285 saylı məktəbin müəllimi Təranə Yusifova yeni direktor təyin edilən Nuranə Yəhyayeva tərəfindən işdən qanunsuz olaraq uzaqlaşdırıldığını iddia edir.
O, bu barədə Bakupost.az -a açıqlamasında bildirib.
35 il pedaqoji stajı olduğunu qeyd edən T.Yusifovanın sözlərinə görə, 1994-cü ildən isə Suraxanı rayon B.Qulamoğlu adına 285 saylı tam orta məktəbdə müəllim işləyib:
"Özüm Ağdam rayonundan məcburi köçkünəm, tənha yaşayıram, heç yerdən köməyim yoxdur. Pensiyaya çıxmağıma bir ilim qalmışdı. Məktəbimizə yeni direktor təyin edilən Nuranə Yəhyayeva məni və müəllim yoldaşım, onkoloji xəstə olan Təranə Rzayevanı ötən il oktyabrın 2-də işdən azad etdi. Nuranə xanım direktor təyin olunandan təhsillə məşğul olmaq əvəzinə, hamını bir-birinə vurdu, idarəyə həqiqətə uyğun olmayan məlumatlar verdi. Mən və T.Rzayeva qrup müəlliməsiyik. Bizim məktəbdə üç nəfər qrup müəlliməsi var. Hamıdan da əvvəl qrupda mən işləmişəm".

İşdən azad edilməsinin səbəblərinə aydınlıq gətirən T.Yusifova direktorun "qruplara uşaq yığılmadığını" əsas gətirdiyini deyib:
"Halbuki valideynlərin hamısıyla özü danışıb. Deyib ki, uşaqlarınızı qrupa qoymayın, birinci sinifdədirlər, yorulurlar. Yəni qərəzli şəkildə valideynlərin qarşısını aldı, onların uşaqlarını qrupa qoymasına mane oldu".
T.Yusifova məsələ ilə bağlı hazırda məktəb rəhbərliyi ilə aralarında məhkəmə çəkişməsinin davam etdiyini bildirib:
“Direktorun qanunsuz addımı ilə bağlı mən və Təranə xanım məhkəməyə müraciət etdik. Məhkəmədə bizə başqa məktəblərdə işləməyi təklif etdilər. İş yoldaşım bu təkliflə razılaşdı, indi işləyir. Amma mən razılaşmadım. Çünki tələbimdə haqlıyam. Sonuncu məhkəmə iclasımıza Bakı Şəhəri üzrə Təhsil İdarəsindən Ərəstun müəllim adlı bir hüquqşunas gəldi. Hakim ona tapşırdı ki, Təranə xanımın məsələsini həll edin. O da hakimə problemi həll edəcəyinə söz verdi. Bir gün sonra Ərəstun müəllim zəng vurub dedi ki, sizi 279 nömrəli məktəbə göndərə bilərik. Dedim ki, başqa məktəb istəmirəm.
İşə Nəsimi rayon Məhkəməsində baxılırdı. Qarşı tərəf apellyasiya şikayəti verib ki, məhkəmə Suraxanı rayonunda olmalıdır, çünki məktəb Suraxanıdadır. Apellyasiya məhkəməsi isə onların iddiasını rədd edib".
T.Yusifova məsələylə bağlı nazirlikdə də qəbulda olduğunu deyib:
“Mən bununla bağlı Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin direktoru Eşqin Bağırovun da qəbulunda olmuşam. Məsələdən o da xəbərdardır. Azərbaycan qanunlarına, Prezident İlham Əliyevə güvənirəm. İnanıram ki, Elm və Təhsil Nazirliyi bu qanunsuzluğu aradan qaldıracaq, haqq-ədalət öz yerini tutacaq".

Məsələ ilə bağlı 285 saylı məktəbin rəhbərliyi ilə əlaqə saxlmağa çalışdıq. Məktəbdən Bakupost.az -a bildirdilər ki, direktor Nuranə Yəhyayeva müsabiqədə iştirak etdiyi üçün açıqlama verə bilməyəcək.

