Böyük Britaniyada sentyabrın 9-da bir gün əvvəl vəfat edən mərhum monarx üçün milli matəm başlayıb.

Böyük Britaniya hökuməti Kraliça II Yelizavetanın xatirəsinə matəmin hansı formada tətbiq ediləcəyi ilə bağlı tövsiyələr verib.

Kraliça II Yelizaveta sentyabrın 8-də 97 yaşında və hakimiyyətinin 71-ci ilində vəfat edib. O, Şotlandiyanın Balmoral qəsrindəki yay iqamətgahında dünyasını dəyişib.

Onun ölümündən sonra ilk oğlu, taxtın 73 yaşlı varisi Şahzadə Çarlz Britaniya monarxı olub. O, III Karl adı ilə taxta çıxıb.

Ölkə daxilində bir çox idman tədbirləri, o cümlədən futbol və kriket matçları ləğv edilib. İngiltərə Futbol Liqasının birinci divizionu olan Premyer Liqa həftəsonu keçiriləcək bütün matçların təxirə salınacağını açıqlayıb.

Dünyanın ən böyük musiqi tədbirlərindən biri olan “BBC Proms”un cümə günü buraxılışı da ləğv edilib.

Məzuniyyət gecələrinin son gecəsi, şənbə gününə planlaşdırılan möhtəşəm bağlanış konserti də ləğv edilib.

İngiltərə və Uelsdə kraliçanın ölümündən sonra nağd pulların dəyişdirilməsinə başlanacağı gözlənilir. Çünki İngiltərə Bankı tərəfindən buraxılan bütün əskinas və sikkələrdə mərhum monarxın portreti var.

Britaniya milli himninin sözlərinin də bu həftə sonu rəsmi olaraq dəyişdiriləcəyi nəzərdə tutulur. Belə ki, 1952-ci ildən bəri himnin mətnində “Kraliçanı qoru, Allah” (“God Save the Queen”) sətiri əksini tapır. Bu sətrin “Allah, Kralı qoru” olaraq dəyişdirilməsi düşünülür.

Bir müddət əvvəl “Azərlotereya” ASC illik audit hesabatını saytında dərc etdi.

Hesabatı KPMG audit şirkəti həyata keçirib. Bu şirkət dünyanın 4 ən nüfuzlu audit şirkətindən (Big-4) biridir. Amma KPMG-nin ölkədə reputasiyası o qədər də yaxşı deyil. Gəlin, səbəblərini birgə incələyək.

KPMG-NİN AUDİT ETDİYİ BANKLAR MÜFLİS OLUB

2016-cı ildə Azərbaycanda 11 bank bağlanıb, bunlardan ən böyük ikisi – “Bank Standard” və “Texnikabank”ın auditini KPMG şirkəti aparıb.

Həmin vaxt “Bank Standard” QSC-nin Kreditorlar Komitəsinin sədri olan hüquqşünas, maliyyə eksperti Əkrəm Həsənov deyib ki, KPMG-nin audit apardığı hər iki bankın müflis olması onun fəaliyyətinə şübhələr yaradır. Halbuki, adıçəkilən bankların 2012-ci ilə qədər kənar auditoru PwC audit şirkəti olub. Sonradan PwC-də işləyən Vüqar Əliyev iş yerini KPMG-yə dəyişib və köhnə müştərisi olan bankları da özü ilə aparıb. Məhz onun sayəsində son illər bu banklarda normal audit aparılmayıb. Hətta hüquqşünas bu məsələ ilə bağlı KPMG-nin baş ofisinə müraciət edib, lakin cavab almayıb.

KPMG “ARTSHAKHBANK”IN AUDİTORU OLUB

2018-ci ildə məlum olub ki, KPMG Azərbaycan qanunvericiliyinə, ölkəmizin ərazi bütövlüyünə hörmət qoymur. Belə ki, “KPMG Armenia” “Artsakhbank”ın rəsmi auditoru olub. Saytda yerləşdirilən sənəddə KPMG-nin imzası və möhürü mövcuddur. Həmin vaxt Əkrəm Həsənov vacib bir məqamı qeyd etmişdi: “KPMG-nin MDB üzrə bank auditi rəhbəri milliyyətcə azərbaycanlı Vüqar Əliyevdir”. Bəli, həmin o yuxarıda adını çəkdiyimiz Vüqar Əliyev. KPMG-nin Ermənistan da daxil olmaqla bütün MDB məkanında bank auditi ilə məşğul olduğunu nəzərə alsaq, Vüqar Əliyevin rəhbərlik etdiyi şirkətin Dağlıq Qarabağda yerləşən banklara da xidmət göstərdiyindən xəbərsiz olmağı qeyri-mümkündür.

