Kişi, qadın və ya uşaq - fərqi yoxdur, əsas odur ki, düşmən istiqamətində avtomat və digər silahlarla atəş aça bilsinlər.

Zamantv.az axar.az-a istinadən xəbər verir ki, bunu ukraynalı politoloq Aleksandr Koçetkov deyib.

O, Rusiya ilə genişmiqyaslı hərbi münaqişə vəziyyətində qadın və uşaqlar üçün səfərbərliyin elan edilməsinin Ukraynanın xeyrinə olacağını bildirib:

“Toplu şəklidə atəş açılan zaman ehtimal nəzəriyyəsi işə düşür və güllələr hədəfini tapır. Mənim təklifim düşmənin mümkün itkilərini artırmağa kömək edəcək".

Azərbaycan Respublikası humanizm prinsiplərini rəhbər tutaraq 29 dekabr 2021-ci il tarixdə Macarıstan Respublikasının vasitəçiliyi ilə 5 nəfər erməni əsilli şəxsi Ermənistan tərəfinə təhvil vermişdir.

Həmin şəxslər 2021-ci ilin 16 noyabr tarixində Ermənistan silahlı qüvvələri tərəfindən dövlət sərhədinin Kəlbəcər istiqamətində törədilən təxribatın qarşısı alınarkən saxlanılan erməni əsilli hərbi qulluqçulardır. Qeyd olunan 5 nəfər Ermənistan vətəndaşı, müddətdən artıq həqiqi hərbi xidmət qulluqçuları - 01.11.1995-ci il təvəllüdlü Abramyan Sarkis Arturi, 18.06.1991-ci il təvəllüdlü Xaçatryan Arman Vaçaqani, 08.01.1988-ci il təvəllüdlü Aqacanyan Vaqe Sasuni, 16.04.1992-ci il təvəllüdlü Xaçataryan Suren Levai və 04.10.1997-ci il təvəllüdlü Avetyan Aram Artemidir.

Bildiririk ki, 2021-ci ilin 26 noyabr, 4 və 19 dekabr tarixlərində də Azərbaycan qarşı tərəfə 21 nəfər erməni əsilli hərbi qulluqçunu qaytarmışdır.

Prezident İlham Əliyev Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərə “Müharibə veteranı” adının verilməsi ilə bağlı tədbirlər haqqında Sərəncam imzalayıb.

Sərəncamda deyilir:

1. 2020-ci il sentyabrın 27-dən noyabrın 10-dək olan dövrdə Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərə “Veteranlar haqqında” Azərbaycan Respublikasının Qanunu ilə nəzərdə tutulmuş qaydada Azərbaycan Respublikası Nazirlər Kabinetinin müəyyən etdiyi kateqoriyalar əsasında 2022-ci il yanvarın 1-dən etibarən “Müharibə veteranı” adının və “Azərbaycan Respublikasının müharibə veteranı” vəsiqəsinin verilməsi, habelə Azərbaycan Respublikası Prezidentinin 2019-cu il 15 aprel tarixli 641 nömrəli Fərmanına uyğun olaraq “Müharibə veteranlarına Azərbaycan Respublikası Prezidentinin təqaüdü”nün (bundan sonra – Azərbaycan Respublikası Prezidentinin təqaüdü) təyin edilməsi və ödənilməsi təmin edilsin.

2. Azərbaycan Respublikasının Nazirlər Kabineti:

2.1. bir ay müddətində:

2.1.1.“Veteranlar haqqında” Azərbaycan Respublikasının Qanununa uyğun olaraq bu Sərəncamın 1-ci hissəsində nəzərdə tutulmuş şəxslərin kateqoriyalarının müəyyən edilməsini təmin etsin;

2.1.2. Azərbaycan Respublikası Nazirlər Kabinetinin normativ hüquqi aktlarının bu Sərəncama uyğunlaşdırılmasını təmin etsin;

2.2. bu Sərəncamın 1-ci hissəsində nəzərdə tutulan şəxslərə Azərbaycan Respublikası Prezidentinin təqaüdünün ödənilməsini təmin etmək üçün tələb olunan vəsaitin 2022-ci ilin və növbəti illərin dövlət büdcəsində nəzərə alınması üçün müvafiq tədbirlər görsün;

2.3. bu Sərəncamdan irəli gələn digər məsələləri həll etsin.

3. Azərbaycan Respublikasının Müdafiə Nazirliyi, Azərbaycan Respublikasının Daxili İşlər Nazirliyi, Azərbaycan Respublikasının Ədliyyə Nazirliyi, Azərbaycan Respublikasının Fövqəladə Hallar Nazirliyi, Azərbaycan Respublikasının Dövlət Sərhəd Xidməti, Azərbaycan Respublikası Prezidentinin Təhlükəsizlik Xidməti, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti və Azərbaycan Respublikasının Strateji Obyektlərin Mühafizəsi Dövlət Agentliyi:

3.1. bu Sərəncamın 1-ci hissəsində nəzərdə tutulan şəxslərin siyahısını 2022-ci il yanvarın 1-dən etibarən müəyyən edib Azərbaycan Respublikasının Nazirlər Kabineti ilə razılaşdırmaqla, onlara “Müharibə veteranı” adının və “Azərbaycan Respublikasının müharibə veteranı” vəsiqəsinin verilməsini, həmçinin bu barədə məlumatların Azərbaycan Respublikası Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sisteminin “Zəfər” altsisteminə daxil edilməsini təmin etsinlər;

3.2. bu Sərəncamdan irəli gələn digər məsələləri həll etsinlər.

