Xəzər rayonunda yerləşən “Rahat” marketin qabağında şam ağaclarının kəsilməsi ilə bağlı Ekologiya və Təbii Sərvətlər Nazirliyindən (ETSN) verdiyi açıqlama Buzovna sakinlərində ciddi narazılıq yaradıb.

DİA.AZ AzToday.az-a istinadla xəbər verir ki, Buzovna sakinləri adıçəkilən marketin qarşısındakı 6 agacın kəsilməsi ilə bağlı ETSN-nin mətbuat xidmətinin verdiyi açıqlamanı təkzib edirlər.

Qurumun mətbuat katibi İradə İbrahimova dünən mediaya açıqlamasında bildirib ki, rayon ərazisində müxtəlif ünvanlarda quru və qəzalı vəziyyətdə olan ağacların götürülməsi ilə bağlı Xəzər rayon İcra Hakimiyyəti tərəfindən Dövlət Ekoloji Ekspertiza Agentliyinə müraciət olunub.

“Rayonun bir neçə yerində, o cümlədən Buzovna qəsəbəsindəki “Rahat” marketin qarşısında Agentlik tərəfindən qurumuş şam ağaclarının götürülərək əvəzinə yeni ağacların əkilməsi şərtilə rəy verilib.”

Sakinlər isə ağacların quru olması ilə bağlı ETSN rəsmisinin dediklərinin yalan olduğunu və sözugedən açıqlamanın baş verən qanunsuzluğun ört-basdır edilməsinə xidmət etdiyini bildirirlər. Yayılan video-görüntülərdə də agacların tam saglam olduğu görünür.

Məlumata görə, parkinq yerinin genişləndirilməsi üçün kəsilən agacları ulu öndər Heydər Əliyevin birbaşa tapşırığı ilə adıçəkilən ərazidə əkilibmiş. Ekologiya Nazirliyinin iddia etdiyi kimi, Xəzər rayonu, Buzovna qəsəbəsi, “Rahat Market”in qarşısında ağacların kəsilməsi heç də həmin ağacların qurması ilə bağlı deyil. Sakinlərin sözlərinə görə, Heydər Əliyevin əkdiyi həmin ağaclar Ekologiya Nazirliyinin Tərlan və Fariz adlı əməkdaşlarının icazəsi ilə kəsilib. Və 6 ağacın kəsilməsinə görə Tərlan və Farizə 50 000 manat ödənildiyi iddia olunur. Prosesdə Buzovna bələdiyyəsinin sədri Mətləb Əliyevin və qəsəbə icra nümayəndəsinin müavini Vüqar Sadıqovun da iştirak etdiyi bildirilir.

Sakinlərin narazılığı ilə bağlı ETSN-nin mətbuat xidməti ilə əlaqə saxladıq, yayılan görüntüləri təqdim etdik. Qurumun mətbuat katibi İradə İbrahimova AzToday.az-a bildirib ki, dünən bununla bağlı açıqlama veriblər. Amma yayılan görüntülər və sakinlərin narazılığı ilə bağlı sualları cavablandırmadı.

Göründüyü kimi, oğul Əliyevin prezidentliyi müddətində Heydər Əliyevin əkdiyi ağacları kəsməyə cəsarət edənləri cəzalandıran çətin tapılsın…

Həmin görüntüləri təqdim edirik:

