Ramiz Mehdiyevi söymək sosial sifarişdir, yoxsa... - Asif Mərzili yazır...

...Ramiz Mehdiyevi söymək üçün növbəyə düzülmələri görüb düşünürəm ki, bu məsələdə tələsib bir çox sərhədləri keçənlər var. Cəmiyyətdə isə sual var: bu sosial sifarişdir, yoxsa yuxarılara yarınmaq istəyənlərin arzu və istəkləridir?! Mən inanmıram ki, bu cür kortəbii anti-təbliğatlardan Prezident İlham Əliyevin xoşu gəlsin. Çünki onun Qarabağ boyda qayğısı var və dünyəvi siyasətçi belə siyasətsizlərə vaxt ayırıb vaxtını itirməz... Bəs nə baş verir?
... Yadımdadır: təxminən 1997-98-də Ramiz Mehdiyev "Yeni müsavat"ı məhkəməyə vermişdi və 500 milyon manat tələb edirdi. Məhkəmə qərarı ilə qəzetin əmlakları siyahıya alındı, icraçılar işə başladı... Redaktorlar Birliyi "Yeni Nəsil"in ofisində kritik vəziyyəti müzakirə etdi, çıxış yolu piket, yürüş etməyə qaldı... Sonda mən təklif verdim ki, Ramiz Mehdiyevlə danışıq aparılsın, görək nə istəyir, tələbi nədir? Hamı dedi ki, mümkün deyil, kim onunla danışacaq? Dedim, mən Bəxtiyar Vahabzadə ilə görüşüb deyərəm. Qərar qəbul olundu. Dərhal zəng vurub Bəxtiyar müəllimgilə getdim. Allah rəhmət eləsin, indi elə ağsaqqal qalmayıb... Məsələni danışdım. Dedi, oğul, Ramiz Mehdiyev kimdir, ona göstəriş verilib... Dedim, göstəriş verənlə danışın... O vaxtlar deyəsən Ziya Bünyadovun Bəxtiyar müəllimin əleyhinə nəsə fikirləri "YM"də getmişdi, kişi bir az tərəddüd etdi, həm də dedi ki, sözümü eşidərlərmi? Mən də Bəxtiyar müəllimi yaxşı mənada "bişirmək" üçün müxtəlif yollara baş vurdum: "Bəxtiyar müəllim, indi sizdən başqa kimimiz qalıb?! Bu məsələni həll edin, tarix sizi unutmaz!" (Amma bizlər unutduq və unuduruq!). Kişi dərhal telefonu götürüb Ramiz Mehdiyevə zəng vurdu... Mən sağ, Ramiz Mehdiyev sağ! Onun Bəxtiyar müəllimə nə dediyini burada yazmaq olmaz!!! Amma dedi ki, mən Prezidentlə məsləhətləşməliyəm... Allah Heydər Əliyevə də, Bəzxtiyar müəllimə də rəhmət eləsin, bu yerdə ağsaqqal sözü işləməli idi. Və işlədi də... Ramiz Mehdiyev zəng vurdu ki, razılaşdıq, qəzetin günahlarından keçirəm, amma... Bunları ona görə yazdım ki, hamı bilsin: vəzifədə olanda ünvanına və əməlinə susanların vəzifədən gedəndə ona qatı düşmənə çevrilməyi də balanslı, tənqidi, ədalətli... olmalıdır. Ramiz Mehdiyev mənə nə ev verib, nə fəxri ad, nə də... Amma... Amma belə vəziyyət o deməkdir ki, biz vəzifədə olanda əl çaldığımıza işdən çıxanda təpik atacayıqsa, düşmən kəsiləcəyiksə, deməli, bu gedənin deyil, bizim problemimizdir... Və bu, problem də yox, xroniki xəstəlikdir! Deməli, biz sabah o birilərini lap pis dildə söyüb yamanlayanlardanıq... Məgər Ramiz Mehdiyevin indi deyilən günahlarını 3-5, 10-15 il əvvəl bilmirdik??? Bəs niyə o vaxt demirdik və susurduq??? Belə çıxır ki, o vaxt susmaq, indi isə danışmaq qızıldır?!
Asif MƏRZİLİ //tezadlar.az//

Zamantv.az