AAK-ın sədr əvəzi haqqında şok faktlar üzə çıxır - İTTİHAM

Azərbaycan Respublikasının Prezidenti yanında Ali Attestasiya Komissiyasının (AAK) sədri vəzifəsini müvəqqəti icra edən Vəli Hüseynovdan narazılıqlar artır.

Məlumata görə, Vəli Hüseynovun problem yaratdığı təkcə AAK-ın əməkdaşı, filologiya elmləri doktoru, professor Səadət Zeynalova deyil. Bildirilir ki, V. Hüseynova qarşı məhkəmədə iddia qaldırmaq və onun “əməllərinə” görə müvafiq qurumlara şikayət etmək istəyən xeyli sayda insan var. Bunun səbəblərindən biri kimi elmi dərəcələrin və elmi adların AAK tərəfindən təsdiqi zamanı V. Hüseynov tərəfindən yaradılan süni maneələr göstərilir.

Şikayətçilər ölkə KİV-lərinə müraciətlərində bildirirlər ki, AAK-ın Rəyasət Heyətinin “Azərbaycan Respublikasının vətəndaşı olan iddiaçıların xarici ölkələrdə dissertasiya müdafiəsi Qaydaları” haqqında 25.05.1996-cı il (protokol 15-r) qərarına əsasən 01.02.1994-cü ildən sonra Azərbaycandan kənarda müdafiə olunmuş fəlsəfə doktoru və elmlər doktoru dissertasiyaları AAK-da təkrar attestasiyadan keçirilməlidir.

Yəni həmin diplom respublikamızın ərazisində tanınması (nostrifikasiya) üçün müvafiq prosedurlardan keçirilməli və müsbət qərar verildiyi halda AAK-ın diplomu təqdim olunmalıdır.

Reyting.az saytına da göndərilən müraciətdə iddia olunur ki, Vəli Hüseynov digərlərinə əsassız maneələr yaratsa da, onun vaxtilə Rusiyada aldığı elmlər namizədi diplomu Azərbaycanda təkrar tanınmadan keçməyib:

“Vəli Hüseynov fəlsəfə doktoru dissertasiyasını “Нейтрин-лептонные процессы во внешном магнитном поле” mövzusunda 21 aprel 1994–cü ildə Rusiya Federasiyasında müdafiə edərək həmin ilin dekabrında təsdiqini alıb.

Deməli, AAK-ın Rəyasət Heyətinin məlum qərarına əsasən, Vəli Hüseynovun da Rusiya Federasiyasında aldığı diplom Azərbaycanda təkrar attestasiyadan keçirilməli idi. Ancaq belə prosedur olmayıb və Vəli Hüseynov təkrar attestasiyadan keçmədən doktorluq dissertasiyasını müdafiə edərək onu təsdiqlədib. Yəni, doktorluq dissertasiyasının müdafiəsində və təsdiqində ciddi qanun pozuntularına yol verilib. Bu səbəbdən Vəli Hüseynovun doktorluq dissertasiyası legitim deyildir”.

Hələlik adlarının çəkilməsini istəməyən şikayətçilər bildirirlər ki, V. Hüseynovun fizika-riyaziyyat elmləri namizədi kimi işlədiyi təşkilatda aldığı məvacib də qeyri-qanuni sayılmalıdır.

Azərbaycan Dövlət İqtisad Universitetinin rektoru Ədalət Muradova yaxın olan elm adamları bildiriblər ki, əgər Vəli Hüseynov adını çəkmək istəmədikləri qəzetlərdən birinə köməkliyini davam etdirsə, onun elm sahəsindəki digər biabırçı faktlarını ictimaiyyətə açıqlayacaqlar:

“Biz bu faktları əldə etmək üçün 4 aydan çoxdur araşdırma aparırdıq. Əldə olunan faktlar çox ciddidir”.

Şikayətçilər sonda müvafiq qurumlara belə bir sual da ünvanlayıblar:

Niyə dünyanın nüfuzlu universitetlərində elmi iş müdafiə etmiş Azərbaycan vətəndaşları böyük əzab-əziyyətlə AAK-da təkrar attestasiyadan keçirlər, Vəli Hüseynov bu prosedurdan keçməsin?

P.S. Redaksiya V. Hüseynovun da mövqeyinə hörmətlə yanaşır və iddialara cavab verməsi üçün ona da yer ayırmağa hazırdır. (Reyting.az)

Zamantv.az