Yasamal rayonu, Ə.Ələkbərov küçəsi, 40 nömrəli evdə yaşayan İsmayılov Eyvaz Elçin oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi iddia edir ki, məhkəmələr onun uşağının ruhi xəstə olan dayısı ilə birgə yaşamasına qərar verib. Bu səbəbdən, o, qəzetimiz vasitəsilə Prezident İlham Əliyevə müraciət edir:

“Möhtərəm Prezident!

Mən, İsmayılov Eyvaz Elçin oğlu, diqqətinizə çatdırıram ki, 15 oktyabr 2016-cı ildə keçmiş yoldaşım Qasımova Safura Füzuli qızı ilə rəsmi nikaha daxil olmuşam. Nikahımızdan 17 dekabr 2018-ci il təvəllüdlü İsmayılov Elçin Eyvaz oğlu anadan olmuşdur. Yasamal Rayon Məhkəməsinin 09 mart 2023-cü il tarixli 2(004)-108/2023 nömrəli qətnaməsi ilə nigahımız ləğv olunmuş, azyaşlı övladımızın ananın yanında saxlanılması, məndən hər ay 220 manat sabit pul məbləğində aliment tutulub Qasımova Safura Füzuli qızına ödənilməsi qət edilib.

Mən övladımızın saxlanılması üçün rəsmi aliment məbləğindən daha çox vəsait xərcləyirəm, lakin ödədiyim vəsait mənim övladımın ehtiyaclarına, xüsusən də müalicəsinə xərclənmir.

Nikahımız ləğv edildikdən sonra keçmiş həyat yoldaşım Qasımova Safura Füzuli qızı övladımızla birgə ata evinə - Ucar rayonunun Qarabörk kəndinə qayıdıb. O, ata-anası və anadangəlmə ruhi xəstə, l-ci qrup əlil olan qardaşı Qasımov Abbas Fizuli oğlu ilə bir evdə yaşayır. Övladımız İsmayılov Elçin Eyvaz oğlunun sağlamlığında ciddi problemlər olduğu üçün mütəmadi müalicə almalıdır. Bakı şəhərində yaşayarkən mən övladımızın müalicəsi ilə mütəmadi məşğul olmuşam, anası onu özü ilə Ucar rayonunun Qarabörk kəndinə aparandan sonra mən və oğlum bu imkandan məhrum edilmişik.

Məni narahat edən digər məsələ isə keçmiş hayat yoldaşım Qasımova Safura Füzuli qızının qardaşı Qasımov Abbas Fizuli oğlu ilə bir evdə yaşamasıdır. Çünki, bu, başqa ailə üzvləri ilə bərabər həm də övladımızın hayatı üçün tahlükəlidir. Mən dəfələrlə Qasımov Abbas Fizuli oğlunun öz anasına əl qaldıraraq onu vəhşicəsinə, ölümcül döyməsi barədə məlumat almışam, həm də bunun şahidi olmuşam. Ona görə də, Yasamal Rayon Məhkəməsinə oğlum Elçinlə ünsiyyət qurmaq və onun anadan alınaraq mənim himayəmə verilməsinə dair iddia ərizələri ilə müraciətlər etmişəm. Yasamal Rayon Məhkəməsi mülki işləri rəy verilməsi üçün Yasamal Rayon İcra hakimiyyətinin Qəyyumluq və Himayəçilik Komissiyasına göndərmişdir. Mən iddia tələbimdə göstərdiyim xüsusatları sübut edən sənədləri və video-materialların komissiyanın üzvü Elçin müəllimə təhvil verməyim barədə sədr Təravət Muradovaya məlumat vermişəm. Bildirmişəm ki, 35 vərəqdən ibarət sənədi və 120 dəqiqəlik video-materialı Qəyyumluq və Himayəçilik Komissiyasının üzvü Elçin müəllimə əlbəəl vermişəm. Lakin bu sübutları təqdim edərkən hiss etdim ki, o insanın məndən təmənnası var, daha sonra bütün hərəkətləri bunu bütünlüklə sübüt etdi.

