"Bravo" qayda pozuntusuna görə - MƏHKƏMƏYƏ VERİLDİ

“Azərbaycan Supermarket” MMC-yə ticarət qaydaları əleyhinə olan (İstehlakçıların hüquqlarının pozulması) inzibati xəta protokolu tərtib olunub.

Zamantv.az FED.az-a istinadla xəbər verir ki, protokol İnzibati Xətalar Məcəlləsinin 447.0.1-ci maddəsi ilə irəli sürülüb.

İnzibati Xətalar Məcəlləsinin 447.0.1-ci maddəsinə görə İstehlakçıların hüquqlarının pozulmasına, yəni mal satan və ya əhaliyə xidmət göstərən şəxslər tərəfindən malın (xidmətin) ölçüsünə, çəkisinə, hesabına, habelə istehlak xüsusiyyətinə və ya keyfiyyətinə dair istehlakçıların az miqdarda aldadılmasına fiziki şəxslər 350 manatdan 500 manatadək məbləğdə, vəzifəli şəxslər 1 500 manatdan 2 000 manatadək məbləğdə, hüquqi şəxslər 4 000 manatdan 6 000 manatadək məbləğdə cərimə edilir.

İş Bakı Şəhər Binəqədi Rayon məhkəməsində hakim Fərid Əmirəliyevin icraatındadır.

Zamantv.az