Şəmkir şəhəri, Səməd Vurğun küçəsi, ev 74 ünvanında yaşayan Nəbiyev Zilfiqar Hətəm oğlu tərəfindən "Hürriyyət" qəzetinin redaksiyasına şikayət məktubu daxil olub. Şikayətçi deyir ki, bacısı ona notarius vasitəsilə “ölüm kağızı” alaraq, qanunsuz olaraq ata evini başqa şəxslərə satıb:

"Mən, Nəbiyev Zilfiqar Hətəm oğlu, yazaraq sizdən xahiş edirəm ki, problemimin araşdırılamsına kömək göstərəsiniz.

Hal-hazırda sənədlərimdə ölü bir insanam. Öz bacım mənə saxta “ölüm kağızı” çıxartdıraraq, ata mülkünü bir necə şəxsə satmışdır.

3-cü qrup əlil, həm də Birinci Qarabağ Müharibəsinin veteranıyam. 2 övladım var, biri yanımda yaşayır.

İllərlə Rusiyada yaşamışam, elə bundan da istifadə edən bacım mənə “ölüm kağızı” çıxartdıraraq torpağımı mənimsəyib satıb. Şəmkir notariusuna gedəndə məni lağa qoyub gülürlər ki, "ölü gəlib".

Rusiyaya gedib işləməyimə səbəb də bacılarım olub. Başımı götürüb getmişəm. Azərbaycanda olduğum müddətdə bacılarımla dalaşırdıq, məni tutdururdular. Dəfələrlə tutulub çıxırdım, yenə eyni hadisələr davam edirdi. Bu səbəbdən də illərlə Rusiyada yaşadım, evimin satılmağından, “ölü” olmağımdan bixəbər.

Rusiyada işlədiyim müddətdə yaxşı insanlarla tanış oldum və həmin insanlar satılan ata torpağımda mənə ev tikdirdilər. Övladlar arasında bölünən bu torpaq hərəyə 6 sot düşürdü, həmin 6 sotda mən ev tikdirdim. Nəbiyeva Hicranın qanunsuz satdığı torpaqda hal-hazırda yaşanlar Duraxanov Əli, Duraxanov Şəhla və s. qohum əqrabaları tez-tez evimə gəlib məni və uşağımı təhqir edir, döyürlər ki, çıx bu evdən, biz bu evin pulunu vermişik. Pulu alıb yeyən Hicrana söz demirlər, yiyəsiz məni görüb, mənim üstümə düşürlər.

Yoldaşımla bacım əlbir olub, torpağı satıblar. Daha sonra bacım və qonşular ailəmi yola vermədiyindən, yoldaşım evdən gedib. Uşağın biri anası ilə qalmadı, məni tək buraxmadı, gəlib yanımda yaşayır. Mən öz canımdan yox, onsuz da “ölmüşəm”, uşağımdan qorxuram. Uşağımı qonşunun uşağı təpiklə vuraraq, kor bağırsağını partladıb. Evimi alan və qonşuluğumda yaşayan şəxslər evimə gələn su borusunu qırıb. Evə 6 nəfər basqın etdi, körpə uşağımı və məni döydülər ki, çıxın evdən. Təpiklə necə vurdularsa, qolum sındı. Sübutlarım da var, amma polis işimə baxmır. Mən sabah cinayət etsəm, “ölü adam” kimi tutulacam, amma məni öldürmək istəyənlər “at oynadırlar”.

Mən sizin qəzet vasitəsilə sual verirəm: ay polislər, mən kimisə öldürsəm yenədə məni heçə sayacaqsız, yoxsa onda qanunla gəlib həbs edəcəksiz? Döyülməyimlə bağlı ekspert kağızım var, uşağım döyülür, niyə məni anlayan yoxdur?!

Qonşuluqda yaşayırlar, biri üstümə gələn kimi hamısı yığılır gəlir. Təkəm, yaşım o yaş deyil ki, onlara cavab verim. Əri yanında olan qadınlar əxlaqsız söyüşlər söyür, məni təhqir edirlər. Onun ərinin gücü çatıb susdura bilmirsə, mən yad kişi nə edim elə insanlara?!

Oğlum məktəbdə oxuyur, savadlı uşaqdı, amma yaşayış yerim yoxdur ki, onu yanımda məktəbə qoyum, təhsilinə davam etsin”.


