İsmayıllı rayonu, Balik kənd sakini Məmmədov Elbrus İsrafil oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi deyir ki, 5 uşağı var, imkanı zəifdir və sosial yardım ala bilmir:

"Mən, Məmmədov Elbrus İsrafil oğlu, yazaraq sizə bildirirəm ki, bu çətin günümdə mənə sosial vermirlər.

5 uşaq atasıyam. Hər dəfə bəhanələr uydururlar, bildirirlər ki, sizin torpaq payınız var, bu səbəbdən sizə düşmür. Daha sonra dedilər ki, notariusa səhv kod vermisiz.

Bir dəfə də göndərdim, onda da dedilər ki, siz “A” və “B”-ni səhv vurmusuz.

Yoldaşımın adına VÖEN açdırmışam. Hər ay vaxtında vergimi ödəyirəm, xahiş edirəm mənə kömək edin. Bütün öhdəliklərimi doğru-düzgün yerinə yetirsəm də, mənə sosial yardım vermirlər. Səhv axtarırlar, uzadırlar".

Elbrus Məmmədovun şikayəti ilə bağlı Dövlət Sosial Müdafiə Fondununun İsmayıllı Rayon Şöbəsi ilə əlaqə saxladıq. Məsələnin araşdırılacağını bildirdilər.

Məlum olur ki, Səhiyyə naziri Teymur Musayevin sərəncamı ilə Fərid Eyvazov bu ilin aprelində Azərbaycan Tibb Universitetinin (ATU) Tədris Terapevtik Klinikasına baş direktor təyin olunub. Amma problem ondadır ki, bu təyinat Azərbaycan Tibb Universitetinin rektoru, professor Gəray Gəraybəylinin başı üzərindən edilib… Ona görə də indi vəziyyət «ruscadır».

Ötən buraxılışımızda klinikanın mühafizə xidmətinin rəhbəri Fərid Pirverdiyevin şikayət ərizəsi dərc olunmuşdu və o, da qeyd etmişdi ki, baş direktor de-yure tabe olduğu rektor G.Gəraybəylini saymır və s.

***

Şikayətçi həkimlərin sözlərindən o da məlum oldu ki, Fərid Eyvazov gələndən bəri (4 ay ərzində) bu klinikadan 80 həkim-müəllim və digər sahə işçiləri işdən çıxıb: «…Məlumat üçün deyək ki, bu klinika təsərrüfat hesablıdır. Yəni, biz müəllimlər həm də klinikada sahələrimiz üzrə xəstə qəbul edirik. Elə həkim-müəllimlər var ki, indiyədək 20-40 min manat gəlir gətirib. Amma Fərid Eyvazov onlara çatası əmək haqqını vermir, yaxud elə faizlə verir ki, buna qazanc demək olmaz… Ona görə də vəziyyət betər hala gətirilib. Sizdən, bir jurnalist olaraq, obyektivliyinizə inanaraq xahiş edirik, gəlin, görün burada neçə xəstə qalıb? Həkimlər ərizə yazıb işdən çıxdığı üçün xəstələr də bura gəlmir… Görünür, Fərid Eyvazovun məqsədi buranı bağlamaq, özəlləşdirməkdir…».

«Təzadlar»ın sosial platformasına göndərilən mesajlardan isə bəlli olur ki, F.Eyvazovun məqsədi başqadır: «…Artıq hamı bilir ki, Fərid Eyvazov klinikanı boşaltdırmaq üçün əlindən gələni edir. Deyilənə görə, o, rektor Gəray Gəraybəylinin yerinə hazırlaşır. Sonra bu klinikanı ləğv edərək yerində ürəyi istəyən obyekti-klinikanı inşaa etdirmək istəyir. Ona yaxın olan şəxslərin söhbətləri bunu deməyə əsas verir», -deyə mesajlarda qeyd olunur.

