Şəkidə təhsil sistemi necə bərbad günə salınıb... - İDDİA

Azərbaycanın hər yerində olduğu kimi Şəki rayonunda da çoxlu yeni məktəblər tikilib, əsaslı təmir işləri aparılıb, məktəblər yeni avadanlıqlarla, texnologiyalarla təmin edilib, bir sözlə, müasir məktəb infrastrukturu yaradılıb. Bütun bu kimi görülmüş işlərə baxmayaraq Şəki rayonunda təhsil sistemindən, məktəblərin yarıtmaz fəaliyyətindən narazı olanlar hələ də var. Narazılıqları isə hamıya məlum problemlərdir. Tədris ili başlar başlamaz, fond pulları, müəllimlər günü münasibətilə hər valıdeyndən müəyyən olunmuş məbləğ, müəllimlərin ad günləri kimi ümumi problemlərə biz çox toxunmaq istəməzdik. Biz şəki təhsil sisteminin görünən deyil,görünməyən tərəflərinə nəzər salacıq. Şəki şəhərində və kəndlərində yuxarı sinif şagirdlərinin sərbəst şəkildə repetitor yanına getməsi də inkaredilməz faktlardır. Bunu sübut etmək üçün dərs vaxtı qəflətən istənilən məktəbdə, istənilən yuxarı sinif otağına daxil olub şağirdlərin sayını yoxlamaq kifayət edər. Şəkinin ümumtəhsil məktəblərini bitirmiş məzunların statistikasına baxdıqda isə qəribə mənzərənin şahidi oluruq. Tələbə adını qazanan şəkili məzunların böyük əksəriyyəti Şəki şəhərində fəaliyyətdə olan orta məktəblərin məzunları olduğu üzə çıxır. Bəs digər kəndlərdə fəaliyyətdə olan məktəblərdə nə üçün bu göstəricilər aşağı səviyyədədir ? Məlumat üçün bildirmək istərdik ki, hazırda Şəki Təhsil Şöbəsinin tabeliyində 96 ümumtəhsil məktəbi, o cümlədən 71 tam orta, 22 ümumi orta, 3 ibtidai məktəb, 5 məktəbdənkənar tərbiyyə müəssisəsi fəaliyyət göstərir. Şəki şəhərindəki bir neçə məktəbi çıxdıqdan sonra rayondakı digər kəndlərdən nə üçün yüksək bal toplayaraq ali məktəblərə qəbul olanların satı azdır? Ona görə ki kəndlərdə şagirdlərə dərs keçirilmir. O ki, qaldı yüksək göstəriciləri olan məktəblərə? Burada da durum başqa cürdür. Uğurlar məktəblərin adına yazılsa da, bu repetitorların əməyinin nəticəsidir desək yanılmarıq. Şəki şəhər fizika-riyaziyyat və humanitar təmayüllü liseyi, 11, 5 və 7 saylı tam orta məktəbləri şağirdləri repetitor yanına buraxmaq baxımından birincilər sırasındadır.Məşhur 3 və 10 saylı tam orta məktəblər isə bu baxımdan xeyli qabağa gediblər.

