Məhkəmənin sədri postunda səlahiyyət müddəti başa çatan Ramiz Rzayev yaxın günlərdə öz postu ilə vidalaşacaq. Qeyd edək ki, 70 yaşlı Ramiz Rzayev kollektivlə vida görüşünü keçirib. 2023-cü il martın 6-da Azərbaycanın Ali Məhkəməsində Ramiz Rzayevin səlahiyyət müddətinin bitməsi ilə əlaqədar tədbir keçirilib. Ramiz Rzayev Ali Məhkəmənin sədri vəzifəsini 18 ildir ki, qürurla daşıdığına, qanunun aliliyinin təmin olunmasında iştirakına görə özünü rahat və xoşbəxt hiss etdiyini ifadə edib.

Maraqlıdır ki, cəmi bir neçə gün əvvəl Ramiz Rzayev səlahiyyət müddətinin başa çatması və yaxın günlərdə vəzifəsini tərk edəcəyi ilə bağlı məlumatlara münasibət bildirmişdi. R.Rzayev açıqlamasında qanunda hakimlərin yaşı ilə bağlı tələbin ona şamil edilmədiyini bildirmişdi: "Biz qanunda dəyişiklik elədik. Qanunla yaş 65 olanda 5 il də uzadılırdı. Kim bu qanunun dövründə təyin olunubsa, onlara şamil olunur. O qanun qəbul olunandan sonra yaş həddi 68 oldu. Yəni iki fərq var: bir var qanun qəbul olunana kimi hakim qəbul olunanlar, bir də var yeni qəbul olunandan sonra təyin olunanlar. Yeni qəbul olunanlara birinci instansiya məhkəməsində son yaş həddi 66 yaş, Ali Məhkəmədə isə 68 yaşdır. Mən 2005-ci ildən bu vəzifədə çalışıram. Həmin qanun 2015-ci ildə qəbul olunub. Bəzi adamlar qanunu bilmir, eşitdiyini danışır. Mətni açıb oxusalar, düzgün şərhini verə bilərlər. O qanun mənim təyinatımdan sonra olduğu üçün mənə aidiyyəti yoxdur. Mən köhnə qanunun vaxtından bu vəzifədəyəm".

Gununsesi.info-nun əldə etdiyi məlumata görə, Ramiz Rzayevin yerinə təyin olunacaq şəxsin də kimliyi müəyyən olunub. Bu, Ali Məhkəmə sədrinin birinci müavini Çingiz Əsgərovdur. Qeyd edək ki, uzun illər Prezident Administrasiyasında çalışan Çingiz Əsgərov həm də Azərbaycanın Avropa İnsan Hüquqları Məhkəməsində səlahiyyətli nümayəndəsi olub.

