Gəncə Şəhər Birləşmiş Xəstəxanasını kim idarə edir, direktor, yoxsa “otdelkadr?” Ümumiyyətlə, 80-ci illərdən kadr məsələləri ilə məşğul olan Məlahət Bayramova, bir çox baş həkimləri yola salsa da, o, indiyə kimi öz postunda möhkəm qərarlanmağı bacarıb.

Mərhum İsa həkimdən bu günə qədər, ələlxüsus Nazim Əhmədovla, daha sonra İlkin İsmayılovla dil tapıb işləmək məharət tələb edir. Baş verənlərə diqqət yetirdikdə görürsən ki, baş həkimlər dəyişsə də, kadr məsələləri ilə bağlı yanaşma dəyişmir. 2023- cü ildə Hesablama Palatasının apardığı yoxlamalar nəticəsində bəlli oldu ki, Gəncə Şəhər Birləşmiş Xəstəxanasında vəziyyət o qədər də ürəkaçan olmayıb.... Çünki, 2023-cü ilin iş planına əsasən, Hesablama Palatasının bu Xəstəxanada həyata keçirdiyi audit yoxlamaları nəticəsində çoxsaylı nöqsanlar aşkar olunur. Hətta, Hesablama Palatasının verdiyi rəyi oxuduqdan sonra ortaya düşündürücü suallar da çıxır. Görəsən bir çox səhiyyə müəssisələrində, o cümlədən Abbas Səhhət adına xəstəxanada necə olur ki, baş həkim İlkin İsmayılov 2023-cü ildən Gəncə Şəhər Birləşmiş Xəstəxası publik hüquqi şəxsin direktor vəzifəsinə təyinat almağı bacarır? Məlumat üçün qısa şəhr verək, 02 fevral 2024-cü ildə Tibbi Ərazi Bölmələrini İdarəetmə Birliyi publik hüquqi şəxsin tabeliyində olan Gəncə Şəhər Birləşmiş Xəstəxanası publik hüquqi şəxs direktor vəzifəsinə təyinat olur. Sözügedən vəzifə isə, həmin vaxta qədər Abbas Səhhət adına xəstəxanaya az öncə baş həkim təyin olunan İsmayılov İlkin Yusub oğluna həvalə olunur.

Bəs bu gənc həkim kimdir? İlkin İsmayılovun bioqrafiyasına nəzər salaq. Bu şəxs 22 oktyabr 1985-ci ildə Bakı şəhərində anadan olub. 2003-2009-cu illərdə Azərbaycan Tibb Universitetində (Müalicə işi) təhsil alır və həmin Universitetin Onkologiya kafedrasında internatura keçərək, 2009-cu ildə Türkiyənin Qazi Universitetinin Ümumi Cərrahiyyə fakültəsində təhsilini davam etdirir. Bu Universitetdə Uzmanlıq elmi dərəcəsini alan İlkin İsmayılov, 2016-cı ildə Gəncə Beynəlxalq Xəstəxanasında ümumi cərrah, baş həkim, daha sonra baş direktor vəzifəsində çalışır. (Gəncə Beynəlxalq Xəstəxanası özəl klinikadır, çatdırılan məlumatlara görə bu xəstəxananın sahibi sabiq vergilər naziri, mərhum Fazil Məmmədovdur.) 2017-ci ildə Tibb üzrə fəlsəfə doktoru adını alır. Hal- hazırda Tibb Universitetinin Birinci Cərrahiyyə Xəstəliklər kafedrasının doktorantıdır. İlkin İsmayılov, 2021- ci ildən Gəncə Şəhər Birləşmiş Xəstəxanası publik hüquqi şəxsi direktorun müavini - Abbas Səhhət adına xəstəxananın rəhbəri olaraq fəaliyyət göstərir. Obyektivlik olsun deyə, cərrah işlədiyi müddətdə işinin peşəkarı olaraq cəmiyyətdə ad çıxarmağı bacarır və bunu heç zaman unutmaq olmaz. Bəli, artıq deyəsən problemin ən ilginc nöqtəsinə çata bildik. Xatırlatmaq üçün deyə bilərik ki, elə Abbas Səhhət adına xəstəxanadan kadrlar şöbəsinin müdiri Məlahət Bayramova ilə birlikdə çalışır. Bir məqama xüsusi diqqət edək, Məlahət Bayramova uzun illərdir ki, yəni 1980-ci ililərdən indiyə kimi kadr məsələləri ilə məşğuldur və xəstəxanada çalışanların çoxu, ələlxüsus yaxın qohum-əqrabası, qonşuları, tanışları və s. onun sayəsində iş tapa biliblər. Əgər dərindən düşünsək o halda belə bir qənaətə gəlmək olar ki, burada nə var ki?