Məsələn Şəki şəhərindəki qədim tarixə malik 10 saylı məktəbdə bu gün tədrisin vəziyyəti hansı səviyyədədir.Eləcə də Şəki şəhərindəki 3 saylı tam orta məktəbdə. Məlumat üçün bildirmək istərdik ki, hər il sözügedən rayonda ali məktəbləblərə qəbul olunan şagirdlərin sayına görə qeyd etdiyimiz məktəblər birincilər sırasındadır. Bu Şəki rayonunda artıq ənənə şəklini alıb. Bu gün respublikamızda tanınmış bir çox şəkili ziyalılar vaxtı ilə sözügedən məktəblərin məzunları olmuş, orada aldıqları təhsilin sayəsində böyük uğurlara imza atmışlar. İlk baxışdan həmin ənənənin bu gün davam etdirildiyi görsənsə də,əslində belə deyil. Bu gün Şəkidəki bu məhşur məktəblərdə təhsilin səviyyəsi çox aşağı düşmüş ,dərsə davamiyyət isə yuxarı sinif şagirdləri arasında demək olar ki yox dərəcəsindədir. Şəkidən redaksiyamıza verilən məlumatlara görə qeyd etdiyimiz məktəblərin 11-ci sinif şagirdlərinin böyük əksəriyyəti Bakıda hazırlıq kurslarına ya da repetitor yanına gedirlər. Bunun da ayrı bir səbəbi var.Yuxarıda qeyd etdiyimiz kimi 10 saylı məktəb Şəki rayonunda çox tanınmış bir məktəbdir. Buraya adətən şəhərdə çalışan vəzifəli şəxslərin, məmurların uşaqları və yaxud da sahibkarların övladları qəbul olunur ki, burada güya yaxşı təhsil verilir. Amma bu əvvəlki illərdə olub və bu gün həmin yüksək səıviyyəli təhsildən bu məktəbdə əsər əlamət belə qalmayıb. Sadəcə məktəbin adı qalıb ki, imkanlı şəxslər bu ada görə uşaqlarının məhz burada təhsil almasına üstünlük verirlər. Məktəbin direktoru Abid Yusifov haqqında isə yayılan məlumatları oxuculara çatdırmazdan əvvəl müəyyən araşdırmalar aparmaq məcburiyyətindəyik. Qeyd edək ki, Abid Yusifov 2011-ci ildən sözügen təhsil ocağına rəhbərliyə başlayıb. Yəni Elxan Usubov elə həmin ildə Şəki rayon İcra Hakimiyyətinin başçısı təyin olunduqdan sonra. Bu da özlüyündə burada çox gizlin məqamların olduğunu göstərir. Şəhərdəki 3 saylı tam orta məktəbin direktoru Bünyamin Baxışov da həmçinin. Onların hər ikisi də rayon İcra Hakimiyyətinin başçısı Elxan Usubovun adamı kimi tanınırlar.Maraqlı burasıdır ki bu şəxslərdən biri Təhsil Nazirliyinin keçirdiyi imtahanlarda 60 mümkün baldan 13 bal toplamaslına baxmayaraq hələ də direktor vəzifəsində çalışır.

Təbii k,bütün bu kim neqotiv hallara yol verilməsinin səbəblərini Şəki rayon təhsil İdərəsinin müdiri Südabər xanım İsmayılovadan sorulmalıdır. O Südabər İsmayılovadan ki, 2010-cu il Milli Məclisə seçkilərdə YAP xətti ilə namizədliyini irəli sürmüş,”Avromed”in sahibi Cavanşir Feyziyevlə razılaşdıqdan sonra namizədliyini geri götürərək Şəki Təhsil şöbəsinin müdiri oldu. 2010-cu ildən bəri təkcə Şəki rayonundakı uşaq bağçalarına dövlət budcəsindən ayrılmış vəsaitlərin proqnozlaşdırılması və istifadəsi vəziyyətinin audit yoxlaması aparılsa çox şeylər üzə çıxar. Xatırladaq ki, Şəki rayonundakı təkcə uşaq bağçalarına il ərzində 450 min manatdan çox vəsait ayrılır ki, hara xərcləndiyi məlum deyil. Zənnimizcə Hesablama Palatasının Şəki Mədəniyyət və Turizm şöbəsində apardığı yoxlamaları Şəki Təhsil Şöbəsində də aparmalı, məktəbəqədər təhsil müəsisələrinə ayrılmış vəsaitlərin təyinatı üzrə xərclənib xərclənməməsinə aydınlıq gətirməlidir. Yaxın gələcəkdə məhz bu məsələlərlə bağlı apardığımız araşdırmalarımızın nəticələrini geniş ictimaiyyətə çatdıracağıq.
Aktualinfo.org

Zamantv.az