KPMG RƏHBƏRLİYİ ABŞ-DA HƏBS OLUNUB

KPMG şirkətinin rəhbərliyi ABŞ-da həbs olunub. Əkrəm Həsənovun sözlərinə görə, dələduzluq və digər cinayətlərə görə şirkətin 6 rəhbər şəxsi həbs edilib: “Onlar nəzarət orqanının işçilərindən özləri haqda məxfi məlumatlar alıblar və qeyri-peşəkar fəaliyyətlərini bu cür ört-basdır ediblər. KPMG-nin reputasiyası bütün dünyada darmadağın olur. Buna baxmayaraq, ölkəmizdə bəziləri bu şirkətə himayədarlıq edir. Hər bir halda xəbərdarlıq edirəm: KPMG ilə, o cümlədən onun yoxladığı şirkətlərlə ehtiyatlı olun”.

“HESABATA İNANMAQ OLMAZ”

Əkrəm Həsənov İndex.az-a açıqlamasında bildirib ki, “Azərlotoreya” ilə yanaşı, Mərkəzi Bankın da son illər kənar auitini KPMG aparır: “Məhz son illər! Halbuki, əvvəllər Mərkəzi Bank heç vaxt KPMG ilə işləmirdi, “Deloitte”, PwC ilə işləyirdi. Son illərdə KPMG dövlət sektorunda yaman fəallaşıb. Bu da onun nəticəsidir ki, onun imici və işgüzar nüfuzuna böyük xələl gəlib. Çünki Azərbaycanda ən böyük bank müflisləşmələrinin fonunda onlar olublar. Təkrar edirəm, “Bank Standard” və “Texnikabank” kimi iri bankların kənar autini onlar aparıblar və hər zaman da yazıb ki, hər şey qaydasındadır. Bununla yanaşı, KPMG xarici ölkələrdə də özünü biabır edib. Azərbaycanda isə aşağı qiymət verməklə daha sərfəli qiymət verməklə daha üzü yola olmaqla öz müştəri bazasını azərbaycanda genişləndirir. Xatırladaq ki, auditor xidməti ən bahalı xidmətdir. Lakin əksər hallarda bu heç özünü doğrultmur. Sadəcə dünya praktikasıdır. Əsas da “Böyük 4-lüy”ə daxil olan audit şirkətləri… Təsadüfi deyilki Azərbaycanda son illər digər, yəni o qədər də baha işləməyən audit şirkətləri fəallaşıb. Bəzi auditorlar şirkət rəhbərləri ilə əlbir olub, öz rəylərində saxtakarlığa yol verirlər. Saxtakarlığı bu “Böyük 4-lüy”ə daxil olanların hər biri etsə də, saxtakarlıq üzrə lider KPMG-dir. Ona görə, KPMG ya qiyməti endirir, ya da “azərbaycansayağı” proseslər baş verir. Buna görə, KPMG son illərdə fəallaşıb, öz imicini düzəldir. Mən onların hesabatlarına heç etibar etmirəm və bununla bağlı əlimdə yetərincə səbəb var! Bunu “Bank Standard”da, “Texnikabank”da pulu qalanlardan soruşa bilərsiniz…”

“AZƏRLOTEREYA” RƏHBƏRLİYİNƏ MÜRACİƏT

“Azərlotereya” ASC-nin maliyyə hesabatına inanmaq olar, ya yox, oxucular, o cümlədən adıçəkilən şirkətin rəhbərliyi qərar versin. Unutmayaq ki, audit şirkətin güzgüsüdür və hər əyri-əskiyi olduğu kimi göstərməlidir. Sonra gec olur… “Azərlotereya” “Bank Standard”, “Texnikabank”ın aqibətini yaşaya bilər… //İndex.az//

Əmək və Əhalinin Sosial Müdafiəsi Nazirliyi aztəminatli ailəyə yenidən sosial yardım təyin etməkdən imtina edir. DİA.AZ bildirir ki, rəsmi qurumlardan imtina cavabı alan 4 uşaq anası yaşadığı acınacaqlı durumdan danışır.

Metal toplayaraq uşaqlara çörək aldığını deyən ana bildirir ki, deputat Razi Nurullayev də vəd vermişdi, amma kömək etmədi: "Nə zaman zəng elədik... Yalandan boş vəd verdilər..."

"İcra hakimiyətinin işçiləri gəlib şəkil çəkdirib getdilər" deyən ana qeyd edir ki, ƏƏSMN-nin işçiləri də problemdən halidir: "İnanmadılar... dedilər ki, mən burda yaşamıram..."