P.S. Maraqlısı odur ki, 2016-ci ildə kimlik alan şəxs hələ də Əmlak Komitəsində və notariusun sənədləşməsində “ölü” kimi göstərilir. Təsəvvür edin, hal-hazırda bu insan yaşadığını sübüt edib, torpağını ala bilmir. İllərdir məhkəmələr davam edir, amma nəticə yoxdur. Deməli, Əmlak Komitəsi ilə notarius əlbir olub, bir insanın həyatını məhv ediblər. Belə çıxır ki, bizim daxili mübarizəmiz ermənilərlə mübarizədən daha çətin olacaq.

Redaksiyadan: Yazıda adları qeyd olunan şəxslərin mövqeyini dərc etməyə hazırıq.

"Hakim Yeni Azərbaycan Partiyasının Nizami rayon təşkilatının indiki və keçmiş sədrinin mərkəzi aparatdan gizli şəkildə pul qazanmaq məqsədilə maraqlı bir alqı-satqı əməliyyatı həyata keçirdiklərinə dair məlumat əldə etmişik. Söhbət YAP Nizami rayon təşkilatına məxsus binanın bir hissəsinin özəlləşdirilərək satllmasından gedir. Təsəvvür edirsiz?" Bu barədə DİA.AZ-a göndərilən məqalədə deyilir.

Məqalədə daha sonra bildirilir: "Hazırda deputat kimi fəaliyyət göstərən Sədaqət Vəliyeva o zamanlar köməkçisi, sonra isə YAP Nizami RT-nin aparat rəhbəri olmuş hazırkı sədr Ramil Vəlibəyovla əlbir olaraq, Hakim partiyanın əmlakının nəzərəçarpacaq dərəcədə böyük hissəsini baba mirası, ata mülkü kimi satıblar və bu maxinasiya partiyanın mərkəzi aparatından gizlədillib. Soruşacaqsınız ki, necə? Darıxmayın, keçmiş sədrin öz köməkçisi ilə birləşərək, əmlak bazarına girişməsinin detallarını ardıcıllıqla nəzərinizə çatdıracağıq. Onu da deyək ki, bu ekzotik cütlükün əmlak satışından başqa,mərkəzi aparatın xəbəri olmadan digər əməliyyatlar da həyata keçiriblər. Keçmiş sədr öz köməkçisi ilə birgə Yap Nizami rayonu Təşkilatını ticarət, iaşə obyekti kimi idarə edib. Sədr öz köməkçisinin əli ilə rayonun biznes stukturlarını, maşın alverçilərini “ partiya ehtiyaclarının ödənilməsi” adı altında inək kimi sağıblar. Hətta “aylığa” otuzdurduqları şirkət rəhbərləri də var və bu pullardan bir qəpik belə mərkəzi aparata ödənilməyib, Vəliyeva-Vəlibəyov cütlüyü hamısını həzm-rabedən keçiriblər.
Qayıdaq bina məsələsinə, daha doğrusu özü boyda da yerin altında olan Sədaqət Vəliyeva ilə onun pulyığan maşını olan, sonra da özünün yerinə sədr gətirdiyi Vəlibəyovun maklerlik fəaliyyətinə. Yox, onlar partiyanın əmlakını Neftçilərdəki məşhur maklerlər bağında satmayıblar. Əməliyyat unikal şəkildə və “TAM MƏXFİ” qrifi altında həyata keçirilib.Əvvəlcə, sözügedən binanın, yəni Bakı şəhəri, Nizami rayonu Qara Qarayev prospekti 2P ünvanındakı rayon təşkilatının binasının bir hissəsi vətəndaş Əliyev Adəm Bayram oğluna satılıb və onun adına özəlləşdirmə aparılıb. Əliyev Adəm Bayram oğlunun adına olan çıxarışdan da görünür ki,özəlləşdirilmiş hissə 26.06.2013-c ildə rəsmi qeydiyyata alınıb (Çıxarış əlavə olunur - Red).

