Sumqayıtdakı “Sum Modern Dental Clinic”də həkim işləyən Pərviz İbrahimov klinikanın baş həkimi Şahin Baxşəliyevi öldürməyə cəhddə ittiham olunur. Həkim bu ittihamla Bakı Ağır Cinayətlər Məhkəməsində hakim qarşısına çıxarılıb.
Bizimyol.info xəbər verir ki, cinayət işinin materiallarında Pərviz İbrahimovun baş həkimə 9 bıçaq zərbəsi vurduğu yazılıb. Amma təqsirləndirilən həkim deyir ki, üç dəfə zərbə vurduğunu xatırlayır: “Birini ayağından, birini böyründən, birini də çiynindən vurdum. Axırıncı dəfə bıçaq elə çiynində də qaldı”.
Pərviz İbrahimov özünü qismən təqsirli bilir. Deyir ki, əməlindən peşmandır. O, baş həkimi bıçaqlamasının səbəbindən də danışıb. Bildirib ki, baş həkim onu və ailə üzvlərini təhqir edib: “Mübahisədən sonra klinikadan çıxıb, dəniz kənarına getdim. Bir saat orada ağladım, qışqırdım. Sakitləşə bilmirdim. Bıçaq götürüb qayıtdım, otağa girən kimi vurdum”.
Mübahisənin nədən başlamasına gəlincə, təqsirləndirilən həkim bu barədə də danışıb. Deyib ki, qəbuldakı yeni işçinin pasiyentlə davranışına etiraz edib: “İranə klinikaya yeni işə düzəlmişdi. Elə hadisə günü bildim. Pasiyentə kobud cavab verdi, mən də ona irad tutdum. Mənə dedi ki, sən kimsən? Dedim, danışığına fikir ver, həkimlə danışırsan. Bu mübahisə baş həkimə də çatdı. Mənim dediklərimə inanmadı, dedi ki, İranənin qardaşını, yoldaşını çağıracaq. Dedim ki, söhbəti böyütməyin mənası yoxdur. O mübahisə əsnasında məni təhqir eləməyə başladı”.
Zərərçəkmiş baş həkim məhkəməyə gəlməsə də, ərizə göndərib. Yazıb ki, barışıblar, şikayəti yoxdur.
Zamantv.az