür. Kecən tədris ilində dəfələrlə direktor müavinləri arasında düşən davaya görə Daxili İşlər Nazirliyinin “102” xidmətinə məlumat gedib. Hələ də işi məhkəmədə olan direktor müavini var. Bəzi texniki işcilər evdə oturub, maaş kartları Xəyalə xanımdadır. Nəzarətsiz məktəb kimi ətrafda Masazır 3 nömrəli məktəbin reytinqi çox aşagı düşüb. Direktor yalnız direktor müavinləri ilə kabinetində cay icməklə məşguldur. 15 sentyabrda nazirin əmri ilə “Əlifba bayramı” tədbirləri yasaqlansa da, bu məktəbdə birinci siniflərin sinif rəhbərlərinə süfrə açdırıb yeyib — içiblər, direktor başda olmaqla. Heç şəhidlərimizin ruhundan utanmayıblar, bütöv Azərbaycan ağlayır, bunlar isə məktəbdə qonaqlıq edir, tort yeyirlər”.

Redaksiyamıza həmçinin direktor müavini Fəxrənsə Əhmədovanın direktorun müəllimlərdən 50 manat pul tələbini çatdırdığı vatsap səs yazısı da təqdim olunub.

P.S. Bu yerdə xatırlatmağa dəyər ki, bundan əvvəl Masazırdakı 4 saylı tam orta məktəbdəki qanunsuzluqlar barədə də tənqidi məqalələr dərc etmişdik. Həmin məktəbdəki korrupsiya halları, eləcə də narkotik maddələrin istifadəsinə göz yumulması, şərait yaradılması barədə Təhsil Nazirliyinə və hüquq-mühafizə orqanlarına rəsmi məktublarla müraciət etmişdik. Təhsil Nazirliyi məqalələrimizdə ehtiva olunan məsələlərin araşdırılmasını Sumqayıt Regional Təhsil İdarəsinə tapşırsa da, görünür, 4 saylı məktəbdə qalanan narkotikin tüstüsü araşdırmaçı məmurların vicdanını susdurdu, görən gözlərini kor elədi.

Məqalədə adları keçən şəxslərin də mövqeyini öyrənmək üçün dəfələrlə 3 nömrəli məktəbə zəng etsək də, telefonu götürən olmadı.

P.S. Mənbə onu da, bildirir ki, direktorun ad günü və müxtəlif tədbirlərdə öz əlaltıları vasitəsilə özünə bahalı zinət əşyaları aldırır.

Qarşı tərəfin də mövqeyini dərc etməyə hazırıq.

Mövzuya qayıdacağıq.

Deryaz.az

"İstər ətrafımdakı insanlar, istərsə də seçicilərim çox gözəl bilirlər ki, vətəndaşı dinləmək, onlara həssaslıq nümayiş etdirmək və problemlərinin həllinə çalışmaq mənim fəaliyyətimdə prioritetdir. Bu mənim iş prinsipimdir!" Bu Milli Məclisin deputatı Jalə Əhmədovanın DİA.AZ-a göndərdiyi müraciətdə yer alıb.
Xanım millət vəkili daha sonra yazır: "Lakin bəzən elə şikayətlərlə üzləşirəm ki, həllində çarəsiz qalıram.

Ədalət mühakiməsinin hakimindən ədalət gözləyən vətəndaşların çarəsizliyi kimi...

Hər birimiz bilirik ki, Azərbaycanda məhkəmə hakimiyyəti müstəqildir və o, hakimiyyətin başqa qollarından asılılığı olmadan həyata keçirilir. Yəni, məhkəmənin işinə müdaxilə etmək yolverilməzdir. Amma bu o demək deyil ki, bəzi məhkəmə sədrləri vəzifələrindən sui-istifadə etməli, məhkəmə prosesləri zamanı vətəndaşa aşağılayıcı münasibət sərgiləməli, yüksək tonla danışmalı və ya işi araşdırmadan birtərəfli mövqedən çıxış edərək qərar qəbul etməlidir!

Məhkəmələrin müstəqil olması onlara bu hüququ verirmi ki, vətəndaşa bu cür davranış nümayiş etdirsin, ən əsası da qeyri-obyektiv qərarlar qəbul etsin və vətəndaşın konstitusion hüquqlarını pozsun?!

Qəbul zamanı seçicilərimin Salyan rayon Məhkəməsinin sədri Muradağa Qasımovla bağlı səsləndirdikləri şikayətlər də məhz bu istiqamətdədir – Muradağa müəllim məhkəmə-hüquq sistemini özününküləşdirib!

Deyəsən M.Qasımov ədalət mühakiməsinin vətəndaşların qanun və məhkəmə qarşısında bərabərliyi əsasında həyata keçirildiyini və məhkəmənin qəbul etdiyi qərarların dövlətin adından çıxarıldığını unudub. Bəs, görəsən vətəndaşa “get, hara istəyisən şikayət et”, deyən Muradağa müəllim, bununla dövlətimizin nüfuzuna xələl gətirdiyini bilirmi? Yoxsa şəxsi mənafeyini daha üstün hesab edir?!

Salyan rayon Məhkəməsinin sədri Muradağa Qasımov unutmasın ki, hər bir məmur xalqın xidmətçisidir!

Mənim isə millətin vəkili olaraq iş prinsipim dəyişməz olaraq qalacaqdır".

Məsələ ilə bağlı dia.az olaraq qarşı tərəfi də dinləməyə hazırıq...

Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyi tender maxinasiyalarının miqyasını və məbləğini genişləndirməkdədir. TİA. Az məlumat verir ki, bu dəfə qaraj tikintisi və yolların xətlənməsi üçün 25 milyon nəzərdə tutulub. Bu rəqəm isə kifayət qədər şişirdilmiş görünür və BNA sədri Vüsal Kərimli növbəti korrupsiyaya imza atmaqdadır. Təbii ki, qaraj və yol xətləri üçün 25 milyon çox böyük vəsaitdir. Deməli, ya yeyinti var, ya da məbləğ şişirdilib. Belə ki, yolların xətlənməsi (1-2), eləcə də “Zığ Avtoparkı” MMC-yə məxsus avtobus qarajının tikintisi (3) ilə bağlı elan etdiyi 3 açıq tenderə yekun vurub.
Tenderlərin qalibləri müvafiq olaraq “1 №-li Xüsusi Təyinatlı Yol İstismarı”, “Yol Xətt” və “Minera” MMC-lərdir.
Qalib şirkətlərə müvafiq olaraq 1,558 milyon manat, 18,085 milyon manat və 5,677 milyon manat, ümumilikdə isə 25,32 milyon manat ödəniləcək. Ümumiyyətlə, BNA-nın tender əməliyyatları və maxinasiyaları çox sakit şəkildə həyata keçirilir. Halbuki qurum şəhərdə bu illər ərzində nə xətləməni başa çatdırıb, nə parkinqlər qurulub, nə dayanacaqlar yaradılıb. Bir sözlə, BNA “pakazuxalıq” edir.