"Şuşa Şəhər İcra Hakimiyyətinin başçısı Bayram Səfərovun keçirdiyi tenderlərin bir qismini oğlu udub". Dia-az.info xəbər verir ki, bu barədə məlumatı tanınmış araşdırmaçı jurnalist Cavanşir Həsənli paylaşıb.

Jurnalist yazır: "Məsələn, Şuşa işğaldan azad olduqdan sonra - 2021-ci ildə Bayram Səfərov 3 lot üzrə dövlət sifarişini oğlu RUFİS SƏFƏROVA məxsus "KƏKLİK" MƏHDUD MƏSULİYYƏTLİ CƏMİYYƏTİnə verib. Yəni Şuşa azad olandan sonra oğlunu "QALIB" elan edib.

DÖVLƏT SİFARİŞİNİ DANA BASDIRMASI KİMİ KƏKLİKOTU DA VURUB TƏNDİRARASI (OXU: TENDER) YEMƏK NECƏDİR?

Cənablar, yeyəndə ağzınızı heç olmasa salfetka ilə silin".

Azərbaycan təhsilində ciddi problemlərin olduğu cümlə aləmə məlumdur və hər birimiz demək olar ki, hər gün övladlarımızın timsalında çətinlikləri görə bilirik.

İstər dərs yükünün ağır olması, istər məktəblərdə tədris prosesinin çatışmazlıqları və problemlər siyahısına əlavə edə biləcəyimiz bir çox çatışmazlıqlar təhsilimizdə təcili islahatlara ehtiyac yaradıb. Amma Elm və Təhsil Nazirliyi mövcud problemləri həll etməkdə o qədər də maraqlı görünmür. Yaxud ola bilsin ki, Nazirliyin təhsilə ayırmağa vaxtı yoxdur.

Elm və Təhsil Nazirliyi daxilində baş verənlərlə bağlı əldə etdiyimiz məlumat səbəbin ikinci olduğunu – nazirliyin təhsilimizə ayırmağa vaxt tapmadığını deməyə əsas verir. Çünki nazirlikdə təhsilin keyfiyyətinin yaxşılaşdırılması uğrunda addımların atılması əvəzində, daxili qarşıdurma yaşanır.

Nüfuz savaşı adlandıra biləcəyimiz bu mübarizə haqda əldə etdiyimiz məlumatlar “Elm və Təhsil Nazirliyi təhsildən başqa hər işlə məşğuldur” sualını yaradır.

Məlumatlara görə, Nazirliyin Aparat rəhbəri Mətin Kərimli ilə nazir müavini Həsən Həsənli arasında “nüfuz savaşı” daha da qızışıb. Əsas mübarizə motivi kadrların təyin edilməsidir. Həsən Həsənli Prezident İlham Əliyevin Sərəncamı ilə bu vəzifəyə təyin olunub və onun əsas işi-missiyası kadr siyasətini həyata keçirməkdir.

Aparat rəhbəri Mətin Kərimli isə “Elm və Təhsil Nazirliyində mənəm, Bağdadda kor xəlifə” prinsipi ilə yanaşır, Nazirlikdə bütün strukturları ələ almağa çalışır.

Həsən Həsənli Mətin Kərimlinin kadr siyasətinə qarışdığını, onun işinə müdaxilə etdiyini dəfələrlə rəhbərliyə bildirib. Baş verənlərdən təhsil naziri Emin Əmirullayevin də məlumatlı olması heç kəsə sirr deyil. Çünki Həsənli Həsənli dəfələrlə Mətin Kərimlinin əməlləri ilə bağlı birbaşa nazirə etirazını bildirib. Elm və Təhsil nazirinin müavini olan Həsən Həsənli Aparat rəhbəri Mətin Kərimlinin kadr siyasəti ilə razılaşmır, onun texniki vəzifə daşıdığını deyir.

Məlumatlara görə, bu məsələ Nazirliyin qapalı iclaslarında dəfələrlə müzakirə edilib. Həsən Həsənli bildirib ki, o, bu vəzifəyə Prezidentin Sərəncamı ilə təyin olunub və Nazirlikdə kadr işlərinə cavabdeh şəxsdir, ancaq Mətin Kərimli onu saymır və kadr işlərinə müdaxilə edir.

Mətin Kərimli isə bütün strukturları ələ almağa çalışdığı kimi, kadr məsələsini də nəzarətə götürmək istəyir.

Hazırda Mətin Kərimli ilə Həsən Həsənli arasında “soyuq müharibə” davam edir.

Kimin “qalib” gələcəyini demək çətindir, lakin “məğlubun” təhsilimiz olduğu aşkar şəkildə ortadadır. Çünki təhsildən məsul olan Nazirlik əsas işini kənara atıb, daxili qarşıdurmaların, “nüfuz müharibə”lərinin platformasına çevrilib.

