Novruz Bayramına sayılı günlər qalıb, vətəndaşlar artıq bayram alış-verişinə başlayıblar.

Bayram günlərində əsas tələbat çərəzlərədir və yarmarkalarda qiymətlər müxtəlifdir.

Satıcıların sözlərinə görə, şabalıdın bir kiloqramı 8 manat, qozun bir kiloqramı 6-12 manat arasında dəyişir, fındıq və xurmanın bir kiloqramı 6 manat, kişmişin bir kiloqramı isə 6-8 manat arasında dəyişir.

Baku TV-nin mövzu ilə bağlı hazırladığı süjeti təqdim edirik:..

Rusiya Ukrayna ilə taxıl sazişinin imzalanmasının əleyhinə deyil, ancaq Moskva müqavilənin cəmi 60 gün uzadılmasını istəyir.

Bunu Cenevrədə Rusiya xarici işlər nazirinin müavini Sergey Verşinin deyib.

Onun sözlərinə görə, Rusiya sövdələşmədən təkcə Ukraynanın deyil, Rusiyanın da qazanc əldə etməsini arzulayır. Nazir müavini bildirib ki, sövdələşmə müddətinin uzadılması onun “sözdə deyil, əməldə” necə həyata keçiriləcəyindən asılıdır.

Verşinin əlavə edib ki, Rusiya Tolyatti-Odessa ammonyak boru kəmərinin yenidən açılmasını və kənd təsərrüfatı məhsullarının ixracının “normallaşdırılmasını” istəyir.

Məlumat üçün bildirək ki, taxıl müqaviləsi 2022-ci ilin iyununda bağlanıb və noyabrda müddəti uzadılıb. Ukrayna martın 18-də başa çatacaq müqavilənin daha bir il uzadılmasını təklif edib.

Azərbaycanın İsraildəki səfirliyinin rəsmi açılış mərasiminin vaxtı açıqlanıb.

Səfirliyin rəsmi açılış mərasimi martın 29-da Təl-Əvivdə baş tutacaq və burada Azərbaycanın xarici işlər naziri Ceyhun Bayramovun da iştirak edəcəyi gözlənilir.

Qeyd edək ki, Prezident İlham Əliyev 2022-ci il noyabrın 26-da Azərbaycanın İsrail Dövlətində (Təl-Əviv şəhərində) səfirliyinin təsis edilməsi ilə bağlı sərəncam imzalayıb.

Dövlət başçısının yanvarın 11-də imzaladığı digər sərəncamla Muxtar Məmmədov Azərbaycanın İsraildəki fövqəladə və səlahiyyətli səfiri təyin edilib.

Bu gün Berlində Azərbaycan Prezidenti İlham Əliyevin Almaniya iş adamları ilə görüşü olub.

Bu barədə Prezidentin Mətbuat xidməti məlumat yayıb.

Dövlət başçısı görüşdə çıxış edib.

Görüşdə iqtisadi sahədə, o cümlədən sənaye, nəqliyyat, enerji, kənd təsərrüfatı, təhsil, texnologiyalar və digər sahələrdə əməkdaşlıqla bağlı fikir mübadiləsi aparılıb.

“Gənclərin Anti-Narkomaniya” ictimai birliyi Azərbaycan dövlətinin ölkəmizdə narkomaniyanın yayılması, xüsusilə belə mənfi halların yeniyetmələr və gənclərin arasında kütləvi hal almasına qarşı apardığı genişmiqyaslı tədbirlərə dəstək olaraq təbliğat kampaniyası həyata keçirir.

13 mart 2023-cü il tarixdə “Sağlam həyat naminə narkotikə "YOX" deyək” şüarı altında Bakı Dövlət Rabitə və Nəqliyyat Kollecində “Gənclərin Anti-Narkomaniya” ictimai birliyi təşkilatçılığı ilə tədbir keçirilmişdir.

Tədbirdə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupunun, Ailə, Qadın və Uşaq problemləri üzrə Dövlət Komitəsinin, Dini Qurumlarla İş üzrə Dövlət Komitəsinin və gənclər iştirak ediblər.

Tədbirdə məqsəd cəmiyyətimizdə, xüsusilə gənc nəslimizin nümayəndələri arasında narkomaniya və narkomanlığa qarşı təbliğat işlərini gücləndirmək, gənclərin qarşılaşa biləcəkləri risklər barədə onları məlumatlandırmaq, bu bəladan müdafiə etmək və sağlam həyata motivasiyalarını daha da gücləndirməkdir. Gənclər Fondunun maliyyə dəstəyi ilə hazırlanmış "Sərhədyanı rayonlarda gənclərin narkomaniya əleyhinə mübarizəsini stimullaşdırmaq məqsədi ilə maarifləndirmə kampaniyasının aparılması" layihəsi çərçivəsində “Biz həyatı seçirik” çarxına baxılıb.
Sonda tədbir iştirakçılarına "Gənclərin Anti-Narkomaniya" ictimai birliyi tərəfindən iştirakçılara sertifikatlar təqdim edilmişdir.

