Havanın soyuq və şaxtalı olmasına baxmayaraq, Azərbaycanın Qarabağ iqtisadi rayonunda faydalı yataqların qanunsuz istismarı əleyhinə Xankəndi-Laçın yolunda keçirilən etiraz aksiyası otuz yeddi gündür yüksək fəallıq, iradə və əzmlə davam edir.

“Report”un aksiyanı işıqlandıran əməkdaşı xəbər verir ki, 2022-ci il dekabrın 12-də səhər saatlarından başlayan aksiya ötən gecə boyu da davam edib.

Gənc fəallar gün ərzində olduğu kimi, yüksək fəallıq göstərirlər. Onlar gecədən səhərədək davamlı şəkildə isti yer, isti çay və qidalarla təmin olunublar.

Təhlükəsizlik qaydalarına yüksək səviyyədə əməl olunan toplanış yerində gecə boyu da heç bir insident baş verməyib.

Həmişə olduğu kimi, etirazçılar bu səhəri də Azərbaycan Dövlət Himninin səsləndirilməsi ilə açıblar. Daha sonra vətənpərvərlik ruhunda mahnılar ifa ediblər.

Eyni zamanda ekofəallar yolun hər iki tərəfində, hərəkətə maneə törətmədən üzərində Azərbaycan, rus və ingilis dillərində yazılmış plakatlar qaldırıb, şüarlar səsləndirirlər.

Aksiya iştirakçılarının tələbləri ilk gündən olduğu kimi, dəyişməz olaraq qalır.

Belə ki, ekofəallar və gənc könüllülər “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, “Экоциду нет! Мониторингу да!” şüarlarını səsləndirirlər.

Xatırladaq ki, ötən gün ərzində Xankəndi-Laçın yolunda hər iki istiqamətə Rusiya sülhməramlılarına məxsus ümumilikdə 32 avtomobil maneəsiz hərəkət edib.

Qeyd edək ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir. Aksiya iştirakçıları günlərdir ki, yüksək əzm, mətanət, qətiyyət nümayiş etdirirlər.

2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.

Dekabrın 16-da Rusiya sülhməramlılarının qərargahında növbəti görüş keçirilib. Ancaq monitorinq qrupunun yataqlara yerində baxış keçirməsinə növbəti dəfə lazımi şərait yaradılmayıb və qarşıya qoyulan vəzifələrin icrasına nail olunmayıb.

Həsən Həsənov 1993-cü ildən etibarən Pirallahı rayon Çilov adasında yerləşən "28 may" Neft-Qaz Çıxarma İdarəsində təmir-quraşdırma çilingəri kimi fəaliyyət göstərib.

Çalışdığı qurumun rəhbərliyilə ilk dəfə 2010-cu ildə ixtisas dərəcəsənin aşağı endirilməsilə başlayan narazılığı, 2018-ci ildə işdən çıxarılması ilə nəticələnib.

H.Həsənov iddia edir ki, "28 may" Neft-Qaz Çıxarma İdarəsinin rəisi Zaur Bağırov Göytəpə qəsəbəsinin baş həkimi Eldar İsayevlə razılaşıb ki, onun tibbi arayışı ləğv edilsin.

Göytəpə Şəhər Xəstəxanasının keçmiş baş həkimi Eldar İsayev ittihamları qəbul etmir.

H.Həsənovun sözlərinə görə xəstəlik vərəqəsi ləğv edildikdən sonra onun işə çıxmayıb, müalicə olunduğu müddət əsas tutularaq işdən çıxarılıb. O hesab edir ki,2010-cu ildə ixtisas dərəcəsi aşağı etdiriləndə çalışdığı qurumdan şikayətçi olduğuna görə onunla ədavət aparılır və işdən çıxarılmağı əsassızdır. "28 may" Neft-Qaz Çıxarma İdarəsinin rəisi Zaur Bağırov isə iddialara belə cavab olaraq deyir ki, H.Həsənovun işdən çıxarılması tamamilə qanuni və məhkəmə predmetində də təsdiq edilib.

Şikayətçi əlavə edir ki, iş ilə yanaşı, evini də itirib. O, Çilov adasına və orada yerləşən evinə qayıda bilmir.

Zaur Bağırov bunu Çilov adasının inzibati strateji obyekt sayıldığı və orada yaşamaq üçün icazənin orada yaşayan insanlara verildiyini deyir.