Tanınmış hüquqşünas Əkrəm Həsənov R.Rzayevin kreslosunu əldən verməmək üçün sona qədər cəhdlər etdiyini bildirdi: “Ramiz Rzayevin səlahiyyəti əslində iki il əvvəl bitmişdi. Mövcud qanuna görə, Ali Məhkəmənin hakimlərinin maksimal yaş həddi 68-dir. Bu müddət uzadıla bilməz. Düzdür, o qanun 2014-cü ildə qəbul olunanda orada yazılmışdı ki, bu qanun qəbul edilənə qədər olanlara köhnə qanun şamil olunur. Amma o qanunla da maksimal yaş həddi 65 idi. O da yazılmışdı ki, xüsusi təcrübəsi olan hakimlərə münasibətdə 70 yaşa qədər müddət uzadıla bilər. Ramiz Rzayevi isə son dəfə 2018-ci ildə təyin etmişdilər, yəni 65 yaşı olanda. Köhnə qanuna görə isə səlahiyyət müddəti bitən vaxtı təyinatı baş vermişdi. Milli Məclis onu hakim kimi təyin etmişdi. Ali Məhkəmə hakimlərini Prezidentin təqdimatı ilə Milli Məclis təyin edir. Sonradan Prezident onların içərisindən Ali Məhkəməyə sədr təyin edir. Amma nə Milli Məclis, nə də Prezident 2018-ci ildə onun təyinat müddətini göstərməmişdi. Amma köhnə qanun axı demirdi ki, 65 yaşı olan avtomatik olaraq 70-ə qədər uzadılır. Bu müddət 66-ya qədər də, ondan sonra 70-ə qədər də uzadıla bilər. 2021-ci il fevralın 25-də Ramiz Rzayevin 68 yaşı tamam olmuşdu. Buna görə də vəzifəsindən getməli idi. Amma bunu etmədi. Bu il fevralın 25-də Rzayevin 70 yaşı oldu. Hətta köhnə qanuna, hansına ki, o istinad edirdi, o qanunla da səlahiyyət müddəti bitdi. O bu il fevralın 25-dən hakim deyildi. Amma buna baxmayaraq, Ali Məhkəmənin binasından çıxmırdı, kabinetində əyləşirdi, yenə də Ali Məhkəməni idarə edirdi, ona məruzələr olunurdu. Son 18 ildə Ramiz Rzayev heç bir işə baxmırdı. O, sadəcə, Ali Məhkəmə hakimləri üzərində rəhbərliyi həyata keçirirdi. Fevralın 25-i şənbə gününə düşdüyü üçün o, artıq bazar ertəsi işə çıxmamalı idi. Avtomatik olaraq, onun səlahiyyətlərini Çingiz Əsgərov icra etməli idi. Amma bu baş vermədi. Çünki Ramiz Rzayev öz səlahiyyətlərini 2 həftə artırmış oldu. Bu isə dünyada hüquq dərsliklərinə düşəcək bir hadisədir. Sizi əmin edirəm ki, xaricdə bunu bilsələr yazacaqlar ki, bu necə Ali Məhkəmədir, necə məhkəmə sistemidir, nə hüquqdur, nə qanundur ki, məhkəmə sədri qanunu bu formada pozur. Amma sanki Ramiz Rzayev nəyəsə ümid edirdi. Ola bilər ki, pərdəarxası nələrsə edirdi ki, qanuna dəyişikliklər edilsin. Fakt budur ki, o, vəzifəsindən getmək istəmirdi”.