***

Bax belə… 2005-2006-cı illərdə Musa Nağıyev adına “Təcili Tibbi” yardım xəstəxanasında həkim-interna kimi fəaliyyət göstərən, 2008-2009-cu illərdə N.Tusi Klinikada, 2011-ci ildən 2012-ci ilədək «Medikal Plaza» Klinikada çalışan, 2013-2016-cı illərdə Səhiyyə Nazirliyində Özəl tibbi müəssisələrinin lisenziyalaşdırılması üzrə ekspert olan, 2014-2015-ci illərdə “Qrand-Hospital”da, 2015-2018-ci illərdə “Aliance-Clinik”də baş həkim kimi fəaliyyət göstərən, nəhayət, “Bakı Bərpa Mərkəzi”ndə baş həkim işləyən Fərid Eyvazovun, belə çıxır ki, ATU-ya rektor gəlmə arzusu reallaşır. Amma təəssüflər olsun, onun gəlişi ilə klinikada qalmaqallar da başlayıb və davam edir. Bəlkə də məqsəd elə ATU rektorunun fəaliyyəti ətrafında belə qalmaqalların yaradılmasıdır ki, yuxarı dairələrdə universitetdə vəziyyətin qənaətbəxş olmaması rəyi yaradılsın.

***

Sonda: şikayətçilərin müraciətləri davam etdiyindən hələki mövzuya son verə bilmirik. Yazıda adı çəkilənləri də dinləməyə hazırıq. Sadəcə, bilmək maraqlıdır: niyə Fərid Eyvazov baş direktor gələndən 80 nəfər işdən çıxıb və həkim-müəllimlərin əmək haqları nədən yanvar ayından bəri verilmir???

«Təzadlar»ın Araşdırma Qrupu

Şübhəsiz, son vaxtlar ictimai həyatımızda baş verən yeniliklər, ölkə başçısı tərəfindən atılan islahatçı addımlar təqdir olunası haldır. Düzdü, bəzi sahələrdə durğunluq, inkişafa meyllilikdən kənarçıxmalar müşahidə olunsa da, ümumilikdə müsbət məqamlar çoxluq təşkil edir.

Bir müddət öncə Penitensiar xidmətin rəisi, rəhbərlik etdiyi sahədə heç bir uğura imza ata bilməyən C.Həsənovun vəzifəsindən kənarlaşdırılması çoxunun ürəyindən xəbər verdi. Onun yerinə reputasiyası zədələnməyən, ədliyyə sistemində müsbət imic sahibi olan Mirsaleh Seyidovun gətirilməsini növbəti mütərəqqi addım saymaq olar. Məhkumların Müdafiəsi İctimai Birliyinin sosial şəbəkə hesablarından cumhuriyyet.az-a daxil olan bilgiyə görə, ötən zaman kəsiyində bir neçə dustaq hüquqi prosedurlara uyğun olaraq cəzalarının çəkilməmiş hissələrindən azad olunmuş və bu proses çox şəffaf həyata keçirilmişdir…

Amma, başqa bir məqam, daha doğrusu, Penitensiar xidmətin Əməliyyat-Rejim idarəsinə Fikrət Qafarovun təyinatı cəmiyyətdə böyük narazılığa səbəb olub. Vaxtilə işlədiyi cəzaçəkmə müəssisələrində “qaniçən”, “qanqster”, “cəllad” kimi ad çıxaran birinin mühüm vəzifəyə gətirilməsi birmənalı qarşılanmadı. Təsadüfi deyil ki, ölkə mediasında Qafarovun dustaqlara qarşı hüquqa zidd əməlləri, onlarla qeyri-insani rəftarı haqda kifayət qədər məlumatlar dərc olunub və dərc olunmaqda davam edir. Təəssüf, adamın inanmağı gəlmir ki, humanist, qanunlara hörmətlə yanaşan M.Seyidovun rəhbərliyi altında Qafarov kimi “cəllad” hələ də özünü “Bağdadın kor xəlifəsi” hiss edir. Ən qəribəsi isə odu ki, nazir Fikrət Məmmədov Qafarovun əməllərinə görməzdən gəlir və istər-istəməz adamı fikir götürür: əcəba, görəsən Əməliyyat-Rejim rəisini Ədliyyənin şefinə hansı tellər bağlayır ki, onun nazıyla bu qədər oynayır?

