Bakıda kişini arvadı bıçaqlayıb.

Zamantv.az-ın məlumatına görə, hadisə Sabunçu rayonu, Ramana qəsəbəsində baş verib. Qəsəbə sakini 45 yaşlı Şəfiqə Babaşova aralarında yaranmış münaqişə zəminində əri 48 yaşlı Gəncalı Babaşovu bıçaqlayıb. Qarnından bıçaq xəsarəti alan kişi xəstəxanaya yerləşdirilib.

Hadisəni törədən Ş. Babaşova saxlanılıb.
Hazırda araşdırma davam edir.

Əməkdar artist Ehtiram Hüseynov Dağnıq skleroz xəstəliyindən əziyyət çəkir.

Zamantv.az-ın məlumatına görə, bu barədə 41 yaşlı muğam ifaçısının özü bildirib. O, Türkiyənin tanınmış müğənnisi Sərdar Ortacın dediyi “Ms xəstəsi olmaq o deməkdir ki, bu gün yaxşı olub, sabah pis olursan. Növbəti gün isə yaxşı olub, insanları təəccübləndirirsən”, sözlərini "Instağram" səhifəsində paylaşıb. Ehtiram paylaşıma, “İnşallah mənə də çarə tapılar” sözlərini əlavə edib.
Qeyd edək ki, Dağınıq skleroz - sinir sisteminin iltihabi xəstəliyi olub, baş və onurğa beynində sinir hüceyrələrinin örtük qişasının zədələnməsi ilə müşahidə olunur. Bu zədələnmə sinir sistemi hissələri arasında əlaqəni pozur və bunun nəticəsində bir sıra simptom və sindromlar yaranır.
Dağınıq skleroz xronik, vaxtaşırı kəskinləşmə ilə keçən və pasiyentlərin müxtəlif dərəcədə əlilliyinə səbəb olan xəstəlikdir. Xəstəliyin başlanmasından 20 il sonra xəstələrin 60%-i sərbəst hərəkət edə bilmir. Çox hallarda xəstəlik ömrün uzunluğuna o qədər də təsir etmir, lakin nadir hallarda xəstəlik çox sürətlə irəliləyir. Klinik müayinələr göstərir ki, xəstələrin MSS-də zədələnmələr əmələ gəlir və bu zədələnmələr zaman keçdikcə səpələnir. Zədələr ocaqlarda olan iltihabi proses nəticəsində yaranan çapıqlardır. Diaqnozun təsdiqlənməsi üçün yeganə bir patoqnomonik test mövcud deyil və xəstənin sağlığında çox nadir hallarda onu təsdiq edən histoloji müayinə mümkün olur.

Azərbaycandakı narkotik istifadəçilərinin sayı açıqlanıb.

Zamantv.az xəbər verir ki, bu barədə Respublika Narkoloji Mərkəzinin baş direktoru Orxan Cəfərov müsahibəsində deyib. O bildirib ki, əvvəlki illərlə müqayisədə narkotik istifadəçilərin sayının artması tendensiyası müşahidə olunur:

“2019-cu ildə qeydiyyatda olan narkotik istifadəçilərinin ümumi sayı 32 min 921 nəfər idisə, 2020-ci ildə 33 min 788, ötən il isə bu göstərici 34 min 602 nəfər təşkil edib”.
Onun sözlərinə görə, Azərbaycanda narkomaniya xəstəliyinə düçar olmuş qadınların və yeniyetmələrin sayı kişilərə nisbətən dəfələrlə azdır:

“Statistikaya nəzər salsaq görərik ki, 2019-cu ildə 641 qadın və 9 yeniyetmə, 2020-ci ildə müvafiq olaraq 618 qadın və 9 yeniyetmə, 2021-ci ildə isə 566 qadın və 14 yeniyetmə qeydiyyata alınıb.

Ötən il 4789 nəfər, o cümlədən 4530 nəfər dispanser, 259 nəfər isə profilaktik qeydiyyatdan çıxarılıb”.

Azərbaycan-İran sərhədində silahlı insident olub.

Dövlət Sərhəd Xidmətinin mətbuat mərkəzindən Zamantv.az-a verilən məlumata görə, fevralın 21-də saat 1:05-də Dövlət Sərhəd Xidməti Sahil Mühafizəsinin Cənub regional şöbəsinin “Kələdəhnə” sahil nəzarəti bölməsinin xidməti ərazisində Şahağacı kəndinin cənubunda sahildən təqribən 40 metr aralı məsafədə içərisində 2 nəfərin olduğu “Mitsubishi “Pajero” markalı avtomobilin əraziyə yaxınlaşması, avtomobildəki şəxslərdən birinin düşərək özünü şübhəli aparması və ətrafı müşahidə edərək kolluqda gizlədilmiş 1 ədəd kisəni götürməsi sərhəd naryadının diqqətini cəlb edib.

