Xaçmazda şəhid Orxan Çobanovun xatirəsi əbədiləşdirilib

Xaçmaz rayonunun Pirquluoba kəndində Vətən müharibəsi şəhidi, gizir Orxan Çobanovun xatirəsi əbədiləşdirilib. Bu məqsədlə kənddə abidə-bulaq kompleksi inşa olunub. Açılış tədbirində Xaçmaz Rayon İcra Hakimiyyətinin başçısının müavini Bəxtiyar Osmanov, rayonun digər idarə-təşkilat əməkdaşları, şəhid valideynləri, qazilər, kənd sakinləri və digər kəndlərdən gələn insanlar da iştirak edib. Belə xatirə komplekslərinin artıq rayon ərazisində bir neçəsinin istifadəyə verildiyini vurğulanıb. Daha sonra şəhid valideynləri, yaxınları, qazilər, şəhidlərin xidmət yoldaşları və ictimaiyyət nümayəndələri çıxış ediblər. Birinci və İkinci Qarabağ müharibəsində həlak olan şəhidlərin abidəsi, "Vətən müharibəsi Qəhrəmanı" Orxan Çobanovun xatirəsinə tikilmiş bulaq kompleksi, yaşıllıq zolağı və bulağın üzərində digər şəhidlərin şəkilləri mərmər lövhə üzərinə həkk olunub. Orxan Çobanov 1997-ci il avqustun 2-də Xaçmaz rayonunda dünyaya göz açıb. Əsgərliyini başa vurduqdan sonra Orxan müddətdən artıq həqiqi hərbi xidmətə başlayıb. Vətən müharibəsinin ilk günündən döyüşlərə qatılıb. Gizir Orxan Çobanov sentyabrın 28-də Füzuli döyüşləri zamanı şəhidlik zirvəsinə ucalıb. O, göstərdiyi şücaətlərə görə ölümündən sonra “Vətən uğrunda”, “Füzulinin işğaldan azad olunmasına görə” və “Cəsur döyüşçü” medalları ilə təltif olunub. Bulağın açılış mərasiminin iştirakçıları əvvəlcə kənd qəbiristanlığında şəhidin məzarını ziyarət edib, ruhuna dualar oxuyublar.
Xaçmaz Rayon İcra Hakimiyyəti başçısının müavini Bəxtiyar Osmanov çıxış edərək Prezident, Ali Baş Komandan İlham Əliyevin rəhbərliyi ilə Zəfərlə başa çatan 44 günlük Vətən müharibəsində qazanılan qələbənin tarixi əhəmiyyətindən, şəhid Orxan Çobanovun şərəfli həyat yolundan danışıb. Bildirilib ki, şərəfli döyüş yolu keçən Orxan və onun kimi şəhidlərin xatirəsi heç bir zaman unudulmayacaq. Onuda qeyd edək ki, şəhid ailələri göstərilən diqqət və qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə ediblər.
Rima Ağakişiyeva
BasharaTV , ZamanTV.az -Xaçmaz.

Zamantv.az