Beləcə həmin vaxt YAP Nizami rayon təşkilatının sədri olmuş Sədaqət Vəliyeva və onun köməkçisi- aparat rəhbəri, hazırda isə sədr olan Ramil Vəlibəyovla birgə hakim partiyanın əmlakı sırasında olan binanı mərkəzi aparatdan gizli şəkildə parçalayaraq satıb və əldə olunan vəsaitdən şəxsi məqsədlər üçün yararlanıblar. Kənardan əlbəttə ki, bina bütöv görünür və belə təsəvvür yaranır ki, göz oxşayan tikili bütövlüklə YAP Nizami rayon təşkilatına məxsusdur. Lakin sənədlər bunun əksini sübut edir. Yeri gəlmişkən YAP-ın əmlakı üzərində mülkiyyətçi hüququ qazanmış Adəm Əliyevin kimliyi məlum deyil..."

DAVAMI VAR...

İddia olunanlarla bağlı dia.az olaraq büttün maraqlı tərəflərin mövqeyini işıqlandırmağa hazırıq...

Qubanın Gədikqışlaq kənd sakinləri susuzluqdan əziyyət çəkirlər. “Əziyyət çəkmək” ifadəsi də yumşaq səslənir. Kənddə içməli su yoxdur. İnfrastruktur bərbad gündə olduğundan, su mənbələrinə gedib çıxmaq da mümkünsüzdür. Kənd camaatı çarəsiz vəziyyətdədir. Sakinlər oktyabrın 2-də sosial mediada “Azərsu”ya müraciət ünvanlayıblar. Onlar onillərdir problemin həll olunmadığını bildiriblər. Paylaşımlara “Azərsu” heç bir reaksiya verməyib. Kənd sakini Vüqar Mehrəliyev yazır ki, dərdlərini deməyə yer də yoxdur.

DİA.AZ Bizimyol.info-ya istinadla xəbər verir ki, Gədikqışlaq camaatı su üçün Samur-Abşeron kanalına üz tutmalı olurlar. Hətta qadınlar belə, həyatlarını riskə atır, kəndirlə kanala enirlər, vedrələrlə su götürməyə çalışırlar. Bunu da təkcə məişət qayğılarını həll etmək üçün istifadə etmirlər. Sonradan suyu duruldaraq içirlər. Gədikqışlaqda mal-qara da insanlar kimi içməyə su tapmır. Yaşlı sakinlər deyir ki, kəndin gününü həmişə belə görüblər. Sakinlərdən biri Bakıya köçməkdən başqa yol qalmadığını deyir: “Çünki susuz yaşamaq mümkünsüzdür. Suya görə kənd adamları bir-biri ilə üz-göz olur. Kəndə baxan yoxdur”.

Quba Su-Kanal İdarəsindən bildirirlər ki, kəndin içməli yox, müəyyən suvarma su problemi yarana bilər. Halbuki Gədikqışlaqda istənilən növ su əldə etmək müşkül məsələdir. 21-ci əsrdə insanlar kəndirlə kanala enərək su götürməyə cəhd göstərir. Başqa vaxt Azərbaycanı regionun lider dövləti adlandırırıq. Gədikqışlaqda insanlar palçıqlı su ilə məişətdə təmizlik yaratmağa çalışırlar. Belə su, həm də xəstəlik mənbəyidir. İnternet axtarış sistemlərindən statistika üçün istifadə etmək yerinə düşər. Görəcəksiniz ki, Gədikqışlağın neçə sakini kanalda boğulub. İnsanlar su əldə etmək üçün gecə-gündüz kanalın kənarında dayanırlar. Vedrələrlə yığılan su dərin çəlləklərə tökülür. Günlərlə gözləyirlər ki, müəyyən qədər durulsun, sonra içə bilsinlər.

İnsanları bu şərtlərlə yaşamağa məcbur etmək cinayətdir. Məsul qurumlar məsuliyyətini anlamalıdır. “Azərsu” vətəndaşa hörmətsizliyi dayandırmalıdır. Gədikqışlaq kənd sakinlərinin səsini eşitmək lazımdır.

Keçmiş tibb bacısı olan Qönçə Səmədova 30 ildir mənzil növbəsində olduğunu deyir. Əvvəl işlədiyi xəstəxanada 70 yaşına kimi yenidən tibb bacısı işləməyi tələb edərək Bakı şəhəri Baş Prokurorluq qarşısında aksiya keçirib.