Demokrat.az

Beyləqan rayon Mərkəzi Xəstəxanasının baş həkimi Şahlar Hüseynov Beyləqan şəhəri, Sevil Qazıyeva küçəsində qanunsuz obyekt tikdirir...

Poliqon.info xəbər verir ki, bu burədə Facebook sosial şəbəkəsində “Beyləqan Xəbərləri” səhifəsi məlumat yayıb.

Məlumatda bildirilir ki, Şahlar Hüseynov baş həkim təyin edildikdən sonra Sevil Qazıyeva küçəsində 2 mərtənbəli obyekt tikdirməyə başlayıb. Obyektin tikintisi üçün isə Dövlət Şəhərsalma və Arxitektura Komitəsinin icazəsi yoxdur. Bildirilir ki, baş həkim obyektin tikintisi üçün icazəni Beyləqan rayon icra hakimiyyətindən hansısa yollarla “alıb”.

Qeyd edək ki. məsələ iləbağlı Poliqon Beyləqan rayon Mərkəzi Xəstəxanasının baş həkimi Şahlar Hüseynova sorğu ilə müraciət edib. Sorğudan sonra Şahlar Hüseynov redaksiyamıza zəng edərək bildirib ki, tikilən obyektin sənədi var və bu iki mərtəbəli bina heç də qanunsuz tikilmir. Biz ondan sənədin surətini redaksiyamıza təqdim etməyi xahiş eləsək də, baş həkim sorğumuzu cavabsız buraxdı.

Qeyd edək ki, Dövlət Şəhərsalma və Arxitektura Komitəsinin Tikintilərin Dövlət Reyestrində Beyləqan şəhəri, Sevil Qazıyeva küçəsində 2 mərtənbəli obyektin inşası ilə bağlı heç bir məlumat tapa bilmədik.

Məsələnin maraqlı tərəfindən biri də odur ki, redaksiyamıza zəng edərək tikilən binanın qanunsuz olmadığını bildirən Beyləqan rayon Mərkəzi Xəstəxanasının baş həkimi Şahlar Hüseynov faktiki olaraq bizneslə məşğul olduğunu etiraf etmiş oldu. Bu isə artıq TƏBİB-in bu etirafa hansı prizmadan yanaşacağı ilə bağlı məsələdir. Ümid edirik ki, istər TƏBİB, itərsə də baş həkim məəsələyə daha ətraflı şıkildə aydınlıq gətirər.