"Zəfər parkı... Xaçmazın gözəl ünvanlarından biridir. 44 günlük şanlı qələbəmizi özündə əks etdirən, Azərbaycanda ilk dəfə Xaçmaz rayonunda inşa edilən Zəfər parkının ümumi ərazisi 4 hektardır. Parkda süni göl, fəvvarə, müxtəlif iaşə obyektləri yaradılıb. Bundan başqa idman qurğuları, velosiped zolağı , uşaqların əyləncəsi üçün atraksionlar , eləcə də, açıq havada tədbirlərin təşkili məqsədilə səhnədə mövcuddur. Parkın ərazisində müasir işıqlandırma sistemi qurulub və yaşıllıq zolaqları salınıb. Zəfər parkı yay aylarında Xaçmazlıların ən çox üz tutduğu məkanlardan biridir. AMMA..." Dia-az.info bildirir ki, iş də məhz bu "amma"dadır. Bu barədə yazan xaçmazlılar daha sonra bildiriir:

"Belə gözəl bir park maləsəf əlaqədar qurumların diqqətsizliyi və nəzarətsizliyi səbəbindən əksər hallarda atılmış yeri xatırladır ki, bu da ilk növbədə dövlətin - büdcənin puluna rəsmi məmurların sayğısızlığıdır.

Fakt budur ki, bura gələn vətəndaşlar təmizliyə riayət eləmirlər, tirnajorların çoxsu tamamı ilə sıradan çıxıb, yerlər "semiçka" qabığı və daha nələr....nələrlə doludur. Tamam vətəndaşlar zibilləyir... Bəs bu təmizliyə nəzarət edən kimsə yoxdurmu? İcra başçısı hara baxır? Bilirmi ki bu park yalnız başçı orada və ya da yaxınlıqda olanda təmizlənir.

Dia-az.info vasitəsilə, xaçmazlılara da müraciət edirik... Millət, heç olmasa bir az parkın qayğısına qalaq... çünki icra hakimiyyəti yox kimidir"

Paytaxda yerləşən “ADA” Universitetinin yeni korpusu üçün tikinti işinin aparılması məqsədi ilə Bakı şəhəri, Nərmanov rayonu, Tələt Şıxaəliyev 18 ünvanında yerləşən evlər kompensasiya qarşılığında vətəndaşlardan alınır.

Vətəndaşlara verilən kompensasiya ilə bağlı narazılıqlar yaranıb. Məlumata görə söküntü işinə nəzarət edən Nərimanov rayon icra başçısının keçmiş birinci müavini Şahmar İbadov vətəndaşlara “ADA” Universiteti adından hədə-qorxu gələrək, istdəyi kompensasiyanı ödəyir. Bununla bağlı bir video müraciəti diqqətinizə çatdırırıq.

Bəs kimdir bu Şahmar İbadov? Uzun illər Nərimanov rayon İcra Hakimiyyəti başçısının birinci müavini işləmiş İbadov hazırda Prezident Adminstrasiyasının İşlər İdarəsində sektor müdiri vəzifəsində çalışır. Şahmar İbadov var-dövləti ilə seçilən məmurlardandır. Onun obyektləri və özünə tikdirdiyi villalar buna misal ola bilər. Məsələn qalmaqallarda adı hallanan “Ariva” hotelin, Nərimanov rayonunda “Çanaqqala”, “Pürrəngi” , Nərimanov parkının içində yerləşən obyektlərin onun təsir dairəsində olduğu bildirilir. Onu da qeyd edək ki, cənab İbadov biznes fəaliyyətinə hələ 90-cı ilin əvvəllərində Binəqədidə (“pasyolka kirov”da) başlayıb. Kifayət qədər geniş maddi imkanlara malik olan İbadovun adı ölkədəki FETÖ şəbəkəsi ilə də hallanıb. Bununla bağlı cumhuriyyet.az bildirir ki, Şahmar İbadovun Gülənin Azərbaycanda fəaliyyət göstərən “komandasının” rəhbərlərindən birinın olması ilə bağlı hətta türk mətbuatı da geniş məqalə dərc etmişdi. Bundan başqa Şahmar İbadovun Elnur Aslanov və Ceyhun Osmanovla ilişkilərinin olması da artıq sübut olunub.

