Aprelin 13-dən 15-dək olan müddətdə Zaqatala rayonu, Göyəm kəndi ərazisindəki məscidin nəzir qutusundan 300 manat oğurlanıb.

Daxili İşlər Nazirliyindən Zamantv.az-a verilən məlumata görə, Zaqatala rayon Polis Şöbəsi əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən Qandax kənd sakini, əvvəllər də oğurluğa görə məhkum olunmuş Anar Osmanov müəyyən edilərək saxlanılıb.

Türkiyədə azərbaycanlı iş adamının külli miqdarda əmlakı mənimsənilib.

Zamantv.az yerli mediaya istinadla xəbər verir ki, bu barədə zərərçəkmiş, Antalyada yaşayan Murad Muradov Kiber Cinayətkarlıqla Mübarizə İdarəsinə müraciətində bildirib. Onun sözlərinə görə, böyük gəlir əldə etmək məqsədilə qatıldığı kripto valyutada 20 milyon lirə (təxminən 2 milyon 312 min manat) pul itirib.

M. Muradov bildirib ki, Antalyadakı villalarının birini kirayə verdiyi alman ər-arvad ona milyarder olmaq üçün kripto valyutaya sərmayə qoymağı təklif edib. Buna inanan azərbaycanlı iş adamı bir neçə ay ərzində kripto valyutaya 1.2 milyon dollar sərmayə edib. Məqsədi isə qazanılan puldan yeni ərazi almaq olub. Ancaq bir müddət sonra almanlar ortaqlığa sadiq qalmayıb. Belə ki, M. Muradov xaricdə olarkən alman ər-arvad onun bütün hesablarına giriş edərək əmlakını mənimsəyiblər.
M. Muradov hadisə ilə bağlı müraciət edərək, insanları ayıq olmağa, fırıldaqçılara inanmağa səsləyib.

Bakıda bir neçə avtomobilin şüşəsi sındırılaraq qarət olunub.

Daxili İşlər Nazirliyindən Zamantv.az-a verilən məlumata görə, paytaxtın Nizami rayonunda avtomobillərin şüşələrini qıraraq oğurluq edən saxlanılıb. Rayon Polis İdarəsi 25-ci Polis Şöbəsi əməkdaşlarının keçirdikləri əməliyyat nəticəsində əvvəllər məhkum olunmuş Murad Canızadə tutulub. Onun Nizami rayonunda 5 avtomobilin şüşəsini sındıraraq dəyəri 2500 manata yaxın maqnitafon, qızıl-zinət əşyaları, saat, videoqeydiyyatçı və digər əşyalar oğurladığı müəyyən edilib. Hadisələr təhlükəsizlik kameraları vasitəsi ilə qeydə alınıb.

Murad Canizadənin paytaxtın digər rayonlarında analoji cinayətlər etdiyi istisna olunmur.

Ukraynanın Zaporjye vilayətində mülki təyyarə qəzaya uğrayıb.

Zamantv.az yerli mediaya istinadən xəbər verir ki, Zaporojye vilayətində qəzaya uğrayan “AN-26” təyyarəsinin Rusiya ordusunun vurmadığı məlum olub. Təyyarənin son dərəcə aşağı hündürlükdə uçduğu müəyyənləşib.

Hüquq-mühafizə orqanlarından bildirilib ki, təyyarə həddindən artıq aşağı hündürlükdə uçaraq yüksək gərginlikli elektrik xəttinə dəyib.
Mülki təyyarənin Rusiya hava hücumundan müdafiə vasitələrinin aşkarlanmaması üçün aşağı hündürlükdə uçduğu vurğulanır.

Qeyd edək ki, bu gün səhər saatlarında baş verən qəza zamanı ilkin məlumata görə, bir nəfər ölüb, iki nəfər yaralanıb.

Bakıda baş verən qətl və intihar odlu silahla törədilib.

Bu barədə Günay Cabbarovanın qonşuları bildirib. Məlum olub ki, hadisənin baş verdiyi Nərimanov rayonu Qarabağ küçəsi, 26 ünvanında həmin vaxt silah səsi eşidilib. Həmin ünvanda Günay Cabbarova qalırmış. Bu ev də onun atasının evi olub.

