Azərbaycan Kommunist Partiyasında kadr dəyişikliyi olmuşdur

27 noyabr 2022-ci ildə respublikamızın klassik siyasi təşkilatı olan Azərbaycan Kommunist Partiyasının növbəti 41-ci qurultayı keçirilmişdir. Qurultaya dünyanın müxtəlif ölkələrinin kommunist və fəhlə partiyalarından təbriklər daxil olmuşdur.

Partiyanın Mərkəzi Komitəsindən zamantv.az-a bildirilmişdir ki, Azərbaycan Kommunist Partiyasının Nizamnaməsində əlavə dəyişikliklər edilmişdir. Buna əsasən partiyanın rəhbər kadr korpusunda mərkəzi komitənin birinci katibi və katiblər qalmaq şərti ilə yeni vəzifə - sədrlik postu təsis edilmişdir.

Açıq səsvermə yolu ilə Azərbaycan Kommunist Partiyası Mərkəzi Komitəsinin sədri vəzifəsinə Azərbaycan Kommunist Partiyası Mərkəzi Komitəsinin birinci katibi olmuş Telman Baba oğlu Nurullayev seçilmişdir.

Onu da qeyd edək ki, Telman Nurullayev Beynəlxalq kommunist və fəhlə partiyaların işçi qrupunun üzvüdür. Beynəlxalq kommunist və fəhlə partiyaların dünyanın müxtəlif ölkələrində keçirilən Müşavirələrində Azərbaycan Kommunist Partiyasını təmsil edən yeganə partiya rəhbəridir.

Azərbaycan Kommunist Partiyası Mərkəzi Komitəsinin ideoloji məsələlər üzrə katibi olmuş Ədalət İdris oğlu Abdinov qurultay iştirakçılarının səs yekdilliyi ilə Azərbaycan Kommunist Partiyası Mərkəzi Komitəsinin birinci katibi seçilmişdir.

Partiyanın Ali Məclisində növbəti plenuma qurultay səlahiyyəti verildi. Növbəti plenumda Azərbaycan Kommunist Partiyası Mərkəzi Komitəsinin və büronun yeni tərkibi təsdiq olunacaqdır.

Azərbaycan Kommunist Partiyasının qurultayından başqa plenum, büro və digər toplantıların onlayn rejimdə keçirlməsinə icazə verilməsini təsdiq edən Nizamnamədəki dəyişiklik qəbul edilmişdir.

Mürsəl Kazımov

Zamantv.az