Rusiyada "Krokus" konsert zalında, İranda Kirman şəhərində anım yürüşündə terror törədilirsə, şimal və cənub qonşularımızdan fərqli olaraq, Azərbaycan təhlükəsizlik adası olaraq nümunəvi dövlətdir. Lakin bizim ölkəmizdə olan "terror" və "təhlükəsizlik" problemi qida sektorundadır. Respublikada "qida terroru" ən dəhşətli şəkildə tüğyan etməkdədir. Buna şərait yaradan isə müftəxor, korrupsioner, xalqın övladlarının genefonduna qənim kəsilmiş "qida terrorçu" su olan məmurlardır. Bir qədər sonra təqdim edəcəyimiz faktlar Niderlandda, Avstriyada, Yaponiyada açıqlansaydı, nəinki bu cinayətə qol qoyan məmurlar işdən qovulardılar, ən ciddi rejimli cəzaçəkmə müəssisəsinə göndərilərdilər. Amma Azərbaycanda toxunulmaz şəxs kimi özlərini aparan bu yırtıcı məmurların xalqa düşmən kəsilməsi ucbatından hər gün milyonlarla insan orqanizmə zərərli, ağır xəstəliklər yaradan, onkoloji problemlərə yol açan qidalardan istifadə edir. Bəs, deyə bilərsiniz ki, konkret olaraq nəyi nəzərdə tutursunuz? Gəlin onda tanış olaq:
Əvvəla, Azərbaycan yeyinti məhsulları istehsal etsə də, əsasən idxaldan asılıdır. Yəni "Azərsun", "Milla" və bazarda digər qida istehsal edən müəssisələr mövcuddur. Hərçənd onların istehlakçıya təklif etdiyi məhsullar da keyfiyyətli deyil. Lakin əsasən qida məmulatları xaricdən idxal olunur. Bunu marketlərin vitrinlərində hər gün müşahidə edirik. Amma ölkəyə gətirilən məhsulların nə dərəcədə keyfiyyətli olduğunu söyləmək gülməli olar. Çünki Rusiya, İran və digər ölkələrin "üçüncü respublikalar üçün" istehsalı olan məhsulları gətirilir. Təbii ki, buna nəzarət iki qurumun üzərindədir - Dövlət Gömrük Komitəsi və Qida Təhlükəsizliyi Agentliyi...
Hazırda hər iki orqan xalqa zəhərli, xəstəlik mənbəyi olan və övladlarımızın inkişafına zərbə vuran məhsulların idxalına şərait yaradır. Biri gömrükdən zay malları buraxır, digəri də həmin qidanın keyfiyyətini və təhlükəsizliyini başdansovdu yoxlayıb yola verir. Bununla da məlum olur ki, gömrük şefi Şahin Bağırov və qida təhlükəsizliyinə cavabdeh Qoşqar Təhməzli Azərbaycan xalqına zəhər yedirir. Anaxeber.info bildirir ki, bu iddianı biz səsləndirmirik, Huriyyet TV efirində aparıcı və verilişə səs göndərərək faktlar təqdim edən bir yük maşını sürücüsü təsdiq edirlər. TIR sürücüsü bildirir ki, Rusiyadan Azərbaycana 100 tonluq yağ gətirilib. Ancaq məhsulun nəinki marqarin olduğu, ümumiyyətlə, marqarinin əvəzləyicisi olduğu üzə çıxıb. Belə desək, bir var zay məhsul, bir də var zir-zibil... Sürücü bu barədə xəbər tutanda səbəbini soruşub, ona cavab verilib ki, tort bişiriləcək. Hər halda, bütün ölkə tort yemir ki, bu qədər marqarin əvəzi bir öldürücü yağa tələbat olsun. Həmin məhsul gömrükdən keçirilib və "Meyvəli"yə gətirilib, oradan da satış məntəqələrinə paylanıb. Bu qədər sadə bir "qida terroru" və nə Şahin Bağırov, nə də Qoşqar Təhməzli bu cinayətdən narahat olurlar. Axı özləri və yaxın çevrələri bu yağlardan istifadə etmir, niyə də veclərinə olsun ki?!
Sürücü həmçinin, başqa məhsullar haqda da oxşar məlumatları canlı efirdə açıqlayıb. Və görünən budur ki, tükürpədici qida cinayətləri törədilir, di gəl, aidiyyatı orqanlar göz yumur, millətin apteklərdə, xəstəxanalarda qalmasına rəvac verir. Bu, birbaşa cinayət məsuliyyəti yaradır və araşdırma aparılmasını zəruri edir. O baxımdan aparıcı efirdə Baş Prokuror Kamran Əliyevə müraciət edərək bu istiqamətdə təhqiqat aparılmasını xahiş edib. Jurnalist bildirib ki, gömrük şefi Bağırov və agentlik sədri Təhməzli barəsində yoxlama olmalıdır. Hər iki məmur xaricdən idxal olunan keyfiyyətsiz məhsulların bazarlara çıxmasına şərait yaradırlar. Halbuki əhali və dövlət onlara güvənib, inanıb ki gömrük və qida agentliyi bu sahəyə nəzarət edir. Onlar isə...

Anaxeber.info

Rusiya və onun satelliti Ermənistan arasında informasiya savaşı davam edir. Hələ ki “qərbçi” baş nazir Nikol Paşinyanın Qərblə oyunu sonuncunun ümidlərini və gözləntisini doğrultmayıb, İrəvanın Rusiya orbitindən uzaqlaşması baş verməyib.

Bunu o vaxt söyləmək mümkün olacaq ki, Ermənistandan Rusiya hərbi kontingenti çıxarılacaq, onun xarici sərhədlərini ruslar yox, öz hərbçiləri qoruyacaq.

Moskva-İrəvan münasibətlərinin gələcəyindən danışan rusiyalı ekspert Aleksey Martınov hesab edir ki, Kreml hələlik heç bir kəskin addım atmayacaq. “Çünki Rusiya, ümumiyyətlə, emosional düşüncələrə meylli deyil, baxmayaraq ki, Paşinyanın yeni Qərb dostları tərəfindən fəal şəkildə təhrik olunur. Rusiyanın Cənubi Qafqazdakı hərbi mövcudluğuna gəlincə isə xatırlatmaq istərdim ki, Ermənistan ərazisində - Gümrüdə Rusiya hərbi bazası var və bu, təkcə Rusiyanın mövcudluğunu deyil, həm də bütün regionun təhlükəsizliyini təmin edir. Baxmayaraq ki, Ermənistan Azərbaycanla münaqişə vəziyyətindədir və hələ də sülh müqaviləsi imzalanmayıb, əminəm ki, Rusiya regionda öz hərbi mövcudluğunu qoruyacaq”.

