Sənət dostları Bəhram Bağırzadə üçün dua istədi: “Gənclərin də qibtə etdiyi enerjinlə...”

Xəbər verdiyimiz kimi, Azərbaycanın Əməkdar artisti Bəhram Bağırzadə ağır vəziyyətdə Mərkəzi Gömrük Hospitalının reanimasiya şöbəsinə yerləşdirilib.
Musavat.com xəbər verir ki, koronavirusa yoluxan əməkdar artistin sənət dostları onunla bağlı paylaşımlar edərək, izləyicilərindən B.Bağırzadə üçün dua etməsini istəyiblər.
Müğənni Xəyyam Nisanov: “Həqiqətən ümid edirəm ki, çox tezliklə hamımızı müsbət əhval-ruhiyyənizlə sevindirəcəksiniz. Əlbəttə, bütün uşaqlar sizdən yeni maraqlı kitablar gözləyir”.
Xalq artisti Tünzalə Ağayeva: “Bəhram, tez sağal, lütfən. Dualarımızdasan. Allah sənə və bütün xəstələrimizə şəfa versin”.

Aktyor Fərda Xudaverdiyev: “Dularımız səninlədir, yaradıcı, istedadlı, səmimi insan. O deyirlər e, gözə gəlirsən. Sən axır vaxtlar gənclərin də qibtə etdiyi enerjinlə özünü gözə gətirdin. Pozitiv ol”.
Aktyor Elcan Rəsulov: “Tez sağal. Maşında çəkilməli tonla videolarımız qalıb. Tez yekunlaşdır o xəstəliyi”.
Xalq artisti Murad Dadaşov: “Dostum-qardaşım! Bəhramımız!Sən tək ailən və dostların üçün yox, hər kəs üçün dəyərli və əziz insansan. Əmin ol ki, bütün Azərbaycanın duaları səninlədir. Sən həmişə imanınla seçilmisən. Allah səni qorusun! Sənin yaxşı bir sloqanın var: Pozitiv ol. Pozitiv olaq, dostum. Biz hamımız yanındayıq, tez sağal! Səndən şad xəbər gözləyirik! Zəng elə! Səsin gəlsin”.
Aparıcı Zaur Baxşəliyev: “Bəhram, sənə Allahdan şəfa diləyirik. Tez sağal, aramıza dön. Bizi güldür, əyləndir, sevindir, düşündür. Səni çox sevirik. Tezliklə xoş xəbərini eşidək”.
Qeyd edək ki, Tibb Universitetinin Tədris Cərrahiyyə Klinikasının dosenti Ədalət Rüstəm Musavat.com-a bildirib ki, hazırda Bəhram Bağırzadənin ağciyərləri faktiki olaraq işləmir: “Bəhram Bağırzadə hazırda Mərkəzi Gömrük Hospitalında müalicə alır. Bu gün onu ilk olaraq süni nəfəs aparatına qoşublar. Lakin ağciyərin vəziyyəti pis olduğu üçün onun bu aparata qoşulması nəticə verməyib. Buna görə də təcili olaraq Bəhram Bağırzadə ürək-damar cərrahı, professor Rəşad Mahmudovun rəhbərliyi altında ECMO aparatına qoşulub. Hazırkı situasiya tələb edir ki, zaman itirmədən onun ağciyəri çıxarılsın. Çünki ağciyərdən onun orqanizminə infeksiya yayılır. Artıq ağciyər tamamilə qeyri-işlək vəziyyətdədir”.

Zamantv.az