Yəni, adətən indiki reallıqda çömçə kimin əlində olursa, yeməyin yağlı yerindən pay da həmin çömçə tutanın sülaləsinə çəkilir. Unutmaq olmaz ki, dövlət xəstəxanası olan bu səhiyyə müəssisəsində uzun illərdir ki, baş həkimlərdən biri digərini əvəz etsə də “otdelkadr”postu dəyişməz qalır, xəstəxana bu formada idarə olunur. Bunun səbəbi baş həkimdə deyil, onu bu posta dəstəkləyəndə axtarsaq, yaxud da aidiyyəti qurumlar, o cümlədən Hesablama Palatası xəstəxananı daha diqqətlə yoxlasaydı, yəqin ki, uzun illər ərzində yaşanan problemlər ortaya çıxardı. Deməyi özümüzə borc bilirik. Özünün dediyinə görə M. Bayramovanın arxasında duran qüvvənin korrupsiyaya qarşı qəti münasibət bildirənlərdən sayılan biri olsa da, hansı ki, bu da sözdə belədir, necə olur ki, simsarının əməllərindənmi xəbərsizdir? Deməzdim. Bütün dövlət qurumlarından onu hifz etməyi hələlik bacaran məmurun gözündəki eynək əcaba (rozovıy) cəhrayımı rəngdədir ? Yəqin ki, əks təqdirdə bu qədərləri görə bilmək o qədər də çətin deyil. İki nəfərdən artıq şəxsin bildiyi sirr artıq sirr deyil. Görünür onun ətəkləri də (yəni söhbət sponsordan, himayədardan gedir-müəllif) korrupsiya çamuruna artıq çoxdan batıb və yaxud da HAQQI unudub. Nə isə... uzun illər ərzində Abbas Səhhət adına Xəstəxananın kadr məsələləri ilə məşğul olan (vəzifəsi kadrlar şöbəsinin rəisi) Məlahət Bayramovanın Adil və İsmayıl adında iki oğul övladı var. Oğlanlarından biri bu Xəstəxanada texnik, digəri isə mülki müdafiə üzrə mütəxəssis kimi çalışır. Hərçəndi onların işə gəlişi belə bayramda şəkərbura, paxlamanı görmək kimi bir şeydi. Oğlunun həyat yoldaşlarından biri ümumi şöbədə katibə işləsə də, digəri Birləşmiş Xəstəxanada kadrlar şöbəsində mütəxəssisdir.

Məlahət Bayramova haqqında çoxsaylı şikayətlərin ardı, arası kəsilməsə də ,nə o,nə də rəhbərlik barəsində olan şikayətlərə əhəmiyyət vermir və özündən sonra, bugünkü vəzifəsinə gəlini Gülnarəni hazırlamaqla məşğul olur. Yəni, bu xanım kadr artıq səhiyyə idarəsini özünün deməyək, himayədarının özünküləşdirməsindən tam əmindir. (Bizsə deyil.) Haşiyə çıxaraq bildirim ki, ölkədə özəl xəstəxalar mövcud olduğundan hamımız məlumatlıyıq, amma səhiyyə idarəsinin özəlləşməsini ilk dəfədir görürük. Belə də ki, media nümayəndələrinin işi görmək, bilmək, məlumatlandırmaqdır. Qalanı Dövlətin işidir. Qayıdaq siyahımıza, siyahıda onun qardaşı qızları, yəni Əliyeva Samirə Aydın qızı və Tağıyeva Həyat Aydın qızının da adı var ki, bu iki xanım da bibiləri Məlahət Bayramovanın sayəsində iş başındadırlar. Məlahət xanım təkcə özünü deyil, həyat yoldaşının qohumlarını da ayrı seçkilik etmədən işlə təmin edə bilib. Məsələn, Aygün Qafarova - bu “otdelkadr”ın qaynı Sərxanın qızıdır və o, sığortanın təşkili və innovasiya şöbəsinin şöbə müdirinin müavini vəzifəsini daşıyır. Bundan əlavə, qaynı Sərxanın oğlu Samir İbrahimov hemodializə şöbəsində texnik vəzifəsində, baldızının oğlu Həsənov Vasif Yusif oğlu isə, xəstəxananın informasiya texnologiyaları şöbəsində çalışır. Bu xəstəxana dövlətdən maliyyələşən səhiyyə müəssisəsi olsa da, burada çalışan işçilərin demək olar ki, yarısından çoxu Məlahət Bayramovanın “bığının altından keçməklə” işlə təmin olunublar. Bəli, uzun illərdir ki, bu xəstəxana “otdelkadr” tərəfindən qoyulan şərtlər daxilində fəaliyyət göstərir desək, heç də yanılmarıq. Yada gələn baş həkimlər gərək Məlahət xanımın uşaqlıq dostları, sinif yoldaşları, yada ki, qohumları ola ki, ona bu qədər artıqlaması ilə səlahiyyət verilib? Redaksiyamıza daxil olan məlumatlarda vurğulanır ki, Məlahət xanımın həyat yoldaşı Faxrəddin İsmayıl oğlu İbrahimov I qrup əlil olduğu halda, o, avtomobil idarə edir. Bu faktın doğru olub-olmadığını aydınlıq gətirmək üçün, üz tutduq Dövlət Sosial Müdafiə Fonduna. Apardığımız araşdırmalar, əldə etdiyimiz məlumatlar, görüb bildiklərimiz və s. bizi belə bir qənaətə gətirdi ki, Gəncənin səhiyyə müəssisələrindəki korrupsiya şəbəkəsinin başında, üzdə, dünən direktor vəzifəsinə gətirilən İlkin İsmayılov olsa belə, araşdırmalarımızdan görünən idarəetmə mexanizminin başında bir başqasıdı, yəni səhiyyə tam başqa səmtdən idarə olunur. Belə bir səbəbdən də, hazırda xəstəxanalarda baş verənləri diqqətdən keçirmə zamanı yetişmiş sayılır.