Məntəqə cəzaçəkmə müəssisələrində Qafarov kimilərin kölgəsinə sığınan Ədliyyə polkovniki Nurəli Eyvazov kimilər da bu gün meydan sulayır. Dustaqlara qarşı ədalətsiz davranan, onların hissləri ilə oynayan eyvazovlar üçün Qafarovun Əməliyyat-Rejim idarəsinə rəhbər gətirilməsi sanki göydəndüşmədir. Amma qanunun da üzü sərtdir. İnanırıq ki, qafarovlar, eyvazovlar çox keçməz, bu sərt üzlə üz-üzə gələrlər. Onda isə gec olacaq, çox gec…

Elm və təhsil naziri Emin Əmrullayev sertifikasiya imtahanından kəsilən 743 müəllimin əmək müqaviləsinə xitam verilməsinə də münasibət bildirib.

Emin Əmrullayev qeyd edib ki, ümumi təhsil səviyyəsində 700-dən çox müəllimin əmək müqaviləsinə xitam vermək onlar üçün də ağırdır.

"Amma başqa yol yoxdur", - deyə nazir vurğulayıb.

AMİA.AZ

"Deməli, Palata indi üzə çıxarıb ki, KTN-nin Aqrar Xidmətlər Agentliyinin yarıtmaz rəhbərliyi dövlətə kələk gəlib". DİA.AZ bildirir ki, bunu açıqlamasında Hesablama Palatasının son ittihamlarına münasibət bildirən tanınmış jurnalist Fazil Əhməd qeyd edib.

Jurnalist daha sonra ilginc məqamların yer aldığı açıqlamada da bulunub: "Söz vaxtına çəkər. Elə deyəsən 2020-ci il idi, KTN-in Çindən aldığı texnikaların qiymətini şişirdərək dövlətə sırıması barədə yazdıq. Daha doğrusu, Vahid Məhərrəmovun müsahibəsini verdik.
Həmin vaxtı KTN məsələyə aydınlıq gətirmək əvəzinə, şantaja keçdi.
Dövlətdən ogurluq eləməkdən utanmayanlar bizi və bizə istinadla müsahibəni verən jurnalistləri aşağılamağa cəhd etdilər. O adam ki, dövlətin verdiyi xidməti maşını belə, ailəsinin sərəncamına verib.
Rəhmətlik Qadir İbrahimli dil-ağız elədi, yoxsa həmin xidməti maşınla kimin və necə qəza elədiyinin görüntüsünü də yayacaqdım...
Sözü ona gətirirəm ki, indi bu adamlar Palatanın yoxlamasına nə deyirlər?!
Di cavab verin də!
Dədələr düz deyir, utanmasan oynamağa nə var ki?!"

DİA.AZ

Yeni tədris ilinin başlamasına sayılı günlər qalıb.

Tədris ənənəvi olaraq sentyabrın 15-də başlayacaq.

Nazirlər Kabinetinin qərarına əsasən, 2023-2024-cü tədris ilində ölkənin hər bir ümumi təhsil müəssisəsi üzrə vahid məktəbli geyimi tətbiq ediləcək.

Həmin qərarda məktəblər tərəfindən 4 cür geyim formasından birinin seçilməsi nəzərdə tutulur.

Lakin bir çox valideyn övladı üçün məktəbli formasını bu və ya digər səbəblərdən dolayı ya almayıb, ya da almamağı düşünür.

Maraqlıdır, həmin şagirdlər üçün hər hansı bir cəza mexanizmi nəzərdə tutulub?

Azərbaycan Respublikası Elm və Təhsil Nazirliyi yanında İctimai Şuranın sədri Günel Səfərova Cebhe.info-ya açıqlamasında bildirib ki, həmin məktəblilər formasız qalmayacaq:

"Əgər o ailə aztəminatlıdırsa, həssas qrupa daxildirsə, regionlar üzrə regional təhsil idarərtmə şöbələrinə müraciət edir və o ailələrin uşaqları məktəbli forması ilə təmin olunurlar.

