Azərbaycanda yeni sığorta fırıldağı – ÖLƏN ADAMLARLA BİZNES

Azərbaycanda sığorta sahəsində yeni dələduzluq növü yaranıb. Bəzi «mütəxəssislər» bir müddət əvvəl avtomobil tərəfindən vurularaq ölmüş insanların varislərini taparaq həmin şəxslərlə birlikdə İcbari Sığorta Bürosundan(İSB) ödəniş tələb etməyə çalışırlar.

Bu barədə FED.az-a İcbari Sığorta Bürosunun (İSB) rəhbəri Rəşad Əhmədov bildirib.

«Bəzi «mütəxəssislər» mütəxəssislər var ki, yeni ölmüş insanların qəbirlərini axtarıb tapırlar daha sonra həmin ölmüş adamın varislərini tapırlar və onlara təklif edirlər ki, gəlin sizə pul verək».

Qeyd edək ki, ölkə qanunvericiliyinə əsasən, icbari sığortası olan avtomobil piyadanı vurarsa, o zaman piyadanın aldığı xəsarətin dərəcsindən asılı olaraq həmin şəxsə (yəni piyadaya) sığorta ödənişi ödənilir. Əgər piyada həlak olarsa, onun ailəsinə 5 min manat sığorta haqqı verilir. Bu maksimum sığorta ödənişidir – avtomobil qəzalarında olduğu kimi.

Əgər piyadanı vuran avtomobil tapılmazsa və yaxudda onun sığortası olmazsa, qanunvericiliyə görə, bu pulu xəsarət alan piyadaya və yaxud da rəhmətə gedibsə onun yaxınlarına İcbari Sığorta Bürosu ödəyir.

«Bu zaman fərqi yoxdur yol hadisəsi piyadanın ölümü və ya xəsarət alması ilə nəticələnib. Hər iki halda ödəniş edilir»-deyə Rəşad Əhmədov bildirib.

Qəza daha çox insanın ölümü ilə nəticələnərsə o zaman ümumilikdə bu məbləğ 50 min manata qədərdir. Bu ödəniş adambaşına 5 min manatdan artıq olmamaq şərti ilə verilir.

Yeni sığorta fırıldaqçıları isə əhalinin bu sahədə məlumatsızlığından sui-istifadə edərək onlara sığorta ödənişi alaraq onu yarı bölməyi təklif edirər. Belələri mərhumun ailəsini tapır və onlara ödəniş alınacağı imkanı olduğunu bildirərək təklif edir ki, bu məbləği bölsünlər.

İcbari Sığorta Bürosu isə bildirir ki, belə fırıldaqçılarla danışıqlara getməyə ehtiyac yoxdur. Ölüm hadisəsi qəza səbəbindən baş veribsə, mərhumun yaxınları özləri də müraciət edə bilərlər.

«Belə hallar baş verəndə İcbari Sığorta Bürosuna birbaşa və ya elektron qaydada müraciət etmək lazımdır. Biz hadisə ilə əlaqədar ödənişin verilməsinə tamamilə hazırıq. Burdada toplanması lazım olan sənədlər elə də çox deyil. Yalnız vəfat edən şəxsin vəfat etməsi ilə əlaqədar arayış təqdim edilməlidir. Bir də məhkəmənin qərarı olmalıdır (hadisənin necə aş verməsinin təsdiqlənməsi üçün). Bu sənədlər olandan sonra İSB ödənişi 7 iş günü ərzində həyata keçiririr»-deyə İcbari Sığorta Bürosunun direktoru Rəşad Əhmədov bildirib.

Qeyd edək ki, sözügedən qanunun qəbul edildiyi tarixdən indiyədək qəzada ölən bütün şəxslər üçün ödənişlər verilir. Bu bizim mübarizə apardığımız haldır. Bu kimi hallarla mübarizə aparmaq üçün belə məsələləri kütləvi informasiya vasitələrində dinləyiciləri və izləyiciləri məlumatlandırırıq. Biz cari ilin yanvar ayından etibarən bu barədə maarifləndirmə tədbirlərimiz genişləndirdik. Bu artıq öz effektini göstərdi. İnsanlar artıq özləri birbaşa müraciət edirlər»-deyə büronun direktoru qeyd edib.

Zamantv.az