Lakin onun sözlərinə görə, baza məsələsi yenidən gündəmə gəlsə, o zaman çox güman ki, Rusiya onu Qarabağ ərazisinə keçirəcək. “Rusiya istənilən digər münaqişədə olduğu kimi, bu münaqişədə də heç kimin tərəfini tutmur, lakin Kreml regionda olmasını tələb edən geostrateji maraqlarını müdafiə edir və bu, təmin olunacaq”, - rusiyalı ekspert özündənrazı şəkildə əlavə edib.

Rusiyanın Gümrüdəki hərbi bazası, sən demə, təkcə Rusiyanın mövcudluğunu deyil, həm də bütün regionun təhlükəsizliyini təmin edirmiş. Bəlkə əksinədir?

İkinci yandan, Azərbaycan Rusiyanın bir quberniyasıdırmı ki, Gümrüdəki bazasını götürüb Qarabağa köçürsün? Martınov Bakının buna razılıq verəcəyini haradan bilir? Azərbaycan öz ərazindən xarici hərbi qüvvələri tam çıxarmağa çalışdığı halda Qarabağda rus hərbi bazası necə yerləşə bilər? Üstəlik, Azərbaycanın Konstitusiyası, Hərbi Doktrinası da buna izn vermir. Ondansa Bakı elə qardaş Türkiyənin hərbi bazasına razılıq verər.

Bu nədir, bir rus ekspertinin sadəlövhlüyü, nəbz yoxlanışı, yoxsa Bakıya mesaj?

Hərbi ekspert, polkovnik Rövşən Məhərrəmov “Yeni Müsavat”a bildirdi ki, rusiyalı siyasi ekspert Aleksey Martınov 2020-ci ildə 44 günlük İkinci Qarabağ müharibəsi dövründə, müharibədən öncə və sonrakı zamanlarda Azərbaycan əleyhinə daim çıxışlar edib və ermənipərəst siyasi ekspert kimi tanınır: “Martınov hər zaman erməni ekspertlərlə bir sırada Azərbaycanın əleyhinə çıxışlar etməsi ilə seçilir. Rusiyadakı siyasi ekspertlərin əksəriyyəti Rusiya siyasi hakimiyyətinin nəzarəti altında olan insanlardır. Onlara hansı məsələ barədə və necə danışmaq barədə sifarişlər, təlimatlar verilir. Güman etmək olar ki, bu dəfə Azərbaycanın nəbzini yoxlamaq üçün Aleksey Martınovun dili ilə Gümrüdəki hərbi bazanın məsələsi o şəkildə ictimailəşdirilib. Güman ki, Martınov ona verilən göstərişə uyğun həmin fikirləri bildirib. Rusiyanın 102-ci hərbi bazası Ermənistandan çıxarılmasa belə, Moskvanın digər hərbi bazalarını Cənubi Qafqazın daha iki ölkəsi olan Azərbaycan və Gürcüstanda yerləşdirməsi arzusu və planı həmişə olub, bu gün də var. Qarabağdakı sülhməramlıların orada qalma müddətinin bitəcəyi tarix yaxınlaşdıqca, Rusiya bölgədə hərbi mövcudluğunu başqa ad altında qoruyub saxlamaq, başqa ad altında daha da genişləndirmək barədə düşünür. Martınova nəbz yoxlaması üçün verilən sifariş də bununla əlaqədardır. 102-ci hərbi baza Ermənistan ərazisini tərk etməyəcək. Çünki Rusiyanın belə bir planı yoxdur və Ermənistan dövlətinin də Rusiyanı buna məcbur etmək gücü, imkanı yoxdur. Ermənistanın Rusiya ilə imzaladığı razılaşmalardan biri də 102-ci hərbi bazanın Gümrüdə qalma müddətinin 2045-ci ilə qədər uzadılmasıdır. Bu reallıq ortada olmasına baxmayaraq, Aleksey Martınova məlum açıqlamanı vermək təlimatı verilibsə, bu bir daha təsdiqləyir ki, Rusiya nəbz yoxlaması edir. Çünki Rusiya siyasi və hərbi rəhbərliyi Qarabağda və ya Cənubi Qafqaz ölkələrinin başqa hər hansı ərazisində hərbi iştirakı başqa bazaları vasitəsilə gerçəkləşdirmək istəyir”.

Ekspert vurğuladı ki, Azərbaycanın belə bir plana razılıq verməsi isə mümkün deyil. Azərbaycanın Hərbi Doktrinası, Milli Təhlükəsizlik Konsepsiyası və Konstitusiyası da Rusiya hərbi bazasının Azərbaycan ərazisində yerləşdirilməsinə imkan vermir: “Azərbaycan gələn ilin noyabrında Rusiya sülhməramlı qüvvələrinin ərazimizi tərk etməsi üçün 6 ay öncədən rəsmi məsələ qaldırmalıdır. Verilmiş rəsmi açıqlamalardan belə nəticəyə gələ bilərik ki, Bakı bu məsələdə qəti mövqedədir.