Ehtimala görə, hadisəni törədən müstəntiq polis mayoru Tural Aslanov əvvəlcə Günay Cabbarovanı vurub. Daha sonra o, özünə də atəş açaraq, həyatına son qoyub.
Qonşuların bildirdiyinə görə, G. Cabbarova əvvəllər ailəli olub. 3-5 yaşlarında iki övladı var. Ata-anası xeyli müddətdir ki dünyalarını dəyişiblər. Polis mayoru T. Aslanov isə subay idi.
Hadisə olan ünvan

***

Saat: 15:08

Polisin və nişanlısının meyiti hadisə baş verən evdən götürülüb.

Lent.az-ın hadisə yerində olan əməkdaşının verdiyi xəbərə görə, meyitlər müayinə edilmək üçün tibbi ekspertizaya aparılıb.

***

Saat 14:32

Bakıda polisin nişanlısını öldürərək intihar etməsi faktı ilə bağlı cinayət işi başlanıb.

Baş Prokurorluqdan Lent.az-a verilən məlumata görə, faktla bağlı Nərimanov rayon Prokurorluğunda Cinayət Məcəlləsinin 120.1-ci (qəsdən adam öldürmə) və 125-ci (intihar həddinə çatdırma) maddələri ilə cinayət işi başlanıb.

Hazırda hadisə yeri müayinə edilməklə zəruri istintaq hərəkətləri davam etdirilir.

Hadisə yerindən fotoları təqdim edir:
Bakıda dəhşətli qətl hadisəsi olub.

Daxili İşlər Nazilriyinin mətbuat xidmətinin bölmə rəisi Zeyni Hüseynov Lent.az-a bildirib ki, bu gün günorta saatlarında paytaxtın Nərimanov rayonu ərazisindəki evlərin birində Xəzər Rayon Polis İdarəsinin əməkdaşı Tural Aslanov qısqanclıq zəminində nişanlısı Günay Cabbarovanı qətlə yetirdikdən sonra özü də intihar edib.

Faktla bağlı araşdırmalar aparılır.

Qeyd edək ki, bu son bir ayda Azərbaycandan qeydə alınan 5-ci analoji hadisədir.

Tovuz rayonunun Dondar Quşçu kəndində 10 yaşlı Nərmin Quliyevanı qətlə yetirilməsi ilə bağlı hələ də məhkəmə prosesi davam etməkdədir. Hadisənin detalları incələnsədə, şahid ifadələri dinlənilsə də, hələlik son qərar verilməyib. Hər məhkəmə prosesində yeni-yeni məqamlar ortaya çıxır.

Bu gün də qətldə ittiham olunan İlkin Süleymanovun cinayət işi üzrə məhkəmə prosesi davam etdirilib.

Zamantv.az APA-ya istinadən xəbər verir ki, bu gün Gəncə Ağır Cinayətlər Məhkəməsində hakim Dadaş İmanovun sədrliyi ilə keçirilən iclasda İlkin Süleymanovla eyni təcridxanada saxlanılmış məhkum Baxşəli Qəhrəmanovun ifadəsi alınıb.
Təqsirləndirilən şəxsin dediyinə görə, İlkin Süleymanov Nərmin Quliyevanı öldürməsi ilə bağlı ona etiraf edib.

Prosesdə təqsirləndirilən şəxsin vəkili Zabil Qəhrəmanov şahidin istintaq zamanı verdiyi ifadələrlə hazırkı ifadəsi arasında çoxsaylı ziddiyyətlər yarandığı üçün ona əlavə suallar verib.

Məlum olub ki, şahid istintaqda İlkinin 2020-ci ilin fevralın sonunda ona etiraf etdiyini deyib. Bugünkü ifadəsində isə bildirib ki, İlkinin etirafı ilə bağlı 2020-ci ilin fevralın əvvəlində məsul şəxslərə məlumat verib.

Vəkil isə İlkinin fevralın sonunda dediyi sözlər haqda fevralın əvvəlində necə məlumat verdiyini soruşub.