Eyni zamanda, belə bir prosedur icra hakimiyyətlərində də var. Həmin ailənin imkanı çatmırsa, dediyim kimi həssas qrupa daxildirsə, onların övladları tələb olunan məktəbli forması ilə təmin olunacaq. Yəni, heç kəs kənarda qalmayacaq".

Zəngilan rayonu, Baharlı kənd sakini Quliyev İlham Hüseyn oğlu tərəfindən Hurriyyet.az saytının redaksiyasına şikayət məktubu daxil olub. 63 yaşlı şikayətçi onun işğaldan azad olunmuş torpaqlara getməsinə icazə verilməməsindən şikayətçidir:

"Mən, Quliyev İlham Hüseyn oğlu, yazaraq sizdən xahiş edirəm ki, problemimi işıqlandırasınız.

Allah bütün şəhidlərimizə rəhmət etsin, canları bahasına torpaqları azad etdilər.

63 yaşım var, şəkər xəstəsiyəm. 2019-cu ildə infarkt keçirmişəm. Mən də, başqaları kimi, gedib vətənimi görüb, gəlmək istəyirəm. Bu, mənim arzum, niyyətimdir.

May ayının 17-də 3 nəfər Dərnəgüldə yerləşən Prezident nümayəndəliyinə müraciət etdik. Bizi qeydiyyata alıb dedilər ki, may ayının 31-də burda olmalısınız. Deyilən vaxt yenidən həmin ünvana getdik. Dedilər ki, iyun ayının 13-də gələrsiniz. Yenə də iyun ayının 13-də getdik qeydiyyata. Bu zaman bizə bildirdilər ki, yaxın vaxtda gedib vətəninizi görəcəksiniz.

İyun ayı bitdi, səs çıxmadı. İyul ayının 26-da bir yoldaşımıza, 31-də isə digər yoldaşa məlumat verib, onları vətənlərinə göndərdilər. Mənə isə cavab gəlmədi.

Avqust ayının 14-də gedib etirazımı bildirdim. Mənə dedilər ki, "1-2 həftəyə sizə də zəng gələcək, narahat olmayın". Avqust ayının 28-də yenidən getdim, bu dəfə mənə bildirdilər ki, yenidən qeydiyyata düşmək lazımdır. Mənə niyə mane olurlar, niyə qoymurlar gedim vətənimi görüm gəlim? Mən xalq düşməni deyiləm, narkoman deyiləm, cinayətkar deyiləm, səbəb nədir görəsən? Mən sadəcə öz vətənimi, yurdumu görmək istəyirəm. Mənə deyirlər ki, sentyabr ayının 28-də yenidən qeydiyyat düşməlisən. Axı mən qeydiyyata düşmüşəm, niyə məni bu yaşımda torpağıma buraxmırlar?

Bu qurumu cənab Prezident yaradıb ki, vətəndaşlara qarşı mədəni, hörmətlə davransınlar. Yaratmayıb ki, kimisə yaddan çıxarıb qeydiyyata almasınlar və yaxud da qərəzli şəkildə torpağına getməsinə mane olsunlar.

Hörmətli redaksiya!

Sizdən xahiş edirəm ki, öz səlahiyyətlərinizdən istifadə edərək, məni niyə doğma yurduma qoymadıqlarını öyrənəsiz. Mən bu cavabı həmin təşkilatdan ala bilmirəm".

Redaksiyadan: Qarşı tərəfin mövqeyini dərc etməyə çalışacağıq.

Azərbaycana payız hələ gəlməyib. Havalar isti keçir. Amma qışın özünü necə aparacağını da bilmək olmur. İstənilən halda istilik qayğıları başlayacaq. Ölkədə evlərin əksərində müxtəlif yollara müraciət edilir. Amma yaşayış binalarında konkret istilik sistemi olmalıdır.
Bizimyol.info xəbər verir ki, “Azərbaycan Respublikasında kommunal xidmətlərin inkişafına dair Strateji Yol Xəritəsi”ndə 2017-2020-ci illərdə istiliklə təmin edilən yaşayış binalarının sayının 5689-a çatacağı qeyd olunmuşdu. Amma say heç 4 minə çatmayıb. Ümumilikdə, 3850 yaşayış binasının istiliklə təchiz olunduğu məlumdur. İş orasındadır ki, 2016-cı ildən sonra çox şey dəyişməyib. Geridə qalan illər ərzində yeni istilik sistemi ilə təchiz edilən binaların sayı cəmi 80 olub. Yəni “Azəristiliktəchizat” yerində sayıb.