Məni Qəyyumluq və Himayəçilik Komissiyasının iclasına dəvət edərkən orada Təravət Muradova və Elçin müəllimlə bərabər cəmi 3 nəfər iştirak etmişdir. Lakin rəy Yasamal Rayon Məhkəməsinə göndəriləndə məlum oldu ki, Qəyyumluq və Himayəçilik Komissiyası mənim təqdim etdiyim sübutlara və video-materiallara istinad etməmişdir, nə də onları nəzərə almamışdır. Üstəlik, onları məhkəməyə göndərməyərək gizli saxlamışdır, rəyə heç bir sənəd və heç bir video-material əlavə edilməmişdir. Yasamal Rayon Məhkəməsi Qəyyumluq və Himayəçilik Komissiyasının rəyinə əsaslanaraq ədalətsiz qərar qəbul edib. Bununla da Yasamal Rayon İcra Hakimiyyətinin Qəyyumluq və Himyaçilik komissiyası mənim və azyaşlı övladımın hüquqlarını kobud surətdə pozmuş, həm də qəbul etdikləri sübutları gizlətməklə vəzifə cinayəti törətmişdir.

Yasamal Rayon İcra Hakimiyyətinin Qəyyumluq və Himayəçilik Komissiyasının mənə qarşı törətdiyi qanunsuzluqlarla əlaqədar mən Azarbaycan Respublikası Prezidentinin Administrasiyasının şöbə müdiri, hörmətli Zeynal müəllim Nağdəliyevin qabuluna gedərək, şikayət etmişəm. Bundan sonra Yasamal Rayon İcra hakimiyyətinin başçısı, hörmətli Elşad müəllimin qabulunda olaraq, şikayət etmişəm. Bu zaman Təravət Muradova Elşad müəllimə məlumat verdi ki, mənim onlara təqdim etdiyim sənədlər və video-materiallar haqqında cənab Zeynal Nağdəliyeva göndərilən arayışda yazılmışdır. Təravət Muradova faktiki olaraq sənədləri və videomaterialları qəbul etdiklərini etiraf etmişdir.

Cənab Prezident!

Yuxarıda göstərilənləri nəzərə alaraq Sizdən xahiş edirəm ki, Yasamal Rayon İcra Hakimiyyətində qəbul edilmiş sübutları Yasamal Rayon Məhkəməsindən daxil olmuş mülki işə əlavə etmədiklarinə və gizlətdiklərinə, bununla vəzifə cinayəti törətdiklərinə göra Yasamal Rayon İcra Hakimiyyətinin Qəyyumluq və Himyəçilik komissiyasının sədri Təravət Muradovanın və Komissiyanın üzvü Elçin adlı şəxsin barəsində tədbir görülsün. Məhkəmə rəylərinin şəkillərini Sizə təqdim edərək, dediklərimin hər birinin həqiqət olduğunu sübut edirəm”.

Redaksiyadan: Yazıda adları qeyd olunan şəxslərin mövqeyini dərc etməyə hazırıq.

Cəlilabad rayonu, M.P.Vaqif küçəsinin sakini Həsənov Umudəli Murtuz oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, Lənkəran və Cəlilabad rayon qaz istismar idarələri ona qarşı qanun pozuntularına yol verirlər:

“Mən, Həsənov Umudəli Murtuz oğlu, yazaraq sizdən xahiş edirəm ki, problemimi işıqlandırasınız.

Məlumat üçün bildirim ki, 1991-ci ildə yaşadığım ünvana təbii qaz xətti çəkdirmişdim. Ölkənin vəziyyəti ilə əlaqədar bir müddət qaz təmiantı dayandırılmışdı. 2012-ci ildə qaz xətti yenidən bərpa olundu və köhnə abonentlərin hər biri bu xəttə qoşuldu. Daha doğrusu, bizim evdən başqa bütün ünvanlar qazla təmin olundu. Bizim ev isə qazsız qaldı. Məsələ ilə bağlı müvafiq qurumlara müraciət etsəm də, heç bir rəsmi şəxs bununla maraqlanmadı”.

