Azərbaycan Respublikasının Prezidenti, Zati-Aliləri, cənab İlham Əliyevə

Bakı şəhər Suraxanı rayonu A.Rzayev küçəsi, ev 132, mənzil 2-də yaşayan 3-cü qrup əlil, əmək veteranı, qabaqcıl
neftçi Şəbiyev Təzəxan Nəci oğlu tərəfindən
Müraciət

Hörmətli Prezident!

Əvvəlcə bildirmək istəyirəm ki, apardığınız siyasət, onun məzmunu dövlətimizin beynəlxalq təcrübə və meyllərini
artırıb, həyata keçirdiyiniz Dövlət Strategiyası xalqımızın həyatında ciddi və ümdə vəzifə kimi misilsiz əhəmiyyət

daşıyır. Sevinirik ki, bu gün Azərbaycandakı davamlı inkişaf, əhalinin sosial-iqtisadi həyatında baş verən müsbət
dəyişikliklər məhz Sizin adınızla bağlıdır.

Möhtərəm Prezident!

Mən, 1956-cı il təvəllüdlü Şəbiyev Təzəxan Nəci oğlu 1985-ci ildən «Suraxanıneft»də operator vəzifəsində
çalışıram. 1990-cı ildən aidiyyatı idarədə ev növbəsindəyəm. 2006-cı ildə işlədiyim idarə «Suraxanı Oyl Opereyşn
Kompanı S.A.» şirkəti adı ilə təsis olundu və mən orada da vicdan və namusla xidmətə başladım. Lakin ev
növbəsində olduğumu bildirəndə, aidiyyatı şəxslər mənə dedilər ki, siz artıq SOKAR-ın işçisi deyilsiniz, evi yalnız
onlardan tələb edə bilərsiniz.
Mən, operator vəzifəsində illərdir dövlətimizin neftçilərin qarşısında qoyduğu vəzifələrin həyata keçməsində üzərimə
düşən işin öhdəsindən layiqincə gəlmişəm. Hazırda da həmin peşəni layiqincə təmsil edirəm. Ailə tərkibim 8
nəfərdən ibarətdir, məcburən 18 kv. metrlik 1 otaqlı evdə yaşayırıq. Həyat yoldaşım uzun illərdir yataq xəstəsidir.
Özümün sağlamlıq problemlərim var. Həkim mənə geniş şəraitdə yaşamağı məsləhət bilir. Darısqallıq səbəbindən
ailəmizin sosial problemlərini həll edə bilmirik. 23 fevral 2007-ci ildən də Suraxanı rayon Əmircan qəsəbə
bələdiyyəsində torpaq növbəsindəyəm. Lakin hələ də nə ev, nə də torpaq almaq xoşbəxtliyi yaşaya bilmirik.
Sizdən artıq dərəcədə xahiş edirəm ki, qabaqcıl neftçi, 3-cü qrup əlil və əmək veteranı olmağım nəzərə alınsın, mənə
ev, ya da torpaq sahəsi verilsin. Bununla 8 nəfərdən ibarət ailənin həyat qayğılarını tamamilə həll etmiş olarsınız.
Bu gün sayənizdə Azərbaycanda bütün dünyaya örnək olacaq uğurlu siyasət aparılır. Apardığınız xarici siyasətin
təməlində sülh və əmin-amanlıq, əhalinin sosial yüksəlişi dayanır. Bu təcrübi uğura söykənərək üzümü Sizə tutur,
xahiş edirəm ki, heç olmasa, bu yaşımda mənə ev verilməsi, yaxud da fərdi torpaq sahəsi ayrılmasına göstəriş
verəsiniz. İnanıram ki, məndən köməyinizi əsirgəməyəcəksiniz.
Əvvəlcədən Sizə öz minnətdarlığımı bildirirəm.

Hörmətlə: Şəbiyev Təzəxan Nəci oğlu
Zamantv.az

Zamantv.az