4. Azərbaycan Respublikasının Xarici Kəşfiyyat Xidməti və Azərbaycan Respublikasının Dövlət Təhlükəsizliyi Xidməti bu Sərəncamın 1-ci hissəsində nəzərdə tutulan şəxslərin siyahısını 2022-ci il yanvarın 1-dən etibarən müəyyən edib Azərbaycan Respublikasının Nazirlər Kabineti ilə razılaşdırmaqla, onlara “Müharibə veteranı” adının və “Azərbaycan Respublikasının müharibə veteranı” vəsiqəsinin verilməsini, həmçinin bu barədə məlumatların 5 (beş) iş günündən gec olmayaraq kağız və elektron daşıyıcılarda Azərbaycan Respublikasının Əmək və Əhalinin Sosial Müdafiəsi Nazirliyinə təqdim olunmasını təmin etsinlər.

5. Azərbaycan Respublikasının Əmək və Əhalinin Sosial Müdafiəsi Nazirliyi:

5.1. bu Sərəncamın 1-ci hissəsində nəzərdə tutulan şəxslərə 2022-ci il yanvarın 1-dən etibarən Azərbaycan Respublikası Prezidentinin təqaüdünün təyin edilməsini və ödənilməsini təmin etsin;

5.2. bu Sərəncamdan irəli gələn digər məsələlərin həlli üçün zəruri tədbirlər görsün.

6. Bu Sərəncam 2022-ci il yanvarın 1-dən qüvvəyə minir.

ABŞ Prezidenti Co Bayden rusiyalı həmkarı Vladimir Putin ilə yanvarın 10-da görüşəcək.

Bu barədə Bayden administrasiyasının sözçüsü məlumat verib.

Həmçinin, Rusiya Xarici İşlər Nazirliyi də 10 yanvarda keçiriləcək görüşü təsdiqləyərək təhlükəsizlik tələblərini müzakirə etməyi planlaşdırıldığını bildirib.

Bununla yanaşı, 12 yanvar tarixində isə Rusiya və NATO arasında görüş keçiriləcəyi açıqlanıb.

Qeyd edək ki, ABŞ və Rusiya liderlərinin görüşləri zamanı adətən hanısa bölgənin bölüşdürülməsi barədə də gizli razılaşmalar olur. Belə görüşlərin nəticələrini sonradan dünyada yaşanan prosesləri diqqətlə izlədikdə də görmək mümkündür.

Yeni ilin ilk ayında Bayden və Putinin arasında görüş keçiriləcəyinin açıqlanması da dünya gündəmində ilk sırada yer aldı.

Çünki son zamanlarda ABŞ və Rusiya arasında Ukrayna məsələsinə görə yaranan gərginlik pik həddə çatıb. Hətta tərəflər bir-birini açıq şəkildə təhdid etməkdən belə çəkinmirdi.

Ona görə də artıq bütün diqqətlər liderlərin görüşünə yönəlib. Onların nələri müzakirə edəcəyi və bu görüşdən sonra nələrin baş verəcəyi isə müzakirə mövzusuna çevrilib.

Maraqlıdır, ABŞ və Rusiya liderlərinin görüşündə hansı bölgənin bölüşdürülməsi gündəmə gələcək? Ümumiyyətlə, liderlər arasında əsas müzakirə mövzuları nələr ola bilər?

DİA.AZ-ın məlumatına görə, politoloq Məhəmməd Əsədullazadə Cebhe.info-ya açıqlamasında bildirib ki, Rusiya ilə ABŞ və NATO arasında Ukrayna ətrafında baş verən proseslər müharibə astanasına gətirib:

“Fikrimcə, hər an tətiklər çəkilə, Qaradəniz və Donbass cəbhəsində ABŞ ilə Rusiya üz-üzə gələ bilər. Təbii ki, bu müharibənin başlaması Moskva və Vaşinqton üçün ağır nəticələrə gətirib çıxa bilər.

Tərəflər bu müharibədən çəkinmək və növbəti mərhələdə öz planlarını həyata keçirmək istəyir. Hazırda ABŞ Ukraynaya dəstək verir, Rusiya isə hərbi qüvvələrini Ukrayna cəbhəsinə yığır.

Əlbəttə ki, müharibənin baş verməsi Ukrayna dövlətinin zəifləməsinə səbəb ola bilər. Ona görə də ABŞ və Rusiya müharibədən çəkinmək üçün müəyyən diplomatik danışıqlar aparmaq məqsədilə görüşəcəklər.

Düşünürəm ki, Vladimir Putin və Co Bayden arasında 10 yanvarda keçiriləcək görüşdə böhrana son qoyula bilər. Çünki Putin də ABŞ-a ultimatum verib və öz geosiyasi mövqeyinin güclü olduğunu bildirib.

O, xüsusilə MDB məkanında NATO və ABŞ-ın irəliləməsinin Rusiya üçün arzuolunmaz bir proses olduğunu qeyd edib. Həmçinin, Kreml Qərbin Şərqi Avropada uzaqmənzilli ballistik raketlər yerləşdirilməsini həzm edə bilmir. Ona görə də tərəflər arasında gərgin bir böhran yaşanır”.

Politoloq deyib ki, Putin və Bayden arasındakı görüşdən sonra mövcud böhran bir qədər səngiməyə doğru gedəcək:

“Hesab edirəm ki, bu görüşdə hansısa ərazilərin bölüşdürülməsi müzakirə olunmayacaq. Çünki Rusiya bunu istəsə də, ABŞ qəbul etməyəcək. Lakin böhranın səngiməsi müharibənin qarşısını ala bilər. Buna baxmayaraq, ABŞ və Rusiya öz mövqelərindən geri çəkilməyəcəklər. Sadəcə olaraq, Ukrayna cəbhəsindəki müharibə ehtimalı təxirə salına bilər”.

Bakının Xəzər rayonunda 1971-ci il təvəllüdlü Rəhim sevgi münasibətində olduğu Sevili (adlar şərti verilib - red.) intim videogönütlü ilə şantaj edib. Zamantv.az sfera.az-a istinadən xəbər verir ki, Rəhim özgənin əmlakını hədə-qorxu ilə ələ keçirməkdə ittiham olunub.