Daxili İşlər Nazirliyinin Mətbuat Xidmətinin katibi Elşad Hacıyev də bu məlumatı təsdiqləyir.

Ölkədaxili bütün məhkəmə instansiyalarında prosesləri uduzan H.Həsənov tələbləri yerinə yetirilənə qədər dövlət qurumlarına müraciətlərini dayandırmayacağını deyir.

Toplum TV

"İtin günündə yaşayırıq, bildiyiniz itin günündə… Gəlib yaşayışımızla əyani tanış ola bilərsiz. Xirtdəyə kimi borcun içində üzürük. Dərman borcla, çörək borcla… Bir gün mən də özünü öldürən qazilərin siyahısına düşəcəm”.

Astara sakini Aslan Babayev 7 aydır ki, Lənkərandakı Hirkan Milli Parkına gözətçi işinə düzəlib. 360 manat maaş alır. Birinci Qarabağ döyüşlərinin iştirakçısı kimi də 80 manat alır. Deyir, evinə daxil olan gəlir bundan ibarətdir. 7 nəfərlik ailə gözünü ona dikib. O isə aldığını kreditlərə ödəyir. Ailə ac qalmasın deyə, çörəyi nisyə alır. Xəstə övladının dərmanlarına görə də apteklərə xeyli borcu yığılıb: "Borcun içində üzürük. Evdə özünə iş tapan bircə mənəm. O vaxt müharibədə yaralandım, dövlət baxmadı mənə, indi yaşa dolduqca vəziyyətim ağırlaşır, tez-tez müalicələr almalı oluram, onu da borc-xərclə edirəm”.

"Hər iki oğlum gəncdir. Bir oğlum Naxçıvanda hərbi xidmətdə olarkən ayaqqabı döyüb, barmaqları iflic olub. Yeriməkdə çətinlik çəkir deyə, əmək fəaliyyətiylə məşğul ola bilmir. Ağır işlər görə bilmir. İkinci oğlumun da 22 yaşı var. Anadangəlmə böyrək qüsurludur. Bir böyrəyi cəmi 40 faiz inkişaf edib. Həkim onun iki kiloqramdan artıq yük götürməsinə icazə vermir. Ömrü müalicələr qəbul etməklə keçir, onun da müalicələrinə görə xirtdəyə qədər borca girmişəm. Uşaq vaxtı müavinət verilirdi, sonradan o da kəsildi”, – şikayətçi deyir.

Aslan Babayev bir borcu ödəmək üçün növbəti borca girməli olur və bu, illərdir ki, davam edir: "Müalicələrimiz üçün adamlardan aldığım borcları qaytarmaqdan ötrü bankdan kredit götürürəm, sonra da o kreditin aylıqlarını ödəmək üçün təzədən adamlardan borc alıram. Düşmüşəm quyunun lap dibinə, çıxa bilmirəm. Hər iki oğlumun əlillik təyinatı üçün müraciət etmişik, imtina veriblər. Pensiya verilsə, ən azı, dərmanlarını öz pullarıyla alarlar. Ünvanlı sosial yardım üçün müracisət edirik, vermirlər, bəhanələr gətirirlər. Kimə deyəsən dərdini? Mən də insanam, utanıram mağazalara nisyə çörək üçün ağız açmağa… Qalmışam təkbaşına 7 nəfərin əlində…”

Aslan Babayevin oğlu Yusif Babazadə də bu yaxınlarda Meydan TV-yə müraciət etmişdi. O bildirmişdi ki, ayaq barmaqlarını itirməsinə görə ikinci qrup hərbi əlillik təyin edilsə də, 2019-cu ilin fevralında pensiyası kəsilib: "İkinci qrup hərbi əlil olmağıma və vəziyyətimin ağır olmasına baxmayaraq 2019-cu ilin fevralından heç bir səbəb göstərilmədən pensiyam kəsilib. Şikayətlərim nəticəsiz qalıb, heç bir yerdən müraciətlərimə cavab ala bilmirəm. Barmaqlarım iflic olduğundan yerimək qabiliyyətimi itirmişəm. Buna görə əmək fəaliyyətiylə də məşğul ola bilmirəm. İki azyaşlı övladım var. Vəziyyətim çox ağırdır”.

