“Son hadisələr, bölgənin ümumiyyətlə yeni formatda şəkillənməsi əlbəttə ki, Ukrayna-Rusiya qarşıdurmasının bitməsindən sonra reallaşacaq. Təbii ki, bölgədə iqtisadi cəhətdən yeni bir mənzərə formalaşacaq. O cümlədən də siyasi cəhətdən də istəklər və arzular konkret reallıqla əhatə olunacaq. Bunun nə olacağı barədə danışmaq düşünürəm ki, gecdir”
Zamantv.az xəbər verir ki, bunu Moderator.az-a açıqlamasında yazıçı, telejurnalist Orxan Fikrətoğlu deyib. O.Fikrətoğlu Azərbaycanın Ermənistana münasibətlərin normallaşmasıyla bağlı 5 maddədən ibarət göndərdiyi təklifin qarşı tərəf üçün faydalı ola biləcəyini deyib:
“Burda Avropa, Amerika, Çin və bu hərbi qarşıdurmanın iştirakçıları sona qədər düşünürəm ki, müəyyənləşməyiblər. Bilavasitə həmin bu hadisələr əlbəttə, Dağlıq Qarabağ probleminə də təsir edir. Şübhəsiz ki, son günlər Ermənistan tərəfindən, xüsusilə rus sülhməramlıların yerləşdiyi nöqtələrdən Azərbaycan tərəfinə atəş açılması bilavasitə siyasi tələblərlə bağlıdır. O siyasi tələblər Paşinyanın Fransaya gedib Makronla görüşməsi, Türkiyəyə getməməsi, ondan sonra Avropa Parlamentinin Azərbaycana qarşı abidələrin dağıdılmasıyla bağlı qərar qəbul etməsi, Rusiya sülhməramlıların rəhbəri general Volkovun bilavasitə Laçın dəhlizindən və digər ərazilərdən Qarabağa keçirilən silahlara göz yumması düşünürəm ki, hər tərəfdən bizə də, ümumiyyətlə bölgədə olan digər qüvvələrə də seçimini et təzyiqidir.
Bu zəmində Azərbaycan Xarici İşlər Nazirliyinin Ermənistan tərəfinə beş təkliflə yanaşması düşünürəm ki, ən konstruktiv yanaşmadır. Təbii ki, burda Ermənistan qərar verə bilən ölkə deyil. Amma Azərbaycan tərəfinin konstruktiv yanaşması və Ermənistana bu təklifləri etməsi Ermistanın düzgün qərar verəcəyi şəraitdə düşünürəm ki, bölgədə dayanıqlı sülhün əldə olunmasına səbəb ola biləcək reallıqdır. Ermənistan dövləti müstəqil qərar verə bilsə və Azərbaycanla artıq danışılmış bəzi məsələlərdə ortaq məxrəcə gələ bilsə, onların özlərinə, iqtisadiyyatlarına, mövqelərinə və həm də Azərbaycan üçün daha əlverişli mühit yarana bilər. Azərbaycanın əlbəttə ki, Türkiyəylə imzaladığı Şuşa bəyannaməsi fonunda Azərbaycan Prezidentinin Türkiyəyə səfəri və xüsusilə Bayden-Ərdoğan görüşündən sonra baş verən real mənzərə birmənalı olaraq Azərbaycanın müstəqil siyasət yürütməsinin təzahürüdür. Azərbaycan öz yaxın müttəfiqi Türkiyəylə strateji hədəflər həyata keçirməyə çalışır və bunu da edəcək. Eyni zamanda, Azərbaycan bölgədə müttəfiq olduğu dövlətlərlə də əvvəlki münasibətlərini qorumağa çalışacaq. Ermənistanın bu beş təklifi qəbul etməsi ən əvvəl onun özü üçün vacibdir”.
Qeyd edək ki, Azərbaycanın xarici işlər naziri Ceyhun Bayramov Ermənistana münasibətlərin normallaşması ilə bağlı 5 maddədən ibarət təklif göndərildiyini bildirib.
Zamantv.az