Şikayətçi deyir ki, Lənkəran və Cəlilabad rayon qaz istismar idarələrinin qanunsuz əməlləri səbəbindən, qaz xəttini şəxsi vəsaiti hesabına çəkdirməli olub: “Bu qurumların özbaşınalığı ucbatından oğlum bankdan pul götürüb, öz hesabına qaz çəkdirdi. Oğlum maşınyuma sexində maşın yuyaraq, çörək pulu qazanır. Bu pulla pensiya almayan ana-atasına və ailəsinə baxır. Evinə baxmayıb, qazandığl pulu bankı ödəsə ailəsi çarəsiz vəziyyətdə qalacaq. Bankı ödənişmək etməsə, cinayət işi açılacaq. Bu qədər haqsızlıq olmaz.

Bu sıxıntılar içində oğlumun intihar edəcəyindən qorxuram. Əgər belə hal baş verərsə, “Azəriqaz”ın Lənkəran Rayon Qaz İstismar İdarəsi və Cəlilabad Qaz İstismar İdarəsinin rəhbərləri məsuliyyət daşıyacaqlar”.

Redaksiyadan: Yazıda adları dərc olunan qurumların cə şəxslərin mövqeyini dərc etməyə hazırıq.

Zaman-zaman Lerik rayonunda çaylardan qum-çınqıl qarışığının daşınması səbəbindən sakinlərin narazılığı barədə yuxarı instansiyalara şikayətlər ünvanlanmış və həmin şikayətlər əsasında əlaqədar qurumların nümayəndələri, o cümlədən, Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin müfəttişləri tərəfindən ərazilərə baxışlar keçirilmiş və araşdırmalar aparılmışdır. Baxışlar zamanı şikayətlərdə göstərilən ərazilərdə fiziki və hüquqi şəxslərə məxsus qum-çınqıl istehsal edən karxana avadanlıqlarının olduğu aşkar edilmişdir. Həmçinin baxışlar zamanı fiziki və hüquqi şəxslər tərəfindən çaylarda qazıntı işləri aparılan müddətlərdə müvafiq qaydaların tələblərinin pozulduğu (firmalar üçün nayrılmış yataq sahəsinin konturlarından kənara çıxmalara yol verilməsi, yataqdan səmərəli istifadə olunmaması, sahələrdə hamarlama işlərinin aparılmaması və s.) müəyyən edilmişdir.. Nəticədə həmin ərazilərdə çay suları axın istiqamətini dəyişdiyindən, bəzi yerlərdə çay sahilinin intensiv yuyulması müşahidə olunmuşdur.

Lerik rayonunda bu kimi qanunsuzluqlara rəvac verən şəxslərdən biri də Milli Məclisin deputatı İqbal Məmmədovun qardaşı Çingiz Məmmədovdur. Ona məxsus “Kaspi Star” firmasına Ləkərçayda qazıntı işləri aparılan zaman müvafiq qanunların tələblərinə ciddi əməl edilməsi barədə xəbərdarlıq edilmiş, gələcəkdə belə halların təkrar olunması aşkar edilərsə, ciddi tədbirlərin görüləcəyi nəzərə çatdırılmışdır.

Amma görünən odur ki, Çingiz Məmmədov deputat qardaşına arxayın olaraq Ləkərçayda qazıntı işləri aparmaqda və qanunun tələblərini pozmaqda davam etməkdədir. Bildirilir ki, Çingiz Məmmədovun sahibi olduğu istehsalat vahidləri əsla vicdanlı vergi ödəyiciləri də deyillər.