Daha ətraflı aşağıdakı videoda:

Azərbaycanda küçələrin açıq qumarxanalara çevrildiyi məsələsi zaman-zaman gündəmə gəlir. “Azərlotereya” ASC-nin hər küçənin tinində açdığı piştaxtaların önünü görəndə, insanlarımızın “şans” urğunda apardığı mübarizəyə baxanda həqiqətən də ürək ağrıyır.

Lotereya oyunları dünyanın hər yerində var, amma bir qaydası, ənənəsi, yolu da var, heç bir ölkənin paytaxtının küçələrində Bakı qədər acı mənzərə ola bilməz. Əvvəllər insanlar hansısa hadisə zamanı bir yerə toplaşırdısa, indi küçədə gedən qumara toplaşır, uduzanların ah-naləsi, şansı gətirməyənlərin ümidsizliyi və keçirdikləri əsəbin özü elə hadisəyə çevrilib. Çox maraqlıdır ki, heç vaxt “Azərlotereya”nın küçədə quraşdırdığı qumar piştaxtalarının önündə böyük sevinc yaşanmır, çünki böyük uduşlar olmur. Görünən yalnız kədər, əsəb, ümidlərin puç olmasıdır.

Bu mənzərə fonunda “Azərlotereya” ASC-nin İdarə Heyətinin rəhbəri Zafer Reisoğlunun bu günlərdə mediaya verdiyi müsahibəsində səsləndirdiyi fikirlər həm paradoks təşkil edir, həm də olduqca gülünc görünür. Zafer Resifoğlu elə danışır ki, sanki ölkəyə böyük xoşbəxtlik bəxş ediblər. Hərçənd ki, qumar piştaxtalarının önündə yaşanan bədbəxtliklər günümüzün acı reallığıdır.

Zafer Reisoğlu isə bu reallığı müsahibəsində gizlətməyə çalışır. Deyir ki, “Azerlotereya” ASC Azərbaycanın qeyri-neft sektorunun inkişafına, əhalinin rifahının yaxşılaşdırılmasına töhfə verir.

Cavaba baxın, qeyri-neft sektoru, əhalinin rifah halının yaxşılaşdırılması.

Hansı töhfədən danışırlar?

İnsanları ciblərindəki son manata qədər qumara qoymağa təşviq etmək töhfədirmi?!

“Azerlotereya” deyə bilər ki, heç kimi buna məcbur etmir. Elə də deyir.
Elədir, amma hər küçənin tinində qumarxana açırlarsa, bu, vətəndaşı asan yolla pul qazanmağa sövq edən, sonuncu manatına qədər oynamağa təşviq edən addımdır.

Reallıq budur ki, “Azerlotereya” bu gün vətəndaşları sürətlə qumara təşviq edir. İdarə Heyətinin sədri isə bunu “əhalinin rifah halının yüksəldilməsinə töhfə” adlandırır. Gülməli, həm də ağlamalı cavabdır, çünki Zafer Reisoğlu bizi, xalqı sözün həqiqi mənasında barmağına dolayıb.
Hələ bu azmış kimi, qeyri-neft sektorunun inkişafına verdikləri töhfədən də bəhs edir. Görünür, cəmiyyəti axmaq hesab edir.

“Azerloteraya” istehsalat müəssisəsidirmi, nəsə istehsal edirmi, yoxsa, fabriklər, zavodlar açıbmı ki, qeyri-neft sektorunun inkişafından danışırlar.
Qumarxana açmaq, vətəndaşı buna təşviq etmək nə vaxtdan qeyri-neft sektorunun inkişafı olub?!

Zafer Reisoğlu isə yeni iş yerləri yaratmalarından danışır, əlavə edir ki, işçilərə tibbi sığorta və nahar pulu da verirlər. Sanki “Azerlotereya” olmasaydı, ölkədə işsizlik baş alıb gedərdi. Vətəndaşın cibinə girməklə, nəinki pulunu, ümidlərini də oğurlamaqla “iş yerləri” açılmır, cənab Reisoğlu.

Realıqlar ortada olduğu halda siz lotereyalarda qoyulan böyük uduşlardan danışır, qazancın 50 faizindən çoxunun uduşlara xərcləndiyini iddia edir, cek-potlardan dəm vurursunuz. Halbuki, udanlarla uduzanların müqayisəsini apardıqda birinciləri tapmaq mümkün deyil.

Necə ola bilər ki, hər gün onlarla lotereya oyunları keçirilir, amma böyük uduşlardan heç birini heç kim qazanmır?
Necə ola bilər ki, son bir ildə cek pot udulmayıb?
Yaxud necə olur ki, maksimim uduşlar 1000 AZN-i keçmir?
“Azerloteraya”nın rəsmi saytında son oyunların nəticələri də təsdiq edir ki, bu qədər lotereya biletinin satışına, keçirilən oyunlara rəğmən, ən yüksək uduş 990,97 AZN olub.