O, Sevilin şəxsi məlumatlarını, onunla cinsi əlaqəyə girərkən gizlin çəkdiyi intim videogörüntünü əri və qohumları arasında yayacağı, şərəf və ləyaqətini alçaldacağı, rüsvay edəcəyini bildirib.

Rəhim 2019-cu ilin noyabrından 2021-ci il iyununa qədər olan müddət ərzində Sevildən müxtəlif vaxtlarda Binə qəsəbəsi Südçülük sovxozu deyilən ərazidəki fərdi yaşayış evində hissə-hissə olmaqla 1000 manat pulunu, 1 ədəd 290 manat dəyərində "Samsung Galaxy A10" markalı mobil telefonunu, sonuncu dəfə isə 100 manatını alıb.

İstintaq orqanı tərəfindən Rəhimin barəsində Cinayət Məcəlləsinin 182.1-ci (hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsi ilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə) maddəsi ilə ittiham elan edilib.

"İntim münasibətdə oduq"

Rəhim istintaqa ifadəsində özünü elan olunmuş ittiham üzrə təqsirli bilib. O bildirib ki, usta kimi müxtəlif tikinti sahələrində çalışıb: "25 ilə yaxındır evliyəm, 3 uşağım və bir nəvəm var. Təxminən 5 il bundan əvvəl Sevillə vatsapda təsadüfən tanış oldum. Bu tanışlıq nəticəsində münasibətlərimiz dərinləşdi. Əvvəlcə aramızda ailəvi gediş-gəliş, sonra sevgi münasibətləri yarandı. Sevillə bir neçə dəfə intim münasibətdə oduq".

Təqsirləndirilən şəxsin sözlərinə görə, təxminən bir il öncə Sevilin evində onun oğlu İsa ilə yeyib-içib: "Sonra İsa ilə aramızda mübahisə düşdü. Sevil mənə məxsus mobil telefonu yerə vuraraq sındırdı. Sevildən telefonumu tələb etdim. O da özünə məxsus "Samsung A 10" markalı mobil telefonu mənə verdi və məni taksi ilə evimə yola saldı.

Sevil telefonumu sındıran zaman nömrəm də telefonun içərisində qaldı. İçkili olduğum üçün nömrəmi götürmədim. Bu hadisədən təxminən 2 ay sonra Sevil mənə məxsus mobil nömrədən dostum Əliyə zəng edib. Əlidən xahiş edib ki, nömrələrini ona çatdırım. Əlinin vasitəsilə məndə olan mobil telefon nömrələrini Sevilə geri qaytardım".

"Qısqandığı üçün münasibətlərimiz pozuldu"

Rəhim deyib ki, bundan sonra Sevil ona zəng edib və darıxdığını, görüşmək istədiyini bildirib: "Mən də Sevilin evinə getdim, onunla görüşdüm və münasibətlərimiz yenidən başladı. Bundan sonra intim əlaqədə olan zaman Sevildən gizli videoya çəkdim. Münasibətlərimiz davam edən ərəfədə təxminən 2 il bundan öncə uşağım məktəbə getdiyi üçün Sevildən uşağa paltar almaqdan ötrü 100 manat verməsini xahiş etdim. Sevil də həmin məbləği verdi.

Sonra Sevilin evində təmir işləri apardığım üçün hər dəfə mənə 10 və ya 20 manat verib. Bu müddətdə Sevil hər zaman məndən xahiş edib ki, ondan ayrılmayım. Lakin məni ifrat dərəcədə qısqandığı üçün münasibətlərimiz pozuldu, mübahisələrimiz başladı. Nəticədə ayrıldıq. Sevil ondan ayrılarkən başıma oyun açacağını bildirdi".

"Məni şantaj etməyə başladı"

Cinayət işi üzrə zərərçəkmiş şəxs qismində ifadə verən Sevilin sözlərinə görə, 5 il bundan əvvəl Rəhimlə mobil telefon vasitəsilə təsadüfən tanış olub: "Bir müddət yazışdıqdan sonra aramızda isti, daha sonra isə intim münasibətlər yarandı. Ərim və oğlum evdə olmadıqları vaxtda Rəhimlə yaşadığım evdə gizli görüşmüşük. Həmin müddətdə aramızda olan bu münasibətlərdən heç kimin xəbəri olmayıb.
Bəzən Rəhimlə həftədə 2-3 dəfə görüşüb, yaxın münasibətlərdə olmuşuq. Lakin son iki ildə münasibətlərimiz birdən-birə soyudu. Səbəbi də o oldu ki, bəzi danışıqlarımızda bir-birimizi başa düşməmişik. Mübahisələr zamanı Rəhim məni şantaj etməyə başladı".

"Şok vəziyyətinə düşdüm"

Zərərçəkmiş qeyd edib ki, Rəhim ondan pul tələb edib: "Hədə-qorxu gəlməklə dedi ki, əgər onun istədiyi məbləğdə pulu verməsəm, mənimlə arasında olan gizli yazışma və intim münasibətə dair videogörüntü barədə ailə üzvlərimə, yaxınlarıma məlumat verəcək. Bununla məni rüsvay edəcək. Rəhimdən videogörüntü barədə soruşdum. Dedi ki, bir dəfə intim münasibətdə olarkən mobil telefonla məndən xəbərsiz çəkib, həmin videogörüntü hazırda telefonundadır, telefondan başqa, əlavə olaraq karta da yazıb, evdə saxlayır.

Bunu Rəhimdən eşidəndə şok vəziyyətinə düşdüm. Düşündüm ki, Rəhim həqiqətən bu video barədə ailə üzvlərimə məlumat versə, hamının içində rüsvay olacam və elə buna görə də dəhşətli dərəcədə qorxuya düşdüm. Düşündüm ki, rüsvay olmaqdansa, Rəhimə pul versəm yaxşı olar".

"Dəfələrlə yalvardım ki..."