Sentyabrın 27-si və 30-da Lerik rayonunun Piran kəndində Ləkərçay çayında aparılan qanunsuz qazıntı işlərini əks etdirən görüntüləri video-qeydə almışıq. Foto-qeydə aldığımız bir başqa görüntülər isə Vizəzəmin meşəbəyliyinin 23 saylı dolayında meşə ərazisində, ağacların qırılması hesabına açılmış ərazidə qanunsuz tikinti işlərinin aparıldığını göstərir. Hələlik bünövrə üzərində bir neçə daş hündürlükdə inşa olunmuş tikintinin təyinatı bilinmir. Amma bəllidir ki, tikinti Lerik Meşə Mühafizəsi və Bərpası Müəssisəsinin rəhbərliyinin “xeyir-duası” ilə həyata keçirilir. Əks təqdirdə, yəni, müəssisə rəhbərinə “hörmət” etmədən bircə daşı belə ikincinin üstünə qoymaq olmazdı.

Əlbəttə, bütün bu qanunsuzluqlar bu ilin iyul ayında 1 saylı Lənkəran Regional Ekologiya və Təbii Sərvətlər İdarəsinin rəisi vəzifəsinə təyin olunmuş Ceyhun Həsən oğlu Hüseynovun gözləri önündə baş verir. O, bu vəzifəyə qədər Dövlət Ekoloji Təhlükəsizlik Xidmətinin rəhbərliyində təmsil olunub və 10 saylı Regional Ekologiya və Təbii Sərvətlər İdarəsinin rəisi olub və fəaliyyətində yetərincə qanunsuzluqlara yol verib. Ceyhun Həsənov 1 saylı RETSİ-nin sabiq rəisi Şakir Quliyevin atasına rəhmət oxutdurur. Şakir Quliyev isə 11 saylı Bakı şəhəri üzrə Regional Ekologiya və Təbii Sərvətlər İdarəsinin Ətraf Mühitin Mühafizəsinə Nəzarət, ekoloji maarifləndirmə sektorunun, bioloji resurslar qrupunun baş məsləhətçi müfəttişi, qrup rəhbəri təyin olunub.

Göründüyü kimi, hər iki şəxs mənfi reputasiyaya malik olsalar da, himayədarları Vüqar Kərimov tərəfindən qorunurlar və yalnız sistem daxilində bir vəzifədən digərinə keçirilirlər. //azerinfo.info//

Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi Şuşa şəhərində otel-konqres mərkəzinin tikintisi üçün icazə verib.

Yenisoz.az yeniavaz.com-a isttinadla xəbər verir ki, bu barədə məlumat Tikintilərin Dövlət Reyestrində yerləşdirilib.

Məlumatda göstərilir ki, Dövlət Şəhərsalma və Arxitektura Komitəsi yanında Qarabağ Regional Memarlıq və Şəhərsalma Baş İdarəsi otel-konqres mərkəzinin tikintisinə 4 sentyabr 2023-cü il tarixli Tİ-33/23 saylı sənəd əsasında icazə verir.

Açıqlanan məlumatlarda göstərilir ki, 10 fevral 2023-cü il tarixində şəhərsalma sənədlərinə uyğunluq barədə 3-35-2/2-520/2023 saylı, həmçinin 14 mart 2023-cü il tarixində tikinti layihəsinə dair BER-22/082 saylı ekspertiza rəyləri verilib.
Bildirilir ki, tikintisinə icazə verilən otel-konqres mərkəzinin tikinti sahəsi 11 289,63 kv. metr, ümumi sahəsi 28 977,18 kv. metr, mərtəbələrinin sayı isə 4 olacaq.

Lakin, qeyd edək ki, ötən ay Şuşa şəhərində inşasına icazə verilən 4 mərtəbəli otel-konqres mərkəzinin təməli 2 il əvvəl 2021-ci ilin avqust ayının 29-da atılıb. Təxminən 2 il davam edən tikintidən sonra bu ilin may ayının 10-da Şuşa Otel-Konqres Mərkəzi Kompleksinin rəsmi açılışı olub.