Cavablar bəllidir, “şans” deyib başımızın altına yastıq qoyan “Azerlotereya” ASC insanları qumara “oturduğu” kimi, uduşlarla bağlı da maxinasiyalara yol verir.

Zafer Reisoğlu isə hər şeyin “dünya standartlarına uyğun olduğunu”, hər şeyin “şansla bağlı olduğunu” deməklə əməllərini ört-basdır edir. Zənnimcə, Azərbaycanın müvafiq dövlət qurumları “Azerlotereya” ASC-nin fəaliyyətini ciddi araşdırmalı və lazımı ölçü götürülməlidir. Əks təqdirdə bu qurum Azərbaycan əhalisini daha da müflisləşdirərək, dövlətə qarşı yönləndirəcək. //demokrat.az//

MTK-ların vətəndaşlara, daha dəqiq desək, binalardakı mənzil sahiblərinə, yəni payçılara yaratdığı problemlərlə bağlı ölkə mediası neçə illərdir ki, yazmaqda davam edir. Amma bu problemlər həllini tapmır.
Gündəlik-Bakı olaraq ötən sayımızda “Sahil-R” MTK tərəfindən inşa edilən, Bakı şəhəri, Nəsimi rayonu, Akademik M.Mirqasımov küçəsi, ev 55, 57, 59 ünvanında yerləşən binanın sakinlərinin şikayətindən bəhs etmişdik. Qısa məlumat üçün qeyd edək ki, MTK-ların inşa etdikləri binanın sakinləri Qanunvericiliyə uyğun olaraq binanın sahibləri-payçıları hesab olunur. Qanunvericliyiə uyğun olaraq bina istismara təhvil veriləndən 6 ay sonra binanın idarəçiliyi sakinlərə, yəni payçılara verilir. Sakinlər isə Mənzil Mülkiyyətçiləri Müştərək Cəmiyyəti ( MMMC ) yaradaraq idarəetməni öz üzərinə götürür. Yenə Qanunvericiliyə uyğun olaraq MMMC yaradılmadığı təqdirdə, MTK binanın idarəçiliyini ərazi üzrə bələdiyyə orqanına verməlidir. Haqqında bəhs etdiyimiz ünvandakı binanın istismara verilməsindən ( 2016-cı il ) 6 ilə yaxın vaxt keçsə də, MTK nəinki idarəçiliyi bələdiyyəyə vermir, əksinə qanunsuz olaraq sakinlərdən pul toplayır. Və sakinlərin dəfələrlə müraciət etməsinə baxmayaraq, MTK yığılan vəsaitlə bağlı hesabat vermir. Bundan əlavə Qanunvericilikdə müəyyən edilib ki, binanın zirzəmisi birmərtəbəli olarsa, ancaq sığınacaq kimi istifadə oluna bilər. Yəni avtomobil dayanacağı-qaraj kimi istifadə oluna bilməz. MTK rəhbərliyi isə Qanunvericiliyi pozmaqla binanın zirzəmisindən qaraj kimi istifadə edir və…üstəlik hər avtomobilə görə ayda avtomobil sahibindən 150 manat alır.
Təsəvvür edirsiniz, yuxarıda qeyd etdiyimiz kimi, bina bütövlükdə, zirzəmisi də daxil olmaqla payçıların əmlakıdır. MTK isə payçıların əmlakını onların özünə qanunsuz olaraq hər ay 150 manata icarəyə verir. Təkrar etməyə məcburuq ki, Qanunvericiliyə görə, bina və ətrafı payçılara məxsusdur. “Sahil-R” MTK-nın rəhbərliyi isə payçıların razılığı olmadan binanın ətrafını müxtəlif obyektlərə icarəyə vermişdir və bunula da obyektlərə giriş-çıxışı təmin edərək sakinlərin hərəkəti üçün lazım olan səkiləri zəbt etmişdir. Binanın həyətindən digər binanın ərazisində yerləşən uşaq bağçasına gedən yol da sakinlərə problem yaradır. Bina sakinlərinin