Sərhəd naryadının “Dayan” əmrinə tabe olmayan şübhəli şəxslər ərazidən kisəni götürüb avtomobillə hadisə yerindən uzaqlaşmağa cəhd edərkən saxlanılıblar.
Onların Astara rayon sakinləri 44 yaşlı Ağayev Qurban Fərhad oğlu və Ağayeva Gülşən Vaqif qızı olmaları müəyyənləşdirilib, saxlama zamanı əvvəllər narkotik vasitənin istifadəsinə görə məhkum olunmuş Q.Ağayev silahlı müqavimət göstərərək üzərində olan “BLOW-TR-14” markalı travmatik tapançadan bir neçə dəfə atəş açaraq sərhəd naryadının iki üzvünə yüngül xəsarət yetirib. Ərazidə xidmət aparan naryad tərəfindən havaya xəbərdarlıq atəşi açıldıqdan sonra dərhal təxirəsalınmaz tədbirlər keçirilib, hərbi qulluqçular şücaət və yüksək peşəkarlıq göstərərək cinayətkarı saxlayıblar.

Hadisə yerindən götürülən kisəyə baxış keçirilərkən içərisindən ümumilikdə 16 kq 965 qr narkotik vasitəyə (4 kq 085 qr marixuana, 9 kq 920 qr tiryək, 2 kg 090 qr metamfetamin və 870 qr heroin) bənzər maddələr aşkar olunaraq götürülüb.

Q.Ağayevin dəfələrlə məhkum olunmasını və yaşadığı ərazidə narkotik vasitələrin satışı ilə məşğul olan şəxs kimi tanınmasını nəzərə alaraq, onun ətrafında zəruri əməliyyat-istintaq tədbirləri davam etdirilərək, Astara rayon polis əməkdaşları ilə birlikdə yaşadığı evə baxış keçirilib və qarajında rəflərin arasında gizlədilən 1 kisənin içərisindən 1 kq 100 qr marixuanaya bənzər narkotik vasitə aşkar edilərək götürülüb.

Fаkt üzrə əməliyyаt-istintaq tədbirləri dаvаm еtdirilir.

Bakı metrosunda ölüm hadisəsi baş verib.

Zamantv.az-ın məlumatına görə, hadisə metronun “İnşaatçılar” stansiyasında qeydə alınıb.

Orada elektrik mexanik işləyən 63 yaşlı Məlikəli Nufəli oğlu Əliyev iş otağında yıxılıb. Başından xəsarət alan elektrik xəstəxanaya yerləşdirilib. Həkimlərin səyinə baxmayaraq, onu xilas etmək mümkün olmayıb.
Faktla bağlı araşdırma aparılır.

“Bəlkə də serialda çəkilmək üçün elə özləri pul verirlər”. Zamantv.az xəbər verir ki, bunu yerli seriallarda və filmlərdə çəkilməməsinin səbəblərini izah edərkən tanınmış aktrisa, Əməkdar artist Nahidə Orucova Yenicag.az-a açıqlamasında deyib.

Aktrisa gənc rejissorlar tərəfindən çəkilən seriallara dəvət edilmədiyini bildirib:

“Seriallara çəkilmirəm, yəqin cavanlar bizi öz seriallarında görmək istəmir. Ya da bizə yaxşı pul verməli olduqlarına görə dəvət etmirlər. Çünki bizim reklama ehtiyacımız yoxdur. Buna görə də onlar üçün peşəkar aktyor və aktrisaları deyil, gəncləri çəkmək daha sərfəlidir. Çünki onlar pula bir o qədər də önəm vermirlər. Bəlkə də serialda çəkilmək üçün elə özləri pul ödəyirlər. Amma çox istərdim ki, ciddi janrda olan serial və filmlərdə oynayım. Amma nə etmək olar, təklif yoxdur. Hazırda bir kamediya janrında serialda varam. Ramin Hacıyevin rejissor yozumunda ərsəyə gələn serialda çəkilirəm. Digər rejissorlardan hələ ki təklif almamışam. Bəlkə də qorxurlar dəvət etməyə, ehtiyat edirlər. Amma nədən qorxurlar, onu bilmirəm”.

