Hörmətli Prezident!
Bakı şəhər Lökbatan qəsəbəsi Qobu Park 1, ev 4, kvartal 87-də yaşayan, Kəlbəcərdən məcburi köçkün düşmüş İbrahim İsa oğlu Qaybalıyev redaksiyamıza şikayət məktubu ilə müraciət edib, haqq səsinə səs verməyimizi, düşdüyü vəziyyəti sizə və aidiyyatı orqanların diqqətinə çatdırmağı bizdən xahiş edir. Biz də humanist alicənablığınızı nəzərə alıb İbrahim Qaybalıyevin şikayətini oldğu kimi sizə ərz edirik.
İbrahim Qaybalıyev şikayət məktubunda bildirir ki, 2021-ci ilin yanvarında oğlum Vüqar İsayev Seymur adlı şəxsdən 21 400 (iyirmi bir min dörd yüz) manata «Ford» markalı 99 BY 454 tranzit nömrəli maşın aldı, sonra da maşını girov olaraq Heydərov Cəbrayıl Cavad oğluna verdi, o da söz verdi ki, oğluna «ovaşnoy» açacam. Həm də Pirallahıda məcburi köçkünlər yaşayan yerdəki «Qarabağ» adlı marekti sənin üçün alacam. Lakin dediyi sözə əməl etmədi. Beləliklə, o, məni və oğlumu aldatdı. O, bizdən başqalarını da bu və buna oxşar yolla aldadıb. Deyilənə görə, Pirallahı rayonu Cəbrayılın əlindədir. Onun Zirə qəsəbəsində, Pirallahıda marketləri, klinikası, qadın salonu, ət kəsimi yeri, restoranı, çörəkbişirmə sexləri, bir neçə maşını var. Bir sözlə, Pirallahı rayonu ancaq ona işləyir. Oğlu Tural Heydərov xarici ölkələrdən maşın gətirir, burada satır. Özü vergidən yayınır. Bunun üçün bir neçə işçini qeyri-rəsmi yolla - müqaviləsiz işlədir. Müqavilə əsasında işlətdiyi işçilərin isə əmək haqlarını az miqdarda göstərir, vergidən yayınma halı törədir. Mən xəstə, kasıb adamam. Maşina verdiyimiz 21 400 manat pulu ondan-bundan borc almışam. O adamlar da artıq pullarını geri tələb edirlər. Bütün bunlardan Cəbrayıl Heydərovun xəbəri var. Ancaq buna məhəl qoymur. Nə vaxt qəbuluna gedirəm, rədd cavabı verir. Deyir ki, mən heç kimi saya salmıram və heç kimdən qorxmuram, kimə istəyirsiniz, ona da şikayət edin. Arxamda elə adamlar durub ki, kimsə mənə bir söz deyə bilməz. Cəbrayıl Heydərov azğınlaşıb. Qanun tanımır, ali dəyərlərə, dövlət və dövlətçiliyə hörmət qoymur. İnsanları bezdirir, dövlətə qarşı qoyur. Şəxsən bizə, bizim kimi neçə-neçə adama həm maddi, həm də mənəvi ziyan vurub. Görünür, Pirallahı rayonunda ondan çəkinirlər deyə törətdiyi qanunsuzluğa, özbaşınalığa göz yumulur. Ona görə xahiş edirəm, kömək edin, qanun tanımayan, dövlətdən çəkinməyən Cəbrayıl Heydərovdan ya pulumuzu, ya da maşınımızı geri alaq.
Cənab Prezident! Biz redaksiya olaraq vətəndaşların müraciətlərini ictimailəşdirmək iqtidarındayıq. Vətəndaş İbrahim Qaybalıyevin dedikləri açığı, bizdə təəccüb yaratdı. Bu ölkədə heç kim qanunu tapdalaya, dövlət dəyərlərinə qarşı çıxa bilməz. Bəs nə baş verir ki, Cəbrayıl Heydərov Pirallahı boyda rayonda at oynadır, üstəlik, dövlət dəyərlərini, qanunu alçaldır, lakin kimsə ona «gözün üstə qaşın var» demir?!
İnanırıq ki, xalqını sevən bir prezident olaraq şikayətçi İbrahim Qaybalıyevin harayına səs verəcək, onu düşdüyü bu çətin vəziyyətdən qurtaracaq, şikayətdə adı hallanan Cəbrayıl Heydərovun məsuliyyətə cəlb olunmasını təmin edəcəksiniz.
Hörmətlə:
Xəyal İmrə,
«Zamantv.az» xəbər portalının təsisçisi və baş redaktoru
Zamantv.az