"Üç ildir gözümə yuxu getmir..." - VİDEOGİLEY

Bakı şəhəri Nəsimi rayonu, Cavadxan küçəsi, 64, ev 29-da yaşayan Nərminə Məmmədova mənzilinin başqa şəxslər tərəfindən zəbt olunmasından şikayətlənir.

Oxu.Az-ın məlumatına görə, 2009-cu ildə Zəngilandan olan məcburi köçkün ailəsi həmin mənzilə gələrək evin onlara məxsus olduğunu iddia edir.

Aralarında yaranan uzun mübahisədən sonra köçkün ailəsi bir otağı və hamamı özəlləşdiriblər. Şikayətçi iddia edir ki, evi zəbt edən ailə buranı “29 a” adlı mənzil kimi göstərib.

O bildirir ki, üç ildir nə qorxudan, nə də şəraitsizlikdən yata bilir. N.Məmmədova dəfələrlə aidiyyəti qurumlara şikayət etdiyini deyir.

Sözügedən məsələ ilə bağlı 138 saylı Mənzil Kommunal İstismar Sahəsinin mühəndisi Ağalar İbrahimov bildirib ki, əgər Qaçqınların və Məcburi Köçkünlərin İşləri üzrə Dövlət Komitəsi tərəfindən məcburi köçkün ailəsinə ev verilərsə, gələcəkdə N.Məmmədovaya Bakı Şəhər İcra Hakimiyyəti tərəfindən o otağın verilməsi məsələsinə baxıla bilər.

Dövlət Komitəsindən isə işin məhkəmədə olduğunu və buna görə də hər hansı açıqlama verməyəcəklərini bildiriblər.

Zamantv.az