"Milli Məclisdə deputatların etik davranış qaydaları ilə bağlı qanun artıq qəbul olunub".
Bunu Sonxeber.az-a Milli Məclisin İntizam komissiyasının üzvü Fazil Mustafa Britaniya parlamentinin Lordlar Palatasının üzvlərinin iclaslarda mürgülənməsinin qadağan edilməsi kimi məhdudlaşdırıcı tədbirlərin ölkə parlamentində tətbiq olunma ehtimalına münasibət bildirərkən deyib.
Onun sözlərinə görə, müvafiq qanunda millət vəkillərinin etik davranış qaydalarına dair bütün müddəalar göstərilib: "Hansı halda bu məhdudlaşdırıcı addımların tətbiq oluna biləcəyi, hətta deputatın hansı halda mandatından məhrum edilməsi də göstərilib. Ona görə də bizdə yeni Amerika kəşf etməyə ehtiyac yoxdur".
F. Mustafa qeyd edib ki, əgər millət vəkilinin müvafiq qanunun müddəalarına uyğun gəlməyən hansısa davranışları varsa, bu məsələdə çox güman ki, elə bir qərar qəbul oluna bilər.
Deputat diqqətə çatdırıb ki, Lordlar Palatasında ənənələr bir az fərqlidir: "Bizdə qanun var və bu qanunun əsasında münasibət bildirilə bilər, əlavə yeniliyə ehtiyac yoxdur".
Xatırladaq ki, Böyük Britaniya parlamentində Lordlar Palatasının üzvlərinin iclaslar zamanı mürgüləməyini qadağan edən sənəd qəbul edilib. Bilidirilir ki, son aylar parlamentin yuxarı palatasının üzvlərinin davranışları standartlara uyğun gəlmir. Belə ki, lordlar yüksək səslə danışıblar, qışqırıblar və debatlar zamanı yatıblar.
Zamantv.az