Sentyabrın 19-da saat 09 radələrində Laçın rayonu Mollalar kəndi ərazisində ağır yol-nəqliyyat hadisəsi baş verib.

DİN-in mətbuat xidmətinin regional qrupundan bildirilib ki, “Ural” markalı avtomobilin qəzaya uğraması nəticəsində Azərenerji-nin əməkdaşları – Məmmədov Məhəmməd Mübariz oğlu və Məmmədov Gülağa Gülməmməd oğlu həyatlarını itiriblər.

Araşdırma aparılır.

Ukraynaya müdaxilədən sonra beynəlxalq sanksiyalarla sıxışdırılan və Rusiya Prezidenti Vladimir Putinin təzyiqi ilə üzləşən rusiyalı milyarderlər Avropadan on milyardlarla dollarlıq aktivlərini çıxarıblar.

Kreml ən zəngin rusiyalılara təzyiq edir ki, “dost olmayan” siyahısına daxil edilən ölkələrdəki aktivlərini repatriasiya (repatriasiya və ya vətənə qayıtma - əmlakın, simvolik əşyanın və ya şəxsin könüllü və ya məcburi şəkildə öz sahibinə, öz mənşəcə aid olduğu yerinə və ya vətəndaşlığı olduğu ölkəsinə qayıtması - red.) etsinlər.

İkiqat vergi müqaviləsi dayandırılıb və bununla bağlı Rusiya Avropa kimi yurisdiksiyalarda qeydiyyatdan keçmiş qurumlara şirkətlərin dividend ödəməsini və ya aktivlərini satmasını çətinləşdirir.

2023-cü ilin avqustunda maqnatlar İqor Şilov və Mark Kurser tərəfindən idarə olunan “United Medical Group CY Plc” və “MD Medical Group Investments Plc”nin səhmdarları şirkətlərin Kiprdən Rusiyaya köçürülməsini təsdiqləyiblər.

Məlumata görə, bu transfer 2022-ci ilin fevral ayından etibarən Rusiyanın ən zənginləri tərəfindən çıxarılan aktivlərin ümumi dəyərini ən azı 50 milyard dollara qədər artıra bilər.

İndi ən varlı rusiyalıların aktivlərini yerləşdirmək üçün yerləri getdikcə daha da azalır, çünki onların çoxu ABŞ, Böyük Britaniya və ya Avropanın sanksiyaları altındadır.

Kipr, Cersi və İsveçrə kimi yerlərdə qeydə alınmış aktivlərin Rusiyaya və Kremlin dost hesab etdiyi Birləşmiş Ərəb Əmirlikləri və Qazaxıstan kimi ölkələrə ötürülməsi işğaldan qısa müddət sonra başlayıb. İlk belə ötürmələr arasında milyarder Andrey Quryev və polad maqnatı Viktor Raşnikovun İsveçrə və Kiprdən Rusiyaya köçürülən ailə aktivləri olub. Milyarder İqor Altuşkin kimi digərləri də daha sonra analoji addım atıblaR.

Həmçinin təkcə milyarderlər deyil, digər rusiyalılar da aktivlərini Rusiya Federasiyasına köçürürlər.

Mənbə: “Bloomberg”

Çinin ən böyük sığorta şirkətlərindən biri olan “China Life Insurance”ın direktorlar şurasının keçmiş sədri Vanq Venbin iki il müddətinə möhlətlə edam cəzasına məhkum edilib.

Çin Mərkəzi Televiziyasının məlumatına görə, müvafiq qərarı Cinan şəhərinin (şərqi Şandun əyaləti) Aralıq Xalq Məhkəməsi qəbul edib.

Şirkətin partiya komitəsinə də rəhbərlik edən keçmiş məmur rüşvət almaqda, eləcə də xaricdəki əmlakını gizlətməkdə təqsirli bilinib. Məhkəmə qərarında deyilir ki, iki il müddətinə möhlət verildikdən sonra qanuna uyğun olaraq cəza azadlığa buraxılmamaq şərti ilə ömürlük azadlıqdan məhrumetmə ilə əvəz olunacaq. Vanq Venbinin bütün şəxsi əmlakı və aktivləri də dövlət nəfinə müsadirə edilməlidir.
Vanq Venbin 1997-2021-ci illərdə müxtəlif dövlət vəzifələrində çalışıb. Bu müddət ərzində o, birbaşa və ya üçüncü şəxslər vasitəsilə ümumilikdə 325 milyon yuan (45,7 milyon dollar) məbləğində rüşvət alıb. Bundan əlavə, o, qanunsuz olaraq xaricdə təxminən 56,42 milyon yuan (7,9 milyon dollar) gizlədib.