Parlament sədrinin köməkçisi vəzifəsindən, Nərimanov İcra Hakimiyyətinə şöbə müdiri təyinatı və ən qısa zamanda icra başçısının I müavini təyin olunması, burdan uzaqlaşan kimi isə Prezident Adminstrasiyasında vəzifə alması da onun hansısa qüvvələr tərəfindən himayə olunduğunu düşünməyə əsas verir. Bu imkanlar qalmaqallı məmurun övladlarına təsir edib. Şahmar müəllimin oğlu Elmar İbadov 2017-ci il avqustun 22-də idarə etdiyi “Range Rover” markalı avtomobillə yaşlı qadını vurub. Bir neçə gündən sonra qadın ölüb. Abşeron Rayon Məhkəməsinin hökmü ilə Elmar İbadov 5 il müddətinə azadlıqdan məhrum olunub. Məhkəmə onun cəzasının məntəqə tipli cəzaçəkmə müəssisəsində çəkməsi haqqında qərar qəbul edib. Daha sonra Sumqayıt Apellyasiya Məhkəməsi ona tam bəraət alıb. Hakim Məhəmmədəli Rzayevin məhkəmə-hüquq sisteminin tarixinə “qızıl” hərflərlə “imza” atdığı bu qərara Şahmar İbadovun zərərçəkmişin ailəsinə hədiyyə etdiyi təzə avtomobil mühüm rol oynayıb. Şahmar İbadovun o biri Totu ləqəbli oğlunun isə 555 qeydiyyat nişanlı milyon manatlıq avtomobil kolleksiyası var. Bir sözlə, Şahmar İbadov və oğlanları bu məmləkətdə nə lazımdırsa edirlər. Bunlar üçün qayda-qanun-zad kağız üstündədir. Məlumata görə qalmaqallı tarixçəyə malik İbadov rayonların birinə icra başçısı və ya nazir müavini getməyə hazırlaşır.

aztoday.az

Bakı şəhəri, Pirallahı rayon sakini Vüsalə Suvarova icra başçısı Vasif İmanovdan şikayətçidir.

O bu barədə "Bakupost" TV -yə müsahibəsində bildirib.

V.Suvarova deyib ki, atası Suvarov Vəfalı Gülhəsən oğlu 1994-cü ildə Ağdamın Güllücə kəndinə şəhid olub.

Vüsalə Suvarovanın sözlərinə görə, atası müharibəyə getməzdən öncə ona yaşadıqları binanın qarşısında torpaq sahəsi verilib:

"Atam şəhid olduğu üçün uzun müddət həmin ərazidə heç bir iş görə bilmədik. 2011-ci ildə isə atamın şəhidlik puluyla orada obyekt tikdik və saç ustası kimi fəaliyyət göstərməyə başladım. 2013-cü ildə Vasif İmanov Pirallahı rayonuna icra başçısı təyin ediləndən sonra bizimlə görüşdü ki, sizin obyektinizi sökməliyəm, yerində uşaq meydançası salınacaq. O, bunun qarşılığında bizə başqa yerdə obyekt verəcəyini vəd etdi".

Amma icra başçısı vədinə əməl etməyib. Nə sökülən tikilinin əvəzinə nəsə verilib, nə də həmin sahədə uşaq meydançası tikilib:

"Düz 11 ildir, icra başçısı bizi süründürür, hörmətsilik edir, aşağılayır. Mənim atam bizi dövlətə etbar edib, gedib şəhid olub. Dövlətsə dəstək olmaq əvəzinə əmlakımızı əlimizdən alır, yeganə çörək yerimizi qapadır".

Daha ətraflı videoda:

“Bravo” marketdə vaxtı keçmiş məhsul satılır.

Bakupost.az xəbər verir ki, bununla bağlı sosial şəbəkədə görüntülər yayılıb.

"Bravo"da vaxtı keçmiş məhsul satılır

Görüntülərdə məlum olur ki, vaxtı keçmiş məhsulun tarixi yenilənərək yenidən satışa çıxarılıb.
Qeyd edək ki, dəfələrlə mətbuatda və sosial şəbəkələrdə bu kimi şikayətlər olunur.