Aslan Babayev köməklik üçün Astara Rayon İcra Hakimiyyətinə müraciət etdiyini, ancaq nəticəsiz qaldığını deyir.

Astara Rayon İcra Hakimiyyətindən Meydan TV-yə deyilib ki, Babayevlər ailəsi quruma da müraciət edib. Onlara bildirilib ki, sosial durumla bağlı aidiyyəti üzrə Əmək və Əhalinin Sosial Müdafiəsi Nazirliyinə müraciət edilməlidirlər: "İcra hakimiyyətinə belə məsələlərə görə büdcə ayrılmır və bu məsələləri həll etmək qurumun vəzifəsinə daxil deyil. Vətəndaşlara dəfələrlə izah edilib ki, bu şeylərə görə aidiyyəti quruma müraciət olunmalıdır. Əmək və Əhalinin Sosial Müdafiə Nazirliyi müxtəlif sosial proqramlar (özünəməşğulluq və sair) həyata keçirir, bəlkə bu ailə də həmin proqramlarla maraqlana bilər. Pensiya məsələsinə görə də aidiyyəti üzrə müraciət etməlidilər”. //Meydan TV//

Sabiq SOCAR şefi və hazırda İqtisadiyyat naziri Mikayıl Cabbarovun altı (6) müavinindən biri olan Rövnəq Abdullayevin biznes şəbəkəsi hörümçək toru kimi şaxələnir. 17 il SOCAR şefi olan nazir müavini əldə etdiyi gəlirləri Azərbaycanda və Avropa ölkələrində şirkətlər qurmağa istifadə edib. Bu şirkətləri isə yaxın qohumlarına həvalə edən R.Abdullayevin oğlu Rəşad Abdullayev Avropadakı şirkətlərə başçılıq edir.
Kommersant.az sabiq şefin ailə biznesi haqqında araşdırmasını oxuculara təqdim edir:

R.Abdullayevə bağlı olan şirkətlər əsasən tikinti, energetika, sənaye və kənd təsərrüfatı istehsalı sahəsində çalışır.

1.3 milyon dollarlıq (2 milyon 210 min manat) saatını itirərək gündəmə gələn Rövnəq Abdullayevin oğlu Rəşad Abdullayev yəni, Abdullayev ailəsinin 29 yaşlı fərdi İngiltərənin London şəhərində təsis etdiyi şirkətlərdən birinin ilk bəyənatını fevral ayının 10-da təqdim edəcək. Şirkətə aid olan əsas sənədlər toplusunu təqdim edirik:











Bakı şəhəri, Nəsimi rayonu, Dilarə Əliyeva, ev 237/14, 3 ünvanında isə Rəşad Abdullayevin Türkiyədə qurduğu “Alpha Roger Proje İnşaat ve Gayrimenkul Danışmanlık Sanayi ve Ticaret Anonim Şirketi”nin filialı qeydiyyatdan keçib.

Rövnəq Abdullayevin şirkətlərini rəhbər şəxslər və təkrarlanan qeydiyyat ünvanları ilə müəyyən etmək mümkündür. Amma bu şirkətlərin əksəriyəti haqda vergilərin elektron qəzetində məlumat olmadığından fəaliyyətləri barədə ictimaiyyətə açıq məlumat yoxdur.

R.Abdullayevin "Əliyevlər şirkət"i

R.Abdullayevin qayınatası Adəm Əliyevin şirkətlərinin sayı çox olduğu üçün milyonluq şirkətinin üstündən tək imza ilə xətt çəkə bilib. Belə ki, A.Əliyev 5 il əvvəl yəni, 2018-ci ildə 1 milyon 106 min manatlıq “Xincab” MMC şirkətini ləğvi ilə bağlı vergilər qəzetinə elan da verib. Bakı şəhəri, Nizami rayonu, Nəvai küçəsi, 15 ünvanında qeydiyyatdan keçən şirkəti başqa MMC-lərlə bağlayan da sözügedən ünvandır. Belə ki, həmin ünvanda R.Abdullayevə məxsus “Trust Holding” MMC, “Terminal-2A” MMC, “Bakimpeks” MMC də hüquqi ünvan alıb. “SOCAR-Petroleum” QSC-nin ortağı olan “A.P. İnternational LLC” şirkətinin (ABŞ) Azərbaycandakı filialı da bu ünvanda qeydiyyatdan keçib.