Azərbaycanda bank sistemi bir fəlakətdir. Müştərilər nadir hallarda bank xidmətlərindən razı qalırlar. Çünki banklar vətəndaşa deyil, özünə xidmət prinsipini kredo seçiblər. Belə yanaşma isə heç bir halda insanları məmnun edə bilməz. Odur ki, tez-tez sosial şəbəkə platformalarında, onlayn mediada, həmçinin müxtəlif müraciət və şikayət məktublarında bankların bərbad, soyğunçu, müştərilərin cibinə girən siyasətindən bəhs olunur.
Məlum olur ki, faizlər yüksəkdir, Mərkəzi Bank bu məsələdə onlara heç bir təzyiq göstərmir və ölkədəki iqtisadi reallığı, əmək haqlarını, gəlirləri nəzərə almağı tövsiyə etmir, nəticədə banklar da vətəndaşları soğan qabığı kimi soymaq maliyyə-kredit siyasəti həyata keçirirlər. Nəinki dünyanın inkişaf etmiç ölkələrində, hətta qonşu İran, Gürcüstan, Türkiyə və digər ölkələrdə vətəndaşları boğan, yuxarı faizlərlə qanını içən bank sektorunu görməzsiniz.
Əksinə, banklar vətəndaşları məmnun etmək üstündə rəqabət aparır, müxtəlif kampaniyalar, layihələr reallaşdırır, müştərilərə cəlbedici təkliflər irəli sürür ki, digər banklara müraciət etməsinlər. Bu mənada təkcə fiziki şəxslər, ipoteka götürən vətəndaşlar deyil, o cümlədən fermerlər, sahibkarlar da həvəslənirlər, stimul qazanırlar.
Ancaq Azərbaycan bankları kustar, primitiv və biabırçı xidmət üzərində dayanıb – yüksək faizlə kredit verib ödəyicinin dərisinə saman təpmək, elementar pul transferlərindən komissiya tutub rahat şəkildə qazanmaq. Buna sadə formada cibgirlik də demək olar, qumar da…
Yəni dünyada ən adi məsələ maliyyə köçürmələri, kartdan karta ödənişlər, post-terminal, yaxud bankomadan vəsait çıxarışlarıdır. Azərbaycanda isə banklar vətəndaşın cüzdanına girir, ona çatacaq halal pulu bankomatdan çıxardığı üçün komissiya tuturlar. Hazırda əksər banklar hər 100 manata 1 manat, hətta 50 manat da bankomatdan çıxarmaq istəsən, yenə 1 manat faiz alırlar. Oğurluq, quldurluq, mənimsəmə…
TİA.Az məlumat verir ki, bu məsələdə əndazəni aşan isə “Bank Respublikadır”. Sözügedən subyektin bankomantından başqa bankın kartı ilə məcburiyyətdən pul çıxarmaq istəyəndə hər 100 manata 2-3 manat komissiya tutur.
Bu da “öz daxili işimdir” adı ilə müştərinin cibinə girib pulunu götürməkdir. Misal üçün bu günlərdə belə halla qarşılaşan müştərilərdən birinin sözlərinə görə, 168 manat vəsait çıxarıb, buna görə ondan 4 manat faiz tutulub. Təbii ki, haqsızlıqdır, qanunla tənzimlənməmiş addımdır.

Bu mövzuda TİA. Az-a danışan hüquqşünas, bankçılıq üzrə ekspert Əkrəm Həsənov deyir ki, komissiya haqlarının təyin edilməsində banklar sərbəstdir:
“Bankomatlardan həmin bankın kartı yox, bir başqa bankın kartı ilə pul çıxarılarsa, müəyyən məbləğdə komissiya tutulur. Burada qanunvericilik heç bir məhdudiyyət qoymayıb.
Ümumiyyətlə, “Banklar haqqında” qanuna görə, banklar öz bank xidmətləri üzrə şərtləri, o cümlədən komissiya haqları və faizləri müəyyən etməkdə tam sərbəstdirlər. O zaman vətəndaş nə etməlidir? Burada vətəndaşın edə biləcəyi yalnız bir şey var: bank seçəndə əvvəlcə bankın şərtləri ilə tanış olub sonra istifadə etmək…”

Oğuz meşələrində ağaclar kütləvi "soyqırıma" məruz qalır.

Mənbənin verdiyi məlumata görə, 50-60 sm ölçülərində olan müxtəlif cinsli ağaclar kəsilərək mebel sexləri və kustar üsulla kömür hazırlayan kömürçülərə satılır.

Meşə quldurları izi itirmək üçün kəsdikləri ağacların bir neçəsinin köklərini yerdən çıxardıb.

Aldığımız məlumatlarda qeyd olunur ki, bu işin başında Ekologiya Nazirinin müavini Vüqar Kərimovla Meşələrin İnkişafı Xidmətinin rəisi olan Xalıqverdi Hüseynov durur. Və meşələrdə olan cinayətlərə başçılıq edən əsas bu iki nəfərdir.

Qırıntı olan ərazinin koordinatıarı:
X-707262, Y-4551241.

Qarşı tərəfin mövqeyini işığlandırmağa hazırıq. //azinfo.tv//

Naxçıvanda, daha dəqiqi Babək rayonunda sakinləri su çiləsi davam edir. Keçən günlərdə DİA.AZ olaraq nəzərinizə çatdırmışdıq ki, insanlarımız nəinki həyətyanı sahələrini, əkdiklərini suvara bilmirlər, hətta içməyə də su tapmırlar. Bununla bağlı sosial şəbəkələrdə Babək sakininin Allaha yağış üçün duası da məhşurlaşmışdı.