VİDEOYA baxmaq üçün BURA TIKLAYIN...My Webpage

Məlimdur ki, Vətən müharibəsi zamanı işğalçı Ermənistan üzərində parlaq qələbələr əldə etdikdən sonra, azad edilən torpaqlarımıza Böyük Qayıdışın başlanması xalqımızın və dövlətimizin qarşısında duran əsas vəzifə oldu. Bəli, çox keçmədi ki, bir tərəfdən ərazilərin minalardan təmizlənməsi prosesi həyata keçirilməyə başlanıldı, digər tərəfdən isə yeni yolların çəkilməsi, körpü və tunellərin inşa olunması, su və elektrik xətlərinin bərpa olunması, dağıdılan şəhərlərin, qəsəbə və kəndlərin yenidən qurulması və s. kimi işlər sürətləndirildi.
Azad olunmuş ərazilərindən olan Zəngilan rayonunda da, hal-hazırda yeni yollar çəkilir, körpülər salınır, elektrik stansiyası və s. tikilir. Budəfəki narazılıq isə, Zəngilan rayonu ərazisində inşa olunan körpü və tunellərin tikintisi işlərində çalışan fəhlələrin üz-üzə qaldıqları problemlərlə bağlıdır. Məsələn, bu günlərdə Dəryaz qəzetinin redaksiyasına Şəki şəhəri, Aran kənd sakini Qədimcan Kabulov tərəfindən müəyyən məlumatlar çatdırılıb. Məlumatlarda bildirilir ki, 08 aprel 2024-cü il tarixdə, saat təqribən 8:30 radələrində “AZVİRT” MMC-yə məxsus avtobus, Zəngilan rayonu ərazisindəki körpü-tunel tikinti işlərində çalışan şəxsləri Bakı şəhəri istiqamətinə apararkən Beyləqan rayonu ərazisində qəzaya uğrayır. Baş verən yol-nəqliyyat hadisəsi zamanı 2 nəfəri qadın olmaqla, cəmi 17 nəfər müxtəlif ağır bədən xəsarətləri alırlar. Xəsarət alanlar içində 2 nəfər fəhlənin, yəni Kabulov Sənan Qədimcan oğlunun xəsarəti çox olur, Kabulov Sərxan Qədimcan oğlunun isə çanaq sümüyü sınır. Belə bir səbəbdən də, bu şəxsin vəziyyəti daha ağır olur. Hadisənin baş verdiyi vaxtlarda xəsarət alanlar Beyləqan Rayon Mərkəzi Xəstəxanasına çatdırılsalar da, təəssüflər olsun ki, bu səhiyyə müəssisəsində onlara qarşı olduqca soyuq münasibət göstərilir və xəsarət alan şəxslərin Bakı şəhərinə çatdırılması məsləhət görülür. Qeyd edək ki, çanaq sümüyü sınan Sərxan Kabulov Elmi-Tədqiqat Travmatologiya və Ortopediya İnstitutuna çatdırılsa da, bu səhiyyə müəssisəsində xəstəni qəbul etməkdən imtina edirlər. Adı çəkilən bu səhiyyə müəssisəsinin şöbə müdiri Rəşad həkim, imtina olunmasını onunla əsaslandırır ki, “İcbari tibbi sığorta üzrə Xidmətlər Zərfi”ndə çanaq sümüyünün əməliyyat olunması qeyd olunmayıb. Bunun nə dərəcədə həqiqət olub-olmaması haqda dəqiq fikir bildirməsək də, deyəcəyimiz odur ki, Travmatologiya və Ortopediya İnstitutunda da xəstəyə ögey münasibət göstərilir.

Bütün bunlar qalsın bir yana, baş verən yol-nəqliyyat hadisəsi zamanı müxtəlif bədən xəsarətləri alan şəxslər “AZVİRT” MMC –nin podratçı şirkəti olan “Saninşaat” şirkətinin Zəngilan rayonu ərazisində inşa etdirdiyi körpü-tunel işlərində çalışan şəxslər olurlar. Çox təəssüflər olsun ki, 08 aprel 2024-cü il tarixdə yol-nəqliyyat hadisəsi baş verir və hadisə barədə hər iki şirkətin rəhbərliyi, o cümlədən “Saninşaat” podtatçı şirkətinin sahibi Rüstəm müəllim də məlumatlı olur, amma həmin vaxtdan bu günə kimi bu şirkətlərin rəhbərləri xəsarət alan şəxslərin durumları ilə maraqlanmırlar. Bu da onu söyləməyə əsas verir ki, hər iki şirkətin rəhbərliyində olan şəxslərə görülən işlər, əldə olunan gəlirlər lazımdır, xəsarət alan şəxslərin sağlamlıq durumları isə, onlar üçün heç bir əhəmiyyət kəsb etmir. Əgər bu belə olmasaydı o halda rəhbərlikdə olanlar Ramazan Bayramı günü münasibətilə evlərinə getmək istəyən və yol-nəqliyyat hadisəsi zamanı müxtəlif bədən xəsarətləri alan şəxslərin sağlamlıq durumları ilə maraqlanardılar.