A.Əliyevin direktor olduğu şirkətlərdən biri isə “Sərv” MMC-dir. “Sərv” MMC ilə “Eyros” MMC-i isə Bakı şəhəri, Nərimanov rayonu, Sülh döngəsi 2, ev 2, mənzil 16 ünvanı birləşdirir. “Sərv” MMC haqqında vergilər elektron qəzetindən və vergi uçotundan məlumat əldə edə bilməsək də, “Eyros” MMC-nin SOCAR-la ortaq olduğu məlum olub. Bu ortaqlıq isə R.Abdullayevin SOCAR prezidenti olduğu dönəmdə start verilib. Onun direktoru Ramil Cavanşir oğlu Əliyev həm də “Ekol Mühəndislik Xidmətləri” QSC-nin baş direktoru vəzifəsində çalışır.




Bu qapalı səhmdar cəmiyyətinin təsisçiləri SOCAR (51%) və Panamanın “Lancer Services S.A” (49%) şirkətidir. Panama şirkətinin sahibi “Union Grand Energy” şirkəti vasitəsilə Anar Əlizadədir. Bu işadamı ilə R.Abdullayevə bağlı olan şirkətlərin yolu həm də Nəvai küçəsi, 15-də də kəsişir. Bu ünvanda 2004-cü ildə A.Əlizadəyə məxsus “Aztrans” MMC dövlət qeydiyyatına alınıb.




Şəkildən də tanış olduğunuz A.Əlizadə (Əliyev) haqqında geniş məlumatı isə daha sonra təqdim edəcəyik.

Adəm Əliyevdən çox da uzaq qalmamaq üçün onunla davam edirik.

2007-ci ildə Türkiyənin “DHT Holding” şirkətlər qrupuna bağlı olan “A.S.M Metal Uluslararası Dış Ticarət Şirkəti” ilə “SOCAR-ASM” MMC qurulub. Şirkətdə SOCAR-ın iştirak payı 30 faiz, Türkiyə tərəfinin payı isə 40 faizdir. Üçüncü təsisçi isə 30 faizlik payla “Eyros” MMC-dir. “SOCAR-ASM” şirkətinin əsas funksiyası Xəzər dənizində və quruda istifadəsiz metal qurğuların sökülməsi, batmış gəmilərin, istismar müddəti bitmiş boru xətlərinin kəsilərək çıxarılmasından ibarətdir. 2010-cu ildə bu birgə müəssisə 2,3 milyon manat mənfəət qazanıb.

Turanlılar ailəsinə məxsus “DHT Holding”lə Adəm Əliyev arasında işgüzar əməkdaşlıq bununla məhdudlaşmır. Holdinqlə ortaq qurulan bir çox şirkətdə (“Azər Toxum” MMC, “Azər Aqro” MMC, “AST Beynəlxalq Tikinti” MMC, “Azər Yem Sənaye” MMC) A.Əliyev rəsmi təsisçilər arasındadır.




Qeyd olunan şirkətlər əsasən kommersiya hüquqi şəxslərin təsisçilərinin adlarının kommersiya sirri kimi gizli saxlanılmayan dövrdə yaradılıb. Bu şirkətlər Türkiyənin “DHT Holding” şirkətlər qrupuna daxildir. Qrup Azərbaycanda daha bir neçə şirkətlə təmsil olunur.

Adəm Əliyevin xariciləri “yemləməsi”

Dağıstan Turanlıya məxsus olan “DHT Holding”in Azərbaycana 2010-cu ildə 80 milyon ABŞ dolları (136 milyon manat) sərmayə yatıraraq həmin ildə 400 milyon ABŞ dolları (680 milyon manat) gəlir əldə edib. Mətbuata açıqlamasında "ana yurdumuz Türkiyə, ata yurdumuz Azərbaycandır" deyən D.Turanlı bildirib ki, holdinqə daxil olan DHT Metal şirkəti Xəzər dənizindən çıxarılan dəmir qırıntılarını armatura çevirir. O bildirib ki, dənizdən hətta tank da çıxarıblar.



Çıxardığı tankı, dəmiri sataraq sərvətinə sərvət qatan Turanlı qazandığı pulları Afrika ölkəsinə yatırıb.