Sevilin ifadəsinə görə, 2019-cu ilin təxminən noyabrından başlayaraq Rəhimə əlinə düşdükcə müxtəlif məbləğlərdə pul verməyə başlayıb: "Pulları konkret hansı tarixlərdə verməyim yadımda qalmayıb. Lakin bütün pulları ona öz yaşadığım evdə vermişəm. Elə olub, 20 manat, 30 manat, 50 manat və 100 manat vermişəm. Rəhimin məni şantaj etməsinə baxmayaraq, biz yenə də görüşmüşük. Çalışmışam ki, Rəhimdə olan videonu onun telefonundan silim. Hər dəfə ona yalvararaq xahiş etmişəm ki, videonu telefondan silsin. Həm də dəfələrlə xahiş etmişəm ki, videonu mənə göstərsin. Lakin Rəhim videonu silməyib, mənə də göstərməyib.

Buna görə də daima stress və gərginlik içində qalmışam. Bilməmişəm necə edim ki, Rəhimin telefonunda olan videonu ələ keçirib silim. Qorxmuşam ki, birdən Rəhim videonu yaxınlarımdan kiməsə göndərər. Bununla da məni rüsvay edər və ləkələnərəm.

Rəhimin mənə qarşı olan hədə-qorxularını real qəbul etmişəm. Düşünmüşəm ki, belə bir video olmasaydı, mənə hədə-qorxu gəlməzdi".

"Dedi ki, intim kadrları qardaşıma, ərimə göndərəcək"

Sevil qeyd edib ki, sonuncu dəfə 2021-ci il iyulun 23-də Rəhimə yaşadığı evdə 100 manat verib: "Bununla da Rəhimə 2019-cu ilin noyabrından 2021-ci ilin iyulun 23-dək olan müddətdə cəmi 1100 manat vermişəm. Hissə-hissə bu qədər məbləğdə pulu Rəhimə verməkdə məqsədim o olub ki, dediyi videonu oğluma, ərimə və qardaşıma göndərməsin. Bacardığım qədər çalışdım ki, bu məlumatı gizli saxlayım.

Rəhimin istifadə etdiyi mobil telefon da mənə məxsusdur. Telefonumu qaytarmasını tələb etsəm də, qaytarmadı. Dedi ki, əgər səsimi çıxarsam, videogörüntüyə çəkdiyi intim kadrları qardaşıma, ərimə göndərəcək. Dedi ki, videonu karta da köçürüb. Buna görə də uzun müddət düşündüm və sonda qərara gəldim ki, Rəhimin barəsində polisə şikayət edim, artıq onun barəsində polis özü tədbir görsün və mən yaşadığım psixoloji gərginlikdən qurtarım".

"Mənə bir şəkil atdı..."

Sevil bildirib ki, iki il bundan əvvəl intim videogörüntü hadqa xəbər tutduqdan sonra dəfələrlə Rəhimdən xahiş etməyinə və hətta yalvarmağına baxmayaraq həmin videonu ona göndərməyib, telefonundan da silməyib: "Rəhim yalnız mənə intim münasibətdə olduğum şəkli atdı. Mən də sonradan telefonumda qalmaması üçün sildim".

Sevil qeyd edib ki, Rəhim onunla barışıq əldə edib, ona dəymiş ziyanı tamamilə ödəyib. Rəhimi bağışlayıb, ondan heç bir şikayəti yoxdur.

Bu cinayət işinə Xəzər rayon Məhkəməsində baxılıb. hakim Tərlan Əkbərovun sədrliyi ilə baş tutan iclasda hökm elan edilib.

Rəhim 3 il müddətinə azadlıqdan məhrum edilib.

Bakının Xətai rayonunda “Olympus Park” şirkətinin icazə almadan inşa etdiyi binanın tikintisi zamanı "Lider" idman klubunun obyektini dağıtması ilə bağlı istintaq yekunlaşıb.

Zamantv.az "qafqazinfo"ya istinadla xəbər verir ki, idman klubunun sahibi İlham Sərdarov bu barədə danışıb. O bildirib ki, əvvəlcə hadisə ilə bağlı Xətai rayon Prokurorluğunda Cinayət Məcəlləsinin 186.2-ci (qəsdən əmlakı məhv etmə) maddəsi ilə cinayət işi başlanılıb. Həmin vaxt digər dövlət qurumları şirkətin inşa etdiyi binada tikinti işlərinin dayandırılmasına qərar veriblər.

Xətai rayon Polis İdarəsinin İstintaq şöbəsində cinayət təqibi ilə bağlı icraata xitam verilməsi haqda qərar qəbul edilib. Belə nəticəyə gəlinib ki, idman klubunu şirkətin ekskavatorçusu Elşən Zeynalov bilmədən uçurub. Sonra isə tikilini uçurması barədə şirkət rəhbərliyinə məlumat verib və “Olympus Park” rəhbərliyi də qəzalı tikintini saxlamamaq, başqalarının təhlükəsizliyini təmin etmək üçün binanın qalan hissəsini söküb. Söküntü isə idman klubunun əşyaları içində ola-ola aparılıb.

Yekunda Cinayət Məcəlləsinin 186.2-ci (qəsdən əmlakı məhv etmə) maddəsi ilə cinayət təqibi üzrə icraata xitam verilib.

Ekskavator sürücüsü Elşən Zeynalov Cinayət Məcəlləsinin 187.2-ci (ehtiyatsızlıqdan özgə əmlakını məhv etmə) maddəsi ilə təqsirli bilinib. 8 noyabrda imzalanan aministiya tətbiq edilib və bu maddə ilə də cinayət təqibi üzrə icraata xitam verilib.

