Başçı müavini ondan tikintiyə görə 15 min dollar rüşvət istəyib... - İDDİA

"O vaxt prezident Ağcabədiyə səfər etməliydi. Köçkünlərin binalarının açılışında iştirakı nəzərdə tutulurdu. Mən də Moskvadan təzə gəlmişdim. Başçı dedi ki, prezident gəlir, o əraziləri abadlaşdır. Fikirləşdim ki, ölkə rəhbəri gəlir, icra başçısı tapşırıb, nə olar, edərəm. Orada ağaclar əkdirdim, səliqə-sahmana saldım. 20 min pulum çıxdı”. Bu sözləri Ağcabədidən sahibkar Etibar Quliyev bildirib. İş adamı bakupress.az-a başına gətirilən oyundan danışıb.

Onun sözlərinə görə, icra başçısı Şahin Məmmədovun tələbinə uyğun olaraq xərc çəkib, abadlıq işləri həyata keçirib.
Amma ay keçib, il ötüb, E.Quliyev 2012-ci ildə qanuni sənədlə aldığı 35 sot torpağında tikinti işlərinə başlamaq istəyib. Amma əvvəlcə baş memar Səfər Səfərov gəlib, tikintiyə icazə üçün rüşvət tələb edib. Onun əmrinə boyun əyməyən sahibkara bu dəfə icra başçısının müavini, Ağcabədidə iş adamlarına "divan tutması” ilə tanınan Rövşən Əhmədov təzyiq göstərib. Başçı müavini ondan tikintiyə görə 15 min dollar rüşvət istəyib.

"Biz burda zülm çəkirik. Rövşən Əhmədov Ağcabədini boğaza yığıb. Mən ətraf əraziləri abadlaşırdım, park saldım, 20 min xərcim çıxdı. Ancaq prezident rayona gələndə Şahin Məmmədovun gördüyü iş kimi təqdim edildi.

İndisə öz torpağımda, sənədlə sahib olduğum ərazidə istirahət mərkəzi tikməyə hazırlaşıram. Ancaq məndən Rövşən Əhmədov 15 min dollar tələb edir. Biz sahibkarlara şərait yaradılmalıdır, iş görürük, iş yeri açırıq, işsizliyi aradan qaldırırıq. Ancaq bunlar imkan vermir. Niyə zəhmətimlə qazanıb əldə etdiyim torpağımda, öz doğma rayonumda öz pulumla tikinti aparmaq üçün icra başçısına və müavininə rüşvət verməliyəm?

Bunun bir əsası varsa, izah eləsinlər. Ümumiyyətlə, Ağcabədidə sahibkarlar onların əlindən bezar olub”, – deyə Etibar Quliyev qeyd edib. Deyilənə görə, Rövşən Əhmədov Ağcabədi icra başçısının "Qəmlo”su hesab edilir. Rayonda insanları incidir, sahibkarlardan xərac yığır, əhalini narazı salır. Ona bu səlahiyyəti verən, meydan sulamağa şərait yaradan icra başçısı Şahin Məmmədovdur.

İddialara görə, R.Əhmədov Ağcabədidə ciddi narazılıq yaratmaqdadır. Onun hərbi xidmətdə olmadığı da söylənir. Buna baxmayaraq, Ş.Məmmədov onu qabağa verib sahibkarlara qarşı "ön cəbhədə” savaşır. Prezident bölgələrə gedir, vətəndaşlarla görüşür, şikayətləri dinləyir, sahibkarlara dəstək verir. Son sosial siyasət, ölkə başçısının xalqla təmasları xüsusi deyilməlidir. Ancaq yerlərdə məmurlar insanları incidirlər. Belə məmurların isə çox çəkmir ki, başı gedir, cəzalandırılırlar. Rövşən Əhmədovla Şahin Məmmədovun Ağcabədidəki zülmü də belə deməyə əsas verir ki, prezident tezliklə onları vəzifəsindən uzaqlaşdıracaq.