Gəncə səhiyyəsinin bataqlıq dönəmindən keçdiyi yolun sonuna gəlib çıxdığımız bəlli olar. Məni heç də yalnış anlamayın və bunu “Gəncə xəstəxanalarında korrupsiya yığışdırılıb”anlamı kimi də başa düşməyin. Əksinə, Hesablama Palatasından sonra adı çəkilən bu “otdelkadr”ın “iş qabiliyyəti”ni “nəzərə aldılar və onu daha da başa çəkdilər. Yəni, Gəncənin “Qubernator”u onu daha mühüm posta təyin etdi. Hesablama Palatasının hesabatı əsasında dəyişən nə oldu? Əsasən kadr islahatında və maliyyə məsələlərində aşkar olunanlardan sonra Məlahət Bayramovanın vəzifəsinin daha da böyüdülüb başa çəkilməsi, yəni bu xanımı Gəncə Şəhər Birləşmiş Xəstəxanasının insan resursları şöbəsinin müdiri vəzifəsinə təyin etdilər. Deyilənlərə görə, işinin peşəkarı hesab olunan İlkin İsmayılovu cərrahlıq işindən ayırıb, onun təmiz adı altında baş verənləri ört-basdır etmək üçün direktor vəzifəsinə gətirilməsi kimin ağlına gəlib? Görünür “Qubernator” artıq peşəkarcasına şahmat oynamağı da öyrənib. Məlahət Bayramovanı bu vəzifəyə yüksəldən “Qubernator”un tapşırığına əsasən, İlkin həkimin bu şəxsdən icazəsiz hər hansı qərar qəbul etməsi, yaxud da işçini qəbul etməsi absurd məsələdir. Sözümüz burada bitmir, söhbət səhiyyədən getmişkən , əsas odur ki, səhhətinizdən muğayat olun və bizi izləməyi unutmayın, elə məndə .

P. S. Əziz oxucular! Bir haşiyə çıxmaqla tarixi bir faktı xatırlatmaq və ürəyimdən keçənləri sizlərlərlə bölüşmək qərarındayam. XVIII əsrin ikinci yarısında Rusiyanın dövlət idarəçiliyində hərc-mərclik yaranan vaxtlarda müəyyən qruplaşmalar, əsasəndən qazaxlar çar ordusu üzərində bir sıra uğurlu qələbələr əldə edirlər. Bütün zamanlarda xalq hərəkatlarında olduğu kimi, yəni, Puqaçovun başçılıq etdiyi kəndli üsyanında da əvvəlcədən hazırlanmış plan qurulmur və üsyançılar arasında nizam- intizama nəzarət etmək də mümkün olmur. Üsyançılar adi soyğunçu və quldurlar kimi hərəkət edirlər. Ayağında çarıq olan Yemelyan Puqaçov özünü çar elan edir və onun hökmdarlığı heç də uzun sürmür, az bir müddətdən sonra çariçanın əmri ilə onun özünü və yaxın ətrafını Moskvada tuturlar və boyunlarını da vururlar.

P.S.S Bütün bunlar hadisələri qabaqlamaq kimi çıxdı. Hələlik isə onu deyə bilərək ki, Prezident Gəncə şəhərinin statusunu dəyişməyib və bu şəhərə quberniya adı isə hələlik verilməsə də, artıq bu şəhərdə özünü Qubernator sayan şəxsin kimliyi əksəriyyətə bəllidir. Gəncədə “Qubernator” adını daşıyanın kimliyi isə... Əgər Məlahət Bayramovanın dediyi kimi, mən qubernatorun qəzəbinə düçar olmayıb sağ qala bilsəm də, bilməsəm də yenidən bu mövzuya qayıdacağıq. Ömrü yazan yazır, bəndə kimdir?

global.az

Sosial şəbəkələrdə Qaradağ rayonu, Lökbatan qəsəbəsi, “Qobu Park-3” yaşayış massivindəki binalarda əyilmə olduğu və ərazidə bərkitmə işlərinin aparıldığı barədə görüntülər yayılıb.

Bildirilib ki, işlər təhlükəsizlik qaydalarına riayət olunmaqla aparılır.

Sakinlər İTV-yə bildiriblər ki, binanın bünövrəsi zəif olduğundan artıq əyilməyə başlayıb. Odur ki, ərazidə quyu qazılıb, bərkitmə işləri görülür.

Tikintini aparan işçilər isə öz növbəsində söyləyiblər ki, təhlükəsizlik qaydaları pozulmayıb.

Lökbatan qəsəbəsi üzrə Mənzil İstismar Sahəsinin nümayəndələri də ərazidə olublar. Onların sözlərinə görə, hazırda bərkitmə işləri bina 26-da aparılır. Növbə ilə deformasiyaya uğrayan digər binalardakı probemlər də aradan qaldırılacaq.

Daha ətraflı İTV-nin süjetində:

Dia-az.info bildirir ki, əyilən bina bir vaxtlar məcburi köçkünlər üçün tikilmiş və açılışında prezident İlham Əliyevin iştirak edib. Digər bir fakt isə odur ki, “Qobu Park-3” yaşayış massivindəki əyilən binaların inşası zamanı böyük yeyintiyə yol verilib.

Sifarişçisi dövlət olan bu binalar "Kristal Abşeron" tərəfindən inşa edilib. Bu şirkətin sahibi isə deputat Ağalar Vəliyevdir. İndi dövlətimiz çoxdandı ərköyünlük edən bu deputatı cəzalandıracaq, ya yox?.. Bunu zamanla görəcəyik...

Və ya Sahil Babayev hansı səbəblərdən özünün kütləvi reklamına ehtiyac hiss edib?

Bu ayın əvvəlində Əmək və Əhalinin Sosial Müdafiəsi Nazirliyinin yeni layihəsi - DOST TV – internet televiziyasının fəaliyyətə başlaması barədə məlumat verildi. Məlumatda deyildi ki, Əmək və Əhalinin Sosial Müdafiəsi Nazirliyinin internet resursu olan DOST TV-də əsasən əmək, məşğulluq, sosial müdafiə və sosial təminat mövzuları əhatə olunacaq, sosial yeniliklər, islahatlar, sosial hüquqlar və s. barədə məlumatlar çatdırılacaq. Sosial məsələlərlə bağlı suallar da nazirlik rəsmilərinin iştirakı ilə birbaşa cavablandırılacaq.