Məlumat üçün onu da bildirək ki, Nazirlər Kabinetinin 12 yanvar 2015-ci il tarixli “Tikintilərin Dövlət reyestrinə daxil edilən məlumatların tərkibi, həmin məlumatların təqdim edilməsi və reyestrin aparılması Qaydaları”nın 4.2-ci maddəsində açıq şəkildə göstərilir ki, tikintiyə icazə verən orqan tikintiyə icazə verdiyi tarixdən 3 iş günü müddətində sənəd və məlumatları Reyestr kitabında qeydə alır.
Göründüyü kimi, Dövlət Şəhərsalma və Arxitektura Komitəsi otel-konqres mərkəzinin tikintisi başa çatdıqdan 3 ay sonra onun tikintisinə icazə verib.

“Kristal Abşeron” vətəndaşı yaşadığı evdən çıxarmaq üçün məhkəməyə müraciət edib.

DİA.AZ bildirir ki, Tribunainfo.az-ın əldə etdiyi məlumata görə, MTK məhkəmədə Habil Məmmədovla bağlı iddia qaldırıb. Prosesdə maraqlı şəxs isə “Azərbaycan Beynəlxalq Bankı”dır.

İşin mahiyyəti tərəflər arasında bağlanmış müqavilələrin ləğv edilməsi, mənzil mübahisələri və mənzildən çıxarılmadır. İşə 10 oktyabr tarixində Sumqayıt Şəhər Məhkəməsində hakim Şəbnəm Həxiyevanın sədrliyi ilə baxılacaq.

"Bakı Metropoliteni” Qapalı Səhmdar Cəmiyyəti (QSC) H.Aslanov stansiyasının dalan yollarında korroziyaya uğramış yük daşıyıcı konstruksiyaların bərpası işlərinin satın alınması ilə bağlı tenderə yekun vurub.

DİA.AZ Qaynarinfo-ya istinadla xəbər verir ki, tenderin qalibi Avro-Asiya İnşaat Korpoasiyası "Evrascon” Açıq Səhmdar Cəmiyyəti (ASC) seçilib. Tərəflər arasında bağlanacaq satınalma müqaviləsinin maliyyə dəyəri 31 677 740,95 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, Avro-Asiya İnşaat Korpoasiyası "Evrascon” ASC 30 aprel 2003-cü ildə qeydiyyata alınıb. Nizamnamə kapitalı 377 290 AZN olan şirkətin hüquqi ünvanı Bakı şəhəri Yasamal rayonu, Qurban Xəlilov küçəsi, ev 8-də yerləşir. ASC-nin qanuni təmsilçisi İsmiyev Həmzət İsmayıl-Əfədniyeviçdir.

"Evrascon” MMC baş nazirin keçmiş müavini Abid Şərifovun şirkəti kimi tanınır. Araşdırma materiallarında qeyd olunur ki, Abid Şərifovun həyat yoldaşı Sədayə Yaqub qızı "Evrascon” ASC-nin səhmlərinin 22 920 ədədinin (nizamnamə kapitalının 12,15 faizi) mülkiyyətçisidir. Abid Şərifov isə bu barədə mediaya açıqlamasında şirkətin qardaşına məxsus olduğunu bildirib.

Qeyd edək ki, Abid Şərifov 1995-2018-ci illərdə baş nazirin müavini vəzifəsində çalışıb.

Regionlarda ipoteka qaydalarının dəyişdirilməsi təklif olunur.

"İpoteka haqqında" qanuna fərqli yanaşmalıyıq. Bakıda da, regionlarda da eyni qaydadadır.
Bunu Milli Məclisin deputatı Siyavuş Novruzov bu gün keçirilən iclasda deyib.

O , qeyd edib ki, əgər gənclərin regionda qalıb işləməsini, ailə qurub yaşamasını istəyiriksə, ipoteka qaydaları dəyişdirilməlidir.

"Regionlarda əməkhaqqı Bakı ilə eyni deyil. Ona görə də ipotekada dəyişiklik etməliyik ki, gənclər regionlarda ev alıb, ailə qurub orada yaşasınlar", - deyə o,bildirib.