Martınovun çıxışı Azərbaycana qarşı təxribatçı çıxışdır. Azərbaycanın öz siyasəti var və belə təxribatçı nəbz yoxlamaları heç nəyi dəyişən deyil. Cənab Prezidentimiz də çıxışlarında bir neçə dəfə bəyan edib ki, 10 noyabr üçtərəfli bəyanatında əksini tapan müddət başa çatanda sülhməramlı kontingent Azərbaycan ərazisindən çıxacaq. Prezident İlham Əliyev bunu hətta Xankəndi separatçılardan azad edilməmişdən öncəki dövrdə demişdi. Sülhməramlı qüvvələrə ötən ilin sentyabrından sonra ümumiyyətlə ehtiyac qalmayıb. Sadəcə olaraq, Azərbaycan öz imzasına hörmət edən ölkə olaraq davranır, üçtərəfli bəyanatdakı müddətin başa çatmasını gözləyir".

İmişli rayonu Qulubəyli bələdiyyəsinin sədri vəzifəsini icra edən Nağıyev Qalib tərəfindən ölkə rəhbərliyinə müraciət ünvanlanıb. Müraciəttdə deyilir:
"Şikayətim Ali Məhkəmənin Mülki kollegiyasının Hakimi Elşanə Vəliyeva barəsindədir.
Şirvan Apelyasiya Məhkəməsinin 29 noyabr 2023-cü il tarixli 2(106)-1813/2023 saylı qətnaməsindən sabiq Bələdiyyə sədri cavabdeh Mirvəli Tağıyev tərəfindən verilmiş kassasiya şikayəti 14 fevral 2024-cü il tarixdə Ali Məhkəmənin Mülki kollegiyasının Hakimi Elşanə Vəliyevanın icraatına daxil olmuşdur 23 fevral 2024-cü il tarixdə işə tərəflərin iştirakı olmadan yazılı icraat qaydasında baxılacağı barədə tərəflərə rəsmi bildiriş göndərilmişdir.Ancaq xeyli müddət keçməsinə baxmayaraq sözügedən 2(102)-1221/2024 saylı işə baxılmayaraq qanunla müəyyən olunmuş 3 ay müddətin tamam olmasına az qalmış baxılacağı təsəvvürü yaranmışdır.Bu fakt isə qarşı tərəfin sifarişi əsasında bu il keçiriləcək Bələdiyyə seçkilərinə qədər vaxtı süni surətdə uzatmaqdan ibarətdir.
25 aprel 2022-ci il tarixdə cavabdeh İmişli rayonu Qulubəyli Bələdiyyəsinin sədri vəzifəsindən azad edilmişdir.Ancaq cavabdeh qanunun tələblərinə əməl etməyərək Bələdiyyənin möhür-ştamp və maliyyə sənədlərini Bələdiyyəyə təhvil vermədiyinə görə 01 iyul 2022-ci il tarixdə İmişli rayon Məhkəməsinə iddia ərizəsi ilə müraciət etsəkdə Qulubəyli Bələdiyyəsinin iddia tələbi 09 fevral 2023-cü il tarixdə təmin olundu.Artıq 22 aydır ki, aidiyyəti üzrə işə baxan Məhkəmələr möhür-ştamp və maliyyə sənədlərini cavabdehdən alıb Qulubəyli Bələdiyyəsinə təhvil verilməsinə müxtəlif bəhanələr gətirərək qəsdən süründürməçilik edirlər.20 aydan sonra sözügedən iş baxılması üçün Ali məhkəmənin Mülki kollegiyasına daxil olsada Hakim Elşanə Vəliyeva işə baxmağa tələsmir.
Əslində cavabdeh tərəfindən verilmiş kassasiya şikayəti əsassız və qanunsuz olduğundan baxılmadan geri qaytarılmalıydi.Belə ki, cavabdehin verdiyi kassasıya şikayətinin əsasını Qulubəyli Bələdiyyəsinin 25 aprel 2022-ci il tarixli iclas protokolunun saxta olduğu iddiası təşkil edir.Cavabdeh Mirvəli Tağıyevi Bələdiyyə sədri vəzifəsindən azad edib, möhür-ştamp və maliyyə sənədlərinin ondan alınıb Qulubəyli Bələdiyyəsinə təhvil verilməsinə əsas olan Bələdiyyənin sözügedən iclas protokolunu qərarını,əgər cavabdeh qanunsuz hesab edirsə belə olan təqdirdə niyə bu günə qədər Qərarın ləğv edilməsi barədə iddia ərizəsi ilə Məhkəməyə müraciət etməmişdir? Ona görə ki, həmin qərarın ləğv olunması üçün cavabdehin əsaslanacağı təkzibedilməz və mötəbər sübutlar yoxudr.
Məlumat üçün bildirirəm ki,cavabdeh Mirvəli Tağıyev Qulubəyli Bələdiyyəsində və digər yerdə törətdiyi cinayət əməllərinə görə 230440055 nömrəli cinayət işi üzrə cinayət məcəlləsinin çoxsaylı maddələri ilə ona ittiham verilərək təqsirləndirilən şəxs qismində cinayət məsuliyyətinə cəlb olunmuşdur. Hazırda Lənkəran Ağır Cinayətlər Məhkəməsində onun barəsində geniş Məhkəmə istintaqı aparılır.Ancaq təqsirləndirilən şəxs M.Tağıyev bu gündə Qulubəyli Bələdiyyəsinin möhür və sənədlərindən qanunsuz istifadə etməkdə davam edir.
Bir müddət əvvəl cavabdeh 77 yaşlı qoca Mirvəli Tağıyevlə sözügedən Qulubəyli Bələdiyyəsinin möhürü ilə əlaqədar onunla mübahisə əsnasında mənə bildirdi ki, Şirvan Apelyasiya Məhkəməsinin Qətnaməsini ləğv etdirmək üçün Ali Məhkəmədə işə baxacaq hakimə lazimi qədər rüşvət verəcəyini,ancaq möhürü mənə heç bir vaxt verməyəcəyini bildirdi.
Xahiş edirəm müraciətim barəsində qanuni tədbir görülsün".