Toplum TV

Daha ətraflı aşağıdakı videoda:

Xatırladaq ki, 2012-ci il iyunın 5-də Suraxanı rayonunda fəaliyyət göstərən “Altun” istirahət mərkəzinin sahibi Asif Əsədullazadənin oğlu Türkel, həmin rayonun Yeni Günəşli qəsəbəsində yerləşən “Badi-Kübə” Mənzil-tikinti kooperativinə məxsus binanın qarşısında atasına məxsus ov tüfəngindən atəşlər açaraq MTK-nın sədri Məmmədov Samid Abış oğlunu qəsdən öldürüb, sonuncunun xalası oğlu, həmçinin MTK-nın təsisçisi Qəmbərov Ədalət Nəcəf oğlunu isə qəsdən öldürməyə cəhd edərək bədən xəsarəti yetirmişdi. Aparılan istintaqla müəyyən edilmişdi ki, 2003-cü ildən təsis edilən “Badü-Kubə” Mənzil-tikinti kooperativi alqı-satqı müqaviləsi əsasında 2007-ci ildən Ədalət Qəmbərov tərəfindən alınıb. Ə.Qəmbərov kooperativ tərəfindən Yeni Günəşli qəsəbəsində 0.40 ha torpaq sahəsində tikilməkdə olan yaşayış binasının inşaasını davam etdiribdi. Həmin dövrdə qeyd edilən torpaq sahəsinin, eyni zamanda qonşuluqda yerləşən “Altun” istirahət mərkəzinin sahibi A.Əsədullazadə “Badü-Kubə” MTK-nın təsisçisi Ə.Qəmbərova müraciət edərək MTK-nın əvvəlki sahibi ilə aralarında olan şifahi razılaşmanı xatırladaraq bina tikilib istifadəyə verildikdən sonra həmin ərazinin sahibi kimi ona hazır binadan 3500-4000 kvadrat metr yaşayış sahəsi verilməli olduğunu bildiribdi. Ə.Qəmbərov kooperativin yeni sahibi kimi bu şərtlə razılaşaraq binanın tikintisini davam etdiribdi. 2008-ci ilin avqust-sentyabr aylarında binanın tikintisi üçün A.Əsədullazadə tərəfindən əlaqədar təşkilatlardan müvafiq sənədlər alınmadığından Ə.Qəmbərovla aralarında mübahisə yaranıbmış.
Bundan sonra “Badu-Kübə” MTK-nın vəzifəli şəxslərinin qanunsuz hərəkətləri barəsində Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsındən daxil olan cinayət işinin istintaqı Baş prokuror yanında Korrupsiyaya qarşı mübarizə idarəsində aparılıbdı. Həmin vaxt istintaqla müəyyən edilib ki, “Badu-Kübə” MTK-nın təsisçilərindən olan Əliyev Nəsib Yusif oğlu və Cabbarov Zaur Zeynal oğlu müxtəlif vaxtlarda rəsmi sənədlərdən istifadə etməklə MTK tərəfindən tikintisi başa çatdırılmamış binada mənzilləri 101 vətəndaşa təkrarən sataraq 3.883.332 manat məbləğındə pulu, o cümlədən “A.R.&Ko” MMC-nin direktoru Əsədullazadə Asif Yusif oğlu “Badu-Kübə” MTK-nın inşa etdiyi yaşayış binasından mənzilləri 21 vətandaşa təkrarən sataraq 632.538 manat məbləğində pulu aldatma yolu ilə ələ keçirərək külli mıqdarda ziyan vurmaqla dələduzluq ediblər.
Nəsib Əliyevə Cinayət Məcəlləsinin 178.3.2 (dələduzluq) və 308.2-ci (vəzifə səlahiyyətlərindən sui-istifadə) maddələri, Zaur Cabbarova isə Cinayət Məcəlləsinin 178.3.2-ci maddəsi ilə ittiham elan edilmiş və cinayət işinin istintaqı tamamlanaraq baxılması üçün aidiyyəti üzrə Bakı Ağır Cinayətlər Məhkəməsinə göndərilmişdir. 2014-cü il fevral ayının 12-də Bakı Ağır Cinayətlər Məhkəməsinin hökmü ilə N.Əliyev 13 il, Z.Cabbarov 9 il, müddətinə azadlıqdan məhrum edilib, A.Əsədullazadə isə 8 il müddətinə şərti cəza alıbdı.
Bir maraqlı məqamı da qeyd edək ki, bütün bu istintaq və məhkəmə proseslərindən MTK-nın təsisçisi Qəmbərov Ədalət Nəcəf oğlu hansısa havadarının köməkliyi ilə nədənsə kənarda qalıbdı. Bunu yuxarıda adlarını çəkdiyimiz və hazırda azadlığa buraxılmış şəxslər də təsdiq edirlər. Bu yaxınlarda aktualxeber.az-a və hüquq-mühafizə orqanlarına üz tutan bir qrup vətəndaşlar Ə.Qəmbərovdan şikayətçidirlər. Onlar iddia edirlər ki, Ədalət bəy vaxtilə onlardan pullar alıbdı və geri qaytarmır. Bəzi dəqiqləşdirmələr apardıqdan sonra daha geniş məqaləni oxucularımıza təqdim edəcəyik.
Mövzuya qayıdacağıq və yazıda adları keçən şəxsləri də dinləməyə hazırıq. //aktualxeber.az//