Müğənni Manaf Ağayev oğlunun həbs edilməsi xəbərindən danışıb.

Manaf Ağayev "Unikal"a açıqlamasında məsələdən məlumatsız olduğunu bildirib:

"Mən hazırda məclisdəyəm. Oğlumun həbs edilməsindən xəbərim yoxdur. Yalan söhbətdir".

Murad İbrahimli

***

Müğənni Manaf Ağayevin oğlu həbs edilib.

"Unikal" apa-ya istinadən xəbər verir ki, Müşviq Ağayev idarəetməsində olan retro avtomobillə Bayraq Meydanının yaxınlığında yol patrul xidmətinin əməkdaşları tərəfindən saxlanılıb.

Ona Səbail Rayon Dövlət Yol Polis Şöbəsinin əməkdaşları sərxoş halda sükan arxasına əyləşməməyi tövsiyə edib. Lakin Müşviq yol polisi əməkdaşlarına müqavimət göstərib. Daha sonra post patrul xidmətinin əməkdaşları hadisə yerinə gəlib. Onlar Müşviq Ağayevi polis bölməsinə aparıb. Məlum olub ki, Müşviq Ağayev ağır dərəcəli sərxoşdur. Onun barəsində 5 sutkalıq həbs-qətimkan tədbiri seçilib.

Türkiyə Cümhuriyyətinin Prezidenti, hakim Ədalət və İnkişaf Partiyasının (AK Parti) Sədri Rəcəb Tayyib Ərdoğan Ankarada səfərdə olan Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqovun rəhbərlik etdiyi nümayəndə heyətini partiyasının mərkəzi qərargahında qəbul edib.

YAP-dan verilən xəbərə görə, nümayəndə heyətini salamlayan Rəcəb Tayyib Ərdoğan iki qardaş ölkə arasındakı münasibətlərin nümunəvi xarakter daşıdığını və uğurla inkişaf etdiyini söyləyib.

O, Yeni Azərbaycan Partiyasının nümayəndə heyətinin Türkiyəyə səfərinin mühüm mənəvi və siyasi əhəmiyyətə malik olduğunu, dostluq və qardaşlıq örnəyi kimi minnətdarlıq doğurduğunu bildirib.

Rəcəb Tayyib Ərdoğan baş vermiş təbii fəlakətin nəticələrinin aradan qaldırılması istiqamətində göstərdiyi qardaş dəstəyinə görə Azərbaycan dövlətinə və Prezident İlham Əliyevə təşəkkürünü bildirib.

Səmimi qəbula görə minnətdarlığını bildirən YAP Sədrinin müavini – Mərkəzi Aparatın rəhbəri Tahir Budaqov tarixi köklərə və ortaq dəyərlərə əsaslanan Azərbaycan-Türkiyə münasibətlərinin hər iki ölkənin liderlərinin məqsədyönlü siyasəti nəticəsində strateji müttəfiqlik zirvəsinə yüksəldiyini söyləyib.

Azərbaycan ilə Türkiyənin hər zaman bir-birinin yanında olduğunu vurğulayan YAP Sədrinin müavini qardaş ölkənin zəlzələnin yaratdığı ağır fəsadları tezliklə aradan qaldıracağına əminliyini ifadə edib. İki ölkənin hakim partiyaları arasında münasibətlərin yüksələn xətt üzrə inkişaf etdiyini diqqətə çatdıran YAP Sədrinin müavini qarşıdan gələn seçkilərdə Rəcəb Tayyib Ərdoğana rəhbərlik etdiyi nümayəndə heyəti adından uğurlar arzulayıb.

Qərbi Azərbaycanın yaşadılması məqsədi ilə məşhur Zəngi çayının adını daşıyan “Zəngi” liseyinin adının dəyişdirilməsi məsələsi gündəmə gətirilib.

Nizami rayon İcra Hakimiyyəti bununla bağlı əlaqədar qurumlara müraciət edib. Bu da məşhur liseyin yaradıcısı Şöhrət ordenli, əməkdar müəllim mərhum Bayram Heydərovun ailəsi, eləcə də ictimaiyyət tərəfindən sərt etirazla qarşılanıb.

DİA.AZ bildirir ki, məsələ ilə bağlı Yenicag.az-a açıqlama verən Bayram Heydərovun qardaşı Qərbi Azərbaycan İcması İdarə Heyətinin üzvü Mirfaiq Mirheydərli sözügedən icra hakimiyyətinin bu niyyətini “erməniyə xidmət” kimi dəyərləndirib.

Daha ətraflı səsyazısını təqdim edirik:

Fövqəladə Hallar Nazirliyinin “112” qaynar telefon xəttinə Qəbələ rayonunun Vəndam qəsəbəsi yaxınlığında meşəlik ərazidə yanğın baş verməsi barədə məlumat daxil olub.

Dərhal əraziyə FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri cəlb olunub.