Bu barədə "Sherg.az"a danışan bank məsələləri üzrə ekspert Əkrəm Həsənov vurğulayıb ki, ipoteka ilə mənzillərin verilmə qaydaları kifayət qədər sadədir:

"Bütövlükdə ipoteka mexanizminin Azərbaycanda səmərəsiz olmasının səbəbi qeyri-şəffaflığıdır. Yəni bilinmir ki, kimə nəyə görə verilir, kimə isə nəyə görə imtina gəlir. Yaxşı olardı ki, ipoteka və kredit zəmanət fondu öz aktiv saytında bütün müraciət edənlərin məlumatlarını dərc etsin. Kimə kredit hansı qaydada verilibsə, saytda dərc olunsun. Müraciət edənlər də bilsinlər ki, doğrudanmı ədalətli qərar verilib. Bu, ən vacib məsələdir".

Ekspert qeyd edib ki , prinsipcə regionlarda daha güzəştli şərtlərlə, kreditin verilməsini təşkil etmək olar:
"Bu elə şərtlər olmalıdır ki, onun qaytarılmasında heç bir problem yaşanmasın. Məsələn, bir şəxsin əmək haqqı ödəniş etməyə çatmırsa, bu güzəştin olması doğru deyil. Güzəşt kimi birinci ilkin ödənişi azaltmaq olar. Yaxud kredit faizini regionlarda şəhərə nisbətən az faizlə təşkil etmək olar. Bir sözlə, güzəştlər elə tərtib edilməlidir ki, ödəniş vaxtı gəldikdə qaytarılmasında hər hansı çətinlik yaşanmasın".

“Rabitəbank”ın marketinq departamentində işçilərin kütləvi şəkildə iş yerlərindən ayrıldığı bildirilir...

DİA.AZ-ın məlumatına görə, Poliqon xəbər verir ki, “Rabitəbank”ın sosial şəbəkə seqmentlərində may ayında təntənəli şəkildə banka yeni PR ekspert olaraq məşhur “Manpasi” radio şousunun aparıcısı və prodüseri olan Səmra Əsgərzadənin gətərildiyi elan olunmuşdu. Lakin aldığımız son məlumatlara əsasən, ötən günlərdə sözügedən radio aparıcısı qalmaqallı şəkildə bankdan ayrılıb.

Əldə etdiyimiz məlumatlara əsasən, ekspert və rəhbərlik arasında yaşanan ciddi münaqişələr sadəcə, Səmra Əsgərzadə ilə kifayətlənməyib, digər əməkdaşların da iş proseduruna zərər vurub və nəticədə bankın marketinq departamentində işçilərin kütləvi şəkildə iş yerindən ayrılması və bankın rəhbərliyi ilə mübahisələrin yaşandığı bildirilir.

İddialara görə, işçilər İTV radiosunda prodüser və aparıcı olaraq çalışan Səmra xanıma xüsusi imtiyazlar göstərilməsinə qarşı irad bildiriblər. Səbəb isə bankda çalışdığı müddət ərzində Səmra Əsgərzadənin radioda olan fəaliyyətini davam etməsi, bununla bağlı rəhbərliyin işçiyə xüsusi şərait yaratması və sözügedən imtiyazların verilməsi ilı bank rəhbərliyinin əmək məcəlləsinin imperativ normalarını pozması və işçilər arasında ayrı-seçkilik edilməsinə şərait yaratması olub. Maraqlıdır ki, xüsusi imtiyazlar tanınan Səmra xanım daha sonra rəhbətliyin qərarı ilə işdən çıxarılıb.

Eyni zamanda, etibarlı mənbələrə əsasən Səmra Əsgərzadə ilə eyni anda dörd əməkdaş da ərizə yazaraq, işdən ayrılıblar. Bankın rəsmi saytında departament rəhbərləri ilə bağlı məlumat yer almasa da, paylaşılan videoda departamentin başında Orxan Salayev adlı şəxsin olduğu bilinir.