İlham Sərdarovun vəkili İntiqam Hacıyev isə bildirir ki, bu deyilənlərin və qərarda göstərilənlərin özü belə bir-birini təkzib edir: “Əgər birinci hərəkət doğrudan da ehtiyatsızlıqdırsa və vətəndaşın mülkü dağıdılıbsa, tikinti şirkətinin rəhbərliyi sonradan söküntü qərarını necə verə bilər? Tikinti rəhbərliyi kimdir ki, tikilinin təhlükəli, qəzalı olması barədə gecə saat 4-də qərar verir və göstəriş edir ki, qalan tikili sökülsün?! Bunun özü elə bir cinayətdir və etiraf edilir”.

İlham Sərdarov qeyd edir ki, “Olympus Park” şirkətinin “28 May” layihəsində də mənzil sökülmüşdü: "Orada da eyni variant idi, guya ekskavator evi səhvən söküb. Maraqlısı isə budur ki, orda da ekskavatoru idarə edən Elşən Zeynalov olub”.

İlham Sərdarova dəymiş zərərin miqdarı isə 162 min 194 manat olaraq müəyyən edilib və həmin məbləğ depozit hesaba qoyulub: “Dövlət Şəhərsalma və Arxitektura Komitəsi şirkətin mənim obyektimin yerində tikdiyi binasına qadağa qoyub. Şirkət rəhbərliyi Komitədə deyib ki, guya razılaşmışıq və 162 mini də buna görə ödəyiblər. Onları aldatmaq istəyiblər, amma mənə zəng edən zaman həqiqəti öyrəndilər".

Qeyd edək ki, sübutların qiymətləndirilməsi və cinayət təqibi üzrə icraata xitam verilməsi haqqında qərardan məhkəmə nəzarəti qaydasında şikayət verilib.

DİN Mətbuat xidmətinin inspektoru, polis mayoru Anar Qafarov bildirib ki, qeyd edilən tikili, yəni idman klubunun yerləşdiyi bina 1959-cu ildə inşa edilib: “Həmin ərazidə tikinti işləri gedən zaman torpaq sahəsi "Olympus Park" şirkətinə məxsus olduğundan idman klubunun yararsız vəziyyətdə olan binası usta səhlənkarlığı səbəbindən dağıdılıb. Sonradan hadisə ilə bağlı Xətai Rayon Polis İdarəsinin İstintaq Şöbəsində cinayət məcəlləsinin 187.2-ci əmlakı ehtiyatsızlıqdan məhv etmə və zədələmə maddəsi ilə cinayət işi başlanılıb, ekspertizalar təyin edilib. İstintaq yolu ilə tikilinin sökülməzdən əvvəlki vəziyyəti və içərisində olan idman qurğularının mövcud vəziyyəti barədə fotoşəkillər əldə edilib.

Ekspertiza zamanı həmin tikilinin sökülməsi zamanı zərərçəkənə 162 min manat maddi ziyan dəydiyi müəyyən olunub. İstintaqın gedişi zamanı zərərçəkənə həmin məbləğin "Olympus Park" şirkəti tərəfindən tam ödənilməsi təmin edilib. Və zərərçəkənə təklif edilib ki, ona ödənilən pulla sökülən binanın yerində eyni kvadratmetr sahədə yenidən idman klubu üçün tikinti apara bilər. Buna baxmayaraq zərərçəkən şəxs bu təkliflə razılaşmayıb və ona tikinti şirkəti tərəfindən 1 milyon 200 min manat pul ödənilməsini tələb edib”.

Xatırladaq ki, şirkət İ. Sərdarovun idman klubunu satmaq üçün təklif etdiyi məbləğlə razılaşmayıb: “Martın 20-si gecə saat 4 radələrində 30 mühafizəçi ilə ekskovator gətirib zalı söküblər. Zalın ölçüsü 315 kvadratmetrdir, 240 kvadrat metr üçün “kupça” (çıxarış) verilib, 150 kvadrat da həyəti var. İndi demək olar ki, zal məhv olub. ”.

“RS Construction” MMC-nin Nobel layihəsi üzrə icraçı direktoru Mehdi Bədirov bildirmişdi ki, “Lider” idman klubunu qəsdən yox, bilmədən söküblər: “İlham Sərdarov bizim təkliflərimizlə razılaşmır, əvvəl 2 milyon manat tələb edirdi, indi 1,5 milyon istəyir. Bizdə də o qədər pul yoxdur”.

Azərbaycan tərəfindən adı “qara siyahı”ya salınan Rusiya Dövlət Dumasının deputatı Vitali Milonov növbəti dəfə Qarabağa qanunsuz səfər edib. Ölkəmizə qarşı qərəzli mövqeyi ilə seçilən ermənipərəst deputat Xankəndidə separatçıların başçısı Araik Arutyunyanla görüşüb. Üstəlik, rusiyalı deputat qanunsuz əməlini sosial şəbəkə hesablarında paylaşaraq səfərdən “məmnunluq” duyduğunu qeyd edib. Bununla da kifayətlənməyən deputat Xankəndidə erməni məktəblilər üçün Yeni il şousu təşkil edib və baş rolu özü ifa edib. Şaxta baba libasını geyinən Milonov ermənilər üçün hədiyyə paylayıb.

Vitali Milonovun Azərbaycana qarşı mövqeyi və ermənilərə olan “isti” münasibəti hər kəsə bəllidir. Lakin ekspertlərin fikrincə, bu şəxs ilk növbədə öz ölkəsinin parlamentində təmsil olunduğunu unutmamalıdır. Artıq dəfələrlə bu cür təxribatlara əl atan deputat regionda sülhməramlı missiya həyata keçirən Rusiya dövlətinin də imicinə xələl gətirir.

