Təxminən iki il bir neçə ay bundan öncə “Evcik-evcik oyunu” başlıqlı bir yazı yazmışdım. Həmin yazıda şəhərdən Biləcəri qəsəbəsinə gedən yolun sağ və sol hissələrində yaradılan təpəciklərdən bəhs olunurdu. O vaxt “Allah-Təala bu işi görən, yaxud da gördürən hər kəsin atasına min rəhmət eləsin!” deyə qeydlər yazmışdım. Çünki, mən həmin təpəciklərə baxaraq sanki uşaqlıq illərimin xatirələrini yada salırdım. Belə ki, uşaqlıq illərində həmyaşıdlarımla birlikdə gah bizim divarın dibində, gah da onların divarlarının dibində torpağı bir yerə toparlayıb təpəciklər düzəldirdik və həmin təpəcikləri mövsümə uyğun müxtəlif gül-çiçəklərlə, yarpaqlarla bəzəyirdik. Sonra da əl işlərimizə baxıb öz-özlüyümüzdə xüsusi zövq alırdıq. Küçəmizdən keçən hər kəsi, ələxüsus böyüklərin deyəcəkləri xoş sözləri eşitməyi də gözləyirdik. Çox vaxt böyüklər bizə toz-torpaqla oynamamağı məsləhət bilirdilər, bəzən elə hallar da olurdu ki, onlar bizə irad da tuturdular. Valideyinlərimiz də bu cür addımlarımıza görə çox vaxt bizi danlayırdılar. Ancaq biz bu cür işlərdən heç cür əl çəkmirdik. Sanki atdığımız addımlarla sevinir, bir az da böyüyürdük. Biləcəri yolunun kənarındakı mənzərənin varlığı bir anlığa olsa belə məni keçmişimə qaytardı, böyüklərimizin iradlarını həmin yazım qeyd də etmişdim. Ötən günlərin birində sərnişindaşınma ilə məşğul olan avtobusun salonunda yaradılmış təpəciklərlə bağlı iradımı bildirərkən, iqtisadiyyatı az-çox bilən bir şəxs ayağa qalxıb qəflətən dilləndi və “bura xərclənən pullar hesabına, təkcə təqaüdçülərin pensiyalarına bir il ərzində yüz manat pul əlavə etmək olar” dedi. Həmin təpəciklərə xərclənən vəsaitlər hesabına kimin nə qədər “haqq-hesab”ı ələ keçirməsi mənim üçün o qədər də önəm daşımırdı. Sadəcə olaraq uşaqlıq illərində bizim ərsəyə gətirdiyimiz təpəciklərin axşamüstü mal-qara örüşdən qayıdana kimi qalması idi. İndi də yol genişlənməsi ilə əlaqədar külli miqdarda vəsaitlər hesabına ərsəyə gətirilmiş təpəciklərin bu gün yox edilməkdədir. “Rahat Market”in qarşısındakı mənzərə məni uşaqlıq illərimə qaytarır. Yəni, bizim “Evcik-evcik oyunu” zamanı ərsəyə gətirdiyimiz təpəciklərin axşamüstü mal-qara örüşdən qayıdana kimi qalması idi. Bu cür mənzərəni gördükdən sonra, özümdən asılı olmayaraq “deyəsən mal-qara örüşdən qayıdır” deyirəm. Deyəsən o biri təpəciklərin yox edilməsi də gündəmə gəlməkdədir. Eşitdiyim bəzi məlumatlara görə Bakı Beynəlxalq və Şəhərlərarası Avtovağzalı ərazisindəki çökməni, bəzi ekspertlər həmin təpəciklərin suvarlması səbəbindən əmələ gəldiyini iddia edirlər. İndi isə mal-qaranın örüşdən tam qayıtmasını gözləyirəm. Görəsən bu təpəcikləri yaradanlar, bunlara çəkilən xərclərin hesabını verəcəklərmi? Yoxsa...
Rasafil Bayramov
Zamantv.az