Hüquqşünas R.Rzayevin yerinə kimin gələ biləcəyi haqda sualı çətin hesab edir: “Azərbaycan reallığından çıxış edərək bunu deyirəm. Normal hüquq, məhkəmə sistemi olan ölkələrdə Ali Məhkəmə, Konstitusiya Məhkəməsi olsun, bunların hakimləri bir qayda olaraq hüquq sahəsi üzrə alimlər olurlar. Onların elmi tədqiqatları olur. Çünki adi rayon məhkəmələri, yaxud birinci instansiya məhkəməsi olsun, bunlardan, hətta Apelyasiya Məhkəməsindən fərqli olaraq, Ali Məhkəmə və Konstitusiya Məhkəməsi ancaq işin hallarına baxmır, hüququn elmi araşdırmasını aparır. Çünki Ali Məhkəmədə aparılan mübahisə hüquq haqqında olan mübahisədir, işin halları üzrə deyil ki. Onlar qiymət verir ki, birinci instansiya, yaxud Apelyasiya Məhkəməsi qanuna düzgünmü qiymət verib. Bu artıq elmdir. Burada alim olmalısan. Təəssüflə qeyd edirəm ki, Azərbaycanda hüquq elmi yoxdur. Bəli, hüquq üzrə fəlsəfə doktoru, dosentlər, alimlər, professorlar, kitablar çoxdur. Amma onların mütləq əksəriyyəti, 99 faizi boş şeydir. Elmə aidiyyəti yoxdur. Ya plagiatdır, ya da boş-boş şeylərdir. Əlbəttə, barmaqla sayıla biləcək alimlərimiz var. Dövlət qurumlarında, özəllərdə təmsil olunur. Amma onlar çox azdır, tanınmayanları belə var. Böyük ehtimalla Ali Məhkəmənin yeni sədri dövlət orqanlarından çıxacaq. Bu şəxs hazırda bu vəzifəni icra edən Çingiz Əsgərov da ola bilər. Artıq neçə ildir ki, sədr müavinidir. Həm də Avropa Məhkəməsində Azərbaycanı təmsil edir. Vaxtilə Prezident Administrasiyasında da çalışır. Bu sahədə kifayət qədər təcrübəsi olan bir adamdır. Milli Məclisin vitse-spikeri Əli Hüseynlinin adı çəkilir. O da qanunvericilik sahəsində kifayət qədər tanınmış bir şəxsdir. Digər namizədlər də var. Hüquq-mühafizə orqanlarında belə isimlər də var. Onu da deyim ki, Azərbaycanda Ali Məhkəmə sədrləri bir qayda olaraq hüquq-mühafizə orqanlarından gəlir. Ramiz Rzayevin özü prokurorluqdan gəlib. Ondan əvvəl Südabə Həsənova idi, ədliyyə naziri olmuşdu. Böyük ehtimalla indi də belə olacaq. Əli Hüseynli ya parlamentdən gələcək, ya Çingiz Əsgərov məhkəmə sistemindən, ya da hüquq-mühafizə orqanından kimsə. Şəxsən mənim üçün fərqi yoxdur. O adamın alimliyi, elmi yanaşmaları yoxdursa, fərq etməz. Amma ümid edirəm ki, yeni sədr Ramiz Rzayevdən yaxşı olacaq. Ona görə ki, bundan pis olması mümkün də deyil. Biz öncəliklə yeni sədrdən olan gözləntilərimizdən danışmalıyıq. Ali Məhkəmə nəhayət şəffaf olmalıdır. Bütün qərarları dərc olunsun, xüsusilə plenum qərarları. Bilək ki, işlərə necə baxırsız. Amma indiyə qədər faktiki olaraq, Ali Məhkəmə qərarlarının heç birini dərc etməyib. Bunun da hamısı Ramiz Rzayevin işləridir. Ali Məhkəmə eyni tipli işlərə eyni cür yanaşmalıdır. Vahid məhkəmə təcrübəsi olmalıdır. Hamı bilməlidir ki, məhkəmələr işlərə necə baxacaq. Yeni təyin olunacaq sədrdən gözləntimiz həm də odur ki, hakimlərin müstəqilliyinə hörmət etsin, onların işlərinə qarışmasın...”
“Yeni Müsavat”