Mənbə: TASS

Bir neçə Afrika ölkəsinin liderləri qitə ölkələrində baş verən silsilə çevrilişlərdən sonra belə hadisələrin qarşısını almaq üçün təhlükəsizlik qüvvələrinin yüksək tərkibini dəyişmək qərarına gəliblər.

Məlumatına görə, Qabondakı hərbi çevrilişdən bir neçə saat sonra Kamerun prezidenti 90 yaşlı Pol Biya bir neçə təhlükəsizlik müşavirini Müdafiə Nazirliyində yüksək vəzifələrə təyin edib. Həmçinin Ruanda prezidenti Pol Kaqame 10-dan çox generalı və 600-dən çox yüksəkrütbəli zabiti vəzifəsindən azad edib. Qvineya-Bisau prezidenti Umaru Sisoku Embalo iki yeni təhlükəsizlik rəisi təyin edib, Uqandanın 78 yaşlı lideri Yoveri Museveni isə ABŞ-də təlim keçmiş polis rəisi general Kale Kayihura və daha 11 generalı vəzifəsindən azad edib. Syerra-Leonedə ötən ay 10-dan çox yüksəkrütbəli hərbçi və bir neçə polis məmuru saxlanılıb və onlar ölkə lideri Culius Maada Bionu devirməyə cəhddə ittiham olunublar.

“Oxford Economics Africa” siyasi-iqtisadi risk modelinə görə, Ekvatorial Qvineya, Mavritaniya, Qambiya, Sierra Leone və Mərkəzi Afrika Respublikasının liderləri risk altındadırlar.

Mənbə: TASS

Rusiya Prezidenti Vladimir Putin Vladivostokda keçirilən Şərq İqtisadiyyat Forumunun plenar iclasında vaxtilə Qarabağ münaqişəsinin həlli üçün öz variantlarını təklif etməsindən danışıb.

Rusiya liderinin sözlərinə görə, Ermənistan bu təkliflə razılaşmayıb:

“Biz nizamlanma üçün öz variantlarımızı təklif etmişdik. Məncə, bu, yaxşı bəllidir. Ermənistan 7 rayona nəzarət edirdi. Hansı ki, Emənistan-Azərbaycan konfliktindən sonra öz nəzarətinə almışdı. Biz Azərbaycanla Kəlbəcər və Laçın rayonlarının və bütün Qarabağın faktiki olaraq Ermənistanın yurisdiksiyasında qalması ilə razılaşma təklif etdik. Lakin Ermənistan rəhbərliyi bununla razılaşmadı. Ermənistan rəhbərliyini onillər ərzində inandırmağa çalışdıq. Fərqli variantlar var idi, amma yekunda hamısı buna gəlib çıxırdı. “Nə edəcəksiniz?” sualına “savaşacağıq” cavabını verdilər. Yekunda hər şey mövcud olan situasiyaya gəlib çıxdı”.

Suriya beynəlxalq ictimaiyyətin diqqətini onun təbii sərvətlərinin ABŞ və onunla əlaqəli terror qrupları tərəfindən sistematik şəkildə talan edilməsinə cəlb edir.

Bu barədə Ərəb Respublikası Xarici İşlər Nazirliyinin BMT Təhlükəsizlik Şurasına göndərdiyi müraciətdə deyilir.

“Dəməşq ABŞ-nin Suriya ərazisində qeyri-qanuni hərbi mövcudluğuna son qoyulmasını, ABŞ administrasiyasının neft və qaz sektoruna dəymiş ziyana görə cavabdeh olmasını və oğurlanmış neft ehtiyatlarına görə təzminat ödəməyi öhdəsinə götürməsini tələb edir”, - sənədə bildirilir.

Xarici İşlər Nazirliyi ABŞ-nin cinayət əməlləri nəticəsində respublikanın neft sektorunda birbaşa itkilərin 27,5 milyard dollar həcmində qiymətləndirildiyini qeyd edib.

Mənbə: TASS

Alyans Ukraynada uğur qazanarsa, NATO-nun növbəti hərbi hədəfi Çin olacaq.

Bu barədə “İl Fatto Quotidiano” nəşrinin köşə yazarı Pyero Bevilakva qeyd edib.

Bevilakva bildirib ki, Ukraynanın qələbəsindən sonra sülh olmayacaq, Çinə qarşı, eləcə də öz yolunu axtaran onlarla başqa ölkəyə qarşı daha böyük döyüş başlayacaq.