dediyinə görə, daha bir ciddi problem binada quraşdırılan liftlərdir. Belə ki, liftlər texniki parametrlərinə görə tələblərə cavab vermədiyi üçün mütəmadi olaraq sıradan çıxır, bu isə sakinlərin (azyaşlı uşaqlar, yaşlı və səhhətində müxtəlif problemi olan insanların) liftdə qalması ilə nəticələnir. Bununla bağlı sakinlərin müraciətindən sonra FHN-nin Sənayedə İşlərin Təhlükəsiz görülməsi və Dağ-Mədən Nəzarəti Dövlət Agentliyi liftlərin istifadəyə yararsız olması barədə rəy verdi.
Amma bu günədək problem aradan qaldırılmayıb. Sakinlərin qeyd etdiyi ən böyük problemin biri isə müqavilədə və çıxarışda göstərilən sahənin xeyli fərqlənməsidir. Belə ki, müqavilədəki rəqəmlə çıxarışdakı rəqəm arasında 8, 10, bəzən 12 kv.m sahə fərqi yaranır. Bu artıq cinayət əməlidir. Bütün bunlar azmış kimi MTK rəhbərliyi binanın altında olan əraziləri “Bazar Store” və “SUNLAB”a icarəyə verib. Bir daha qeyd edirik ki, Qanunvericiliyə görə, həmin sahələr binanın payçıları olan sakinlərə məxsusdur. MTK-nın bu əməlləri Qanunvericiliyə ziddir. Amma MTK nəinki həmin sahəni icarəyə verib pul alır, hətta bununla binanın sakinlərinə ciddi problemlər yaradır. Birincisi, həmin obyektlərdəki avadanlıqların istismar zamanı yaratdığı yüksək səs-küy sakinlərin rahatlığını, istirahətini pozur. Və ən əsası Səhiyyə, Ekologiya və Təbii Sərvətlər Nazirlikləri buradakı səs-küyün normadan artıq olması barədə rəy verib və sənədlər Rayon Məhkəməsinə göndərilib. Təəssüf ki, Rayon Məhkəməsi iki dövlət qurumunun iddiasını təmin etməyib.
İndi hazırda Ekologiya və Təbii Sərvətlər nazirliyi Rayon Məhkəməsinin qərarından apelyasiya şikayəti verib. Hazırda binanın sakinləri yuxarıda qeyd olunan narazılıqlarla bağlı Səhiyyə Nazirliyinə, Ekologiya və Təbii Sərvətlər Nazirliyinə, FHN-ə, DİN-ə, Dövlət Şəhərsalma və Arxitektura Komitəsinə, Azərbaycan Avtomobil Yolları Dövlət Agentliyinə, Bakı və Nəsimi İcra Hakimiyyətlərinə müraciət ediblər. Hazırda həmin qurumlar tərəfindən araşdırılma aparılır. Yeri gəlmişkən, sakinlər onu da qeyd edir ki, "Bazar Store"-yə məhsul gətirən şirkətlərə məxsus iri yük maşınları mütəmadi olaraq binaya gələn yolda tıxac yaradır və sakinlərin gediş-gəlişinə mane olur, dözülməz səs-küyə səbəb olurlar, sakinlərin istirahət hüququnu pozurlar. Eyni zamanda binada yerləşən "SUNLAB" tibbi müayinə obyektinin də 5 yerdən girişi var.
Eyni zamanda Laboratoriyanın kuryerlərinin istifadə etdiyi motosikletlər də ciddi problem yaradır. Onu da qeyd edək ki, MTK-nın rəhbərliyi layihədən kənara çıxaraq binada əlavə artırma edib. Bir sözlə, MTK rəhbərliyi payçıların hüquqlarını, ölkə qanunvericliyi kobud şəkildə pozur. Ümid edirik ki, dövlət qurumlarının araşdırması və Apelyasiya Məhkəməsi bütün bu baş verən özbaşınalıqlara son qoyacaq. //gundelik-baku.com//