Təbii ki, əhalinin maarifləndirilməsi və xeyli sayda jurnalist həmkarımızın işlə təmin olunması baxımından müsbət layihə kimi qəbul oluna bilər. Ancaq o halda ki, söhbət normal, effektiv, şəffaf və necə deyərlər, “əhaliyə canı yanan” bir nazirlikdən gedərsə (əgər ümumiyyətlə, Azərbaycanda belə birisi varsa-C.M.). Yəni, necə deyərlər, “avazın yaxşı gəlir, oxuduğun Quran olsa”...

Təəssüf ki, indiyə qədərki mənzərə göz önünə alınanda, nədənsə yeni televiziya layihəsinin əhalidən çox nazirliyin və nazirin maraqlarına, piarına xidmət edəcəyinə dair şübhələr yaranır. Ümumiyyətlə, son zamanlar sözügedən nazirliyin və şəxsən nazir Sahil Babayevin mətbuatda reklamı xeyli artıb. Xüsusilə də ölkənin ən tanınan rusdilli saytlarından biri mütəmadi olaraq, az qala hər gün nazirliyin bu və ya digər tədbirləri, xüsusilə də S.Babayevin fəaliyyəti, görüşləri, səfərləri barədə məlumatlar yayır. Adətən bu məlumatlar müsbət mesajlar və təriflərlə “bəzədilir”. Hansı ki, əvvəllər nə sözügedən nazirlik, nə də nazirlə bağlı bu tendensiya müşahidə olunmurdu.

S.Babayevin hazırda hansı səbəblərdən bu cür reklama ehtiyacının yarandığını demək çətindir. Bu, onun hakimiyyət daxilindəki mövqeyinin, vəzifəsinin itirilməsi təhlükəsindən tutmuş daha yüksək posta iddialara qədər müxtəlif səbəblərlə bağlı ola bilər. Ümumiyyətlə, indiki hökumətdə özünü reklam etdirmək istəyən nazirlər və digər yüksək vəzifəlilər az deyil, amma indiyə qədər bunun üçün televiziya yaradanına rast gəlməmişik...

Lakin bizi düşündürən daha çox nazirin şəxsi karyera məsələləri yox, belə bir televiziyanın – bahalı bir layihənin, bu nazirliyin nəyinə, harasına yaraşmasıdır. Söhbət əhalinin sosial təminat sarıdan zəif, kasıb təbəqəsinin, əlillərin, qazilərin və s. ən çox şikayət etdiyi, fəaliyyətindən narazı qaldığı nazirlikdən gedir.

Maraqlıdır ki, bu nazirlik və onun obyektləri, şirkətləri və s. olan yüksək gəlirli vəzifə sahibləri yaşa görə 220 manat müavinət, 240 manat pensiya alan vətəndaşa həmin televiziyadan nəyi və hansı üzlə deyəcək, izah edəcək? Öz missiyasının, vəzifəsinin fəlsəfəsini anlamayan, anlamaq istəməyən, ona görə də dövlətin əhalinin kasıb təbəqəsinə, əlillərə, pensiyaçılara verdiyi vəsaitin artırılması yox, kəsilməsi, “qənaət edilməsi” ilə fəxr edən bir nazirliyin və onun başında duran şəxsin bu “qara camaata” xitab etməyə sözü və buna mənəvi haqqı varmı?

Bəlkə xırda və mənasız bəhanələrlə süründürməçiliyə məruz qoyulan, nəticədə əlillik müavinəti aylarla, illərlə, ya da birdəfəlik kəsilən əlil vətəndaşa deyəcək nələrisə var?

Bəlkə kənd camaatına min əzab-zillətdən, süründürməçilikdən və “qara-qura” alış-verişdən sonra verdikləri sınıq-salxaq mal-qaranı, qoyun-quzunu göstərəcəklər?

Görəsən, “uşaq pulu”nun verilməsinin ən qızğın əleyhdarlarından olan nazir Babayev kirayələrdə yaşayan, fəhləlik edib övladına od bahasına uşaq yeməyi alan və kasbçılıq ucbatından ailəsi hər an dağılmaq təhlükəsilə üz-üzə qalan azərbaycanlı gəncə özünün və hökumətin “uşaq pulu inadkarlığını” necə izah edəcək həmin televiziyadan?

Yeri gəlmişkən, S.Babayev “uşaq pulu” verilməməsini onunla izah etmişdi ki, “ölkədə demoqrafik vəziyyət yaxşıdır və əhalinin artımının stimullaşdırılmasına ehtiyac yoxdur”. Yəni, əhaliyə hər uşağa görə 100 manat versələr, millət artıb-törəyə bilər, bu isə nazirin dediyinə görə, dövlətə, hökumətə lazım deyil. Doğrudanmı belədir?

Axı, heç bir dövlət, o cümlədən Azərbaycan dövləti bu cür düşünə bilməz və sözsüz ki, düşünmür də! Belə olan halda, millətə, xalqa qarşı belə bir aşağılayıcı zehniyyətin, düşüncənin sahibinin indiyə qədər nazir postunda qalmasının özü bir möcüzədir və yəqin ki, nazir Babayev yaratdığı yeni televiziyada bu möcüzənin də sirrini açıqlayacaq...

Yeri gəlmişkən, son statistikaya görə, Azərbaycanda kişilərin 48 faizi pensiya yaşına çatmamış dünyasını dəyişir. Ancaq yəqin ki, bu statistika Azərbaycandakı demoqrafik durumla bağlı "özünəməxsus mövqeyi" olan nazir Babayevi qətiyyən kədərləndirmir...