Yazarın fikrincə, müharibələrin bitməsi üçün Qərbin məğlubiyyəti zəruri şərtdir. Belə olan halda Avropa Birliyi müstəqillik qazanacaq.

Keçmiş nəqliyyat naziri Ziya Məmmədovun biznesmen oğlu Anar Məmmədovla yeni faktlar açıqlanıb. DİA.AZ bildirir ki, bu dəfə də tanınmış araşdırmaçı-jurnalist Cavanşir Həsənli Anar Məmmədovun ictimailəşməyən fəaliyyətinə işıq salıb.

C.Həsənli yazır:
"Ziya Məmmədovun oğlunun Britaniyadakı şirkətlərinin birinin audit sənədində qeyd olunur;
The principal activity of the company in the period under review was that of retail of Kentucky Fried Chicken and its associated products.
(Nəzərdən keçirilən dövrdə şirkətin əsas fəaliyyəti Kentucky Fried Chicken və onunla əlaqəli məhsulların pərakəndə satışı olmuşdur)
Kentucky Fried Chicken -KFC brendinin tam adıdır.
Ziya Məmmədovun İngiltərədə oğluna məxsusluğunu inkar etdiyi onlarla restorandan 6-sı Anar Məmmədovun benefisiarı olduğu şirkətlərdən təkcə birinin vasitəsilə idarə olunur ki, onun da aktivləri 4 milyon funt sterlinq təşkil edir. Amma bu restoranlar KFC deyil, "Pizza Hut" adı altında fəaliyyət göstərir".

Hər halda, sual yarana bilər ki, Anar Məmmədov artıq nazir oğlu deyil və onun bizneslə məşğul olma kimi hüquqları var. Təbii ki, var. Amma o da var ki, eyni haqq və hüquq hər bir Azərbaycan vətəndaşına da aiddir ki, onun dövlətinin büdcəsindən oğurlanan vəsaitlərin sonrakı aqibətindən xəbərdar olsun...

Məsələ ilə bağlı olaraq bütün maraqlı tərəflərin mövqelərini işıqlabndırmağa hazırıq...

Cəlilabad Rayon İcra Hakimiyyəti Cəlilabad və Göytəpə şəhərlərində yolların əsaslı təmiri işlərinin satın alınması ilə bağlı tenderə yekun vurub.

Tenderin qalibi "Birlik-3A” MMC seçilib. Qurumla şirkət arasında bağlanacaq satınalma müqaviləsinin maliyyə dəyəri 246 205,8 AZN-dir.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Birlik-3A” MMC 23 iyun 2011-ci ildə qeydiyyata alınıb. Nizamnamə kapitalı 50 AZN olan şirkətin hüquqi ünvanı Masallı rayonu, Gəyəçöl kəndində yerləşir. MMC-nin qanuni təmsilçisi isə Cəbiyev Mübariz Abdin oğludur.

Mübariz Cəbiyevdən əvvəl şirkətin qanuni təmsilçisi Quliyev Qulamhəsən Səməd oğlu, ondan əvvəl isə Abıyev Zaur Niyazi oğlu olub. Zaur Abıyev həm də "Elnur-2” İstehsal Kommersiya Şirkətinin qanuni təmsilçisidir.

Bu şirkət "tender kralı" kimi tanınır. Əsasən cənub bölgəsində yerləşən rayonların yerli qurumlarının keçirdiyi tenderlərin qalibi olur. Zaur Abıyevin adı "MTN işi”ndə də keçir. O bu işdə zərərçəkən qismində tanınıb.

Zaur Abıyevin də "Birlik-3A” MMC-nin qanuni təmsilçisi olması bu şirkətin də tender əməliyyatlarında iştirak üçün yaradılması barədə şübhələrə səbəb olub.

Adətən tender oyunları üçün yaradılan şirkətlər barəsində açıq mənbələrdə heç bir məlumat olmur. "Birlik-3A” MMC də bu qəbildəndir. Yəni, şirkət barəsində açıq mənbələrdə heç bir məlumat yoxdur.

Digər tərəfdən, dövlət satınalmalarının vahid elektron portalında yerləşdirilən məlumatlardan görünür ki, "Birlik-3A” MMC də "Elnur-2” şirkəti kimi əsasən cənub bölgəsində yerləşən rayonların yerli qurumlarının keçiridyi tenderlərin qalibi olur.

Cəlilabad Rayon İcra Hakimiyyətinin başçısı Rafiq Cəlilovdur. O, 2021-ci ildən bu vəzifədədir. Qaynarinfo