Yanğınsöndürənlərin səyi nəticəsində yanğın geniş əraziyə yayılmasına imkan verilmədən qısa müddətdə məhdudlaşdırılıb.

Hazırda yanğının tam söndürülməsi istiqamətində zəruri və təxirəsalınmaz tədbirlər davam etdirilir.

Yanğınla mübarizə tədbirlərinə FHN-in Dövlət Yanğından Mühafizə Xidməti Qəbələ Rayon Yanğından Mühafizə Hissəsinin qüvvələri və Ekologiya və Təbii Sərvətlər Nazirliyi Meşə Təsərrüfatı Mərkəzinin əməkdaşları cəlb olunub.

Əlavə məlumat veriləcək.

***15:52

Bu gün Qəbələ rayonunun Nohurqışlaq kəndi yaxınlığında meşə ərazisindəki kolluq sahədə yanğın hadisəsi baş verib.

Ekologiya və Təbii Sərvətlər Nazirliyinin Mətbuat katibi İradə İbrahimova bildirib ki, ilkin ehtimala görə yanğın sözügedən kənddə vətəndaşın bağ sahəsində xəzəllərin yandırılması nəticəsində başlayıb, sonradan meşə ərazisinə keçib.

O qeyd edib ki, hazırda nazirliyin yerli qurumları, FHN -in Dövlət Yanğından Mühafizə Xidmətinin əməkdaşları tərəfindən yanğının söndürülməsi və digər ərazilərə keçməsinin qarşısının alınması istiqamətində tədbirlər görülür.

İ.İbrahimova yanğın hadisələrinin baş verməməsi üçün vətəndaşları yanğın təhlükəsizliyi qaydalarına əməl etməyə, odla ehtiyatlı davranmağa, yanğına şərait yaradan bütün hallardan çəkinməyə çağırıb.

“Qaradağ rayonu “Qobu Park-2” yaşayış kompleksində aşma təhlükəsi ilə üz-üzə qalan 16 saylı binanın yerləşdiyi ərazi tarixən bataqlıq, göl olub. Belə bir yerdə çoxmərtəbəli binaların tikilməsi əslində qanunauyğun deyil. Çünki uzun müddət su yığınağı olan yerin təmizlənib yerində bina tikilməsi insanların həyatına təhlükə yaradır. Vətəndaşlar narazılıqlarında haqlıdırlar. Bu məsələyə çox ciddi reaksiya verilməlidir. “Kristal Abşeron”dan soruşulmalıdır ki, niyə orada bina tikib. Axı belə yerlərin seçilməsi uyğun deyil. Sürüşmə zonasında da xeyli binalar tikilib. Həmin ərazilərdə yaranan problemləri uzun müddət aradan qaldırmaq mümkün deyil. Ev tikənlər özlərinin xeyirləri üçün başdansovdu iş görürlər. Türkiyədə baş verən zəlzələ göstərdi ki, əslində bu, insanların faciəsidir. Zəlzələdə dağılan binaların tikintisini həyata keçirənlərin çoxu həbs ediliblər. Axtarışlar aparılır. Əlbəttə, bu, bizdə də var”.

Bu sözləri Pravda.az-a açıqlamasında Milli Məclisin deputatı Tahir Rzayev deyib.

Deputat bildirib ki, sözügedən ərazi “Lökbatan” adlanır:

“Elə adından məlumdur. Tarixən oradan karvanlar keçib, həmin yerdə batıb qalıblar. Lökbatanın adı da buradan qaynaqlanır. Televiziyada da “Qobu Park-2” yaşayış kompleksinin problemi barədə reportajı izlədim. Kadrlarda gördüm ki, yay aylarında orada ifunətdən dayanmaq olmur, anti-sanitariya hökm sürür. Bəs orada böyüyən uşaqlar necə olacaqlar? Evi tikənlər, görəsən, uşaqların taleyi barədə fikirləşmirlər? Onlar çox vaxt ancaq ciblərini fikirləşirlər ki, “cibimə pul gəlsin, tez tikim, uzaq ərazidir, ucuz qiymətə alınacaq”. Ancaq vətəndaş özü məcburdur ki, həmin yerdən ev alsın, tikinti şirkətinə inanır. Vətəndaşın inamından sui-istifadə etmək olmaz. Tikinti şirkətlərimizin əksəriyyəti bundan istifadə edir. Çoxsaylı şikayətlər var. Ciddi dönüş yaradılmalıdır. Fövqəladə Hallar Nazirliyi, müvafiq orqanlar tez zamanda əməli işə keçməlidirlər. Yoxlanmalıdır. Çöküntü varsa, tezliklə qarşısı alınmalıdır. “Kristal Abşeron” məsuliyyət daşıyır. Vətəndaşlar başqa yerə köçülürməlidirlər, onların haqları ödənməlidir. Ya da kompensasiya verilməlidir. “Kristal Abşeron” sakinlər üçün başqa yerdə ev tikməlidir. İnsanların tələbatı ödənilməli, şikayətlər nəzərə alınmalıdır”.