Cəlal Məmmədov

“AzPolitika.info”

Hədə-qorxu ilə tələb etmədə təqsirləndirilən "Qazaxlı Alik"in oğlu Fuad Muradovun məhkəməsi başlayır.

“Report” xəbər verir ki, onun barəsindəki cinayət işinə Gəncə Ağır Cinayətlər Məhkəməsində hakim Elmin Rüstəmovun sədrliyi ilə keçirilən məhkəmə iclasında baxılacaq.

Xatırladaq ki, onun barəsində ötən ilin oktyabr ayında Nərimanov rayon Məhkəməsinin qərarı ilə 4 aylıq həbs qətimkan tədbiri seçilib.

F.Muradova Cinayət Məcəlləsinin 182.2.1, 182.2.2 və 182.2.4-cü maddələri (Hədə-qorxu ilə tələb etmə) ilə ittiham irəli sürülüb.

Qeyd edək ki, "Qazaxlı Alik" ləqəbi ilə tanınan Arif Muradov I Qarabağ müharibəsi veteranı, ehtiyatda olan polkovnikdir.

“Laser Beauty Clinic” barəsində daha bir şikayət daxil olub.

“Unikal”a müraciət edən pasiyent Gülya Məmmədova iddia edir ki, “Laser Beauty Clinic”də kosmetoloq Rəna Soltanova ona burun dolğusu etdikdən sonra burnu çirk etməyə başlayıb. Burun dolğusu üçün 350 manat pul ödədiyini deyən pasiyent klinikaya şikayət etsə də, burnunda yaranmış problem aradan qaldırılmayıb.

“Mən Məmmədova Gülya 17.05.2023 tarixində “Lazer Beauty Clinic”də Rəna Soltanovaya burun dolğusu üçün müraciət etmişəm. Kosmetoloq özü şəxsən mənə burun dolğusu etdi. Prosedurdan əvvəl asistentləri mənə bir neçə sənəd imzalatdılar. Prosedura 350 manat pul ödədim. Evə gəldikdən iki saat sonra burnumda dəhşətli ağrılar başladı. Həkimə zəng etdim ki, ağrım var. Amma asistenti mənə dedi ki, damara düşəndə elə ağrı olur, ağrı kəsici içim keçib-gedəcək. Sabahı gün Rəna Soltanova özü görüntülü yığıb baxdı və panik vəziyyətdə təcili məni klinikaya çağırdı. Klinikada məni ən sonuncu kabinetə saldılar, qapını da bağladılar. Dedilər çıxmayım, həkim özü gələcək, başqa pasiyentlər görməsin. Rəna Soltanova gəldi başladı burnumu sıxmağa çirk çıxartdı. Sonra yenidən burnuma iynə vurdu. Soruşduqda isə dedi ki, vurduğu dolğunu əritmək məqsədilə iynə vurub. Bundan sonra dəfələrlə burnumda ağrı olduğunu desəm də, mənə inanmadıqlarını söylədilər. Burnuma vurduğu geli əritdiyindən, dolğunun pulunu, ödədiyim məbləği geri istəsəm də, mənə dəymiş ziyanı ödəmədilər. Mən Rəna Soltanovadan şikayətçiyəm. Klinikada özbaşınalığa son qoyulması üçün aidiyyəti qurumlar tədbir görməlidirlər”- Gülya Məmmədova bildirib.

O, məsələ barəsində Səhiyyə Nazirliyinin Analitik Ekspertiza Mərkəzinə müraciət etsə də, sözügedən qurum onun şikayətini araşdırmayıb: “Səhiyyə Nazirliyinin bu qurumu mənə məktub yazdı ki, guya, şikayəti araşdırmaq istəsələr də, onunla əlaqə yarada bilməyiblər. Halbuki, mən şikayət məktubuna işləyən əlaqə nömrəmi qeyd etmişdim. Buna baxmayaraq, onlar mənə təkrar müraciət etməyi, yaxud da məhkəməyə müraciət etməyi tövsiyə etdilər”.

Qeyd edək ki, pasiyent redaksiyamıza ünvanladığı şikayət məktubunda burnunda yaranmış fəsadı əks etdirən foto və videoları da təqdim edib.

Məsələ ilə bağlı “Laser Beauty Clinic”də çalışan Rəna Soltanova ilə əlaqə saxlasaq da, dəstəyi qaldıran onun bacısı Nigar Rüfət Rəna Sultanovanın xaricdə səfərdə olduğunu söylədi. Bildirdi ki, onlar bütün pasiyentləri yadda saxlaya bilmirlər. Ona görə də, pasiyent şəxsiyyət vəsiqəsi ilə birgə yenidən klinikaya müraciət etməlidir. Əgər problem varsa, pasiyentə köməklik göstəriləcək.(“Unikal”)

Bir neçə gün bundan əvvəl deryaz.az xəbər portalının redaksiyasına Sabunçu rayonundakı 271 nömrəli tam orta məktəbdə baş verən bir çox problemlərlə bağlı müəyyən məlumatlar daxil olmuşdu. Daxil olan məlumatlarda bildirilir ki, məktəbin ibtidai sinif müəlliməsi Bağırova Səltənət Zahid qızı 29 avqust 2023-cü il tarixdə müəllimlərin sertifikasiya imtahanında iştirak etmiş və o, 40 imtahan balı, 21 müsabiqə balı toplamışdır. Buna baxmayaraq, hal-hazırda Səltənət Bağırova öz ixtisası üzrə, yəni ibtidai sinif müəlliməsi işləmir.