Çünki artıq prezidentin son siyasətinə, verdiyi qərarlara tam zidd fəaliyyət göstərən məmurlar, icra başçıları sistemdən uzaqlaşdırılır. Rövşən Əhmədovla Şahin Məmmədov cütlüyü isə rayonda bu illər ərzində çox haqsızlıqlar ediblər. O haqsızlıqla üzləşənlərdən biri – E.Quliyev deyib ki, hər şeydən bezib: "Mən doğulub- böyüdüyüm torpaqda pulumla aldığım ərazidə nəsə tikməliyimsə, Rövşən Əhmədovarüşvət verməliyəm?

Ağcəbədidə hansı sahibkarı dindirsəniz Rövşənin Əhmədovun əlindən bezara gəlib. Əlimdə əsas var, Rövşən Əhmədovun psixi problemləri olduğu üçün heç hərbi xidmətdə olmayıb.

Bu vəziyyətdə olan adam necə icra hakimiyyətində müavin işləyə bilər?Kimə deyək,hara deyək dərdimizi bilmirik. Xahiş edirəm bizim səsimizi prezidentə çatdırın”.

R.Əhmədovun daş karxanaları var. Qarqarçayın sərvətləri də onun "karyer”lərinə daşınır. Karyer Türkiyəyə bağlı "Polat” şirkəti ilə tərəf müqabili kimi fəaliyyət göstərir. Məlumata görə, icra başçısı Şahin Məmmədov da bu işdə əsas pay sahibidir. Onlar şirkətlə sövdələşərək yol çəkilişi üçün çınqıl daşlarını ona məxsus karyerdən daşıtdırır.

Karyer də onun öz adına deyil, 1 – ci müavini olan Rövşən Əhmədovun qardaşı Əliş Əhmədovun adına sənədləşdirilib. Həmin karyerdən "Polat” şirkətinə daşınan xammal emal olunmadan, yol üçün yararlı olub – olmaması yoxlanılmadan qəbul edilir. Qeyd olunur ki, karxanada əmək qanunvericiliyinin tələbləri pozulur, əməyin təhlükəsizliyi təmin edilmir, işçilərlə əmək müqaviləsi bağlanılmır. Daşınan mallar üçün qaimə, faktura yazılmır ki, bu da vergidən yayınmağa şərait yaradır.

Şahin Məmmədov karyeri Qarqar ərazisinə ona görə salıb ki, özü də yaxınlıqdakı Bayat kəndindən olduğu üçün başçı postundan üzaqlaşdırıldığı təqdirdə karxana biznesinin rəsmən sükanı arxasına keçsin və işləri demək olar ki, evindən – ata yurdundan idarə etsin.R.Əhmədovun diplomu hazırda sənədləri etibarsız hesab edilən Azərbaycan Beynəlxalq Universitetindəndir.

Üstəlik o, hərbi xidmətdə olmayıb. Bu barədə bir müddət əvvəl mətbuatda da yazılmışdı. Qarşı tərəfin vəkili açıqlama verib guya təkzib elədi, amma sadəcə söz dedi, heç bir sənəd-sübut ortayaqoyulmadı.

Ağcabədinin icra başçısı Şahin Məmmədov belə bir vəzifəyə uyğun gəlməyən adamın təqdimatını necə verib anlaşılan deyil. O, diplomu ABU hələ San Marino adını daşıyan vaxt alıb.

Bildirilir ki, Rövşən Əhmədovun hərbi xidmətdə olmaması ilə bağlı Müdafiə Nazirliyinə sorğu göndərilib və təsdiqlənib. Bu barədə sahibkar Teyyub Eminov media nümayəndələrinə bu haqda bir sənəd təqdim edib və həmin sənəd əsasında mediada yazı dərc edilib.

"Dövlət qulluğu haqqında” qanuna görə isə hərbi xidmət keçməmiş şəxslər dövlət qulluğunda işə götürülə bilməzlər. Mediadakı yazılarda ehtimal edilir ki, R.Əhmədov dövlət qurumlarına təqdim etdiyi sənədlərində saxtakarlıq etməklə istəyinə çata bilib. Bakupress.az-ın əməkdaşı həm başçıya, həm müavininə zəng açıb, amma telefonlara cavab verməyiblər. Qarşı tərəfin mövqeyini dərc edə bilərik.

Zamantv.az