“Olympus Park” tikinti şirkətinin Xətai rayonunda "Lider" idman klubunu sökməsi, yerində bina inşa etməsi ilə bağlı yaranan problemə görə məhkəmə çəkişmələri uzun müddətdir davam edir.

Məhkəmə sökülən obyektin qiymətləndirilməsi üçün ekspertiza təyin etmişdi. Ekspertizanın rəyi olduqca ilgincdir.

Xatırladaq ki, “Olympus Park” tikinti şirkətinin Xətai rayonunda "Lider" idman klubunu sökməsi, yerində bina inşa etməsi ilə bağlı yaranan problemə görə cinayət işi açılıb, daha sonra cinayət işinə xitam verilib.

Zərərçəkmişə 162 min manat ödənilməsi barədə qərar çıxarılsa da, klubun rəhbəri İlham Sərdarov bununla razılaşmır. O deyir ki, təkcə uçqunun altında qalan idman avadanlıqlarının qiyməti 162 min manatdır.

Bu işlə bağlı son olaraq Bakı Kommersiya Məhkəməsində hakim Leyla Əliyevanın sədrliyi ilə araşdırılan məhkəmə iclasında qərar qəbul olunub ki, dağıdılan əmlakın qiymətləndirilməsi üçün ekspertiza təyin edilsin. Ekspertizanın keçirilməsi “Əmlak Ekspert Mərkəzi” MMC-yə tapşırılıb.

Zərərçəkmiş tərəf isə müstəqil “Legitim Qiymətləndirmə və Consulting” MMC-yə müraciət edərək dağıdılmış əmlakı qiymətləndirib. MMC idman klubunun dağıdılması nəticəsində dəymiş zərərin təxmini bazar qiymətini 1.425.000 manat olaraq qiymətləndirib.

İlham Sərdarov əlavə edir ki, dağıdılmış əmlakının bazar qiyməti ilə hesablanması konstitusiyanın 29-cu maddəsinə ziddir: “Yəni, dövlət layihəsi olanda söküləcək obyektin, mənzilin bazar qiyməti hesablanır. O da əvvəldən ədalətli şəkildə hesablanıb, ödənildikdən sonra. Burda isə özəl şirkət olduğu üçün ancaq bərpa edilmə qiymətləndirilə bilər”.

Artıq məhkəmənin təyin etdiyi ekspertizanın rəyi də məlum olub.

Obyekti sökülən İlham Sərdarov deyir ki, “Əmlak Ekspert Mərkəzi” MMC qiymətləndirmə üçün müqayisəli obyektlər göstərib. Amma göstərilən obyektlərin qiyməti ilə onun sökülən obyektinin qiyməti uzlaşmır:

“Həmin obyektlərin şəkilləri də var. Mənim obyektimi Şıxliniskayada bir obyektlə müqayisə ediblər. Həmin obyektlə belə müqayisə edəndə mənim obyektimin qiyməti daha çox hesablanmalıdır. Çünki minimum qiymətlə belə hesablamayıblar. Bu adamlar mənim obyektimi söküb yerində bina tikirlər. Təsəvvür edin ki, tikdikləri binada evlərin satış qiyməti 1 kvadratmetr üçün minimum 1300 manatdır. Obyektin kvadratı isə 4000 min manat. Amma mənim obyektimin qiymətini 1000 manata belə hesablamayıblar.

Rəyi verən ekspert deyir ki, "Həzi Aslanov" metrosunun ətrafı səhralıqdır. Bunu da əmlakın dəyərini aşağı salmaq üçün edir. Eskpertin istifadə etdiyi sənədlər 2005-ci ilin materiallarıdır. İndi "Həzi Aslanov" metrosunun ətrafı səhralıqdır? Bakıda bunu kimdən soruşsan gülər. Metronun ətrafında 100 metrlik boş yer var?”.

Zərərçəkmiş İlham Sərdarov ekspertizanın rəyindən narazı olduğunu bildirib. Məhkəmə iclası sentyabrın 5-də baş tutacaq.

Xatırladaq ki, sonuncu məhkəmə iclaslarından birində “RS Construction” MMC-nin (“Olympus Park”) nümayəndəsi və vəkili Eynar Əliyev demişdi ki, bu məsələyə görə şirkətin borclanmaları yaranıb. İlham Sərdarovun məqsədi şirkətə külli miqdarda ziyan vurmaqdır. Vəkil tikintinin dayandırılması ilə şirkətin külli miqdarda borclarının yarandığını etiraf etmişdi.

Məhkəmə çəkişməsi isə Bakıda idmançıların klubunun gecə ilə uçurulması, bu günə qədər kompensasiya ödənilməməsi ilə bağlı şikayətlərə görə davam edir.

Bildirək ki, “RS Construction” MMC İlham Sərdarova qanunsuz olaraq sökdüyü obyektinə görə 162 min manat təklif edir. Bundan başqa, İlham Sərdarovdan etdiyi şikayətlər nəticəsində “RS Construction” MMC-nin işgüzar nüfuza vurulmuş zərərin əvəzi olaraq 1 milyon manat məbləğində pul tələb edir.

Bildirək ki, Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin 28.08.2020-ci il tarixli tikinti işlərinin dayandırılması barədə qərarına əsasən, Xətai rayonu, Cavanşir və Sadıqcan küçələrinin kəsişməsində yerləşən “RS Construction” MMC-nin sifarişi ilə həyata keçirilən 3 ədəd 12 mərtəbəli yaşayış binalarının tikintisi dayandırılıb. //Musavat.com//

“Kontakt Home” müştərilərini aldatmaqda davam edir. Bu şirkətin məhsullarının istifadəyə yararsız olması haqda istehlakçı şikayətlərinin ardı-arası kəsilmir. Alınan məhsulların xarab çıxması, qızıl zəmanət talonunun işə yaramadığı şikayətlər daxilindədir.