Hesablama Palatasının audit yoxlamaları göstərir ki, açıq səhmdar cəmiyyəti həmişə nöqsanla işləyib. Məsələn, hesabatlarda dövlət büdcəsindən ayrılan vəsaitdən istifadə zamanı lüzumsuz xərclərə yol verildiyi xüsusi qabardılıb. Nəqliyyat vasitələri və aqreqatlara artıq yanacaq sərf edilib. Ümumiyyətlə, israfa yol verilib. Dövlət müəssisəsinin proqnozlarının tərtibi zamanı əvvəlki dövrlərin faktiki və davam edən illərin gözlənilən xərci, mal-material ehtiyatlarının anbar qalıqları müvafiq proqnozlaşdırmalarda nəzərə alınmayıb. Anbarda qalığı olan malların təkrar alınması nəticəsində zəruri olmayan xərcə vəsait yönəldilərək səmərəsiz xərcə yol verilib. O qədər nöqsan var ki, sadalamaqla bitmir...

Uzun sözün qısası odur ki, “Azəristiliktəchizat” pis fəaliyyət göstərib. Ölkədəki yaşayış binalarının yarıdan bir qədər az hissəsi istiliklə təchiz olunur. İndi əhalinin vəziyyətini təsəvvür edin. Qış aylarında, payızın soyuq günlərində mənzillərin isidilməsi əməlli-başlı problemə çevrilir. Açıq səhmdar cəmiyyəti isə vəzifənin öhdəsindən gəlmir. Tez-tez başqa dövlət qurumlarına böyük borc yarandığı məlum olur. Az qala hər il qaz borcu üzə çıxır. Hesablama Palatasının audit yoxlamaları isə dövlət vəsaitindən məsuliyyətsizcəsinə istifadə olunması faktını ortaya qoyur.

İlin soyuq günləri irəlidədir. Açıq-aşkar görünür ki, “Azəristiliktəchizat” mövsümə hazır deyil. Ya mənzillər istiliklə gec təmin olunacaq, ya da iş lazımınca görülməyəcək. Hər il eyni mənzərə yaranır. Gecikmə isə, adətən, borclara görə olur. “Azəristiliktəchizat” bütün ili yatır, qışda oyanır. Onda isə çox gec olur...
Bizimyol. İnfo

Sentyabrın 6-sı saat 19:50-də Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri Azərbaycan Ordusunun Laçın rayonu istiqamətində yerləşən mövqelərini atıcı silahlardan atəşə tutub.

Bu barədə Müdafiə Nazirliyindən bildirilib.

Ordumuzun bölmələri tərəfindən qeyd olunan istiqamətdə cavab tədbirləri görülüb.

Son illər ölkəmizdə idarəetmə sahəsində gedən davamlı islahatların nəticəsində bir sıra vəzifələrə yeni təyinatlar olub. Xüsusilə də, icra hakimiyyəti başçısı postlarına gənc kadrların təyin olunması artıq ənənəyə çevrilib. Bununla yanaşı stajlı icra başçılarının sayı da az deyil.

Bizim.Media pensiya yaşını doldurmuş icra başçılarını araşdırıb.

Alı Qocayev

Samux rayon İcra Hakimiyyətinin başçısı Alı Qocayevin 76 yaşı var. O, 1947-ci ildə anadan olub. Alı Qocayev 2005-2012-ci illərdi Binəqədi rayonuna rəhbərlik edib. Artıq 11 ildir ki, o Samux rayon İcra Hakimiyyətinin başçısıdır.