Millət vəkili Sahib Alıyev vurğulayıb ki, Fransada rus agenti kimi tanınan Valeri Pekres Qarabağa necə buraxılıbsa, Vitali Milonov da elə buraxılıb. Deputat budəfəki səfərin zamanına diqqət çəkib:

“Ermənistanın Baş naziri Nikol Paşinyan ermənilərə Qarabağın Azərbaycanın ayrılmaz parçası olması ilə razılaşmaqdan başqa digər yollarının qalmadığını anlatdı. Yəni Prezident İlham Əliyevin dəfələrlə bildirdiyi “Azərbaycanın torpaq bütünlüyü heç vaxt danışıqlar predmeti olmayıb və olmayacaq” sözlərini təkrarladı. Bunun ardınca separatçıbaşı Araik Arutyunyan onu kəskin tənqid etdi. Çünki Arutyunyan Paşinyanın sərəncamı ilə Ermənistandan hər ay aldığı 30 milyon dolların kəsilməsi ilə hansı vəziyyətə düşəcəklərini yaxşı bilir. Kimdir separatçıbaşını və bir neçə agenti Ermənistanın baş nazirinin üstünə qısqırdan? Bu sualın cavabı Rusiya Dumasının hakimiyyət partiyasından olan deputatı Vitali Milonovun Xankəndinə səfərində və Arutyunyanla yan-yana şəkil çəkdirməsindədir”.

Sosial şəbəkələrdə Goranboy rayonunda yaşayan Vətən müharibəsi qazisi Vüsal Quliyevin çətin şəraitdə yaşaması ilə bağlı videomüraciəti yayılıb.
Sözügedən videoda göz yaşları içində danışan qazi rəsmi qurumlar tərəfindən get-gələ salındığını deyir: “Gəlin, bizim yaşamağımıza baxın, gör nə gündə yaşayırıq. Bu, yaşamaq deyil. İcra başçısına yaxınlaşmışam, deyir get sabah gələrsən, birisi gün gələrsən. Bayrama görə ayın-oyun almağa gücüm çatmır”.
Zamantv.az "qafqazinfo"ya istinadla xəbər verir ki, Goranboy Rayon İcra Hakimiyyəti başçısının müavini – Sosial-iqtisadi inkişafın təhlili və proqnozlaşdırılması şöbəsinin müdiri Rafət Qurbanov sözügedən Vətən müharibəsi iştirakçısının çətin şəraitdə yaşadığını təsdiqləyib. Bildirib ki, o, İcra Hakimiyyətinə bir həftə əvvəl müraciət edib: “Vüsal Quliyev müharibə dövründə hərbi xidmətdə olub, döyüşlərdə iştirak edib. Biz də onun haqqında yenicə məlumat almışıq, bizə bir həftə olar müraciət edib. Çox pis vəziyyətdə yaşayırlar. Onun evində olmuşuq. Heç şəxsiyyət vəsiqəsi belə yoxdur. Nəinki özünün, ailəsində heç kimin sənədləri yoxdur. Hərbi biletinin əsasında sənədlərini toplamışıq.
ƏƏSM tərəfindən şəhid ailələri və qazilərə növbə əsasında ev tikilir. Lakin onun sənədləri olmadığına görə növbəyə yaza bilmədik. Ailəsini bizim köhnə xəstəxanada binada müvəqqəti yerləşdirmək istədik ki, sahibkarlara müraciət edək, kimin imkanı varsa, onun ev tikintisinə yardım etsin. Lakin qalmaq istəmədilər. Tapşırmışıq həmin xəstəxanadan salamat vəziyyətdə olan məişət əşyaları- stol, stul, çarpayı və digər əşyalar göndərilib. Dünən ərzaq yardımı etmişik. Həmçinin başqa sahibkarlar da ona ərzaq yardımı, maddi vəsait göndəriblər”.
Qeyd edək ki, Quliyev Vüsal Məhiyəddin oğlu 44 günlük Vətən müharibəsində Füzuli və Xocavənd istiqamətində döyüşlərdə iştirak edib və müvafiq medallarla təltif edilib.

Azərbaycanda hüquq-mühafizə və nəzarət orqanlarının və ümumilikdə məhkəmə-hüquq sisteminin hansı vəziyyətdə olduğunu göstərən çoxlu sayda biabırçı cinayət işləri və məhkəmə qərarları göstərmək olar. Lakin onların arasında Prezident Administrasiyasının sabiq şöbə müdiri, ölkə başçısının ictimai-siyasi məsələlər üzrə sabiq köməkçisi Əli Həsənovun yaxın ətrafına aid şəxslərə qarşı cinayət işi xüsusilə seçilir.

Məlum olduğu kimi, bir müddət əvvəl Əli Həsənovun kurasiyasında olan KİVDF-nin sədri Vüqar Səfərli başda olmaqla, bir neçə nəfərə məhkəmə hökmü elan olundu. “Əli Həsənovun cinayət işi” adlandırılan bu işdə Vüqar Səfərliyə 10 il 6 ay müddətinə azadlıqdan məhrumetmə cəzası, digərlərinə isə müxtəlif müddətə şərti cəzalar verildi. Həmçinin, sözügedən şəxslərdən Vüqar Səfərlinin və Ədalət Vəliyevin (Əli Həsənovun bacanağı-red.) əmlakları müsadirə olundu. Bunlardan da ən qiymətlisi formal olaraq Əli Həsənovun savadsız, düz-əməlli imza atmağı belə bacarmayan, keçmiş traktorçu bacanağı Ədalət Vəliyevə aiddir - 36 milyon manat! Səfərlinin müsadirə olunan mal-mülkü isə 2-3 milyon civarındadır.

Rəsmi ittihama görə, jurnalistlər üçün bina tikintisində 18 milyon manatlıq yeyintiyə yol verilib. Bu, müsadirə olunan məbləğin yarısı deməkdir. Lakin unutmayaq ki, Ə.Həsənov jurnalistlər üçün hər üç binanın tikintisindən külli miqdarda qazanc götürüb. Bəzi məlumatlara görə, təkcə birinci binaya görə podratçı şirkət ona 7 milyon manat “şapka” ödəyib. İkinci və üçüncü binalarınsa hər birinin birincidən az qala iki dəfə böyük olduğunu nəzərə alsaq, təkcə bu tikintilərdən oğurlanan və Həsənova çatan pulun miqyasına dair aydın təsəvvür yaranar...