Daxil olan məlumatlarda o da qeyd olunur ki, bu gün o, ibtidai siniflərə yalnız musiqi dərsindən və texnologiya fənnindən dərs keçir. Başqa bir məlumatda o da bildirilir ki, Səltənət Bağırovanın adı ştat cədvəlində ibtidai-sinif müəlliməsi olaraq getsə də, eyni zamanda onun adına sinif müəlliməsi olaraq əməkhaqqı yazılsa da, hal-hazırda o, ibtidai siniflərə yalnız texnologiya fənnindən və musiqi dərsindən dərs keçir. Baxmayaraq ki, 2023-cü ilin sentyabr ayında Səltənət Bağırova məktəbin direktoru Səbinə Qasımovanın qəbulunda olur. Həmin vaxt direktor ona ibtidai sinif verəcəyinə vəd versə də, sonda Səbinə Qasımova verdiyi vədinə əməl etmir.

Qeyd edək ki, redaksiyamıza bu yöndə məlumatlar daxil olduqdan sonra, məktəbin direktoru Səbinə Qasımova ilə əlaqə saxlamaq və qarşı tərəf olaraq ondan məsələlərə münasibətini öyrənmək üçün bir neçə dəfə cəhd etsək də, təəssüflər olsun ki, bu yöndə istəyimiz baş tutmadı.

Hər dəfə telefona cavab verən şəxslər bir bəhanə gətirərək Səbinə xanımın yerində olmadığını söylədi.

Ona görə də ümid edirik ki, aidiyyatı qurumlar, 271 nömrəli tam orta məktəbdə yaşanan belə bir problemin aydınlaşdırılması, eyni zamanda bu yöndə aparılmış araşdırmaların nəticəsi ilə bağlı tabeçiliyindəki qurumlara lazımı tapşırıq verəcək (Deryaz)

Binəqədi rayonu, Biləcəri qəsəbəsi, Rəşid İsmayılov küçəsi, bina 11d, mənzil 28-də yaşayan Əsgərova Mahizər Yunus qızı tərəfindən Hurriyyet.az saytının redaksiyasına şikayət məktubu daxil olub. Şikayətçi komunal xərclərin nəğd ödənişindən narazıdır:

“Mən, Əsgərova Mahizər Yunus qızı, yazaraq sizə bildirirəm ki, yaşadığım ərazidə kommunal xərclərə görə ödənişləri terminal vasitəsilə ödəməyə icazə vermirlər. Belə ki, pulu bizdən nəğd alırlar. Ödəniş etdikdə isə çek verilmir.

Kommunal xidmət idarələrinin əməkdşalarına deyəndə ki, ödənişi terminal vasitəsilə etmək istəyirəm, deyirlər, yox, olmaz. Mən bilmirəm, bu problemi kimə deyim. İndi hansı zəmanədir ki, kommunal ödənişləri nəğd şəkildə yığırlar?!

Ona görə, istədim ki, problemimi ictimailəşdirəsiniz. Bilirəm ki, məmnim kimi bu problemdən əziyyət çəkən çox sayda sakin var”.

Əvvəl: "Melorasiya və Su Təsərrüfatı" ASC - rəhbəri Zaur Mikayılov

İndi: Azərbaycan Dövlət Su Ehtiyatları agentliyi - sədri Zaur Mikayılov

Ölkə başçısının müvafiq sərəncamına əsasən qurumun adı dəyişdirildi, amma nə fəaliyyətində, nə də strukturda heç bir dəyişiklik olmadı.

Demək ki, "toplananların yerini dəyişdikdə, cəm dəyişmir".

Fəaliyyət və strukturda dəyişiklik yoxdursa, istənilən sahədəki özbaşınalıqlar da, qanunsuzluqlar da, barəsindəki narazılıqlar da, şikayətlər də olduğu kimi qalacaq. Necə ki, Zaur Mikayılov və onun tabeliyində çalışan müavinindən tutmuş, bölgələrdəki müdirlərə qədər hamısından şikayətlər əvvəl də var idi, bu gün də var. Nəzərə çarpan dəyişiklik isə yalnız, bu qurumda çalışanların özgüvənlərinin daha da artaraq, ifrat dərəcəyə çatmasıdır. Onlara görə hətta vətəndaşa səsini qaldıran rəhbərə olan arxayınçılıq və bu arxayınçılıqdan irəli gələn rüşvət, yeyinti faktları bu gün bütün bölgələrdə insanların narazılığına səbəb olub.

Deyəsən, ölkə xaricində "biznesin idarə olunması" ixtisasına yiyələnən Zaur Mikayılov, rəhbəri olduğu dövlət qurumunu da ixtisasına uyğun və əvvəl işlədiyi şəbəkə market formatında həyata keçirir.

Biz əvvəllər də Zərdab rayon Suvarma Sistemləri idarəsinin rəhbəri Əhliman Kərimovun fəaliyyətində yol verdiyi nöqsanlar, korrupsiya halları və digər qanunsuzluqlar barəsində "DogruXeber.az" informasiya portalında, eləcə də "Kanal14" YouTube kanalında faktlar təqdim etmişdik. Eyni zamanda, həmin faktları sorğu şəklində aidiyyatı qurumlara da göndərmişdik. Amma, Kürdəmir rayon Suvarma Sistemləri İdarəsinin rəhbəri vəzifəsindən korrupsiya ilə işdən çıxarılıb, barəsində cinayət işi açılan, hətta həbs olunub, sonra "sirli səbəblərlə" azadlığa çıxan, hələ bu da azmış kimi Zərdab rayon Suvarma Sistemləri İdarəsinə müdir təyin olunan Əhliman Kərimov bu gün də öz kürsüsündə əyləşib, "pulunu yığır".

