Qanunları pozmaqda davam edən "Unibank"ın yalanı: - “Bu müştərilərin adlarının siyahıya düşməməyi...”

Bir müddət əvvəl “Unibank” Dəstəgül Vəliyeva adlı vətəndaşa Prezident fərmanına uyğun olaraq 370 AZN kompensasiya verəcəyini bildirib.

Xanım banka müraciət etdikdə isə onlar xanıma kompensasiya ilə bağlı çağıracaqlarını deyiblər. Lakin bir müddət sonra "Unibank" rəhbərliyi xanıma kompensasiya düşməməsi ilə bağlı məlumat göndərib . Səbəbini isə texniki problemlə izah ediblər.

Belə ki, xanımın “Flexi kredit" öhdəliyi lizinq müqaviləsi əsasında formalaşıb. Fərman isə yalnız kredit öhdəliklərinə şamil edilir. “Unibank” sonradan araşdırma apararaq lizinq müqaviləsi ilə bağlı öhdəliklər aşkar edərək nəticədə xanımın adını siyahıdan çıxarıb.

Maraqlıdır, “Unibank” indiyədək Prezident fərmanı ilə tanış deyildimi? Lizinq öhdəlikləri niyə xanıma 370 AZN kompensasiya düşdüyü haqqında məlumat göndərilmədən öncə araşdırılmayıb? Texniki xəta adı ilə buna laqeyd yanaşma nə dərəcədə düzgündür?

Məsələ ilə bağlı Cebhe.info-ya açıqlama verən bankın İctimaiyyətlə əlaqələr və media şöbəsinin müdiri Sülhiyyə Şirinova səbəbi siyahının Mərkəzi Kredit Reyestrindəki məlumatlar əsasında formalaşması və lizinq öhdəlikləri üzrə kreditlərin də reyestrdə olduğundan, bu müştərilərin adlarının siyahıya düşməməyi ilə izah edib:

““Flexi kredit” öhdəlikləri lizinq müqaviləsi əsasında formalaşıb. “Azərbaycan Respublikasında fiziki şəxslərin problemli kreditlərinin həlli ilə bağlı əlavə tədbirlər haqqında” Prezident fərmanına əsasən, kompensasiya ödənişləri yalnız kredit (pul) öhdəliklərinə şamil edilir, lizinqə və ya ticarət obyektlərindən kreditlə (nisyə) alınmış mallara görə kompensasiya ödənişi aparılmır.

Prezident fərmanı və həmçinin lizinq müqaviləsi ilə təbii ki, daha əvvəldən tanışıq. Lakin “Flexi kredit” üzrə müştərilərin adlarının ilk mərhələdə kompensasiya siyahısına salınması, texniki problemlər səbəbindən olmuşdur. Belə ki, siyahı Mərkəzi Kredit Reyestrindəki məlumatlar əsasında formalaşdığından və lizinq öhdəlikləri üzrə kreditlər də reyestrdə olduğundan, bu müştərilərin adları siyahıya düşmüşdür. Lakin sonradan sənədlərdə araşdırılma aparılaraq, lizinq müqavilələrinə bağlı öhdəliklər aşkar edilmiş və fərmana aid edilmədiyindən, kompensasiya ödənişi siyahısından çıxarılmışdır”.

Zamantv.az