Əmək və Əhalinin Sosial Müdafiəsi Nazirliyi tabeliyində Dövlət Məşğulluq Agentliyinin sədrinə yeni müşavirlər təyin edilib.

Qaynarinfo-nun əldə etdiyi məlumata görə, nazir Sahil Babayevin müvafiq əmri ilə Dövlət Məşğulluq Agentliyinin Peşə hazırlığı departamentinin müdiri Fuad Mehdizadə vəzifəsindən azad olunaraq, sədrin müşaviri təyin olunub.

Peşə hazırlığı departamentinin müdiri isə Rəsulova Mehriban Mehman qızı təyin edilib.

Reklamınızı SmartBee ilə effektiv edin.

Nazirin digər əmri ilə Dünya Azərbaycanlıları Konqresinin (DAK) Azərbaycan Nümayəndəliyinin sabiq rəhbəri Səftər Rəhimli də Dövlət Məşğulluq Agentliyi sədrinin müşaviri təyin olunub.

Qeyd edək ki, Dövlət Məşğulluq Agentliyinin sədrinin müşavirlərinin sayı 5, köməkçilərin sayı isə 2 nəfərdir.

Bakı Şəhər Yaşıllaşdırma və Təsərrüfatı Birliyinə yeni direktor təyin edilib.

DİA.AZ bildirir ki, Qaynarinfo-nun əldə etdiyi məlumata görə, Bakı Şəhər İcra Hakimiyyətinin başçısı Eldar Əzizovun müvafiq əmri ilə bu vəzifəyə Mirdamət Seyidov təyin olunub.

Qeyd edək ki, Mirdaməd Seyidov bundan əvvəl Yaşıllaşdırma Təsərrüfatı Birliyinin Baş direktorunun müavini, Mənzil-Kommunal Təsərrüfatı Departamentinin sədr müavini olub və Nizami rayon Hərbi Komissarlığında çalışıb.

Xatırladaq ki, bir neçə gün əvvəl Bakı Şəhər Yaşıllaşdırma və Təsərrüfatı Birliyinin direktoru Həsrət Əmrahov səhhətində yaranan problemlərə görə öz ərizəsi ilə vəzifəsindən azad edilib.

Qaynarinfo-ya daxil olan məlumata görə, Mirdamət Seyidovun vəzifədən azad olunmasının səbəbi "səhhəti lə bağlı" deyil. Belə ki, Binəqədi rayonu, 7-ci mikrorayon ərazisində Ulduz adlı qadının torpaq alıb, ərazidə ağacları kəsdirməsi sakinlərin narazılığına səbəb olub. Nəticədə ictimai asayişi qorumaq üçün əraziyə polis əməkdaşları cəlb edilib. Yaranan söz-söhbətə görə Həsrət Əmrahova töhmət verilib və o, ərizə yazaraq vəzifəsindən uzaqlaşıb.