Əslində, əvvəldən məlum idi ki, bu işin sözügedən cinayətdə sadəcə imzası ilə iştirak edən və yüksək vəzifəli bacanağının zibilinə düşən Ə.Vəliyevə heç bir aidiyyatı yoxdur. Buna baxmayaraq, bu işdə rəsmən məsul şəxs kimi adı keçən Vəliyevin 36 milyonluq əmlakı müsadirə olundu. Ancaq o da məlum oldu ki, bu əmlak Vəliyevin yox, şəxsən Əli Həsənovun əmlakıdır. Çünki sözügedən əmlak Ə.Həsənovun oğlu Şamxal Həsənovun adına olub və o, istintaq dövründə əmlakı iş üzrə təqsirləndirilən Ə.Vəliyevə bağışlayıb. Daha sonra əmlakın üzərinə həbs qoyulub, məhkəmə isə onun müsadirə edilməsi ilə bağlı hökm çıxarıb. Bu, o deməkdir ki, hakim də, prokuror da yaxşı bilir ki, bu işin başında duran da, əmlakı müsadirə olunan da Əli Həsənovun özüdür. Lakin Azərbaycan reallığının ortaya qoyduğu mənzərə ondan ibarətdir ki, bu adama qarşı heç bir rəsmi iddia yoxdur və o, əmlaklarının heç də böyük olmayan bir hissəsindən özünü və yaxınlarını həbsdən qurtarmaq üçün vaz keçsə də, ümumilikdə ən azı 500 milyon dollarlıq qalan var-dövləti, mal-mülkü, sərvəti, biznesi ilə həyatını davam etdirir...

Bəli, hələ Həsənov vəzifədə olarkən ölkə mətbuatına onun malik olduğu var-dövlətin, mülklərin bir qismi bəlli idi. Bu siyahı heç də Mətbuat prospekti 23-də yerləşən və hazırda müsadirə edilən 36 milyonluq Beynəlxalq Mətbuat Mərkəzinin (BMM) binası ilə (Yeri gəlmişkən, sözügedən ünvanda 2 belə bina var, ola bilsin ki, müsadirə olunan heç BMM-in binası deyil, onun ekiz tayıdır-red.) məhdudlaşmır. Bu siyahıya Həsənovun ailəsinə aid “Kaspi” Təhsil Mərkəzi və onun ölkə ərazisindəki, eləcə də paytaxt Bakıdakı çoxsaylı filiallarından tutmuş “Xətai” klinikasına, həmçinin müsadirə olunan BMM-in binasının qonşuluğundakı eyni ölçü və görünüşdə olan digər binaya qədər çoxsaylı əmlaklar aiddir. Buraya İsveçrədəki bir neçə milyonluq villa, Türkiyədəki biznes başda olmaqla, xaricdəki əmlak və biznesləri də əlavə etmək olar. Həsənovların bu əmlaklarının, bizneslərinin dəyəri və mətbuata bəlli olmayan digər var-dövləti toplansa, bəlkə də ortaya 36 milyondan az qala 36 dəfə böyük rəqəm çıxar.

Yeri gəlmişkən qeyd edək ki, Əli Həsənova aid, BMM-in yaxınlığındakı eyni quruluş və ölçüdə olan digər oxşar binanı Dövlət Gömrük Komitəsinin İdarələrindən biri uzun illərdir ki, icarəyə götürüb və hazırda da buna görə böyük məbləğdə kirayə haqqı verir. Bu isə o deməkdir ki, uzun illər dövlətin mətbuat, ictimai-siyasi mühit, qeyri-höklumət təşkilatları və s. ilə bağlı siyasətində əsas fiqurlardan biri olan, yastı-yastı nitqlər söyləyən, özünü dövlət adamı kimi təqdim edən bu şəxsin hiyləgər korrupsioner və talançı olduğunun üzə çıxmasına, başqalarının adı arxasında gizlənərək törətdiyi cinayətlərin sübuta yetirilməsinə, bir sözlə, bütün bu biabırçılıqlara baxmayaraq, Azərbaycan dövləti onu cəzalandırmaq əvəzinə, hələ öz büdcəsindən ona kirayə haqqı da ödəyir!...

Burada ayrıca götürülmüş Əli Həsənov personasından və onun korrupsiya əməllərindən heç də əhəmiyyətsiz olmayan başqa bir məsələ də var. Söhbət Həsənovun uzun illər tutduğu vəzifədən və bu vəzifənin verdiyi korrupsiya imkanlarının miqyasından gedir. Belə ki, Həsənovun büdcə vəsaitlərinə birbaşa çıxışı, tenderləri, dövlət satınalmalarını yerinə yetirmək, vəzifə təyinatı həyata keçirmək, vergi toplamaq, cərimə kəsmək və s. kimi “yağlı” korrupsiya səlahiyyətləri olmayıb. Onun əsas gəlir mənbələri “Azərbaycan” nəşriyyatının, həmçinin, Vüqar Səfərlinin bir zamanlar rəhbərlik etdiyi “Azərmətbuatyayım”ın, eləcə də “Azərkitab”ın əmlaklarının talan edilməsi, büdcədən cəmiyyətin ən ağır sosial-iqtisadi duruma malik kəsimlərindən olan jurnalistlərə, mətbuata ayrılan vəsaitlərdən oğurluq edilməsi kimi heç də nəhəng sayılmayacaq istiqamətlər olub.