Türkiyəli iş adamı D.Turanlı Cənubi Afrikanın ən əhəmiyyətli polad zavodlarından biri olan “CİSKO” polad fabrikini alıb və 2020-ci ildə etdiyi yeni investisiyalarla polad istehsalını artırıb.

D.Turanlıya məxsus Azərbaycanın ən böyük ağır sənaye şirkəti olan “DHT Holding” hazırda Cənubi Afrikadakı investisiyalarını davam etdirir. Xüsusilə metal qırıntılarına investisiyaları ilə tanınan DHT Holdinq Cənubi Afrikada Murray & Roberts tərəfindən 1967-ci ildə qurulan və 2010-cu ildə bağlanan Cape Town Dəmir və Polad İşləri (Cisco) zavodunu aldıqdan sonra yeni investisiyalarla istehsala başlayıb və 42 milyon dollar investisiya yatırıb.

“Azər Yem Sənaye” MMC-nin təsisçiləri Turanlı Oğuzhan Əli oğlu və Adəm Əliyevdir. Balakən rayonunda illik 80 min yem istehsal etmək gücündə olan şirkətə 2007-ci ildə 2 milyon 684 min ABŞ dolları investisiya qoyulub.

“Azər Toxum” MMC və “Azər Aqro” MMC 2008-ci ildə Adəm Bayram oğlu Əliyev və Türkiyə vətəndaşı Emin Fahrettin Baburşahın təsisçiliyi ilə yaradılıb. Bir müddət sonra “Azər Toxum” MMC-də təsisçilərin strukturu dəyişib. Onların arasına “Azər Aqro” MMC (payların 19,78 faizi) və dövlətə məxsus “Azərbaycan İnvestisiya Şirkəti” ASC (AİŞ – 17,46%) daxil olub. “Azər Toxum” MMC nizamnamə kapitalı 100 manatdan 18,9 milyon manata, “Azər Aqro” MMC-nin – 4,4 milyon manata qaldırılıb.

Söz verdiyimiz kimi qayıdaq Anar Əlizadəyə (Əliyevə). Rövnəq Abdullayevin dayısı oğlu olan A.Əlizadənin İsveçrə bankındakı hesabında 100 milyon ABŞ dolları olduğu iddia edilir. O, hələ 2020-ci ildə Azərbaycanda Silahlı Qüvvələrə Yardım Fonduna 2 milyon manatlıq ianə də etmişdi. Bu da onu fonda ən çox ianə edən şəxs kimi siyahıya salıb.

A.Əlizadə azərbaycanlı iş adamı, Union Grand Energy Şirkətlər Qrupunun sahibi və Baş İcraçı Direktoru, “Baku Business Factory”nin təsisçisi, “Socar Trading”-nin təsisçisi (digər təsisçilər: SOCAR, Valeri Qolovuşkin) və keçmiş prezidentidir. Hazırda A.Əlizadə dünyanın bir çox ölkələrində, o cümlədən Azərbaycan, BƏƏ, Türkiyə və Sinqapurda neft, tikinti, ticarət və sənaye sahələrində uğurlu fəaliyyət göstərən bir sıra şirkətləri idarə edir.

Onun qardaşı Nihad Əliyev isə SOCAR-da yüksək vəzifədə idi. 2021-ci ilin mart ayında isə o İstanbuldakı otellərin birində dostları ilə (üç kişi, üç qadın) istirahət edərkən dünyasını dəyişib. Belə ki, N.Əliyev istirahət zamanı belindən tapançasını çıxarıb və zarafatla başına dayayıb. Daha sonra isə atəş açılıb və N.Əliyev ehtiyyatsızlığın qurbanı olub.

A.Əlizadənin digər qardaşı Bədəl Əliyev isə SOCAR İT departamentində satınalma meneceri olaraq işləyir. Atası Nüsrət Əliyev Neft Emalı Zavodu Qaz sektorunun müdiri, əmisi Azad Əliyev isə Neft Emalı Zavodu Kislorod sektorunun müdiridir.

Qeyd edək ki, “Ekol Mühəndislik Xidmətləri” QSC-nin baş direktoru vəzifəsini icra edən Ramil Cavanşir oğlu Əliyev də A.Əlizadənin əmisi nəvəsidir. Digər əmisi nəvəsi Nail Əliyev isə Neft-Yağ Emalı Zavodunun baş direktorudur.