azerbaycanrealligi.com

Daşkəsən rayonu, Məmməd Əsədov küçəsi, ev 5-də yaşayan Məmmədova Zenfira Fəxrəddin qızı və Məmmədova Vüsalə Qabil qızı tərəfindən “Hürriyyət” qəzetinin redaksiyasına şikayət məktubu daxil olub. Şikayətçilər iddia edirlər ki, İcra Hakimiyyəti tərəfindən onlara qarşı haqsızlıq edilir:

“Biz, Məmmədova Zenfira Fəxrəddin qızı və Məmmədova Vüsalə Qabil qızı, yazaraq sizdən xahiş edirik ki, problemimizi işıqlandırasınız.

Kasıb ailəyik, 10 aydır evimiz təbii fəlakət nəticəsində uçaraq, yarasız hala düşmüşdür. Fövqəladə Hallar Nazirliyi bizi çadıra çıxardı. 4 ay çox əziyyətli günlər keçirdik.

Müraciətlərimizdən sonra İcra Hakimiyyətindən bizim kirayə pulları ödənildi və kirayə evə çıxdıq. Evimizə Gəncə şəhərindən icra nümayəndələri gəlib baxış keçirdilər. Onlar saxta sənədləri qüvvəyə mindirib, evin köhnəldiyini, istismar vaxtının keçdiyini yazıblar. Gedib bu quruma müraciət edirik, deyirlər ki, bizlik deyil, İcra Hakimiyyətindən necə tapşırıblar, elə də yazmışıq.

Bir neçə ailə olaraq, evsiz qalmışıq. Kirayə pulunu da bu aydan dayandırıblar. Bizə deyirlər ki, gedin çadırda qalın.

Bu qədər haqsızlıq olar? Dərdimizi deməyə yer yoxdur. İcra Hakimiyyətindən bizə deyirlər ki, hara şikayət etsəniz də, xeyri yoxdur. Həqiqətən də üz tutduğumuz saytlardan şikayətlərimiz silinir. Bu qədər başımıza oyun açırlar. Səlahiyyətli qurumlardan xahiş edirik ki, bizə kömək edin”.

Məsələ ilə bağlı Daşkəsən Rayon İcra Hakimiyyəti ilə əlaqə saxlamağa çalışsaq da, zənglərimiz cavabsız qaldı.

Redaksiyadan: Yazıda adları qeyd olunan qurumların mövqeyini dərc etməyə hazırıq.

Azərbaycan Mərkəzi Bankı (AMB) avto-icbari sığorta üzrə şikayət indeksini açıqlayıb.

İqtisadiyyat.az xəbər verir ki, şikayət indeksi ötən ilin aprelindən bu ilin mart ayına qədər olan dövrü əhatə edir.

Belə ki, ən çox şikayət edilənlər arasında “Xalq Sığorta” 4,27, “Bakı Sığorta” 2,57 və “AtaSığorta” isə 1.62 indekslə ilk üçlükdə qərarlaşıb.

