“Azərbaycan ərazisinin təxminən 20 faizinin resurslarından istifadə etməməsi ölkə iqtisadiyyatı üçün problemdir”

“Azərbaycan ərazisinin təxminən 20 faizinin Ermənistan tərəfindən işğal edilməsi nəticəsində ölkə əhalisinin 10 faizi qaçqın və məcburi köçkün düşdü. Bu insanlar sosial ehtiyaclarının ödənilməsi üçün Azərbaycan dövlətinin köməyinə böyük ehtiyac duyurlar. Azərbaycanın malik olduğu resursların əhəmiyyətli bir hissəsi əhalinin məhz məcburi köçkün təbəqəsinin ehtiyaclarının ödənilməsinə sərf olunur. Azərbaycan hökuməti tərəfindən onların zəruri ehtiyaclarının ödənilməsi üçün əhəmiyyətli işlər aparılır, çox böyük həcmdə vəsaitlər xərclənir".

Bizimyol.info xəbər verir ki, bunu Baş nazirin müavini Əli Əhmədov Bakıda keçirilən Strateji Prioritetləşdirmə Seminarında çıxışında deyib.

Baş nazirin müavini qeyd edib ki, Azərbaycana qarşı ədalətsizliyin davam etdiyi belə bir şəraitdə Azərbaycan hökuməti özündən asılı olmayan səbəblərdən yaranan xərcləri ödəməlidir: “Belə bir halın mövcud olması, Azərbaycan ərazisinin təxminən 20 faizinin resurslarından istifadə edilməməsi həm Azərbaycan iqtisadiyyatı üçün problemdir, həm də Azərbaycan hökumətinin üzərinə qoyulmuş ağır sosial yükdür. Amma Azərbaycan hökuməti bunu həll etmək məcburiyyətindədir”.

Ə.Əhmədov bildirib ki, son 30 ildə Azərbaycan əhalisi üç milyon nəfər artıb ki, bu da 40 faizdən çox artım deməkdir: “Hazırda əhalimizin 50 faizdən bir qədər çoxu şəhərdə yaşayır. Bu da kənd yerlərində həyat səviyyəsinin yüksəldilməsi ilə bağlı bizim qarşımızda vəzifələr qoyur”.

Baş Nazirin müavini BMT-dən ölkəyə dəstəyin artmasını istəyib: “Biz istəyirik ki, bu problemin həllinə BMT-nin diqqəti artsın. Bu, siyasi konteksdə deyilmiş söz deyil. Əgər bizim əhalimizin bir hissəsi köçkün olmasaydı, ərazilərimizin 20%-i işğal altında olmasaydı Azərbaycanın iqtisadi inkişafının göstəriciləri daha da yüksək olardı".

Zamantv.az