7 saylı Birləşmiş Şəhər Xəstəxanasının pediatrı Elsevər Kərimovun feysbuk profilindən yazdığı şərh sosial şəbəkələrdə gündəm olub.

DİA.AZ Yeniavaz.com-a istinadla xəbər verir ki, pediatrın şərhi bir çox sosial şəbəkə istifadəçisi tərəfindən paylaşılıb və müzakirə mövzusuna çevrilib.

E.Kərimov yazdığı şərhdə gəlirin düzgün bölünməməsindən şikayətlənib:
“Noyabr ayında 811 xəstəyə xidmət etmişəm, mənə 734 manat pul yazıb. Dekabr hələ qalıb. Hesabladım, adamın biri 90 qəpiyə düşür. Ona görə Azərbaycanda tibbi xidmət 1 manatlıq səviyyəyə düşüb. Heç olmasa, hər xəstəyə görə həkimə 5 azn ödənilsə, 4-5 min pulumuzu alarıq. Adam özünü qul kimi hiss edir. Zülmünü isə xalq çəkir: keyfiyyətsiz tibbi xidmət”.

Xeyli müddət Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini, sonra rəisi olmuş, hazırda nazirliyin Aparatının Əmək siyasəti şöbəsinin müdiri olan Fuad Heydərov barəsində az qala 1 saata yaxın internetdə axtarış aparsaq da bu adamın kimliyi barədə bir cümələyə də rast gəlmədik.
Axı, bu adam mühüm dövlət qurumu olan Dövlət Əmək Müfəttişliyinin rəisi olub, yəni sıradan biri deyil. Bu adam neçənci ildə anadan olub, hansı ali məktəbi bitirib, ixtisası nədir, hərbi qulluqda olubmu və s..?
Birdən oxuyuruq ki, təzə nazir Sahil Babayev işdən azad olunan Müfəttişliyin rəisi Elman Cəfərovun yerinə onun müavini Fuad Heydərovu təyin edib. Vəssəlam. Fuad Heydərov barəsində bu qədər. Vallahi, bizi qınamayın ee...elə bil bu adamlar göydən zənbillə mühüm dövlət vəzifələrinə təyin olunurlar.
Bir daha qeyd etmək istəyirik ki, Dövlət Əmək Müfəttişliyi çox mühüm dövlət qurumudur. Azərbaycanda yüz minlərlə, bəlkə də milyondan çox işləyən vətəndaşlar var. Bunların əmək müqaviləsindən tutmuş məzuniyyətinə qədər, iş başında aldığı xəsarətdən tutmuş müalicəsinə qədər məsələlərə Müfəttişlik baxır.
Müfəttişlik barəsində qısaca məlumat verək ki, məsələ oxucuya aydın olsun. Müfəttişlik Azərbaycan Respublikasının ərazisində fəaliyyət göstərən dövlət, özəl, sahibkarlıq, fiziki şəxslər, hüquqi şəxslər və s fəaliyyət sahələrində Azərbaycan dövlətinin Əmək Məcəlləsinin düzgün həyata keçirilməsinə nəzarət edir. Dövlət Əmək Müfəttişliyi Xidməti əmək qanunvericiliyinə əməl olunması sahəsində, о cümlədən işçilərlə əmək münasibətlərinin əmək müqaviləsi (kontraktı) əsasında tənzimlənməsi, əməyin ödənilməsi, məzuniyyət və istirahət hüququnun təmin edilməsi, əməyin mühafizəsi, texniki təhlükəsizlik, əmək şəraiti, əmək xəsarəti ilə əlaqədar ödənclərin ödənilməsi, işçilərin və iş yerlərinin attestasiyası, işçilərin istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortası, iş prosesində əmək və əməyin mühafizəsi tələblərinə (iş davamiyyəti, əməyin təhlükəsizliyi, əməyin gigiyenası, qadınların, əlillərin, yaşı 18-dən az olan şəxslərin əməyindən istifadə olunması və s.) riayət edilməsi üzrə və əmək qanunvericiliyinin tələblərinə uyğun digər istiqamətlərdə dövlət nəzarətini həyata keçirir. Və...üstəlik əmək qanunvericiliyinin pozulmasında təqsirkar şəxslərin məsuliyyətə cəlb olunması üçün dövlət orqanları qarşısında məsələ qaldırır. Yəni gördünüz ki, bu qurumun əlində işçilərin hüquqlarını qorumaq üçün kifayət qədər səlahiyyət var. Amma....
Əmması odur ki, az qala hər gün oxuyuruq ki, filan MTK-nın apardığı tikintidə fəhlə binadan yıxılaraq öldü. Görəsən, Fuad Heydərov bir dəfə maraqlanıbmı ki, həmin fəhlənin əmək müqaviləsi varmı..? Əlbəttə, yoxdur. Görəsən həmin MTK-da əməyin təhlükəsizliyinin qorunması ilə bağlı Fuad Heydərov bircə dəfə məsələ qaldırıbmı..? Əlbəttə, yox.
Görəsən, həmin MTK-larda fəhlələrə qanuni məzuniyyət verilirmi..? Fəhlələr iş saatından artıq işlədilirmi ? Bəzən hətta dövlət qurumları ixtisar adı altında işçiləri işdən uzaqlaşdırır. 1-ci və 2-ci qrup əlillərin iş vaxtı qısa olmalı, əmək məzuniyyətləri 42 gündən az olmamalıdır.
Görəsən, 2018-ci ildə rüşvət ittihamı ilə işdən çıxarılan Elşən Tağıyevi qurumda necə işə götürüblər..?
Belə ki, Dövlət Əmək Müfəttişliyi Xidmətinin sektor müdiri Elşən Tağıyevin "As İnşaat-N” MMC tikinti şirkətindən rüşvət aldığına görə, işdən qovulmuşdu. Belə bir adama Fuad Heydərov necə yenidən vəzifə verib?
Sözün qısası, Fuad Heydərov vaxtilə Müfəttişliyi rüşvət və korrupsiya yuvasına çevirmişdi. Və... nazir Sahil Babayev onu vəzifəsindən azad edərək nazirliyin Aparatının Əmək siyasəti şöbəsinin müdiri vəzifəsinə təyin edib. Onun yerinə kimi təyin edib..?
Bu başqa bir yazının mövzusudur. Ancaq biz deyirk ki, bu kadr siyasətinin adı buğdan götürüb saqqala qoymaqdır, ay Sahil Babayev. Cənab nazir, bəs deyirdin sosial sahədə inqilabi dəyişikliklər edirəm... //gundelik-baku.com//