P.S. Məqalə dərc olunan zaman Azvirt MMC-nin mətbuat xidmətinin rəhbəri Ceyhun bəy zəng edib bildirdi ki, xəsarət alan işçilərin heç biri bizim işçilər deyil. Yalnız onlar bizim şirkətin maşınında qəzaya düşüblər. Əcaba bu təsadüf haradan. Bəs o işçiləri işlədən şirkət onlarla müqavilə bağlamayıblarmı ki, bu gün onların tibbi sığortası olmadığından onlar xəstəxana dəhlizlərində qalıblar. Deyəsən torbada pişik var.

Yazıda adları keçən hər kəsin mövqeyini dinləməyə hazırıq.

Mövzu diqqətimizdədir.

Deryaz.az

Bu gün – 18 apreldə Kəlbəcərin işğalı zamanı Ermənistan silahlı qüvvələrinin Başlıbel kəndində dinc əhaliyə qarşı törətdiyi kütləvi qətliamın növbəti ildönümüdür.

Hadisə 1993-cü il aprelin 18-də törədilib.

Rəsmi məlumata görə, 1993-cü il aprelin 3-də Ermənistan silahlı qüvvələri Başlıbel kəndinə silahlı hücum edərək kənd sakinlərinə məxsus evləri kütləvi surətdə qarət edib və tamamilə yandırıb. Kəndi tərk edə bilməyən 62 nəfər təxminən 3 kilometr aralıda, kəndin ən hündür hissəsində yerləşən “Portda” adlanan dağ relyefli ərazidəki təbii mağaralara sığınıb. Həmin 62 nəfərdən 48-i Başlıbel, 1-i Taxtabaşı kəndlərinin, 4-ü Laçın rayonu sakini, 9 nəfər isə kəndi müdafiə edən hərbi qulluqçular olub.

Törətdiyi vəhşiliklə kifayətlənməyən Ermənistan silahlı qüvvələrinin avtomat və iriçaplı silahlarla silahlanmış ünsürləri öz azğınlıqlarını davam etdirərək 1993-cü il aprelin 18-də silahsız mülki şəxslərin doğma kəndlərində qayalara sığındığı yerləri axtararaq aşkarlayıb, köməksiz vəziyyətdə qalmış mülki şəxslərin gizləndiyi mağaraları həmin gün saat 15-dən 21 radələrinədək atəşə tutmağa başlayıblar. Nəticədə silahsız, hər hansı müqavimət göstərmək imkanına malik olmayan 12 nəfər (1-i 12 yaşlı uşaq, 1-i 16 yaşlı yeniyetmə, o cümlədən 6 qadın və 6 kişi olmaqla) – 63 yaşlı Səmədov Yaqub İsa oğlu, 54 yaşlı Əhmədova Büsat Əliş qızı, 12 yaşlı Əhmədova Zövqiyyə Binnət qızı, 60 yaşlı Əmralıyev Məhəmməd Abış oğlu, 29 yaşlı Əmralıyev Surxay Məhəmməd oğlu, 21 yaşlı Əmralıyev Çingiz Məhəmməd oğlu, 16 yaşlı Əmralıyeva Aygün Məhəmməd qızı, 67 yaşlı Həsənova Çiçək Mikayıl qızı, 68 yaşlı Cəfərova Gülara Cəfər qızı, 95 yaşlı Cəfərova Gülgəz Qədim qızı, 22 yaşlı Abdullayev Vüqar İsa oğlu və 52 yaşlı Əsgərov Əhliman Əvəz oğlu sığındıqları yerdə qəsdən öldürülüblər.

Hücum nəticəsində 14 nəfər - 93 yaşlı Babayeva Kubra Qədim qızı, 23 yaşlı Əmralıyeva Arzu Binnət qızı, 56 yaşlı Əhmədov Binnət Əbdüləli oğlu, 13 yaşlı Əhmədov Niyyət Binnət oğlu, 15 yaşlı Əhmədova Şərqiyyə Binnət qızı, 56 yaşlı Əmralıyeva Zibeydə Abış qızı, 67 yaşlı Həsənova Leyli Əli qızı, 58 yaşlı Həsənova Mərmər Cavad qızı, 63 yaşlı Həsənova Şamama Hüseyn qızı, 36 yaşlı Həsənova Zeynəb Mahmud qızı, 63 yaşlı Qasımova Tutu Alı qızı, 2 yaşlı Məhəmmədov Hökmdar Surxay oğlu, 73 yaşlı Yusifova Şamama Ağa qızı və 65 yaşlı Mənsimov Hüseyn İbrahim oğlu girov götürülüb. Həmin şəxslər sonradan girovluqdan azad edilsələr də, onlardan 9-u aldıqları mənəvi və psixoloji sarsıntılardan vəfat ediblər.