R.Abdullayevə məxsus “Trust Holding” MMC-nin maliyyə nəzarətçisi isə Rüfət Əliyevdir.



Bunlardan başqa Rövnəq Abdullayevin “Rabitə Bankla” da yaxından əlaqəsi var. Belə ki, bankın müşahidə şurasının üzvü Rauf Əliyevin 30 yaşı olmasına baxmayaraq 2 ildir ki, sözügedən bankda yüksək vəzifədədir. Həmçinin R.Əliyev “Rabitə Bank”ın 40,6 faizlə ən böyük səhmdarıdır. Onun üzvü olduğu şuranın sədri Zakir Nuriyevin bankdakı səhmləri isə 11,48 faiz təşkil edir.




Rauf Əliyevin 2014-cü ildən çalışdığı “Z-Commerz” MMC və Rövnəq Abdullayevin oğlu Rəşad Abdullayevin təsis etdiyi “AR Construction” MMC eyni ünvandan qeydiyyatdan keçiblər.

Rauf Əliyev, Rövnəq Abdullayev və “Rabitə Bank” haqqında daha geniş və təfərrüatlı məlumat həftə içi video və yazılı formada Kommersant.az saytı tərəfindən təqdim olunacaq. Yazıda SOCAR yanacaq doldurma mərkəzlərindəki “Rabitə Bank”ın POS cihazları, sözügedən bankın audit hesablamaları, Abdullayev bağları, səhmdarları və səhmdarın pay sahibi olduğu “Meqa Sığorta” haqqında geniş məlumatlar veriləcək.

Yanvarın 12-dən başlayan külək, media və sosial şəbəkələrdən hamının bildiyi kimi Xaçmaz rayonunun onsuz da qənaətbəxş olmayan işıq sisteminə xeyli zərbə vurub. Beləki, güclü küləyin nəticəsi olaraq bu sahədə ard-arda, zəncirvari formada baş verən qəzalar rayonun böyük bir hissəsini, 100-dən artıq yaşayış məntəqəsini işıqsız qoyub.
İnsafən desək, Azərişığın yerli qurumunun əməkdaşları durmadan çalışsalar da, təbii ki, həm fiziki baxımdan, həm də zaman baxımından bu problemləri yoluna qoymağı çatdıra bilməyiblər və bizdə olan məlumata görə, hələ də rayonda işıqsız qalan kəndlər var, hətta Xaçmaz şəhərinin özündə də bəzi küçələr elektrik enerjisindən məhrum olduğunu söyləyirlər.
Dövrümüzdə bütün sosial həyatın bir növ əsasını təşkil edən elektrik enerjisinin verilməsində yaranan məhdudiyyətlər isə camaata olduqca ağır başa gəlib.
Çünki, işığın sönməsi bir çox yerlərdə istiliyin və suyun da olmamasına gətirib çıxarıb.
Bu gün Xaçmazda baş verən qəzaların birini, qeyd etdiyim kimi, Xaçmaz şəhəri, Atatürk küçəsindəki transformatorunda baş verən yanğını müzakirə edəcəyik.
Təbii ki, yanğından sonra Azərişığın əməkdaşları da olay yerinə gəlib, gecə ilə hadisənin nəticələrini aradan qaldırmağa çalışıblar.
İnsafən onu da qeyd etmək vacibdir ki, 3-4 gün silsilə qəzalarla 24 saat işləyən bu azsaylı qrupun belə davranışları təqdirəlayiqdir.
Amma...
Bu məsələnin amması ondan ibarətdir ki, Atatürk küçəsindəki transformator, həm də Nazim Qəniyevinn həyətində, bəli, evinin 5 metrliyində yerləşir.
Transformator digər evlərə də olduqca yaxın məsafədədir, ancaq Qəniyevlər ailəsi isə demək olar ki, birbaşa odun-alovun, təhlükənin içində yaşayırlar.
Ailə uzun illərdir ki, bir çox səlahiyyətli orqanlara müraciət etsə də, aldıqları ən son və qəti cavab bu olub ki, transformatorun yerini yalnız öz hesabına dəyişə bilərsən.
Xaçmazda Azərişığın yerli idarəsinin əməkdaşları bütün günü qəzalarla məşğul olduqlarından, həm də biz onlara mane olmamaq üçün suallarımıza qeyri-rəsmi cavablar almağa çalışdıq.
Maraqlı bir situasiya yaranıb. Hökümət, yəni Azərişıq iddia edir ki, bu ərazidə əvvəl transformator olub, sonra isə ev tikilib. Qəniyevlər ailəsi isə deyir ki, hələ uzun illər bundan öncə, o dövrün şəhər sovetinin təkidi ilə, özlərinə məxsus həyətdə transformator qoyulub.
Burda kimin haqlı olub olmamasını birbaşa deyə bilmirik.
Əlbəttə ki, məntiqlə Azərişıq yəqin ki, bir yerə transformator qurarşdırırsa, əlbəttə ki, bu quraşdırmanın özünəməxsus, təlimata uyğun qaydaları və şərtləri olmamış deyil.
Ancaq sakinlərin şikayəti də əsasıs və ya boşuna deyil.
Adi bir yanğın hadisəsində bütün ətrafdakı qonşuların hansı əsəb və stressi yaşadıqlarını təsəvvür etmək çətin deyil.
Yəqin ki, obyektiv şəkildə işıqlandırdığımız bu geniş reportaj Azərişığın əmədaşlarının çəkdikləri əziyyətə kölgə salmamaqla həm də bu qurumun rəhbərliyinin məsələyə həssas yanaşmasına çağırış kimi nəticəsiz qalmayacaq.
Necə deyərlər, daha gözəl nəticələr üçün, daha dürüst addımlar atmağa, məsələn biri elə bu transformatoru burdan başqa yerə köçürməklə həm küçənin sakinlərinin, həm də özlərinin qayğı və stressindən qurtula bilərlər.
Nəticəni DÖVLƏTin yanaşması göstərəcək, biz də bu yanaşmanı çəkib göstərəcəyik...
Cəmil Məmmədli
Teref.az