“AzPolitika.info”ya daxil olan məlumata görə yaxın günlərdə Ədliyyə Nazirliyində də kadr islahatlarının aparılacağı gözlənilir. Bu çərçivədə yüksək vəzifəli şəxslərin, o cümlədən nazir müavini Azər Cəfərovun istefaya göndəriləcəyi bildirilir.

Xatırladaq ki, II dərəcəli dövlət ədliyyə müşaviri, 69 yaşlı A.Cəfərov 2012-ci ilin iyul ayında Ədliyyə nazirinin müavini təyin edilib.

Mənbə bildirib ki, ədliyyə sistemində gənc kadrların irəli çəkiləcəkləri gözlənilir.

Əmək və Əhalinin Sosial Müdafiəsi Nazirliyi adlı qurumdakı MÜDAFİƏ sözü əbəs yerə deyil. Bu nazirlik dövlət üçün Müdafiə Nazirliyi qədər vacib qurumdur. Niyə..?
Məlumdur ki, dünyada bütün hakimiyyətlərin ən böyük problemi iş qabiliyyətli insanlar üçün MƏŞĞULLUQ və iş qabiliyyəti olmayan insanlar üçün SOSİAL TƏMİNAT-dır. Bu iki vacib məsələ də Əmək və Əhalinin Sosial Müdafiəsi Nazirliyinə, yəni cənab nazir Sahil Babayevə həvalə olunub. Doğrudan da, vətəndaşlar üçün vacib olan MƏŞĞULLUQ, yəni yeni iş yerlərinin olması və şəhid ailəsi, qazi, veteran, əlil, xəstələr, iş qabiliyyəti olmayanlar, təqaüdçülər, sahibsiz internat uşaqları üçün isə SOSİAL TƏMİNATDIR.
Çox təəssüf ki, cənab nazir Sahil Babayev bu iki vacib sahəni az qala iflas həddinə çatdırıb. Son illər minlərlə insanın təqaüdləri ləğv olunub və məşğulluq adı altında vətəndaşlara xəstə inək, qoyun verilməsi və yüksək qiymətə sənədləşdirilməsi barədə ölkə mediasında kifayət qədər yazılıb. İndi gəlin görək, 5 ildir nazir postunu tutan Sahil Babayev bu vacib vəzifələri kimlərə tapşırıb. Sahil Babayevin mühüm vəzifə verdiyi Vüqar Behbudov kimdir ?
Bu adam 2000-ci ildə Bakı Dövlət Universitetinin Şərqşünaslıq fakültəsini bitirib. Sonra 2002-ci ildən Vergilər Nazirliyində, 2008-ci ildən Dövlət Sosial Müdafiə Fondunda müxtəlif vəzifələrdə işləyib. 2011-ci ildən Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin Aparatının Sosial xidmətlər sektorunun müdiri, 2016-cı ildən həmin Nazirlik yanında Dövlət Sosial Müdafiə Fondunun Aparatının Sosial xidmətlər və proqramlar şöbəsinin müdiri vəzifələrində çalışıb. 2020-ci ildə Sahil Babayevin əmri ilə nazirliyin tabeçiliyində olan Dövlət Sosial Xidmətlər Agentliyinin idarə heyətinin sədri vəzifəsinə təyin edilib.
Yuxarıda qeyd etdiyimiz kimi ölkədə mühüm vəzifə olan DÖVLƏTİN SOSİAL SİAYSƏTİ Vüqar Behbudova tapşırılıb.
Birincisi, dünyanın heç bir yerində ərəbşünas və ya şərqşünasa dövlətin sosial siyasəti həvalə edilmir. Axı, ərəbşünas hara, sosial siyasət hara..?
Vüqar Behbudov bu mühüm vəzifədə çalışdığı son illərdə nəinki başqalarının haqqını yeyib, hətta internatda böyüyən kimsəsiz uşaqlara dövlət tərəfindən verilən mənzilləri də satıb. Belə ki, Vüqar Behbudovun agentliyi internatda böyüyən gənclərə dövlətin verdiyi mənzillər üzərində ev alveri, biznes qurub. Bu hələ harasıdır..?
Dövlət internatda böyüyən gənclərə təkcə mənzillər vermir, həm də mənzillər lazım olan mebellə, avadanlıqlarla təmin olunur.
Təsəvvür edirsiniz, hətta açılış mərasimində Ölkə Rəhbəri iştirak edərkən də dövlət başçısına məlumat verilib ki, mənzillər avadanlıqla təmin edilib. Ancaq bütün bunlar yalan olub.
İndi gördünüzmü, bu məmurlar hətta Prezidentə də yalan deyirlər. Şikayət edənləri isə həbslə hədələyirlər.
Bütün bunlar azmış kimi, Vüqar Behbudovun agentliyi yüzlərlə, minlərlə təqaüdçüləri, qaziləri, şəhid ailələrini, veteranları aldadıb, onların hesabına milyonlar qazanıb. Belə ki, şəhid ailələri və müharibə əlilləri mənzillə, avtomobillərlə təmin olunmalıdır. Ancaq Qarabağ qaziləri və əlilləri Vüqar Behbudov barəsində bütün qurumlara şikayət ediblər, amma nəticəsi olmayıb. Söhbət təkcə mənzillərdən və avtomobillərdən getmir.
Ümumiyyətlə, bu agentliyin işi həm də şəhid ailələri və müharibə əlillərinin sanatoriya-kurort mərkəzlərində müalicəsini təşkil etmək, onlara pulsuz, dövlətin hesabına putyovka verməkdir. Amma putyovklar da mənzillər kimi kənar şəxslərə satılıb, külli miqdarda pullar qazanılıb. Siz elə bilirsiniz, bunları Vüqar Behbudov təkbaşına eləyib...? Elə bilirsiniz bu əməllərdən Sahil Babayevin xəbəri olmayıb..?
Sözün qısası, Vüqar Behbudovun mənzil, avtomobil, putyovka biznesi on minlərlə insanı dövlətdən narazı salıb. Yəqin ki, yaxın zamanda Vüqar Behbudov qanun qarşısında cavab verməli olacaq. //gundelik-baku.com//

Qanunazidd əməlləri ilə ölkəmizdə keçirilən ekoloji sağlamlığın yaxşılaşdırılmasına və ətraf mühitin mühafizəsinə yönələn genişmiqyaslı tədbirlərə kölgə salan vəzifəli şəxslərə qarşı ardıcıl və təxirəsalınmaz mübarizə tədbirləri davam etdiyi bir vaxtda nədənsə 2 saylı Tovuz Regional Ekologiya və Təbii Sərvətlər İdarəsinin rəisi Yaşar Mustafayev meşələrin bu cür kütləvi qırılmasına göz yumur.