"Pulunu yığır" deyərkən, idarənin texnikalarını icarəyə verib ordan aldığı, idarənin texnikaları üçün dövlətin ayırdığı yanacağı satıb, ordan aldığı, işə işçi götürərkən onlardan aldığı... və sair pullardan söhbət gedir ki, bütün bunlar barəsində əvvəllər bu idarədə mühəndis işləyən Şəmsi Əhmədov ətraflı şəkildə açıqlama vermişdi.

Qeyd edək ki, məlumata görə Əhliman Kərimov Kürdəmir rayonunda özü işdən çıxarılsa da, fürsət tapıb, oğlunu həmin idarədə mühim vəzifəyə qoydurub.

Xatırladaq ki, haqqındakı bütün məlumatlar barəsində Əhliman Kərimovun mövqeyini öyrənmək üçün ona zəng etdiyimizdə, hər kəsin fəaliyyətini özününkü ilə eyni bilib, "bu məsələni dayandır, kartını da at mənə bir 50 manat göndərim, kontur alarsan" demişdi.

Danışdıqca, kimliyini daha da bəlli edən bu adam sonradan ümumiyyətlə susdu. Susdu ki, özünün yaratdığı bataqlıqda daha da batmadan, himayədarları onu qoruya bilsin. Hələ Kürdəmir rayonunda işlədiyi zamanlarda onun fəaliyyətinin narazı saldığı vətəndaşlardan birinin redaksiyamıza bildirdiyinə görə, Zaur Mikayılova yaxınlaşıb, özünü təqdim edib, Əhlimandan şikayət edən kimi, Zaur Mikayılov, - "Mən səni xatırladım. Bəsdir də, nə istəyirsən, imkan ver işləsin də", deyə ona səsini qaldırıb.

Amma , sonradan bu narazılıqları səsinin tonu ilə azalda bilməyəcəyini anlayıb, Əhliman Kərimovu (müvəqqəti olaraq) işindən azad etdi. Maraqlıdır ki, Kürdəmir rayon Suvarma Sistemləri İdarəsinin hazırkı müdiri Tahir Xəlilov də öz sələfinin fəaliyyətini eyni qaydada davam etdirir və bununla da narazı vətəndaşların sayını "qoruyub saxlayıb".

Tahir Xəlilovun insanlardan pul alıb, işə götürməsi, özünün işə gəlməməsi, telefon zəngi ilə müavinləri yönləndirməsi, günlərinin kollektivin ona yaxın üzvləri ilə restoranda yeyib-içməkdə keçirməsi və sair məlumatlar barəsində mövqeyini öyrənmək üçün, ona zəng etdik. Özümüzü təqdim edib, barəsindəki məlumatlara dair sual vermək istəyərkən, o, "sən kimsən mənə sual verirsən" deyə, səsinin tonunu qaldırdı.

Mətbuat nümayəndəsi ilə danışmağı bacarmayan, əgər, (qanunlar düzgün icra olunarsa) mətbuat nümayəndəsi ilə bu tonda danışdığına görə onu hansı qanuni cəzanın gözlədiyini bilsəydi, yəqin ki, bu qədər "cəsarətli" olmazdı. Amma, bilmir. Marketdən dövlət qurumuna "transfer olunan" kadrın bildiyi anca bu qədər olar...

Bildikləri və etdiklərinə rəğmən "dilini dinc saxlamağı da bacarmayan" Tahir Xəlilov, bizə verilən məlumata görə bir dəfə "dilinin bəlasına da düşüb". Yerli sakinlərin sözlərinə görə, restoranda yaxşıca yeyib-içdikdən sonra, rayonun kişiləri barəsində təhqiramiz ifadələr işlədərək, "kiçik bir axtarışa çıxıb". O, "axtarışın nəticəsi" isə Tahir Xəlilova sözün əsl mənasında ağır zərbə olub. Bir neçə gün gözlərdən uzaq olub, sonra eynəklə cəmiyyət içinə çıxan bu cavan oğlan, ikinci vətən müharibəsi zamanı harda olduğunu bilmirik, amma bu dəfə qarşımıza kimsədən qorxub-çəkinmədiyini sübut edəcək səs tonu ilə çıxdı.

Necə deyərlər, "həm suçlu, həm güclü"...

Yeri gəlmişkən, Kürdəmir rayonundan əvvəl Şəmkir rayon Suvarma Sistemləri İdarəsində 6 aylıq müdir keçmişi olan Tahir Xəlilov orada yerli sakinlərə və eləcə də çalışanlara "elə od qoyub" ki, "Ulduz" filminin Məhəmmədi demişkən, hələ "6 il tüstüsü təpələrindən çıxacaq".

Artizan quyularının qazılması və bərpası üçün dövlət büdcəsindən pul ayrılmasına baxmayaraq baxmayaraq, yerli sakinlər onlardan pul yığılması barəsində "Kanal14" YouTube kanalında canlı yayımlanan "Kamalın zamanı" proqramında etiraz bildirirdilər. Bundan əlavə, idarənin iş zamanı yüksək gərginlikli elektrik xətlərinin olduğu yerdə işlədilən texnikalarından birinin sürücüsünün ölümü hadisəsi belə baş verib. Lakin, hər kəsdən gizlədilən ölüm hadisəsi dərhal ört-basdır edilib, ardından isə Tahir Xəlilov Kürdəmir rayon Suvarma Sistemləri İdarəsinə müdir gedib. Orada da özünə kifayət qədər narazı vətəndaş "auditoriya"sı topladığına görə, bəlli ki, başına nə gəlirsə-gəlsin vərdiş elədiyi iş üsulunu davam etdirir.

Yeri gəlmişkən, Tahir Xəlilov ilə yenicə danışmışdıq ki, bu "vurhavurda" Əhliman Kərimovdan bizə zəng gəldi. Deyir, "nə məsələdir?".
Soruşuruq, "hansı məsələ" ?