17 ailənin yaşadığı bu iki mərtəbəli ev Balaxanının “28 May” küçəsində yerləşir. Vətəndaşların dediyinə görə, təxminən 7-8 ildir, qəzalı vəziyyətdədir. Onlar deyir ki, pəncərələr sabit qalmır, döşəmə və tavanlar yararsız vəziyyətə düşür, taxtalar çürüyür. Şikayətçilər iddia edir ki, rəsmi qurumlardan onlara buranın plana düşdüyünü desələr də, heç bir tədbir görülmür.

Toplum TV

Daha ətraflı aşağıdakı videoda:

Azərbaycanın tanınmış yerli şirkətlərindən biri olan “TAC” MMC-də sürücülər dünən işə çıxmaqdan imtina edib.

DİA.AZ bildirir ki, -AzToday.az-a daxil olan məlumatlara görə, 20-dən çox sürücü şirkət tərəfindən onların qanunsuz cərimələnməsindən narazı qalaraq işə çıxmayıb.

Qeyd edək ki, el arasında “Aquavita” adı ilə tanınan şirkətdə işçilərin əmək hüquqlarının kobud şəkildə pozulması halları ilə bağlı mediada dəfələrlə məlumatlar gedib. Amma şirkət rəhbərliyi qanunları pozmaqda davam edir.

Sürücülər qanunsuz cərimələnmələrinin səbəbini mövsumun bitməsi ilə izah edirlər. Belə ki, payız və qış fəslində şirkətin satışı zəiflədiyi üçün rəhbərlik işçiləri kütləvi ixtisar etməklə xərclərini azaltmaq istəyir…

Redaksiyamıza daxil olmuş məlumata görə, Lerikdə meşələrə qənim çıxan Sultan və Xalid Mirzəyev qardaşlarının cinayət əməllərinə görə növbəti məhkəmə oktyabrın 3-də baş tutacaq. Qardaşlar 2012-ci ildən başlayaraq ta 2022-ci ilədək 4-5 dəfə inzibati qaydada məsuliyyətə cəlb olunaraq müxtəlif məbləğlərdə cərimə olunublar. Axırıncı dəfə isə 2022-ci ilin dekabr ayında Girdəsər meşəbəyliyinin 7 saylı dolayında gecə ilə bir neçə ədəd ağac kəsərək bir neçə içlik materialı şpal halına salıb oğurlayanda meşə idarəsi işçiləri tərəfinden yaxalanıblar və 2300 manata yaxın cərimə olunublar, işləri hüqüq-mühafizə orqanları tərəfindən istintaqa verilmiş, Cinayət Məcəlləsinin 259.2.3-cü maddəsi ilə iş açılıb.

İşləri məhkəmədə ola-ola özlərinə qoyulmayan Sultan və Xalid qardaşları növbəti cinayətlərini törədiblər. Belə ki, onların tədarük etdikləri yük maşını avqustun 12-də polis tərəfindən saxlanılıb. Məlum olub ki, yük maşınının kuzovuna alt tərəfdə işlik material yığan oğrular üst hissəyə oduncaq yığaraq örtməyə çalışıblar. Bu isə qardaşların əvvəllər də sınaqdan keçirdikləri cinayət metodudur. Əgər onların cərimələnmələrinə səbəb olan aşkarlanmış əməllərinin sayı 5-6-dırsa, təxmin etmək olar ki, üstü açılmamış əməlləri dəfələrlə çoxdur. Üzə çıxmayanların sırasında isə 1 saylı Regional Ekologiya və Təbii Sərvətlər İdarəsinin mühafizəçilərinin təmənna qarşılığında göz yumduqları, əlbir surətdə həyata keçirdikləri də az deyil. Amma yenə sə sağ olsun, Lerik Rayon Polis Şöbəsinin vicdanlı əməkdaşları ki, meşə qənimlərinə güzəştə getməyiblər.