Cinayətkar qruplaşmanın üzvlərinin əlindən digər mağaralara qaçaraq gizlənən və vəhşilərdən canını qurtarmağa çalışan 36 şəxsdən 7 nəfəri də, mühasirə şəraitində aldıqları xəsarətlərdən Kəlbəcər rayonunun müxtəlif kəndlərində dünyasını dəyişiblər.

Sağ qalmış Başlıbel kənd sakinləri sonrakı tarixlərdə iki qrupa bölünməklə müxtəlif mağaralarda gizlənib, həyatları üçün yaranmış təhlükələrə baxmayaraq, 1993-cü il mayın 12-də gecə saatlarında həmyerlilərinin qətlə yetirildiyi mağaraların yanına yaxınlaşıb odlu silahlarla qətlə yetirilmiş 12 nəfərin meyitlərini paltarlı vəziyyətdə iki cərgə (hər cərgədə 6 qəbir olmaqla) qəbirlər qazmaqla dəfn etdikdən sonra hadisə yerindən uzaqlaşıblar.

1993-cü il aprelin 19-dan sonrakı tarixlərdə isə sağ qalmış 29 nəfər 113 gün mühasirə həyatı yaşadıqdan sonra çətin dağ relyefinə malik yollarla Kəlbəcər rayonunun Çaykənd kəndinə, oradan Tərtər çayını və Qoşqar dağını keçməklə Daşkəsən rayonu istiqamətində meşələrlə irəliləyərək iyul ayında Daşkəsən rayonunun Zivlən kəndinə çatmaqla həyatlarını xilas edə biliblər.

Faktlar Azərbaycan Baş Prokurorluğunun apardığı istintaqla rəsmi təsdiqini tapıb. Cinayət işinin istintaqı zamanı kənddə mülki əhaliyə qarşı xüsusi amansızlıq və qəddarlıq nümayiş etdirildiyi sübuta yetirilib.

Başlıbeldə qətlə yetirilənlərdən 12 nəfərin cəsədi 44 günlük müharibədən sonra, ötən ilin aprelində ekshumasiya edilərək Məhkəmə Tibbi Ekspertiza və Patoloji Anatomiya Birliyinə gətirilərək müvafiq istintaq hərəkətləri aparılıb. Faciə qurbanlarının meyit qalıqlarından və həmin şəxslərin ailə üzvlərindən götürülmüş DNT analizləri əsasında aparılmış ekspertizaların nəticələri onların erməni hərbçiləri tərəfindən güllələnərək qətlə yetirildiyini təsdiqləyib.

Dörd ay davam edən istintaqdan sonra ekshumasiya edilmiş cəsədlər əvvəlki yerinə qaytarılaraq orada dəfn edilib.

Hacıqabul Rayon İcra Hakimiyyəti (RİH) ilə tenderlərinin qalibi olan "Victory Construction Group" şirkəti arasında qalmaqal yaranıb.

İqtisadiyyat.az xəbər verir ki, RİH öhdəlikləri yerinə yetirmədiyinə görə şirkətə qarşı məhkəmədə iddia qaldırıb.

İşin mahiyyəti müqavilələrdən əmələ gələn öhdəliklər üzrə mübahisələrlə (podrat müqaviləsi üzrə mübahisələr) bağlıdır.

İddia Bakı Kommersiya Məhkəməsində hakim Leyla Əliyevanın sədrliyi ilə araşdırılacaq.

Qeyd edək ki, "Victory Construction Group" 2022-ci ildə dövlət qeydiyyatına alınıb. Şirkətin rəhbəri Bədəlov Bəhruz Bayram oğludur. Şirkət ötən il Hacıqabul rayonunda RİH-in elan etdiyi tenderlərin qalibi olub. B.Bədəlov "Şabran-D" Məhdud Məsuliyyətli Cəmiyyətinin rəhbəri Cəlal Bədəlovun qardaşıdır.