Deyir, "mənə link atdılar ki, orda nəsə yazılıb məndən. Mən də dedim görüm nə məsələdir". Amma, bizimlə danışdığı zaman Əhliman Kərimova gələn telefon zəngi deyəsən bizi ona xatırlatdı, "hə bildim, oldu, cavab göndərərik" deyib, tələsik sağollaşdı.

Görünür, daha yaddaşı sözünə baxmayan bu ağsaqqal ildən artıqdır ki, "ünlü iş adamı" olduğundan xəbərsizdir. Amma, maraqlıdır ki, aidiyyatı qurum olan Dövlət Su Ehtiyatları agentliyi (DSEA) də Əhliman Kərimovla birlikdə öyrənmiş oldu. Baxmayaraq ki, yuxarıda qeyd etdiyimiz kimi, hələ bir il əvvəl biz bütün faktları yayımlamadan öncə aidiyyatı qurumlara da rəsmi sorğu şəklində göndərmişdik. Eyni zamanda, "DogruXeber.az" informasiya agentliyinin tabeliyində fəaliyyət göstərən bütün saytlarımızda və "Kanal14" YouTube kanalında yayımlamışdıq. Lakin, bir neçə gün əvvəl DSEA-nin facebook səhifəsi bu məlumatların şərh bölməsində bizdən əlaqə nömrəsi istədi. Saytın əlaqə bölməsində nömrəmiz qeyd olunsa da təkrar şərh bölməsində yenə qeyd etdik. Amma...

Bəli, düz anladınız, amma yenə susdular.

Bu müddətsiz sükutun səbəbi isə düz DSEA-nə qədər uzanır. Etibarlı mənbənin redaksiyamıza verdiyi məlumata görə Əhliman Kərimov Zaur Mikayılovun "oliqarx məmur" kimi tanınan, Londonda milyon dollarlıq villası və digər biznesləri ilə mətbuatda özünəməxsus yer tutan müavini Rafiq Aslanovun tələbə yoldaşı imiş. Yeri gəlmişkən, Tahir Xəlilovun da Zaur Mikayılovun məhz özünün keçmiş iş yoldaşı olduğu deyilir. Yəni, bir zamanlar "Bravo" super marketdə birlikdə işləyiblər.
Yəqin buna görədir ki, hər iki müdirin "kəsdiyi başa, sorğu yoxdur".

İndilik bu belədir, lakin ümid edirik ki, tezliklə qanunlar dövlətin büdcəsinə və dövlət qurumunun nüfuzuna zərər verən bu şəxsləri mühakimə edəcək.

Mövzunu davam etdirəcəyik.

Redaksiyamız hər kəsin söz haqqını tanıyır.

DogruXeber.az

"Burda həkimlər götürdükləri otağa görə pul verirlər... aylıq olaraq icarə üçün". Bu barədə dia-az.info-ya müraciət edən narazı vətəndaş bildirir ki, məhz buna görə də Bakıdakı "Aristokrat" tibb mərkəzindən qiymətlər astronomik həddədir.

"Biz həkimlərə haqq qazandırmırıq ki, qiymətlər buna görə bahadır. Həkimlər bunu bəhanə edirlər. Amma dövlət var... qanun var... Kimsə bu klinikadakı özbaşınalığa görə dövlət adına müdaxilə etməli deyilmi? Bu adamlar özbaşınadırmı?" deyən narazı vətəndaş daha sonra bildirir:

"Xəstələr də gəlir onlara pulla diş düzəltdirir. Deməli, kim qapıdan girir... hər şey burdan başlayır. Qapıdaca xəstədən 10 manat pul alırlar. Heç bilinmir həkim bu işi görə biləcək, ya bilməyəcək... 10 manat pul alırlar.

Təbii ki, xərclər tək bu deyil... Əgər dövlətin müvafiq qurumları bura müdaxilə etsə, hər şey ortaya çıxarar... Yəni bura bazardır... sağlamlığın satın alındığı.... bildiyiniz meyvə-tərəvəz bazarı..."

Abşeron rayonu, Saray qəsəbəsi, "Təzə məhəllə" sakini Rzayev Əli Hüseyn oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Baş prokuror Kamran Əliyevə müraciət edir:

"Hörmətli Baş prokuror!

Yazıb sizə bildirirəm ki, mən 12 aprel 2018-ci il tarixdən 2019-cu il fevral ayının 18-ə kimi Sabirabad rayonunun Qaraqaşlı kəndində fermer iş adamı Mirzəyev Sahib Tapdıq oğlunun idarə etdiyi balıq gölündə müqavilə ilə (ayda 400 manata) işləmişəm. Əmək haqqım yetişdirdiyimiz balıqlar böyüyüb satılandan sonra ödənilməliydi. Lakin balıq məhsulu satılıb qurtarandan sonra Mirzəyev Sahib mənə çatası 400 manat pulu vermək istəmir. Məni təhqir edir, “get hara istəyirsən şikayət et” deyərək, mənə ödəniləsi olan əmək haqqımdan boyun qaçırır.

Cənab prokuror, xahiş edirəm mənə kömək edin, müvafiq qurumlara tapşırıq verin.

Qeyd edim ki, Sabirabad rayon Polis şöbəsi şikayətimə baxmadı. Polis biz vətəndaşların yanında olmalı, saxtakar insanları müdafiə etməməlidir".

Məsələ ilə bağlı Mirzəyev Sahib Tapdıq oğlunun mobil nömrələri ilə əlaqə saxladıq. Telefonu açan şəxs nömrələrin Sahib adlı şəxsə aid olmadığını bildirdi. Şikayətçi isə deyir ki, nömrələr Sahibə məxsus olsa da, özünü gizlədir.