Ancaq bu şəxs acgözlük sarıdan digər daha samballı korrupsiya imkanlarına malik nazirlərdən və digər iri məmurlardan geri qalmayıb və hətta bəzən onları üstələyib də. Əgər belə olmasaydı, heç olmasa jurnalistlər üçün tikilən binalardan aldığı “şapka”larla, tikintidəki yeyintilərlə kifayətlənərdi. Lakin adam bu da azmış kimi, həmin binalardakı mənzillərin bölgüsü zamanı da öz iştahasını gizlədə bilmədi və həmin mənzillərin bir qismini gerçək jurnalistikaya aidiyyatı olmayan yaxın adamları arasında bölüşdürdü, pay-püşk etdi...

Demək istədiyimiz odur ki, vəzifəsi etibarilə korrupsiya imkanları nisbətən məhdud olan Ə.Həsənov belə təkcə ölkə daxilində (hələ xaricdəki mal-mülkünü demirik) dəyəri 10 milyonlar deyil, yüz milyonlarla ölçülən varidata sahiblənib və bunu hər kəs bilsə də, bu gün ona “gözün üstə qaşın var” deyən yoxdursa, indi görün büdcə vəsaitlərinə birbaşa çıxışı olanlar, tender qərarları imzalayanlar, dövlət satınalmaları edənlər, öz şirkətlərinə böyük tikintilər verənlər, dövlət əmlakını satanlar, vergi, gömrük rüsumu toplayanlar və digər “yağlı” korrupsiya imkanı olan sahələrdəki “gəlmiş-keçmiş” məmurlar nələrə sahibdirlər...

Bu gün mütəxəssislər işğaldan azad olunan ərzilərimizin bərpasına 20 milyard dollara yaxın vəsait lazım olduğunu bildirirlər. Azərbaycanda Ə.Həsənovdan qat-qat daha artıq korrupsiya imkanları olan və bu imkanlardan istifadə edən məmurlar olub və var. 20 milyard, təbii ki, böyük məbləğdir, lakin təkcə Həsənov kimisinin varidatı 100 milyonlarla ölçülürsə, o zaman Eldar Mahmudovdan Fazil Məmmədova, Hacıbala Abutalıbovdan Abid Şərifova, Əhməd Əhmədzadədən Tağı Əhmədova, Zakir Qaralovdan “Qaçqınkom” Əli Həsənova, Ziya Məmədovdan Ramiz Mehdiyevə, Oqtay Əsədovdan Qorxmaz Hüseynova qədər sadaladığımız və sadalamadığımız çoxsaylı məmurların və bəzi oliqarx deputatların varidatını üst-üstə toplasaq, alınan məbləğlə iki-üç Qarabağ boyda ərazini yenidən tikib-qurmaq olar.

Bunun üçünsə hökumət kasıb-kusubun, pensiyaçının, əlilin boğazından yox, belələrinin “piyindən” kəsib götürməlidir...

“AzPolitika.info”

Azərbaycanda jurnalist adı ilə altında gizlənərək hədə-qorxu ilə pul tələb edən şəxslərin əməlinin təfərrüatı məlum olub.

Zamantv.az Oxu.Az-a istinadən məhkəmə materiallarına əsasən, cinayətin motivlərini təqdim edir.

2021-ci ilin mayın 27-də özünü “faktlaşdırma.az” xəbər portalının təsisçisi kimi təqdim edən Qurban Alışanov, özünü “Aztv.news” xəbər portalının baş direktoru kimi tanıdan Seymur Məmmədov, özünü “Araşdırmaçı Jurnalist Agentliyi”nin direktoru kimi təqdim edən Elvin Qurbanov qabaqcadan əlbir olaraq bağça müdirindən pul almağı planlaşdırıblar.

Onlar Bərdə rayonunun Dəymədağıldı kəndində yerləşən körpələr evi-uşaq bağçasına gəliblər.

Hər üç “jurnalist” bağça müdirinin (qadındır) diqqətinə çatdırıblar ki, onlar bağçada yoxlama aparacaqlar.

Onlar bağçada karantin və sanitar qaydalarının pozulduğunu, yemək cədvəlinin tutulmadığını və sair iradları bildirərək videoçəkilişlər aparıblar.

“Media mənsubları” bağça müdirini nüfuzuna xələl gətirəcək həqiqətə uyğun olmayan rüsvayedici məlumatlar barədə videoçəkiliş apararaq sosial şəbəkələrdə yayacağı ilə hədələyiblər.

Bu zaman onlar arasında danışıq olub. Hədə-qorxu ilə pul tələb edənlər bağça müdirindən 500 manat alacaqları təqdirdə, məlumatları ictimailəşdirməyəcəklərini bildiriblər.

Danışıqlar nəticəsində bağça müdiri məbləği 300 manata endirə bilib. “Jurnalistlərə” deyib ki, bir neçə saatdan sonra gəlsinlər və pulu götürsünlər.

Seymur çayxanada oturub gözləyib, Elvinlə Qurban isə pulu götürməyə gediblər. Bağça müdiri pulu onlara uzadan zaman onlar pulu alıb heç cibimə qoymamış arxadan polis işçiləri onları tutublar.

Bağça müdiri ifadəsində göstərib ki, o, “reket jurnalistlərlə” danışdıqdan sonra prokurorluğa bu barədə məlumat verib. Polis prokurorluqdan daxil olmuş məlumatlar əsasında əməliyyat hazırlayaraq “jurnalistləri” zərərsizləşdirib.

Məhkəmənin hökmü ilə Qurbanın, Seymurun, Elvinin əməli Cinayət Məcəlləsinin 182.2.1-ci maddəsi ilə (Qabaqcadan əlbir olan bir qrup şəxsin hədə-qorxu ilə pul tələb etməsi) tövsif edilib.

Cinayətin xarakteri, ictimai təhlükəliliyi, təqsirləndirilən şəxslərin ikisinin azyaşlı uşaqlarının olması, yaşayış yeri üzrə müsbət xarakterizə edilməsi və sair cəzanı yüngülləşdirən hal kimi nəzərə alınıb.

Onların hər biri 1 il 6 ay müddətinə azadlıqdan məhrum edilib.