Qazax rayon sakini Cəfərov Arif Zakir oğlu tərəfindən Hurriyyet.az saytının redaksiyasına şikayət məktubu daxil olub. Sürücü kimi 44 günlük müharibədə iştirak etdiyini bildirən şikayətçi deyir ki, nazirlikdən onun xəstəliyimə laqeyd yanaşırlar:

“Mən, Cəfərov Arif Zakir oğlu, yazaraq bildirirəm ki, Aprel döyüşlərində və 44 günlük müharibədə "maxe" sürücü kimi zəfərin iştirakçısı olmuşam. Qələbədən 8 ay sonra tərxis edilmişəm.

Müharibədən sonra səhhətimdə ciddi problemlər ortaya çıxdı, hətta qaraciyər serrozu diaqnozu qoyuldu. Səhhətim kəskin ağırlaşmışdı.

Vətənimiz üçün 2 əsgər övladı böyüdürəm. Rəsmi və qeyri-rəsmi gəlirim yoxdur. Oğlum zibil tullantılarından dəmir yığıb satmaqla məşğuldur. Evə tək gəlir gətirən odur. Bir reseptim 800 AZN tutur, sosial yardım olaraq isə 220 AZN verilir. Amma tanıdığım şəxslər var ki, hərbi xəstəliklə 420 AZN alırlar.

İmkansızlığın ucbatından qaraciyər serrozu xəstəliyindən ciyər çatışmazlığına gəlib çatmışam.

Mart ayının 6-da Əlillərin Bərpa Mərkəzində olmuşam. Hərbçiləri qəbul edən həkim mənə kobudcasına bildirdi ki, sənə 2-ci dərəcəli əlillik verməyəcəyik, narazılığın var, get sən də özünü yandır.

Mənə 2 illik sosial pensiya veriblər. Bəzi məmurlar o qədər harınlayıb ki, heç "prezidentin qəbuluna gedəcəm" sözünü də veclərinə almırlar.

Xəstəliyimi bilib, ölümümü gözləyən adamam. Mən bu halımda dövlətimdən haqqımı ala bilmirəm. Bir tək ümidim Allahadır. O dünyada Allaha şikayət edəcəm.

2021-ci ildən pensiya üçün müraciət etdiyim halda, imtina verirdilər. Halbuki, səhhətim göz qabağındadır.

Sizdən xahişim odur ki, mənim vəziyyətimi ictimailəşdirin, bəlkə yuxarıda oturan vəzivəli şəxslər xəcalət çəkə”.

Şabranlı sahibkar Mansur İbrahimovun sabiq deputat İlham Əliyevə qarşı məhkəmə iddialarından birinə də Sumqayıt Kommersiya Məhkəməsində hakim Fərman Həmidlinin sədrliyi ilə baxılır. Sahibkar Mansur İbrahimov İlham Əliyevin qanunsuz sahibliyindən ona məxsus olan əmlakların geri qaytarılmasını tələb edir. Bildirir ki, İlham Əliyev əmlaklarını ona qaytarmamaq üçün qanundan sui-istifadə edir. İlham Əliyev məhkəmələrə əsassız iddialar verir. O iddia edir ki, Fərman Həmidlinin sədrliyi ilə keçirilən prosesdə İlham Əliyev qarşılıqlı iddia təqdim edib. Həmin iddia əsassız olduğundan məhkəmə təmin etməyib. İlham Əliyev isə hakimin verdiyi qərarla razı olmayıb, Sumqayıt Apelyasiya Məhkəməsinə şikayət verib. Şabranlı sahibkar Mansur İbrahimov Musavat.com-a deyib ki, İlham Əliyev deputat olduğu günlərdə, 2011-2019-cu illər ərzində ona məxsus olan Şabran rayonu, Gəndab, Aygünlü və Dəvəçi kəndləri ərazisində yerləşən ümumilikdə 52 hektar bağ torpaq sahələrini özünün 400 hektar torpaq sahəsinə qataraq qanunsuz olaraq özününküləşdirib:

“2011-ci ildə İlham Əliyev Kərim Məmmədov və hazırda YAP Xaçmaz təşkilatının sədri olan Məhəmməd Balaqadaşov vasitəsilə mənimlə tanış oldu. O zaman mənə demişdilər ki, İlham Əliyev mənə şəriklik təklif edir. Şərti də budur ki, o, sərmayə qoyacaq, biz isə şirkətin genişlənməsini təmin edəcəyik. Söhbətimiz Kərim Məmmədovun bacısı Minavər Əsədovanın evində oldu. O zamanlar bəzi maneələr vardı, buna görə də İlham Əliyevin təklifi ilə razılaşmalı oldum. İlham Əliyev “Turaz” MMC-yə 50 faiz ortaq oldu. Lakin şərikliyimiz elə ilk gündən baş tutmadı. Çünki İlham Əliyev vəd etdiyi vəsaitləri şirkətə vermədi, əksinə, şirkətin mühasibatlığını məhv elədi. Deyirdi ki, mənə mühasibatlıq yox, “uçotçik” lazımdır. Mən isə bununla razılaşmırdım, deyirdim ki, hər bir manatın qeydiyyatı olmalı, mühasibatlığı aparılmalıdır. Uzun müddət münasibətlərimiz gərgin oldu, bağlardan yığılan meyvələrin satışı, hesabatı məndən gizlədilirdi. Bu işlərə Kərim Məmmədov və onun qaynı Zahir Ələsgərov baxırdı. Mən öz şirkətimdə sırf hüquqi hesabatlara nəzarət edə bilirdim. Ümumiyyətlə, mənə maaş belə verilmirdi. İlham Əliyev cibində deputat mandatı, qayınatası Ramiz Mehdiyevə güvənir, mənim sıfırdan qurduğum şirkəti beləcə ələ keçirmişdi. Ayın yarısından çoxunu Şabranda keçirir, hər gələndə başının dəstəsi ilə məclis qururdu. Məni öz şirkətimdə kənar bir şəxsə çevirmişdilər. Qanunsuzluqlarına etirazlarımı da qulaqardına vururdu. Açıq şəkildə məni həbslə hədələyirdi. Başa düşürdüm ki, şikayətlərimin heç bir nəticəsi olmayacaq. Ona görə də “Turaz” MMC-də İlham Əliyevin özbaşınalığı ilə bağlı heç bir şikayət etməmişdim. 2019-cu ilin avqustunda İlham Əliyev mənim digər şirkətim “Dostluq MK” MMC-yə də əl qoymağa çalışırdı. Görürdüm ki, həmin MMC-nin də bağ torpaq sahələrini ələ keçirəcək. Mənə təklif etdi ki, “Dostluq MK” MMC-dəki 50 faiz payımı ona 3 milyon manata satım. Düşündüm ki, şirkətin 50 faizini ona satmaqla vəziyyətdən çıxaram,digər sahələrdə işimi genişləndirərəm. Lakin o, alqı-satqı müqaviləsi ilə MMC-nin 50 faizini alsa da, pulu ödəmədi. Bu günə qədər də, mənə 3 milyon manatı ödəməyib. Hazırda bu işlər bağlı Ali Məhkəmədə əlavə kassasiya şikayətim var.

Bundan başqa Ali Məhkəmədə “Turaz” şirkətindəki şərikliyimizlə bağlı da şikayətim var. Şikayətin mahiyyəti budur ki, mən şirkətə 2 milyon 578 min 220 manat vəsait qoymuşam. Bu məbləği mən havadan demirəm, məhkəmə qərardadı əsasında təyin olunan məhkəmə mühasibatlıq ekspertizası müəyyən edib. İlham Əliyev həmin məbləği mənə ödəməlidir.

Sumqayıt Kommersiya Məhkəməsində İlham Əliyevə qarşı iddia tələbim budur ki, mülkiyyətimdə olan və “Turaz” şirkətinin 400 hektarlıq bağ torpaq sahələrinə qanunsuz olaraq qatılan 52 hektar bağ torpaq sahəm mənə qaytarılsın. Ümumilikdə isə qanunsuz olaraq “Turaz” şirkətinin 400 hektarlıq bağ torpaq sahələrinə mənə məxsus olan 83 hektar bağ torpaq sahəsi qatılaraq zəbt olunub. 52 hektar torpaq sahəsi dövlət reyestrində mənim mülkiyyətimdədir. Qalan 31 hektar isə müəyyən sənəd çatışmamazlığına görə tam olaraq mənim mülkiyyətimə qeydə alınmayıb. Buna görə də həmin 31 hektar torpaq sahəsi ilə bağlı hələlik iddia qaldırmamışam.

Sabiq deputat İlham Əliyev mənə qarşı çox böyük qanunsuzluqlar edib. Ümidim Azərbaycan məhkəmələrinə, Azərbaycan dövlətinə, dövlətimizin başçısı möhtərəm İlham Əliyevədir. İnanıram ki, Azərbaycan məhkəmələri nəhayət ki, mənim haqqımı bərpa edəcəklər.

Musavat.com