Bundan əlavə, “Paşa Sığorta” 0,93, “Atəşgah Sığorta” 0,90, "Meqa Sığorta" 0,64, "Qala Sığorta" 0,50 və "Azərbaycan Sənaye Sığorta" 0,40 indekslə şikayət olunanlar sırasında yer alıb.

Qeyd edək ki, avto-icbari sığorta üzrə şikayət indeksi vətəndaşların bu növ üzrə sığorta xidmətlərini əldə edərkən seçim etmələrinə dəstək göstərilməsi məqsədilə hesablanılır və yayımlanır. Şikayət indeksinin hesablanmasında beynəlxalq səviyyədə istifadə olunan metodologiyaya əsaslanaraq avto-icbari sığorta növü üzrə lisenziyası aktiv olan sığorta şirkətləri ilə bağlı daxil olan şikayətlər nəzərə alınıb. Eyni zamanda avto-icbari sığorta növünün aparılması üzrə verilən icazənin ləğv edilməsi yolu ilə lisenziyasının qüvvəsi məhdudlaşdırılmış və lisenziyası ləğv olunmuş sığorta şirkətləri ilə bağlı şikayətlərin tənzimlənməsi Mərkəzi Bank tərəfindən əvvəlki qaydada davam etdirilir.

"Sabirabad rayonunun Ulacalı və Qruzma kəndlərini birləşdirən çox təhlükəli bir körpü var. İşimlə əlaqədar ayda bir neçə dəfə həmin körpüdən istifadə etməli oluram. Həmin körpüdən istifadə edən sakinlər hər dəfə ödəniş edirlər, minik maşınları 50 qəpik, böyük maşınlar isə 1 manat. Hər dəfə həmin körpüdən keçərkən həyəcan keçirir, bir gün Kür çayında batacağımı düşünürdüm, belə bir körpünün varlığına hansı qurumun icazə verdiyini özümə sual edirdim". Dia-az.info bildirir ki, bunu öz etirazında tanınmış jurnalist, criminal.az saytının baş redaktoru Anar Məmmədov qeyd edib.

Jurnalist daha sonra bildirir: "Bu gün ağlıma gələn başıma gəldi, həmin körpüdən keçərkən maşının qabaq təkərləri qum doldurulmuş kisədən sürüşərək çaya düşdü. Kənd sakinlərinin köməyi ilə əraziyə çağırdığım başqa avtomobilə qoşqu edərək düşdüyüm yerdən çıxarıldım.
Əraziyə toplaşan kənd sakinlərindən öyrəndim ki, həmin körpü Anar adlı şəxsin nəzarətindədir. O, şəxsi maraqlarına görə dövlət qurumları ilə anlaşaraq həmin körpünü qəzalı və insan həyatı üçün təhlükəli olmasıba baxmayaraq, pul yığmaqda davam edir.
Məni az qala çay apara, körpünün pul yığanı üstümə düşüb ki, maşınların gəlhagəl vaxtı işimi "sorvat" etdin…
Həmin Anarla əlaqə saxladım, bildirdi ki, körpüdən yığdığı pulla dövlətə vergi ödəyir, şəhid və qazi ailələri saxlayır və s. Utanmadan deyir ki, hadisə hər yerdə olur, göydə təyyarə, yerdə avtomobil də qəzaya uğrayır.
Aidiyyatı dövlət qurumlarına, şəxsən fövqəladə hallar naziri Kəmaləddin Heydərova müraciət edirəm, qısa zamanda həmin əraziyə yoxlama göndərsin və gələcək facilərin qarşısını alsın. Sonra gec olacaq…"

Bu gün ölkənin bir sıra məkanlarında yanacaqdoldurma məntəqələri fəaliyyət göstərir. Düzdür, bu cür obyektlərin sayının çox olması sürücülər üçün əlverişlidir. Lakin bununla bərabər tez-tez qalmaqallı mövzular da ortaya çıxır.

Bir neçə gün əvvəl “SOCAR Petroleum” QSC və “İST Petrol” yanacaqdoldurma məntəqələrində sürücülərə su ilə qarışdırılmış yanacağın satılması sosial şəbəkələrdə geniş müzakirəyə səbəb olub. Məlumata görə, “İST PETROL” yanacaqdoldurma məntəqəsində satılan avtomobil yanacağının keyfiyyəti aşağıdır. İddia olunub ki, yanacağa benzinlə birlikdə su qatılır.

