“Varım-yoxum paltarlarım və mahnılarımdır. Başqa heç nəyim yoxdur. Geyimlərim mənim ölü kapitalımdır. Heç vaxt kirayə paltar götürməmişəm, ya tikdirirəm, ya da alıram”.
Oxu.Az xəbər verir ki, bu sözləri Əməkdar artist Mətanət İsgəndərli Xəzər televiziyasında yayımlanan “Evdəkilərə salam” proqramında deyib.
Dəbdəbəli evində çəkiliş komandasını qəbul edən Mətanət İsgəndərli yemək bişirə bilməyən qadınları tənqid edib:
“Bu evdə 15 ildir yaşayıram. Söyləyirlər ki, müğənnilər evdə işləmirlər. Yazıq canımız... Biz evə elə yorğun gəlirik ki, ev işləri ilə məşğul olmağa vaxt olmur. Evin çox işlərini yardımçı edir.
Cəld, diqqətli adamları sevirəm. İş görəndə əllərimi görə bilməzsiniz. Cəld iş görürəm. İş yarıtmayan adamlardan xoşum gəlmir.
Bəzi qadınlar yemək bişirməyi sevmədiklərini deyirlər. Necə ola bilər ki, bir qadın yemək bişirə bilməsin? Belə qadınları sevmirəm”.
Karantin günlərini evində keçirən Əməkdar artist koronavirusdan qorunmaq üçün gigiyena qaydalarına ciddi əməl etdiyini, oğlu Kərimin isə həddən artıq vasvası olduğunu diqqətə çatdırıb:
“Gəlinim mənimlə eyni binada, lakin aşağı mərtəbədə yaşayır. Onları görmək istəyəndə ya oğlumgilə gedirəm, ya da bizə gəlirlər. Onlara deyirəm ki, bizə spirtlə gəlin. Liftin düymələrini isə salfetlə basın! Oğlum Kərim uşaqları qucağında gətirir. Kərim çox təmizkardır. Ağzında maska, əllərinə də əlcək taxır. Spirtlə gəzir. Böyük qutularda spirt alıb”.
Verilişinin gedişatında müğənni qızı Ülkərdən də bəhs edib. Ad gününü qeyd etmək üçün Bakıya gələn İsgəndərlinin qızı karantinə görə ölkəni tərk edə bilməyib.
“Qızım Ülkər də Bakıdadır. Fevralın 21-də onun ad günü idi. Fevralın 18-də bura gəldi. Mart ayının əvvəli yaşadığı Antalyaya qayıtmaq istəyirdi. Amma qayıda bilmədi. Elə o vaxtdan buradadır. Efir vasitəsi ilə kürəkənim Erginə və onun ailəsinə salamlarımı çatdırıram”.
Şounun aparıcısı Aytəkin İsmayılqızı sonda M.İsgəndərlinin bacısı Sədaqət xanıma söz verib. Kameralar önünə keçən Sədaqət xanım mahnı ifa edib.
Zamantv.az