“Bu hüququn əldə olunması ölkəmizin dünyadakı nüfuzundan xəbər verir”

Aprelin 27-29-da Bakıda daha bir mötəbər idman yarışı - Formula 1 Azərbaycan Qran-Prisi keçiriləcək. Bununla bağlı Moderator.az-a açıqlama verən millət vəkili Adil Əliyev bu tədbirin ölkəmiz üçün əhəmiyyətinə diqqət çəkib:

“Belə bir mötəbər yarışı Azərbaycanda keçirmək hüququnu əldə etmək hər şeydən öncə ölkəmizin dünya miqyasındakı nüfuzundan, ona olan hörmət və ehtiramdan xəbər verir. Bu cür mötəbər tədbir heç də hər dövlətdə keçirilmir. Bu tədbiri keçirənlər dünya çapında söz sahibləridir. Bu kimi yarışlar dünyanın bəzi siyasi dairələrində nüfuz sahibi olan şəxslərin təşkilatçılığı ilə keçirilir.

Bu cür yarışların ölkəmizdə keçirilməsi Azərbaycanın inkişaf etmiş ölkə kimi dünya miqyasında daha çox, daha dərindən tanıdılması baxımından mühüm əhəmiyyət kəsb edir. Bu vaxta qədər ölkəmizdə bir neçə beynəlxalq əhəmiyyətli yarış keçirilib. Hansı ki, biz gördük ki, bu yarışlardan sonra Azərbaycanın nüfuzu dünyada xeyli dərəcədə yüksəldi, Azərbaycana oaln maraq və diqqət artdı. Bu baxımdan aprelin sonunda keçiriləcək Formula 1 yarışlarını da önəmli hesab edirəm. Bu, xalqımızın və dövlətimizin marağına uyğun olan önəmli bir tədbirdir”.

Zamantv.az