Məsələ ilə bağlı “SOCAR PETROLEUM” QSC-nin mətbuat xidməti bildirib ki, “SOCAR PETROLEUM” QSC 11.04.2024-cü il tarixində “İST Petrol” MMC rəhbərliyi tərəfindən qəbul edilən yanacağın keyfiyyəti ilə bağlı narahatedici məlumat alan kimi məsələni nəzarətə götürmüşdür.

“SOCAR Petroleum” QSC sözügedən texniki problemin yanacaq çəninə su sızması nəticəsində baş verdiyini bildirərək, sürücülərə dəymiş bütün maddi məsuliyyəti öz üzərinə götürüb ödəsə də, insanlar bundan sonra da keyfiyyətsiz məhsulun satışından narahatdırlar. Bundan başqa, paytaxt sakinləri xüsusən “İST Petrol”un “Əhmədli” filialında müxtəlif problemlərin olduğunu bildirirlər.

Bəs, görəsən, bu təsadüfdür yoxsa reallıq?

Belə ki, adı zaman-zaman müxtəlif ittihamlarda və qalmaqallı vətəndaş şikayətlərində hallanan “İST Petrol” MMC-nin adı son zamanlar yenidən gündəm olub. “İST Petrol”la bağlı şikayətlər sadəcə bununla bitmir. Yaxın keçmişə nəzər saldığımız zaman sözügedən yanacaqdoldurma məntəqəsi ilə bağlı zaman-zaman şikayətlərin sosial şəbəkələrdə və KİV-də yayıldığının şahidi oluruq.

Məsələ ilə bağlı danışan nəqliyyat məsələləri üzrə ekspert Elməddin Muradlı redaksiyamıza bildirdi ki, Azərbaycanda bir çox yanacaqdoldurma məntəqələrində satılan benzinin keyfiyyəti heç də ürəkaçan deyil:

"Minlərlə sürücü bu kimi problemlərin fəsadını yaşayır, təəssüflər olsun ki, bu cibəgirmələr aidiyyatı qurumların gözü qarşısında baş verir və bununla bağlı tədbirlər də görülmür. Yanacaqdoldurma məntəqələrinin təhlükəsizlik qaydaları ilə bağlı bəzi təlimatlar var. O təlimatlardan da biri yanacaq çənlərinin vaxtında təmizlənməsi məsələsidir. Bu təmizləmə olduqca ağır bir prosesdir, bu zaman bütün iş dayanır və çən tam boşalır. Bu təxminən ayda bir, ya da 3 ayda bir dəfə baş verən bir prosesdir".

Ekspert qeyd edib ki, bu gün istər bəzi yanacaqdoldurma məntəqələrində, istərsə də onlara nəzarət edən qurumlarda özbaşınalıq baş verir. Onun sözlərinə görə, illərdir bu kimi problemlər var, lakin heç bir tədbir görülmür.

Şikayətlərə məsuliyyətsiz yanaşılır

Araşdırma apardığımız zaman məlum olur ki, Bakıda sürücülərin ən çox şikayətləndiyi və narazı qaldığı yanacaqdoldurma məntəqələrindən biri elə məhz "İST Petrol" MMC-dir. Vətəndaşları narazı salan əsas faktorlar isə “İST Petrol” MMC-nin qanunsuz və yarıtmaz fəaliyyəti ilə bağlıdır.

Məlumata görə, bir müddət əvvəl Bakıda sürücü "İST Petrol"un yanacağının keyfiyyətindən narazı qalıb. O, yanacağın içərisindən torpaq çıxdığını bildirib. Sürücünün sözlərinə görə, yanacağın içərisindəki torpaq avtomobilin filterini yararsız hala salıb.

Məlumat üçün qeyd edək ki, avtomobillərin mühərrikinin sıradan çıxmasına səbəb olan 5 əsas problemdən biri benzinə su, qum və ya digər qatqı maddələrinin qatılmasıdır. Benzinin tərkibinə qarışan su qısa zaman ərzində avtomobilin yanacaq sisteminə, nasosa, eləcə də slindirlərə ciddi zərər vurur.

“İST Petrol” MMC sözügedən texniki problemin yanacaq çəninə su sızması nəticəsində baş verdiyini bildirərək, sürücülərə dəymiş bütün maddi məsuliyyəti öz üzərinə götürsə də, bundan sonra itirilmiş keyfiyyətini, sürüclərin və vətəndaşların güvənini yenidən qazana biləcəkmi? Təəssüflər olsun ki, xeyr.

Məlumat üçün qeyd edək ki, bu xəbəri dərc etməklə müəssisənin işgüzar nüfuzunu zədələmək niyyətimizin olmadığını bir daha bəyan edir, “İST Petrol” MMC-yə qarşı hər hansı qərəzli mövqeyimizin olmadığını vurğulayırıq.

“Hürriyyət”