Zamantv.az - Şəmkir rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində qanunsuz olaraq narkotik vasitə əldə edib saxlamaqda şübhəli bilinən Nəsimi Abbaszadə saxlanılıb. Üzərindən heroin aşkarlanan şəxs narkotik maddəni qonşusundan aldırdığını bildirib.

DİN-dən verilən məlumata görə, davam etdirilən istintaq-əməliyyat tədbirləri nəticəsində N. Abbaszadəyə narkotik maddəni 70 manata satan Şəmkir rayon sakini Sabir Yusifov saxlanılıb. Üzərindən narkotik vasitə aşkar edilən Sabir Yusifovun yaşadığı fərdi yaşayış evindən isə narkotik vasitə olan tiryək aşkar edilərək götürülüb.

Faktlarla bağlı Polis Şöbəsində cinayət işi başlanılıb araşdırmalar davam etdirilir.

Rusiya prezidenti V.Putinin Ukraynanın suverenliyini birbaşa pozaraq bu dövlətin hüquqi ərazisindəki qondarma “DXR” və “LXR”-i tanıması Xankəndi və İrəvandakı revanşist, işğalçı, separatçı və terrorçu xislətli ermənilərin canına yağ kimi yayılıb. Onlar tezliklə Kreml tərəfindən Qarabağdakı separatçı-terrorçu rejim barədə də belə bir addımın atılacağına ümidləniblər. Artıq Araik faktiki ağası Putinin bu addımını alqışlayıb...

“Putin Artsaxın müstəqilliyini niyə tanımalı olduğunu ən yaxşı şəkildə izah edib”. Zamantv.az moderator.az-a istinadla xəbər verir ki, erməni mediasında yayılmış məlumata görə, bu cümləni Azərbaycan Respublikasının Qarabağ torpağındakı separatçı-terrorçu rejimin qanunsuz "qanunverici orqanı"nın "Ədalət" fraksiyasının "deputat"ı David Qalstyan öz "Facebook" səhifəsində yazıb.

“Putin Artsaxın müstəqilliyini niyə tanımalı olduğunu ən yaxşı şəkildə izah edib. Onun son çıxışında "Ukrayna və Donetsk" sözlərini Azərbaycan və "Artsax" sözləri ilə əvəz etsək, hər şeyin üst-üstə düşdüyünü görərik. Ona görə də düşünürəm ki, bu, bizim üçün yeni bir şansdır. Biz də belə bir qanun layihəsinin təşəbbüskarı olmalıyıq. Təəssüf ki, indiki həlledici anda Ermənistan və Qarabağ hakimiyyəti ən zəif vəziyyətdədir, ona görə də belə bir layihənin dərhal həyata keçirilməsini təmin etmək üçün hər şeyi etmək lazımdır” –deyə üzdəniraq “deputat” bildirib.

Zəruri şərh:
Separatçı və işğalçıların belə çıxışlarını qətiyyən qulaqardına vurmaq olmaz. Çünki öncə nəzərə almaq lazımdır ki, postsovet məkanındakı digər separatçı qurumlar kimi Xankəndindəki separatçı-terrorçu xunta ilə yanaşı, İrəvandakı revanşist, işğalçı və irqçi xislətli müxalifətin arxasında da məhz Kreml, şəxsən V.Putin dayanır...

1988-ci ildə Qarabağ münaqişəsi yenicə qızışdırılanda Azərbaycanda kiminsə ağlına gələrdimi ki, ermənilər cəmi 4-5 ildən sonra Vətənimizin Şuşa, Laçın, Kəlbəcər, Ağdam və s. kimi guşələrini işğal edəcəklər. Çoxumuz deyirdik ki, əşşi, erməni bizə nə edəcək? Amma bizə son 34 il ərzində ediləni əslində ermənilər Moskvanın fətvasıyla etdi...
Yaxud işğaldan sonrakı dövrdə 2020-ci ilədək həssas siyasi analitik və yazarlardan savayı kim ağlına gətirərdi ki, nə vaxtsa Azərbaycan torpaqlarının xeyli hissəsi azad ediləcək və bundan yararlanan Rusiya “sülhməramlı” adı altında öz ordusunu respublikamızın ərazisinə yeridəcək... Nə yazıqlar ki, bu baş verdi və bundan sonra bu gedişlə Donbasda olduğu kimi, Qarabağda on minlərlə Rusiya vətəndaşı peyda ola bilər...