Xatırladaq ki, Səmra Əsgərzadə daha əvvəl Yelo Bankın marketinq departamentinin əməkdaşı olub.

Kütləvi işçi axını və təntənəli şəkildə radio aparıcısının banka gətirilən aparıcının daha sonra işdən çıxarılması isə əksəriyyət bank işçiləri üçün müəmma olaraq qalıb. Hadisəni araşdırmaq üçün sosial şəbəkələr üzərindən əlaqə qurmağa çalışdığımız əməkdaşlar isə bankdan ayrıldıqlarını və bu mövzulr haqqında ümumiyyətlə danışmaq istəmədiklərini bildiriblər. Qeyd edək ki, işdən ayrılması ilə bağlı sosial şəbəkə üzərindən Səmra Əsgərzadənun mövqeyini öyrənməyə çalışsaq da, o, sualımızı cavablandırmayıb.

Məsələ ilə bağlı “Rabitəbank”a sorğu yollasaq da, sorğumuza da cavab verilməyib.

Bütün halalrda bu məlumatda adı keçən şəxslərin və “Rabitəbank”ın mövqeyini dərc etməyə hazırıq.

Bakinin Xətai rayonu, Afiyəddin Cəlilov küçəsi - 11 k ünvanında fəaliyyət göstərən “Flora Holland” gül mağazası deyəsən, dövlət dilimizin Azərbaycan dili olduğunu unudub.

Əgər belə olmasaydı, endirimlə bağlı elanını ana dilimizdə yazmayıb rus dilində yazmağı və dilimizi “ikinci sort” yerinə qoymağı rəva bilməzdi.

flora-hoƏlbəttə, biz bilmirik bu mağazanın – şirkətin rəhbərliyi kimin əlindədir, kimdir sahibi, hansı millətin gen daşıyıcısıdır, amma bura Azərbaycandır və dövlət dilimizə hörmət etmək hər bir kəsin borcudur! Kimlər isə “ruskoyazıçnı” ola bilər və biz rusun dilini ana dilimiz səviyyəsində bilə bilərik, amma başqa millətin dilini təbliğ edib, ana dilimizi gözdən salmağa imkan verməməliyik.

Düşünürəm ki, “Flora Holland” da hansı ölkədə fəaliyyət göstərdiyinin fərqində olsa yaxşıdır.

Bu xalq, işğalda olan torpaqlarını ermənilərdən xilas etmək üçün minlərlə şəhid verib qəhrəmanlıq dastanı yazıb və o şəhid oğullar o torpaqları ona görə qanları ilə sulayıb Vətən etməyiblər ki, onların “ana dilini ağladıb”, əcnəbinin dilini başa çəksinlər!

Vətənə, dilimizə olan bu sevginin mənasını, anlamını dərk etməyənlər bunu anlasalar yaxşıdır!

Tezadlar.az

Şəmkir şəhəri, Səməd Vurğun küçəsi, ev 74 ünvanında yaşayan Nəbiyev Zilfiqar Hətəm oğlu tərəfindən "Hürriyyət" qəzetinin redaksiyasına şikayət məktubu daxil olub. Şikayətçi deyir ki, bacısı ona notarius vasitəsilə “ölüm kağızı” alaraq, qanunsuz olaraq ata evini başqa şəxslərə satıb:

"Mən, Nəbiyev Zilfiqar Hətəm oğlu, yazaraq sizdən xahiş edirəm ki, problemimin araşdırılamsına kömək göstərəsiniz.

Hal-hazırda sənədlərimdə ölü bir insanam. Öz bacım mənə saxta “ölüm kağızı” çıxartdıraraq, ata mülkünü bir necə şəxsə satmışdır.

3-cü qrup əlil, həm də Birinci Qarabağ Müharibəsinin veteranıyam. 2 övladım var, biri yanımda yaşayır.