Bu gün respubilkamızda ən çox istilikxanaları olan rayonlardan biri və birincisi Şəmkir rayonudur. Bu rayonun bəzi işbazları Ərazi Ekolgiya İdarəsinin tabeli qurumları ilə separat danışığa gedərək ucuz yanacaq kimi məşələrimizi hədəf seçiblər.

DİA.AZ bildirir ki, bu haqda Dünyanınsəsi.Az saytına qanunsuz meşə qırımı ilə bağlı videofakt göndəriblər.

Belə ki, Şəmkir rayonun Kür qəsəbəsi ərazisində yerləşən meşə zolağı bir qurup şəxs və şəxslər tərəfindən kəsilərək istilikxana sahiblərinə satıldığı bildirilir.

Belə olan halda Şəmkir Regional Meşə Təsərrüfatı Mərkəzinin rəhbərliyi eləcə də 2 saylı Tovuz Regional Ekologiya və Təbii Sərvətlər İdarəsinin məsul şəxsləri hara baxır?

Əgər bu qurumlar meşələri qoruyub mühavizə edə bilmirsə nədən hər il dövlət büdcəsindən onlara MİLYONLARLA vəsait ödənilməlidir?
Ərazidə yaşayan sakinlər qeyd edirlər ki, Kürün Şəmkir rayonu ərazisindən keçən bütün meşə massivləri kütləvi şəkildə qırılaraq bəzi vəzifəli şəxslərin qazanc mənbəyinə çevirilib. Amma nədənsə bu “soyqrım”çılara “gözün üstə qaşın var” deyən tapılmır.

Redaksiya olaraq inanırıq ki, sözügedən meşə zolağında qanunsuz ağac kəsməklə, külli miqdarda ziyan vurulmaqla törədilmiş olan bu cinayət hadisəsi mütləq Prokurorluq orqanları tərəfindən araşdırılacaqdır.

Səsləndirilən ittihamla bağlı maraqlı tərəflərin də mövqelərini işıqlandıra bilərik:

Ağacların kütləvi şəkildə kəsilməsi ilə bağlı videofaktı təqdim edirik:

Azərbaycan ərazilərində faydalı qazıntı yataqlarının qanunsuz istismarının dayandırılmasını, “Qızılbulaq” və “Dəmirli” yataqlarında monitorinqin keçirilməsinə icazə verilməsini tələb edən azərbaycanlı könüllü gənclər və ekoloqlar tərəfindən Laçın-Xankəndi yolunun Şuşa ərazisindən keçən hissəsində təşkil olunan etiraz aksiyası 89 gündür davam edir.

Havanın soyuq olmasına baxmayaraq, hazırda aksiya iştirakçılarının Laçın-Xankəndi yolunda fəallığı müşahidə olunur.

Etirazçılar səhər saatlarında Azərbaycanın Dövlət Himnini səsləndiriblər.

Qeyd edək ki, aksiya iştirakçıları Qarabağda faydalı qazıntı yataqlarının qanunsuz istismarının dayandırılması ilə bağlı Azərbaycan, rus və ingilis dillərində mütəmadi olaraq plakatlar qaldırır, "Azərbaycan oyaqdır, sərvətinə dayaqdır!”, “Ekoloji cinayətə son!” və sair şüarlar səsləndirirlər. Aksiya iştirakçıları tələbləri yerinə yetirilməyənədək etirazlarını davam etdirəcəklərini bildirirlər.

Xatırladaq ki, ötən il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq Azərbaycanın İqtisadiyyat, Ekologiya və Təbii Sərvətlər nazirlikləri, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdirildiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb. Buna etiraz olaraq, azərbaycanlı ekofəallar Şuşa ərazisindən keçən Laçın-Xankəndi yolunda dekabrın 12-dən dinc aksiyaya başlayıblar.