İndi isə sözügedən rayonun Cəhri kəndindən redaksiyamıza şikayət daxil olub.

DİA.AZ-a müraciət edən cəhrililər su çiləsinin şiddətli formada davam etdiyini, əlaqədar qurumların isə bununla bağlı tədbir görmədiyini qeyd edirlər.

Daxil olan məlumata görə, Babək rayonu Cəhri kəndinin sakinləri 1 maşın suyu 30 manata alırlar. Hətta həyətlərini belə maşınla aldıqları su ilə suvarmaq məcburiyyətində qalıblar...

Məsələ diqqətimizdədir. Əlaqədar qurumları dinləməyə hazırıq...

Sentyabrın 4-dən 5-nə keçən gecə Ermənistan silahlı qüvvələrinin bölmələri dövlət sərhədinin Basarkeçər rayonunun Aşağı Şorca və Yuxarı Şorca yaşayış məntəqələri istiqamətində yerləşən mövqelərindən Kəlbəcər rayonunun Yellicə və Zivel yaşayış məntəqələri istiqamətində yerləşən Ordumuzun mövqelərini müxtəlif növ atıcı silahlardan intensiv atəşə tutub.

Bu barədə Müdafiə Nazirliyi məlumat yayıb.

Azərbaycan Ordusunun bölmələri tərəfindən görülən adekvat cavab tədbirləri nəticəsində qarşı tərəf susdurulub.

"Tərtər işi” ilə bağlı həbs olunan Rahib Məmmədovun kimliyi ilə bağlı bəzi məlumatlar məlum olub.

DİA.AZ APA-ya istinadla xəbər verir ki, Rahib Məmmədov həbs olunana qədər ədliyyə mayoru rütbəsində hərbi hüquqşünas kimi xidmət edib. O, həmçinin Rahib Bəşər imzası ilə tanınan şairdir.

Rahib Məmmədov Azərbaycan Yazıçılar Birliyinin üzvü, “Qızıl qələm” və “Azərbaycan Bayrağı” mükafatları laureatıdır.

Onun "Həyat eşqi", "Sevgi Dünyam", "Zirvəyə doğru" adlı kitabları nəşr olunub.

Xatırladaq ki, Rahib Məmmədov “Tərtər işi” ilə bağlı həbs olunub.

O, Cinayət Məcəlləsinin 145.3, 293.2, 341.2.2 və 341.2.3-cü maddələri təqsirləndirilən şəxs qismində cəlb edilməklə barəsində məhkəmə qərarı ilə həbs qətimkan tədbiri seçilib.

"Somalidə oktyabr və dekabr aylarında aclıq olacaq".

Gundem.media xarici KİV-ə istinadən xəbər verir ki, bu haqda Birləşmiş Millətlər Təşkilatı məlumat yayıb.

Quraqlığın pisləşdiyi və qlobal ərzaq qiymətlərinin rekord həddə çatdığı üçün Somalinin bəzi bölgələrində oktyabr və dekabr ayları arasında aclıq baş verəcək.

“Azərbaycan Meliorasiya və Su Təsərrüfatı” ASC-nin Tikilməkdə olan meliorasiya və irriqasiya obyektlərinin birləşmiş müdiriyyəti Xaçınçay su anbarının 7 km -lik magistral kanalla birlikdə təmiri və bərpası ilə bağlı elan etdiyi açıq tenderinin qalibini açıqlayıb.

DİA.AZ xəbər verir ki, 9.903 milyon manatlıq tenderin qalibi “Körpü-Bina-Tikinti” MMC-dir.

Xatırladaq ki, "Körpü-Bina-Tikinti" MMC bundan əvvəl Mənzil İnşaat Dövlət Agentliyinin Bakı şəhəri, Yasamal rayonu, Xarici dairəvi avtomobil yolunun kənarında (Qanlı gölün şimal hissəsi) yerləşən 15,4 ha torpaq sahəsində inşa olunan yaşayış kompleksində ərazinin şaquli planlaşdırılması, yollar, səkilər və velosiped yollarının çəkilməsi üzrə 472 179 min manatlıq tenderini qazanıb (16.12.2021).

DİA.AZ bildirir ki, bunlar da son deyil və ümumiyyətlə adı yerli KİV-də kifayət qədər qaranlıq işlərdə hallandırılan "Körpü-Bina-Tikinti" MMC-nin rəhbəri Xəlil Göyüşovdur. Onun adı ilə bağlı olduqca ağır ittihamlar var. Pul qaçaqmalçılığından tutumuş büdcə oğurluğuna qədər...