Məhkəmədə məlum olub ki, şahid istintaqa verdiyi ifadələrinin birində İlkinin Nərmini Altay Ələkbərovun öldürdüyünü deyib, digər ifadəsində isə Nərmini onun qohumu ilə birgə qətlə yetirdiyini etiraf edib.

Vəkilin suallını cavablandıran şahid digər suallara da ziddiyyətli cavablar verib.

O, ifadəsi zamanı həbsxanada nüfuzlu bir məhkum kimi tanındığını qeyd edib. Vəkilin “Hansı maddə ilə cəza çəkirsiniz” sualını cavablandıranda məlum olub ki, Baxşəli Qəhrəmanov Cinayət Məcəlləsinin 244.1-ci (Fahişəliklə məşğul olmaq üçün əxlaqsızlıq yuvalar təşkil etmə, saxlama və ya bu məqsədlər üçün mənzil sahələri vermə) maddəsi ilə təqsirli bilinərək həbs olunub.

Proses mayın 4-də davam etdiriləcək.

Xatırladaq ki, 2019-cu ilin noyabrın 19-dan itkin düşən Tovuz rayonunun Dondar Quşçu kənd sakini, 10 yaşlı Nərmin Quliyevanın qətlə yetirilərək yandırılan meyiti 2020-ci il yanvarın 6-da kənd ərazisində aşkar edilib.

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşlarından ibarət istintaq-əməliyyat qrupu tərəfindən cinayətin açılması istiqamətində həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində cinayəti törətməkdə şübhəli bilinən Dondar Quşçu kənd sakini, 1973-cü il təvəllüdlü Süleymanov İlkin İbrahim oğlu tutularaq istintaqa cəlb edilib.

İş üzrə çoxsaylı şahidlər dindirilib, məhkəmə-tibbi, məhkəmə-bioloji, məhkəmə-kimyəvi ekspertizaları təyin edilib və digər zəruri istintaq hərəkətləri aparılıb.

İ.Süleymanova Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələr ilə təqsirli bilinərək barəsində cinayət işi açılıb.

Bakı Ağır Cinayətlər Məhkəməsinin 3 hakimi intizam məsuliyyətinə cəlb olunub.

Bu barədə Məhkəmə-Hüquq Şurasından məlumat verilib.

Bildirilib ki, fəaliyyətində bundan əvvəl peşəkar çatışmazlıqlar aşkar edilmiş hakimlərin fəaliyyəti təkrar qiymətləndirilərək 4 nəfərin işində dönüş yaratmadıqlarına görə səlahiyyətlərinə vaxtından əvvəl xitam verilməsi qərara alınıb. Qanunvericiliyin tələblərinin pozulmasına görə apellyasiya məhkəmələrinin 4, Bakı Ağır Cinayətlər Məhkəməsinin 3 hakimi intizam məsuliyyətinə cəlb olunub.

Həmçinin, korrupsiyaya şərait yaradan hüquqpozmalara, süründürməçiliyə və digər kobud qanun pozuntularına yol verilməsinə görə birinci və apellyasiya instansiyası məhkəmələrinin 12 hakimi barədə intizam icraatı başlanılıb.

Bakının Nizami rayonunda bıçaqlanma baş verib.

Zamantv.az APA-ya istinadən xəbər verir ki, hadisə Qara Qarayev prospektində qeydə alınıb.

1985-ci il təvəllüdlü Qəhrəmanov Səddam Bəbir oğlu tanışı tərəfindən bıçaqlanıb.
O, sağrı nahiyyəsinin kəsilmiş-deşilmiş xəsarətləri ilə xəstəxanaya yerləşdirilib.

Fakt araşdırılır.

Ağdaşda ölümlə nəticələnən yol qəzası olub.

Zamantv.az xəbər verir ki, hadisə ötən gün saat 12 radələrində Ağdaş şəhəri Heydər Əliyev prospektində baş verib. Rayon sakini Məmmədov Yusif Tapdıq oğlu idarə etdiyi “Hyudani Sonata” markalı avtomobillə yolu keçməyə çalışan Kərimova Həqitət Novruz qızını vurub. O. Ağır xəsarətlərlə Mingəçevir şəhər Xəstəxanasına yerləşdirilib. Həkimlərin müdaxiləsinə baxmayaraq, o, saat 16 radələrində orada dünyasını dəyişib.

