“Uşaqların qaldığı evin həyəti istifadə olunmuş şprislərlə doludur”

Xəbər verdiyimiz kimi, Şamaxıda baxımsız qalan uşaqlarla bağlı fakt Daxili İşlər Nazirliyi tərəfindən nəzarətə götürülüb. Daha sonra isə uşaqlar Ailə, Qadın və Uşaq Problemləri üzrə Dövlət Komitəsinin nəzarətinə götürülüb.
Zamantv.az yeniavaz.com-a istinadən xəbər verir ki, Azərbaycan Uşaqlar Birliyi-Uşaq Sığınacağı Reinteqrasiya Mərkəzinin sədri Kamalə Ağazadə isə məsələ ilə bağlı yeni iddialar səsləndirib.
O bildirib ki, daha əvvəl məsələ ilə bağlı aidiyyəti qurumlara müraciət edib:
“Əvvəla onu deyim ki, bu ailə ilə bağlı ilk müraciətim keçən il yayda Şamaxı İcra Hakimiyyətinə və Ailə, Qadın və Uşaq Problemləri üzrə Dövlət Komitəsinə olub. Onda da dəhşətli görüntüləri göndərdim aidiyyəti qurumlara. Təəssüf ki, nəticəni bu gün yayılan videoda gördünüz.
Bu uşaqlar zorakılıq, hətta deyərdim ehtimalla fiziki zorakılıq qurbanlarıdır. Hətta azyaşlıların “Mehman yanımızda qalırdı” ifadəsi məni başqa şübhələrlə qarşı qarşıya qoyub. İnanın təcrübəmə, mütləq orda seksual hərəkətlərə təhrik çıxacaq. Əlbəttə ki, bu, qurumlar üçün o qədər də maraqlı olmaz. Ancaq Azərbaycan Respublikasının Daxili İşlər Nazirliyi və Azərbaycan Respublikasının Baş Prokurorluğu üçün bu ehtimalları araşdırmaq maraqlı olar”.
O qeyd edib ki, uşaqların anası onlarla maraqlanmayıb:
“Ana cinayətə meylli biri kimi araşdırılsın. Bütün kənd bundan qorxur və ya qorxmur, abırsızdan abrını saxlayır. Qonşuların dediyinə görə, uşaqların qaldığı evin həyəti istifadə olunmuş şprislərlə doludur, bu da uşaqların hansı təhlükələrlə qarşılaşdığından xəbər verir. Halbuki kənd camaatı dəfələrlə bu ailə haqqında icra nümayəndəsinə, bələdiyyəyə bildirib. İcra hakimiyyəti nümayəndəsinin bildirdiyinə görə, bu dəfə (amma anlamadım niyə keçən dəfə müraciət edəndə yox) uşaqlar dövlət himayəsinə keçəcək”.

Zamantv.az