Dayanacaq binanın blokuna girişi əngəlləyir

"Binanın giriş hissəsini bağlayaraq, beşmərtəbəli qaraj tikilir. Ötən ilin oktyabrından müraciət etmədiyimiz qurum qalmayıb. Artıq, tikinti üçün qazıntı işlərinə başlanılıb”.

Bunu Meydan.TV-yə Azadlıq prospekti ilə Nəsib bəy Yusifbəyli küçəsinin kəsişməsində yerləşən doqquzmərtəbəli binanın sakinləri bildiriblər.

Onların sözlərinə görə, bir neçə dəfə keçirilən etiraz aksiyasından sonra tikinti dayandırılsa da, sonradan inşa işləri davam etdirilir.

"Beşmərtəbəli dayanacağı "Az Pera MMC” tikir. Son 10 ildə ərazidə onlarla çoxmərtəbəli bina tikilib, sıxlıqdan nəfəs almaq, həyətlərdə addım atmaq çətindir. Sakinlər avtomobillərini həmin boş ərazidə saxlayırdılar. İndi belə çıxır ki, dayanacaq üçün ödəniş etməliyik”, – tikinti aparılacaq ərazinin yaxınlığındakı binada yaşayan Orxan Kərimov bildirib.

Şikayətçi deyir ki, dayanacaq tikintisindən əvvəl 50 ildən çox yaşı olan qovaq ağacı da kəsilib.

Şirkət demək olar ki, bütün idarələrdən razılıq sənədi alıb. Baxmayaraq ki, binanın birinci blokuna girişi tamamilə tutur. Məsələn, qəza baş verərkən yanğınsöndürən maşının əraziyə daxil olması mümkün olmayacaq: "Həmin blokda yaşayan sakinlərdən birini təcili xəstəxanaya çatdırmaq lazım olsa, əraziyə təcili yardım maşını girə bilməyəcək. Tikintiyə icazə verən qurumlar isə bunu görə-görə icazə sənədi verib”.

İkibloklu, 100-dən çox mənzilin yerləşdiyi bina 1975-ci ildə Şin Zavodunun əməkdaşları üçün istifadəyə verilib. Dayanacağın tikildiyi ərazi həmin binaya məxsusdur. Tikiləcək dayanacaq ilə bina arasında məsafə yarım metrdən azdır.

Dövlət Satınalma və Arxitektura Komitəsindən bildiriblər ki, Bakı Şəhər İcra Hakimiyyətinin torpaq sahəsinin ayrılması barəsində sərəncamı mövcuddur.