Faktla bağlı araşdırma aparılır.

Azərbaycan Respublikasının Prezidenti İlham Əliyev aprelin 21-də Füzuli rayonunda Köndələnçay su anbarlarında aparılacaq təmir-bərpa işləri, Şuşa rayonunun Daşaltı kəndində Əhmədbəyli-Füzuli-Şuşa avtomobil yolunun və bu yolun üzərindəki tunellərin inşası, Şuşa şəhərində inzibati binanın əsaslı təmiri və konfrans zalının tikintisi ilə tanış olub.

AZƏRTAC xəbər verir ki, işğaldan azad olunmuş ərazilərin bərpasını öz maliyyə imkanları hesabına həyata keçirən Azərbaycan bu sahədə də öz standartlarını yaradıb. Mina problemi, eyni zamanda, pandemiyanın yaratdığı çətinliklərə rəğmən, bərpa və yenidənqurma işləri bütün istiqamətlər üzrə sürətlə və planlı şəkildə aparılır. Su anbarlarının gələcək istismarı, hidroehtiyatların ölkənin su təsərrüfatı sisteminə inteqrasiyası da bərpa prosesinin və Böyük Qayıdışın tərkib hissəsidir.

Prezident İlham Əliyev Köndələnçay su anbarlarında aparılacaq təmir-bərpa işləri ilə tanış oldu.

Bildirildi ki, işğal dövründə on minlərlə hektar əkinəyararlı torpaq sahələrinin suvarılmaması faktiki olaraq bu sahələrin təsərrüfat dövriyyəsindən çıxarılmasına səbəb olub. Mövcud su anbarlarının qəsdən məhv edilməsi isə Ermənistanın Qarabağda aqrar sahədə dağıdıcı fəaliyyətinin nəticəsidir. Köndələnçay su anbarı buna bariz misaldır. Ümumi sistemə daxil olan “Köndələnçay-1”, “Köndələnçay-2” və “Aşağı Köndələnçay” su anbarlarının bərpası ilə Füzuli rayonu ərazisində 6200 hektar əkin sahəsinin suvarılması mümkün olacaq.

Qeyd edək ki, işğaldan azad olunmuş ərazilərdə ümumilikdə 9 su anbarı tikilir və ya təmir olunur. Qarabağın zəngin su ehtiyatlarının düzgün və səmərəli idarə olunması bütövlükdə regionun iqtisadi inkişafını sürətləndirəcək.

İşğaldan azad olunan ərazilərin kənd təsərrüfatı sahəsində potensialı ölkə iqtisadiyyatı üçün mühüm drayverlərdən birinə çevriləcək. Su ehtiyatlarının düzgün idarə edilməsi və səmərəli istifadəsi isə Qarabağda aqrar sahənin inkişafına töhfə verəcək. Hazırda bərpası nəzərdə tutulan su anbarlarının istifadəyə verilməsi ilə bu məsələ həllini tapacaq.

İşğal dövründə Ermənistan məqsədli şəkildə su ehtiyatlarından təzyiq vasitəsi kimi istifadə edirdi. Bu gün Azərbaycan Prezidenti İlham Əliyevin strateji kursuna əsasən, bərpa prosesi zamanı sudan məqsədyönlü istifadə üçün infrastruktur imkanlarını təkmilləşdirilir. Bu, eyni zamanda, keçmiş məcburi köçkünlərin həyat şəraitinin yaxşılaşdırılması, məşğulluğun artırılması, ölkədə ərzaq təhlükəsizliyinin təmin olunmasına hesablanıb.

X X X

Sonra dövlətimizin başçısı Şuşa rayonunun Daşaltı kəndində Əhmədbəyli-Füzuli-Şuşa avtomobil yolunun və bu yolun üzərindəki tunellərin inşası ilə tanış oldu.