İllərlə Rusiyada yaşamışam, elə bundan da istifadə edən bacım mənə “ölüm kağızı” çıxartdıraraq torpağımı mənimsəyib satıb. Şəmkir notariusuna gedəndə məni lağa qoyub gülürlər ki, "ölü gəlib".

Rusiyaya gedib işləməyimə səbəb də bacılarım olub. Başımı götürüb getmişəm. Azərbaycanda olduğum müddətdə bacılarımla dalaşırdıq, məni tutdururdular. Dəfələrlə tutulub çıxırdım, yenə eyni hadisələr davam edirdi. Bu səbəbdən də illərlə Rusiyada yaşadım, evimin satılmağından, “ölü” olmağımdan bixəbər.

Rusiyada işlədiyim müddətdə yaxşı insanlarla tanış oldum və həmin insanlar satılan ata torpağımda mənə ev tikdirdilər. Övladlar arasında bölünən bu torpaq hərəyə 6 sot düşürdü, həmin 6 sotda mən ev tikdirdim. Nəbiyeva Hicranın qanunsuz satdığı torpaqda hal-hazırda yaşanlar Duraxanov Əli, Duraxanov Şəhla və s. qohum əqrabaları tez-tez evimə gəlib məni və uşağımı təhqir edir, döyürlər ki, çıx bu evdən, biz bu evin pulunu vermişik. Pulu alıb yeyən Hicrana söz demirlər, yiyəsiz məni görüb, mənim üstümə düşürlər.

Yoldaşımla bacım əlbir olub, torpağı satıblar. Daha sonra bacım və qonşular ailəmi yola vermədiyindən, yoldaşım evdən gedib. Uşağın biri anası ilə qalmadı, məni tək buraxmadı, gəlib yanımda yaşayır. Mən öz canımdan yox, onsuz da “ölmüşəm”, uşağımdan qorxuram. Uşağımı qonşunun uşağı təpiklə vuraraq, kor bağırsağını partladıb. Evimi alan və qonşuluğumda yaşayan şəxslər evimə gələn su borusunu qırıb. Evə 6 nəfər basqın etdi, körpə uşağımı və məni döydülər ki, çıxın evdən. Təpiklə necə vurdularsa, qolum sındı. Sübutlarım da var, amma polis işimə baxmır. Mən sabah cinayət etsəm, “ölü adam” kimi tutulacam, amma məni öldürmək istəyənlər “at oynadırlar”.

Mən sizin qəzet vasitəsilə sual verirəm: ay polislər, mən kimisə öldürsəm yenədə məni heçə sayacaqsız, yoxsa onda qanunla gəlib həbs edəcəksiz? Döyülməyimlə bağlı ekspert kağızım var, uşağım döyülür, niyə məni anlayan yoxdur?!

Qonşuluqda yaşayırlar, biri üstümə gələn kimi hamısı yığılır gəlir. Təkəm, yaşım o yaş deyil ki, onlara cavab verim. Əri yanında olan qadınlar əxlaqsız söyüşlər söyür, məni təhqir edirlər. Onun ərinin gücü çatıb susdura bilmirsə, mən yad kişi nə edim elə insanlara?!

Oğlum məktəbdə oxuyur, savadlı uşaqdı, amma yaşayış yerim yoxdur ki, onu yanımda məktəbə qoyum, təhsilinə davam etsin”.


P.S. Maraqlısı odur ki, 2016-ci ildə kimlik alan şəxs hələ də Əmlak Komitəsində və notariusun sənədləşməsində “ölü” kimi göstərilir. Təsəvvür edin, hal-hazırda bu insan yaşadığını sübüt edib, torpağını ala bilmir. İllərdir məhkəmələr davam edir, amma nəticə yoxdur. Deməli, Əmlak Komitəsi ilə notarius əlbir olub, bir insanın həyatını məhv ediblər. Belə çıxır ki, bizim daxili mübarizəmiz ermənilərlə mübarizədən daha çətin olacaq.

Redaksiyadan: Yazıda adları qeyd olunan şəxslərin mövqeyini dərc etməyə hazırıq.