Atalar boş yerə deməyib ki, ağla gəlməyən başa gələr... Odur ki, başımızı boş, mənasız manıs deyişmələriylə qatmayaq, ayıq olaq ki, bir gün ayılıb uğrunda şəhid və qazilərimizin qanı axıdılmış Xankəndi, Xocalı, Ağdərə və s. torpaqlarımızın hüquqi baxımdan əlimizdən çıxmasını görməyək...

Xəbər verdiyimiz kimi, son günlər ərzində Müdafiə Nazirliyinin yüksək rütbəli zabitləri külli miqdarda mənimsəmə ittihamları ilə həbs ediliblər. Cəmiyyətdə isə Müdafiə Nazirliyində baş verən bu hadisələrin günahkarının Müdafiə naziri Zakir Həsənov və sabiq Baş Qərargah rəisi Nəcməddin Sadıkov olduğuna dair fikirlər səsləndirilir. Zamantv.az xəbər verir ki, məsələ ilə bağlı Ümid Partiyasının sədri İqbal Ağazadə "Unikal"a açıqlamasında kimin günahkar olduğunu istintaqın müəyyənləşdirəcəyini bildirib:

"Amma hər halda həbs edilən şəxslər həmin dövrdə kiminlə işləyiblərsə və cinayət hansı dönəmi əhatə edirsə, həmin dövrdə işləyənlərin hamısı, əsas da Müdafiə Nazirliyində olan rəhbər şəxslər günahkardırlar. Bu barədə ciddi bir söz demək istəmirəm. İstintaqın yekunlaşmasını gözləyirəm. Çox istərdim ki, istintaq obyektiv aparılsın.

Hesab edirəm ki, bu məsələni cəmiyyətin ictimai rəyə istiqamətləndirmək düzgün olmaz. Təqsirli olan şəxslərin hamısı öz cəzasını almalıdır. Azərbaycan xalqının cibinə girmək, büdcəni talamaq, xüsusilə də bunu müharibə şəraitində olan bir dövlətin Müdafiə Nazirliyində etmək çox ağır bir məsələdir".

Ağ Partiya başqanı Tural Abbaslı qatıldığı canlı yayımlardan birində “Artsax”ın Milli Məclis tərəfindən terrorçu rejim kimi elan edilməsi təklifi ilə çıxış edib. Maraqlıdır ki, partiya liderinin bu təklifi ictimaiyyət tərəfindən də müsbət qarşılanıb.

Bəs, sözügedən addımın atılması nə qədər realdır? Zamantv.az xəbər verir ki, mövzunu Bizim.Media-ya şərh edən sabiq xarici işlər naziri Tofiq Zülfüqarov məsələnin aktuallığına diqqət çəkib:

“Hesab edirəm ki, bu çox aktual bir addım olacaq. Çünki qondarma rejim terror fəaliyyəti ilə məşğuldur. Bizdə olan məlumatlara görə, Rusiya sülhməramlılarının müvəqqəti yerləşdirildiyi ərazilərdə yaşayan əhalinin bir qismi Azərbaycanın tərkibində, bizim qanunvericiliyə uyğun şəkildə yaşamağa hazırdılar. Lakin onları güc tətbiq etməklə separatist qanunsuz quruma tabe olmağa məcbur edirlər. Yerli erməniləri güclə silahlı birləşmələrə cəlb etməyə çalışır, onlara silah paylayırlar.

Bunlar terror əməlləridir və bunu edənlərə qarşı sözügedən addımı atmaq faydalı olacaq. Yaddan çıxartmayaq ki, qondarma qurumun rəhbərliyində terrorçular, müharibə qanunlarını pozan arayikkimilər dayanır. Onlar da qanun qarşısında cavab verməlidirlər”.

Tofiq Zülfüqarov Azərbaycan parlamentinin qondarma rejimi terror təşkilatı elan edəcəyi təqdirdə, beynəlxalq arenadan gələcək reaksiyanı da şərh edib:

“Hesab edirəm ki, biz bu mövzunu təbliğat baxımından doğru şəkildə təqdim etsək, mövqeyimizi başa düşəcəklər. Nümunə üçün Türkiyə təcrübəsinə nəzər sala bilərik. Türkiyədə PKK terrorçu təşkilatı ölkə qanunlarına zidd fəaliyyətlə məşğuldur. Lakin kürd əsilli əhalinin böyük qismi Türkiyənin ən layiqli vətəndaşlarıdırlar. Biz də məsələni bu şəkildə qoymalıyıq ki, bizim mübarizəmiz sadə ermənilərlə yox, terrorçularladır”.