Bu dəfə Yasamal rayon sakini Nazilə Yusufova “Kontakt Home”un Ayna Sultanova filialından şikayətçidir. Bizim.Media-ya müraciət edən şikayətçinin sözlərinə görə 2020-ci ildə “Kontakt Home”un sözügedən fialilından 350 manat civarında “Samsung A 20 S” model telefon alıb.

1 həftə keçməmiş telefonun yararsız olduğu üzə çıxıb. İstehlakçı 14 gün müddətinə malın geri qaytarılması hüququndan istifadə edərək filiala yaxınlaşıb. Amma qarşı tərəfdən ona məhsulun 100 manat aşağı qiymətlə qaytarılacağı bildirilib. Müştəri ziyana düşməmək üçün telefonu qaytarmayıb.

Bir neçə gün sonra telefon ümumiyyətlə işləməyib və ekranı tamamilə sönüb. Çarəsiz qalan istehlakçı yenidən “Kontakt Home”a üz tutub. Oradan isə xanım müştəri şirkətin servisinə yönləndirilib:

“Müqavilə sənədi ilə telefonu servisə verdim. Telefon 2 ay servisdə qaldı. Bir müddət sonra mənə zəng gəldi ki, “telefonun 3 cihazı dəyişilib, gəlin götürün”. Özümə də maraqlı gəldi ki, vur-tut telefonu 1 həftə işlətmişəm. Necə oldu ki, 3 cihazı xarab etmişəm. Servisə yaxınlaşdım. Bu dəfə tamamilə fərqli bir cavab eşitdim. Mənə bildirildi ki, başqa şəxsin adına olduğu üçün telefonu sizə verə bilmərik.

Sən demə işlənmiş telefonu ikinci dəfə mənə satıblar. Onu da deyim ki, telefon servisdə olduğu müddətdə aylıq 42 manat kredit ödənişimi etmişəm. 4 ayın borcu qalmışdı. Amma nə əlimə sağlam telefon ala, nə də boş yerə xərclədiyim pullarımı geri qaytara bildim. Əksinə bütün filiallarda, məhkəmələrdə qaldım.

Dəfələlərlə incidildim. Bütün bunlar azmış kimi telefon servisdə olduğu müddətdə müvəqqəti istifadə üçün mənə verilən telefona görə də 350 manat cərimə tələbi ilə məhkəməyə verilmişəm”.

Şikayətçi bildirib ki, istehlakçı hüququ aldadıldığı və incidildiyi üçün Yasamal rayon Məhkəməsinə müraciət edib və məhkəmənin bütün iclaslarına qatılıb. Amma məhkəmə işə xitam verib və ona gələn son məktubda qeyd edilib ki, müraciətlər baxılmamış qaldı.

İndi isə “Kontakt Home” müştərini məhkəməyə verib:

“Kiminsə adına olan telefonu mənə sırımaqları, aylarla məni incitmələri, malım və pulum getdiyi bəs deyil, köhnə bir telefona görə məhkəməyə verilmişəm. Guya istifadə zamanı telefonun ekranını cızmışam və buna görə 350 manat da cərimələnmişəm.

Mənə verdikləri telefonun modeli o qədər köhnə idi ki, əlimə alanda belə “Kontakt Home”un əməkdaşı özü ekranda problem olduğunu dedi. Ancaq zəng gedib gəlirdi. Necə veriblərsə, elə də qaytarmışam. Onu qaytaranda mənə irad tutdular ki, guya ekrana cızıq düşüb.

İstifadə müddəti bitmiş bir telefona görə niyə cərimə edilməliyəm ki? Ya ödədiyim pulu geri qaytarsınlar, ya da yeni telefon versinlər. Qalan kredit borcumu da ödəməyə hazıram”.

Məsələ ilə bağlı “Kontakt Home” mağazalar şəbəkəsinin İctimaiyyətlə Əlaqələr Şöbəsinin meneceri Vəfa Rüstəmova ilə bir neçə dəfə əlaqə yaratmağa çalışsaq da, cəhdimiz baş tutmayıb.

Qarşı tərəfin mövqeyini dərc etməyə hazırıq... //bizim.media//

Naxçıvandan maraqlı bir məlumat əldə etmişik.

“Hürriyyət”ə göndərilən məlumatda son 8 ildə Muxtar Respublikada təhsilin səviyyəsi əks olunub.