Qeyd edək ki, Qarabağın dirçəlişinə aparan Böyük Qayıdış proqramının əsas tərkib hissələrindən biri yol infrastrukturunun qurulmasıdır. Şuşaya çəkilən Zəfər yolunun cığırı qəhrəman əsgər və zabitlər tərəfindən açılıb. Hazırda bu yolda işlər davam etdirilir – məqsəd Şuşaya avtomobillə daha tez və rahat çatmaqdır. Cəmi 10 ay əvvəlki vəziyyətlə hazırkı mərhələni müqayisə etdikdə mübaliğəsiz demək olar ki, dünyada bu sürət və keyfiyyətdə görülən işlərə rast gəlmək mümkün deyil.

Əhmədbəyli-Füzuli-Şuşa avtomobil yolunun digər önəmi onun Zəngəzur dəhlizinin magistralı ilə birləşməsindədir.

Məlumat verildi ki, yolun uzunluğu 81,6 kilometr, hərəkət zolaqlarının sayı 4-6, hərəkət zolağının eni isə 3,5 metrdir. Yol boyu 7 tunelin tikintisi aparılır. Bir neçə tuneldə qazma işləri artıq tamamlanıb, digərlərində isə qazma, partlatma və qırma üsulları ilə qaya qruntlardan ibarət hissələrin kənarlaşdırılması işləri davam edir. Bundan başqa, tunellərdə havalandırma və izolyasiya sistemləri də quraşdırılır.

Əhmədbəyli-Füzuli-Şuşa avtomobil yolunda tunellərin inşası ilə yanaşı, yol boyu müxtəlif hissələrdə torpaq yatağının, körpülərin, yeraltı keçid və suötürücü boruların tikintisi də layihəyə uyğun şəkildə icra olunur.

Prezident İlham Əliyev avtomobili tuneldə idarə etdi.

Qeyd edək ki, Qarabağ və Şərqi Zəngəzur iqtisadi rayonları ərazisində icra olunan yol-nəqliyyat infrastrukturu işğaldan azad edilən rayon və kəndlərin sosial-iqtisadi inkişafında mühüm rol oynayacaq. Əhmədbəyli-Füzuli-Şuşa avtomobil yolunun tikintisinin 2024-cü ildə başa çatdırılması planlaşdırılır.

X X X

Daha sonra Prezident İlham Əliyev Şuşa şəhərinə gəldi.

Məlum olduğu kimi, aparılan kompleks işlər çərçivəsində Şuşa şəhərinin tarixi görkəminin bərpası, əvvəlki şöhrətinin özünə qaytarılması və ənənəvi dolğun mədəni həyatına qovuşması üçün bərpa-quruculuq işləri sürətlə davam etdirilir.

Dövlətimizin başçısı əvvəlcə Şuşa şəhərində tullantıların idarə olunması poliqonunda gedən işlərlə tanış oldu.

Bildirildi ki, burada məişət tullantıları Avropa standartlarına uyğun xüsusi yeraltı konteynerlərdə yerləşdiriləcək. Poliqonda 4 çeşid üzrə 600 ədəd SMART yeraltı konteyner və 11 ədəd xüsusi texnika nəzərdə tutulub. Ərazidə söküntü materiallarının çeşidlənməsi də aparılacaq. Şəhərin su təchizatı sisteminin dayanıqlığının təmini də iki mərhələdə paralel layihələrlə həyata keçiriləcək.

Sonra Prezident İlham Əliyev Şuşa şəhər inzibati binanın əsaslı təmiri və konfrans zalının tikintisi ilə tanış oldu.

Məlumat verildi ki, hazırda binada işlər tamamlanmaq üzrədir. Şəhərin arxitekturasına uyğun tikilən binada hər cür şərait yaradılacaq.

Azərbaycan Respublikasının Prezidenti İlham Əliyev aprelin 21-də Füzuli rayonunda Köndələnçay su anbarlarında aparılacaq təmir-bərpa işləri, Şuşa rayonunun Daşaltı kəndində Əhmədbəyli-Füzuli-Şuşa avtomobil yolunun və bu yolun üzərindəki tunellərin inşası, Şuşa şəhərində inzibati binanın əsaslı təmiri və konfrans zalının tikintisi ilə tanış olub.

Bununla bağlı AZƏRTAC məlumat yayıb.