Xəbər verdiyimiz kimi, Ağstafa Rayon İcra Hakimiyyətinin başçısı Nizaməddin Quliyev və onun birinci müavini Ramiz Tatarov saxlanılıblar. Hər iki şəxs ötən gecə hüquq-mühafizə orqanlarının əməkdaşları tərəfindən korrupsiya faktlarına görə saxlanılıb. İcra Hakimlərindən narazılıq demək olar ki, həmişə səsləndirilsə də, ciddi tədbirin görülmüəsi, onun işdən azad edilməklə yox, məhz məhkəmə qarşına çıxardılaraq cəzasının istənilməsi əhalidə son dövrlər aparılan islahatlara inam hissi yaratdı.
Hüquq müdafiəçisi Sahib Məmmədov da belə düşünür. O Bizimyol.info saytına verdiyi açıqlamada bildirib ki, islahatlar dalğası fonunda bu rüşvəxor məmurlara qarşı mübarizənin daha da güclənəcəyi gözlənilən idi:
“Korrupsiyanı şərti olaraq iki hissəyə bölürlər – yuxarıların korrupsiyası (nomenklatur korrupsiya) və aşağıların korrupsiyası (məişət korrupsiyası). Azərbaycanda "ASAN xidmət"in yaranması ilə xırda korrupsiyanın, demək olar ki, kökü kəsilib. İnsanlar xidmət alarkən, əmlak üzərində haqlarını həyata keçirərkən, vergi ödəyicisi kimi bəyannamə verərkən, sosial sığorta bəyənnaməsi verərkən və başqa hallarda xırda ödənişlər olurdu.Bu kimi halların qarşısını "ASAN xidmət" kəsdi və biz buna alışdıq.Nomenklatur korrupsiyasına gəldikdə, dövlət satınalmalarında, digər məsələlərdə korrupsiya faktları qalmaqdadır və dövlət başçısı bunun qarşısını almaq üçün addımlar atır. Ölkəmizdə korrupsiya ilə mübarizə haqqında qanun var, dövlət qulluqçularının etik davranış qaydalarına riayət etməlidirlər. Qanunvericiliyin tələblərinə əməl etməyənlərin cəzalandırılması normakl haldır. Məmurların korrupsiya faktları ilə cinayətə cəlb olunması bütün dünyanın təcrübəsində var. Almaniyada xalqı qarşısında böyük xidmətləri olmuş Helmut Kol məhz vəzifədən –sui istifadə faktlarına görə cəzalandırıldı və uzaqlaşdırıldı. Heç kim keçmiş xidmətlərinə arxayın olmamalıdır və bu mənda qanun hamı üçün qanundur.
Zamantv.az