Di gəl, Lerik rayon Məhkəməsinin sədri cənab Atabəy Kiçibəyov 5-6 aydır ki, işi yubadaraq hələ ki, heç bir təsirli qərar qəbul etməmişdir. Məlumata görə, növbəti məhkəmə iclası oktyabr ayının 3-də keçiriləcəkdir. Ümid edək ki, bu dəfə Mirzəyev qardaşları layiqli cəzalarını alacaqlar. //azerinfo.info//

Bakı şəhəri, Nərimanov rayonu, F.Yusifov küçəsi, bina 45 A, mənzil 35 ünvanında qeydiyyatda olan Əsgərov İsmayıl Abbas oğlu tərəfindən “Hürriyyət”in redaksiyasına şikayət məktubu daxil olub. Şikayətçi qəzetimiz vasitəsilə Prezident İlham Əliyevə, Əmək və Əhalinin Sosial Müdafiəsi naziri Sahil Babayevə, Baş prokuror Kamran Əliyevə müraciət edir:

“Hörmətli Prezident!

Mən, Əsgərov İsmayıl Abbas oğlu, 1965-ci ildə Beyləqan rayonunda anadan olmuşam. 2008-ci ildən indiyədək 7 nəfər ailə üzvümlə birlikdə ümumi sahəsi 60,2 kv.m, yaşayış sahəsi 33,6 kv.m, yardımçı sahəsi 26,6 kv.m olan 2 otaqlı mənzildə yaşayıram. Həm də 1-ci qrup əliləm.

Yaşadığım mənzil şəraitim yetərli olmadığından, "mənzil şəraitinin yaxşılaşdırılması” üçün növbəyə götürülməyimə görə səlahiyyətli orqanlara müraciətlər etmişəm. Lakin səlahiyyətli orqanlar tərəfindən etdiyim müraciətlərə qanunla nəzərdə tutulmuş qaydada cavab verilmədiyindən, mübahisələr yarandığı üçün məhkəməyə müraciət etmişəm.

Bakı şəhəri Nərimanov rayon Məhkəməsinin 06 may 2015-ci il tarixli, 2(005)-2010/2015 saylı qətnaməsinə əsasən, 09.04, 1992-ci il Nərimanov rayon İcra Hakimiyyəti başçısının 15 may 2015-ci il tarixli, 182 nömrəli sərəncamı ila 1-ci qrup gözdən əlil kimi güzəştli şərtlərlə mənzil növbəsinə götürülmüşəm. Həmin sərəncamın surəti aidiyyəti üzrə Azərbaycan Respublikasının Sosial Müdafiəsi Nazirliyinə və Azərbaycan Gözdən Əlillər Cəmiyyəti İctimai Birliyinə göndərilmişdir.

Azərbaycan Respublikasının Prezidentinin 25 yanvar 2021-ci il tarixli və Azərbaycan Respublikası Nazirlər Kabinetinin 16 avqust 2021-ci il tarixli, 492 S nömrəli sərəncamlarının tələblərinə əsasən, Vətən Müharibəsi və Birinci Qarabağ Müharibəsi şəhid ailələrinin və qazilərinin, Çernobil AES qazasının aradan qaldırılması ilə əlaqədar əlilliyi müəyyən edilmiş şəxslərin və gözdən əlil şəxslərin yaşayış sahələri ilə təmin edilməsi Azərbaycan Respublikası Əmək və Əhalinin Sosial Müdafiəsi Nazirliyinin müvafiq qürumları tərəfindən həyata keçirilir. Bakı şəhərinin bu və ya digər yaşayış məntəqələrində gözdən əlillərin yaşayış sahəsi ilə təmin edilməsi birbaşa 33 SMN-nin "Sosial Xidmətlər Agentliyi” adlanan qurumunun səlahiyyətlarinə aid edilmişdir.