Ötən ilin iyununda Bakı Şəhər Memarlıq və Şəhərsalma Baş İdarəsi tərəfindən həmin ərazidə yerüstü avtomobil dayanacağı binasının tikintisinə elektron formada icazə verilib.Meydan.TV

Bəstəkar-müğənni Murad Arif əməkdar artit Bəhram Bağırzadənin regionlardan Bakıya gələnləri şəhər həyatına uyğunlaşa bilməməsi haqqında fikirlərinə münasibət bildirib.

Murad Arif sosial şəbəkədə bu sözləri yazıb: "Yenə Moşu-Sevda qarşıdurması... ("Bəxt üzüyü" filmindən). Məncə, bu dəxlisiz rayonlu-şəhərli söhbətinə söyüş qoymaq lazımdır".

Qeyd edək ki, Bəhram Bağırzadə bu fikirləri qeyd edib: "Bakıya gələn insanlar urbanizasiya prosesini keçə bilmirlər. Görürsüz, onlar hətta restoranda çox ucadan danışırlar. Belə bir ifadə var, şəhər öz memarlığı il gözəldir, amma şəhər birinci növbədə orada yaşayan insanlarla gözəldir. Son 25 ildə şəhər çox dəyişib. Rayondan gələnlər şəhərə adaptasiya ola bilmirlər. Bu, bizim günahımızdır. Biz susuruq, onlara demirik ki, uşaqlar, restoranda belə danışmaq olmaz".

Milli.Az

Türk dövlətinin qurucusu Mustafa Kamal Atatürk deyərdi Azərbaycanın sevinci bizim sevincimiz, kədəri bizim kədərimizdir. Azərbaycan bizim qardaşımızdır. Heç nəyə baxmayaraq ona yardım etmək borcumuzdur. Mübaribələr hər zaman kişlik meydanı olub vətən üçün canından keçib Şəhid olan yüzlərlə qəhrəmanlarmız var.

Poladlarmız, Mübarizlərmiz qürur yerlərmizdir!

Hələ adını sadalaya bilmədiymiz qazilərmiz var. Bununla da əzmi, İradəsi, vicdanı yenilməz qürurlu Azərbaycan xalqı 44 günlük vətən müharibəsində bir daha bütün dünyaya hansı cəsarətə malik olan xalq olduğun göstərdilər. Amma çox təəssüflər olsun ki, 44 günlük müharibə bitdikdən sonra, qürurlu mərd oğullarmızın döyüş əzmin nüfuzdan salan insanları televiziyada sosial şəbəkələrdə yerli KİV-lərdə görürük, onlar danışmaqla əzimkar xalqa stimul yox əksinə küskün saldıqlarının bəlkədə fərqində deyillər.

Kimdir onlar? Onlara kim bu səlahəti verib?

Biznes ledisən pulun-paran var deyə hər sözü söyləyə biləcək cəsarətə malik deyilsən və yaxud da həyatında olan insanın millyonları var deyə burda mən bağdad da kor xəlifə deyib at oynada bilməzsən.

Bir neçə gün bundan öncə Ruhi Əliyeva adlı bir şəxsin video müsahibəsində mən də 44 günlük vətən müharibəsində Tovuz istqamətində top atmışam deməsi Cəmiyyətdə birmənalı olaraq ruh düşkünlüyü yaradıb. Beləki, ordumuza dəstəyə yüzlərlə insanların getməsinə baxmayaraq , 44 günlük vətən müharibəsi dövüründə Ruhi Əliyevaya necə və kim icazə verilibki hətta 12 ci topu atıb.

Hara baxırdı ölkənin Müdafiə nazirliyi və güc strukturları?

Ruhi Əliyevanın fikirləri sübut edir ki, müdafiə nazirliyi konkret olaraq Tovuz rayonu ərazisində yerləşən N saylı hərbi hissənin rəhbərliyi ciddi qanun pozuntularına yol vermişdir və yaxudda Ruhi Əliyeva yalan danışır. Böyük ehtimalla Ruhi Əliyeva inanır ki, onun danışığına heç kim əhmiyyət vermir.

Bu baxımdan rahat şəkildə ictimayyəti aldadır. İnanırıq ki, dövlət qurumları R. Əliyevanın söylədiklərini yoxlayacaq və həqiqət üzə çıxacaq.

AZƏRBAYCANREALLIĞI.COM