Bununla bağlı daha geniş materialımız olacaq. Bizi izləməkdə davam edin. İddia olunanlarla bağlı dia.az olaraq bütün maraqlı tərəflərin mövqeyini işıqlandırmağa hazırıq...

DİA.AZ

Dövlət Gömrük Komitəsində 100-ə yaxın əməkdaş təqaüdə buraxılıb.

DİA.AZ xəbər verir ki, bu barədə Gununsesi.info-ya adıçəkilən komitədən verilən məlumatda bildirilir.

Məlumata görə, təqaüd yaşına çatmış əməkdaşlar rəhbərliyə müraciət edərək fəaliyyətlərinə xitam verilməsini istəyiblər.

Qeyd edək ki, həmin şəxslərin əksəriyyəti təqaüd yaşına çoxdan çatsa da komitə sədrinin əmri ilə hər il xidmətdə qalıblar.
Görünür, kütləvi şəkildə təqaüdə göndərilənlər yeni rəhbərliyin iradəsi ilə bu ərizəni yazıb.

Lerik Rayon İcra Hakimiyyəti başçısının Lerik Şəhər Ərazi Nümayəndəliyi şəhərdə abadlıq işlərinin satın alınması ilə bağlı müsabiqəyə yekun vurub.

DİA.AZ qaynarinfo-ya istinadla xəbər verir ki, tenderin qalibi "Şabran D” MMC olub. Qurumla şirkət arasında maliyyə dəyəri 301 856.28 AZN təşkil edən satınalma müqaviləsi imzalanıb.

İqtisadiyyat Nazirliyi yanında Dövlət Vergi Xidmətinin reyestr məlumatlarında "Şabran D” MMC-nin 12 dekabr 2007-ci ildə qeydiyyata alındığı göstərilir. Nizamnamə kapitalı 10 AZN olan şirkətin hüquqi ünvanı Bakı şəhəri Nərimanov rayonu, akademik Həsən Əliyev küçəsi, ev 92a, mənzil 1-də yerləşir. MMC-nin qanuni təmsilçisi Bədəlov Cəlal Bayram oğludur.

Bir neçə il əvvəl Cəlal Bədəlov rüşvət qalmaqalı ilə gündəmə gəlmişdi. O, mediaya açıqlamasında, eyni zamanda hüquq-mühafizə orqanlarına müraciətində bildirmişdi ki, Şabran rayonunda aparılan quruculuq işlərinin və yeni layihələrin tenderində iştiraka razılıq almaq məqsədi ilə Şabran Rayon İcra Hakimiyyəti başçısının keçmiş 1-ci müavini Mehdi Balabəyova 227 min manat verib. Buna baxmayaraq, tenderdə uğurlu nəticə əldə etməyib.

Cəlal Bədəlovun bu açıqlaması tenderlərin şəffaf keçirilmədiyi barədə iddiaların təsdiqi hesab edilə bilər. Şirkət rəhbəri bu fikirləri ilə həm də özünün tenderlərdə iştirakla bağlı qaydaları pozduğunu etiraf edib.

Lerik şəhərində abadlıq işlərinə gəlincə, araşdırmalarımız zamanı bəlli olub ki, hər il yerli İcra Hakimiyyəti abadlıq işlərinə 300 min manatdan artıq vəsait xərcləyir.

Məsələn, ötən il Lerik Rayon İcra Hakimiyyəti başçısının Lerik Şəhər Ərazi Nümayəndəliyi ilə "Makro 2000 Eğitim Teknolojileri İnaşşat Taahhüt İş ve Dış Ticaret Anonim Şirketi”nin Azərbaycandakı ilə filialı ilə maliyyə dəyəri 385 644.76 AZN təşkil edən satınalma müqaviləsi imzalayıb.
2020-ci ildə abadlıq işlərinin satın alınması ilə bağlı "Elnur-2” Universal İstehsalat Kommersiya şirkəti ilə maliyyə dəyəri 382 984.4 AZN təşkil edən satınalma müqaviləsi bağlanıb.

Beləliklə, son iki ildə Lerikdə abadlıq işlərinə 1 070 485.44 AZN pul xərclənib. Rayon sakinləri isə deyir ki, abadlıq işləri daha çox kosmetik xarakterlidir. "Yollar pis vəziyyətdədir, elə kəndlər var ki, ora qışda maşınla getmək olmur. Abadlıq işləri adətən Lerikin özündə aparılır. O da kosmetik xarakterlidir”, deyə sakinlər bildirib.