Müəllif 2014-cü ildən indiyədək ali məktəblərə qəbul imtahalarında 500-dən artıq bal toplayan Naxçıvan abituriyentlərinin sayını göstərən cədvəl tutub və cədvəldən də aydın görünür ki, 8 il ərzində bu uğura imza atanların sayı 33%, ümumi göstəricilərdəki nisbəti isə 50%-ə yaxın azalıb.

Belə ki, 2014-cü ildə Muxtar Respublikada 500-dən çox bal toplayanların sayı 347 idi və bu da Azərbaycanın 5564 başarılı abituriyentlərinin 6.2%-ə bərabərdi. Bu il isə həmin rəqəm sayda 254-ə, nisbətdə 3.5%-ə düşüb.

Müəllifin fikrincə, hətta bu rəqəmlər belə, real mənzərəni tam əks etdirmir. Nədən ki, Muxtar Respublikada hətta 490 bal toplayanlar belə, 500-lük abituriyentlərin siyahısına salınır və belə saxta 500-lərin sayı az deyil. Bu da istər-istəməz uğur göstəricilərinin süni şəkildə şişirdilməsinə yol açır. Ən əsası isə, bu cür saxtakarlıqlar illərdir davam edir.

Muxtar Respublikanın təhsil sistemində hər il təkrarlanan digər saxtakarlıq Naxçıvan yetişdirməsi kimi göstərilən bir sıra abituriyentlərin əslində bu diyarla birbaşa əlaqəsinin olmamasıdır. “Məsələn, 2016-cı ildə guya Şahbuz kəndlərindən birində təhsil almış kimi göstərilən bir qız abituriyentin 695 bal topladığı barədə xəbər yayılmışdı. Hətta o vaxt bu məlumatı MR-in rəsmi orqanı “Naxçıvan xəbərləri” saytı “TQDK-nın qəbul imtahanında 695 bal toplayan Prezident təqaüdçüsü naxçıvanlı gənc” sərlövhəsi ilə təmtəraqlı şəkildə dərc etmişdi. Naxçıvanın “İstedad” kursu da həmin abituriyenti özünün ən başarılı yetişdirməsi kimi təqdim edir və onunla qürur duyduğunu gizlətmirdi. Lakin sonradan məlum oldu ki, bu abituriyent bir gün belə Naxçıvan məktəbinə getməyib, Bakıdakı kurslardan birində imtahanlara hazırlaşıb. Onu yetişdirən bir başqa hazırlıq kursunun ortaya çıxması Naxçıvan rəsmi mətbuatını dərhal tədbirlər görməyə vadar etdi. Həmin xəbəri öz səhifələrindən sildilər. “İstedad” kursu isə bu günə qədər bu saxta uğurunu özünün facebook səhifəsində reklam edir”.

Kənd Təsərrüfatı Nazirliyinə məxsus “Azəraqrar Dövlət İstehsalat və Emal Birliyi” MMC-nin direktorunun ölkədən çıxışına qadağa qoyulur.

32gun.az-ın əldə etdiyi məlumata görə, Dövlət Vergi Xidmətinin Bakı şəhəri Lokal Gəlirlər Baş İdarəsi Abbasov Fəda Əli oğlu ölkədən getmək hüququnun müvəqqəti məhdudlaşdırılması haqqında

Bakı Kommersiya Məhkəməsinə müraciət edilib. İşə hakim Nərmin Əhmədovanın sədrliyi ilə baxılacaq.

Qeyd edək ki, Fəda Abbasov Kənd Təsərrüfatı Nazirliyinə məxsus “Azəraqrar Dövlət İstehsalat və Emal Birliyi” MMC-nin qanuni təmsilçisi və direktorudur.

MMC-nin Dövlət Vergi Xidmətinin Bakı şəhəri Lokal Gəlirlər Baş İdarəsinə 169 min 406 manat 27 qəpik borcu var.

Xatırladaq ki, “Azəraqrar Dövlət İstehsalat və Emal Birliyi” 2018-ci ildə yaradılıb. Onun nizamnamə kapitalı 5 min manatdır.

32gun.az

Prezident İlham Əliyev Bakı şəhərinin Xətai rayonu ərazisində avtomobil yollarının yenidən qurulması işlərinin davam etdirilməsi ilə bağlı bəzi tədbirlər haqqında sərəncam imzalayıb.

Bununla bağlı Prezident.az məlumat yayıb.

Sərəncama əsasən, Bakı şəhərinin Xətai rayonu ərazisində avtomobil yollarının yenidən qurulması işlərinin davam etdirilməsi məqsədilə “Azərbaycan Respublikasının 2022-ci il dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.26.18-ci yarımbəndində göstərilmiş məbləğin 4,27 milyon manatı Azərbaycan Avtomobil Yolları Dövlət Agentliyinə ayrılıb.