Pandemiyanın ən canalıcı dövrünü yaşadığımız bu günlərdə bəzi küçələrdə natəmizlik baş alıb gedir.
Belə ki, Abşeron rayonu ilə bağlı Sonxeber.az redaksiyasına bir çox şikayətlər daxil olub.
Xırdalan şəhərinin mərkəzi küçələrindən olan Mehdi Hüseynzadə küçəsi, Nübar qəsəbəsi, Sumqayıt şossesi, Abşeron gənclər şəhərciyi ilə bağlı şikayətləri dərc edirik.
Abşeron rayonu Nübar qəsəbəsi sakini ətrafın zibilləndiyindən şikayətlənir və zibillərin hətta şəhid fotosunun ucaldıldığı yerə qədər çatdığını söyləyir:
"Həmin şəxs bizim qəsəbənin şəhididir. Ancaq fotolardan da gördüyünüz kimi, ətraf zibilxanadır. Bu, şəhidin xatirəsinə də hörmətsizlikdir. Ətrafda yaşayış yerləri var, ancaq tullantıların iyindən dayanmaq olmur. Zibillər daşınmır, sadəcə hər gün yandırılır. Onun da ətrafa yayılan iyini siz düşünün".
Sumqayıt şossesi, Abşeron Gənclər şəhərciyindən yazan şikayətçi isə bildirir ki, zibilin 5 metrliyindən artıq iydən dayanmaq olmur:
"Gəlib daşısalar da, ətrafda yenə də qalır. Çirkli uşaq bezi, əzilmiş pomidor, iylənmiş şaftalı görməkdən bezmişik. Şəhərciyi mənbəyi məlum olmayan sular basır, üfunət iyi adamı dəli edir. Liftlər qırıq, düymələri yox, blokların vəziyyəti "içlər acısı"..."
Xırdalan şəhərinin mərkəzi küçələrindən biri olan Mehdi Hüseynzadə küçəsində "Sultan" MMC binasının yaxınlığında yenə eyni vəziyyət ürək ağrıdır. Şikayətçi yazır:
"Şəhərin mərkəzi olmasına baxmayaraq, zibilin iyindən küçədən keçmək mümkün olmur. Ölümcül virusun dərdini çəkdiyimiz bir zamanda bu nə natəmizlikdir? Bilmirik, dərdimizi kimə deyək ki, gəlib tədbir görsünlər".
Məsələ ilə bağlı qarşı tərəfin mövqeyini dərc etməyə hazırıq.
Xırdalan şəhəri, Mehdi Hüseynzadə küçəsi
Zamantv.az