Mənzil şəraitinin yaxşılaşdırılması barədə növbəm 09.04.1992-ci ildən hesab olunsa da, "Sosial Xidmətlər Agentliyi” dolayı yollarla mənim 15 may 2015-ci il tarixdən növbədə dayanmağımı gündəmə gətirməklə, hazırda inşa olunmuş və bölgüsü gedən Bakı şəhəri, Nərimanov rayonu, Faiq Yusifov küçəsi 40A ünvanında inşa edilmiş Azərbaycan Gözdən Əlillər Cəmiyyəti İctimai Birliyinə məxsus olan çoxmənzilli binadan növbə əsasında mənzilin ayrılmasının mümkün olmayacağını bildirmişdir. 27.012015-ci ildə Gözdən Əlillər Cəmiyyəti ilə "Sevinc" MMC arasında bağlanmış müqaviləyə əsasən tikiləcək evlərdən 75 mənzilin gözdən əlillər üçün ayrılması nəzərdə tutulmuşdur. Lakin bu günədək mənzillərin bölüşdürülməsinin getdiyi bir zamanda mənim mənzillə təmin olunmayacağım verilmiş cavablardan məlum olmuşdur.

Mənə biganəlik göstərən Azərbaycan Gözdən Əlillər Cəmiyyəti İctimai Birliyinə və Nərimanov rayon İcra Hakimiyyətinə müraciət etsəm də, cəmiyyət mənim Nərimanov rayonu üzrə gözdən əlil kimi növbədə 1-ci olmağım barədə siyahının Azərbaycan Respublikası Əmək və Əhalinin Sosial Müdafiəsi Nazirliyinin nəzdində "Sosial Xidmətlər agentliyi"nə təqdim etdiklərini bildirməklə, özlərini sığortalamağa davam edir.

Mənim başıma bu oyunları açan 2008-ci ildə Yasamal rayonundakı 1 otaqlı mənzilimi digər şəxsə bağışlamaqla, mənə ailə tərkibimə görə 3 otaqlı mənzil əvəzinə 2 otaqlı mənzili verən Azərbaycan Gözdən Əlillər Cəmiyyəti İctimai Birliyinin sədri S.Abdullayev olmuşdur. Onun mənzil "maxinasiyası" həmin vaxtdan hal-hazıradək davam etməkdədir. Onun əməlləri isə hüquq-mühafizə orqanları tərəfindən ört-basdır edilmişdir. Cəmiyyət sədri kimi onun qanunazidd hərəkətlərinə aidiyyəti orqanlar göz yumublar.

Cənab Prezident!

Bu qurumun rəhbərləri Sizin sərancamınıza əməl etmirlar, məni müxtəlif istiqamətlərə yönləndirməklə mənəvi cəhətdən sındırmağa çalışırlar. Bildirirəm ki, yeni tikilmiş yaşayış binası hazırkı yaşadığım ünvana yaxındır. Həmçinin, mənim işlədiyim 37 saylı Şəhər Poliklinikası Narimanov rayonu ərazisindədir.

Nəzərinizə çatdırım ki, 1-ci qrup gözdən əlil kimi respublika üzrə növbədə birinci sıradayam. Mənim mənzil şəraitim 7 nəfərin yaşaması üçün yetərli deyil və birinci növbədə mən mənzillə təmin olunmalıyam.

Mənim hazırda ailə üzvlərimin tərkibinə daxil olan oğlum Abbas 3-cü dərəcəli əlildir. Digər oğlum Tural isə 2014-2016-cı illərdə hərbi vəzifəli kimi nümunəvi xidmət keçmiş, aprel döyüşlərinin iştirkçısı olmuşdur.

Səlahiyyətli orqanlar tarafindan verilmiş cavablar mənim mənzil şəraitiminin yaxşılaşdırılmasına dolayı yolla yalnız maneəçilik törətdiyindən, bu cavablar məni qane etmədiyindən, məcbur olub sonuncu ümid yeri kimi Sizə müraciət edirəm.

Hörmətli Prezident!

Sizdən xahiş edirəm ki, Azərbaycan Respublikası Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyi tərəfindən bölgüsü aparılan Gözdən Əlillər Cəmiyyətinə məxsus Bakı şəhəri, Nərimanov rayonu, Faiq Yusifov küçəsi 40A ünvanında inşa edilmiş çoxmanzilli yaşayış binasından güzəştli şərtlərlə, növbəlilik əsasında 1-ci qrup gözdan əlil kimi, ailə tərkibim nəzərə alınmaqla, mənzillə təmin olunmağıma kömək edəsiniz”.

Redaksiyadan: Yazıda adlarıq eyd olunan şəxslərin mövqeyini dərc etməyə hazırıq.