Xəbər verildiyi kimi “Azərsu” ASC maye xlorun satın alınması məqsədilə keçirdiyi tenderdə qalib elan edilmiş “Old Line Trading Company” MMC ilə 1380 ton maye xlor alınması üçün müqavilə bağlayıb.
“Turan” informasiya agentliyinin verdiyi xəbərə görə, idxal qiymətlərinin müqayisəli təhlili "Azərsu"nun tender nəticələrindən sonrakı alış qiymətlərinin şübhəli və ya şişirdilmiş olması qənaətinə gəlməyə əsas verir.
Xəbərdə bildirilib ki, dövlət satınalmaları reyestrinə əsasən, "Old Line Trading Company" MMC-nin 1380 ton maye xlor tədarükü üzrə tender təklifinin qiyməti 1 milyon 888.9 min manat və ya 1 milyon 111.1 min ABŞ dolları təşkil edib. "Old Line Trading Company" MMC tərəfindən təklif olunan xlorun bir tonu 805,1 dollar təşkil edəcək. Dövlət Gömrük Komitəsindən verilən məlumata görə, 2019-cu ildə Azərbaycana ümumi bəyan edilmiş dəyəri 577.5 min dollar və ya 544.3 $ / ton olan 1 min 60.9 ton xlor tədarük edilib.
Məsələ ilə bağlı “"Azərsu" ASC-nin mətbuat katibi Anar Cəbrayıllı Bizimyol.info-ya açıqlamasında ölkəyə gətirilən maye xlorun gömrükdə rəsmiləşdirilən qiyməti ilə alış qiymətləri arasındakı fərqli izah edib.
“Öncə bildirim ki, həmin məlumatda ötən ilki qiymətlər qeyd edilməklə yalnız maye xlorun öz qiyməti ilə bağlı xəbər verilib. Gömrükdə bəyan edilən qiymətlər yalnız maye xlorun öz qiymətidir. Bu qiymətin üzərinə digər xərclər gəlir. Vurğulayım ki, maye xlor təhlükəli maddə olduğu üçün onun daşınma xərcləri baha başa gəlir. Üstəlik, vergi xərcləri, təchizatçının xərcləri, mənfəət faktoru var. Yəni qiymətlər arasında müqayisəli təhlil aparılarkən alış qiyməti, daşınması xərcləri, mənfəət məsələləri nəzərə alınmalıdır”,-deyə A.Cəbrayıllı bildirib.
Zamantv.az