“LANDAU School” illik qiymətləri artırdı: Valideyinlər narazılıq edir!

Bakıda "LANDAU School”da təhsil haqqının 2023-2024-ci təhsil ili üçün artırılması ciddi narazılığa səbəb olub.

Valideynlər bu qərarla razılaşmayıb və məktəb rəhbərliyinə narazılıqlarını bildiriblər. Onlar qiymətlər endirilməyəcəyi halda övladlarını başqa məktəblərə aparacaqlarını deyiblər.

"LANDAU School”un İdarə Heyəti valideynlərin narazılığını başqa bir yolla həll etməyə çalışsa da, bu da onları qane etməyib. İdarə Heyəti tərəfindən qərar verilib ki, əvvəllər hər sinifdə 18 şagird təhsil alırdısa, onların sayı 20-21 nəfərə yüksəldilsin. Rəhbərlik şagird sayını artırmaqla təhsil haqqını müəyyən qədər aşağı salmağı planlaşdırır.

Bundan başqa qərar verilib ki, 2024-2025-ci tədris ili üçün təhsil haqqı artımı olarsa, hazırkı şagirdlər üçün maksimum 500 AZN-ə qədər olacaq. Bu bənd müqavilənin əlavəsində də qeyd ediləcək.

Hazırkı təhsil ilində təhsil haqqları 1-4 siniflər üçün 7300 (hissəli ödəniş 7600 manat), 5-11 siniflər üçün 8800 (hissəli ödəniş 9200 manat) olub.

Dəyişikliklərdən sonra 2023-2024-cü tədris ili üçün birdəfəlik təhsil haqqı ödənişi aşağıdakı kimi təyin edilib:

1-4-cü siniflər 8,000 AZN (hissəli ödəniş olduqda 8,400 AZN)
5-7 siniflər 9,300 AZN (hissəli ödəniş olduqda 9,700 AZN)
8-9 siniflər 9,900 AZN (hissəli ödəniş olduqda 10,400 AZN)
10-11 siniflər 10,000 AZN (hissəli ödəniş olduqda 10,500 AZN)
10-11 siniflər xüsusi ixtisaslar üzrə 12,500 AZN (hissəli ödəniş olduqda 13,000 AZN)

Valideynlər ən çox hissəli ödənişlərə üstünlük verdiyindən 1-4 siniflər üçün 1100 manat, 5-7-ci siniflər üçün 900 manat, 8-9 siniflər üçün 1100 manat, 10-11 siniflər üçün 1700-3100 manat arası qiymət artımı qeydə alınıb.

"LANDAU School” İdarə Heyəti təhsil haqqlarının artırılmasına səbəb kimi ölkədə baş verən qiymət artımını əsas gətirib.

Məsələ ilə bağlı "LANDAU School”un da mövqeyini dərc etməyə hazırıq.Qaynarinfo

Zamantv.az