Mübariz Əhmədzadə

Zaqatala rayon İcra Hakimiyyətinin başçısı Mübariz Əhmədzadənin də 76 yaşı var. O, 1947-ci ildə anadan olub. Mübariz Əhmədzadə 2007-2009-cu illərdə Qax, 2009-cu ildən isə Zaqatala rayon İcra Hakimiyyətinin başçısı vəzifəsini daşıyır.

Bayram Səfərov

Şuşa şəhər İcra Hakimiyyəti başçısı Bayram Səfərovun 72 yaşı var. O, 1951-ci ildə anadan olub. Bayram Səfərov 2009-cu ildən Şuşanın icra başçısıdır.

Adil Məmmədov

Qobustan rayon İcra Hakimiyyətinin başçısı Adil Məmmədovun 71 yaşı var. O, 1952-ci ildə anadan olub. Adil Məmmədov 1994-2002-ci illərdə Oğuz, 2002-2004-cü illərdə Qəbələ, 2004-2011-ci illərdə Biləsuvar rayonuna rəhbərlik edib. O, artıq 12 ildir ki, Qobustan rayon İcra Hakimiyyətinin başçısıdır.

Rafil Hüseynov

Ağcabədi rayon İcra Hakimiyyətinin başçısı Rafil Hüseynovun 70 yaşı var. O, 1953-cü ildə anadan olub. Rafil Hüseynov 2012-2019-cu illərdə Masallı, 2019-cu ildən isə Ağcəbədi rayon İcra Hakimiyyətinin başçısıdır.

Malik İsaqov

Qubadlı rayon İcra Hakimiyyətinin başçısı Malik İsaqovun 70 yaşı var. O, 1953-cü ildə anadan olub. Malik İsaqov 22 ildir ki, eyni vəzifəni daşıyır.

Tofiq İbrahimov

Ağdaş rayon İcra Hakimiyyətinin başçısı Tofiq İbrahimovun 69 yaşı var. O,1954-cü ildə anadan olub. Tofiq İbrahimov 2004-2010-cu illərdə Qəbələ, 2010-2012-ci illərdə Lənkəran və 2012-ci ildən bəri isə Ağdaş rayon İcra Hakimiyyətinin başçısı vəzifəsini daşıyıb.

Novruz Novruzov

Siyəzən rayon İcra Hakimiyyətinin başçısı Novruz Novruzovun da 69 yaşı var. O,1954-cü ildə anadan olub, Novruz Novruzov 1995-2002-ci illərdə Lerik, 2002-2007-ci illərdə Goranboy, 2007-2019-cu illərdə Şabran və 2019-cu ildən isə Siyəzən rayon İcra Hakimiyyətinin başçısıdır.

Zakir Fərəcov

Sumqayıt şəhər İcra Hakimiyyətinin başçısı Zakir Fərəcovun 69 yaşı var. O 1954-cü ildə anadan olub, Zakir Fərəcov 2005-2015-ci illərdə Abşeron, 2015-ci ildən bu günədək Sumqayıt şəhər İcra Hakimiyyətinin başçısıdır.

Alı Alıyev

Füzuli rayon İcra Hakimiyyətinin başçısı Alı Alıyevin 68 yaşı var. O, 1955-ci ildə anadan olub. Alı Alıyev 12 ildir ki, bu vəzifənin başındadır.

Mərdan Camalov

Zərdab rayon İcra Hakimiyyətinin başçısı Mərdan Camalovun 57 yaşı var. O, 1956-cı ildə anadan olub. Mərdan Camalov 2005-2019-cu illərdə Şirvan şəhərinin, 2019-cu ildən isə Zərdab rayon İcra Hakimiyyətinin başçısıdır.

Eldar Əzizov

Bakı şəhər İcra Hakimiyyətinin başçısı Eldar Əzizovun 66 yaşı var. O, 1957-ci ildə anadan olub, Eldar Əzizov 2000-2003-cü illərdə Nizami, 2003-2011-ci illərdə Gəncə şəhər, 2011-2015-ci illərdə Sumqayıt şəhər, 2015-2018-ci illərdə Səbayil və 2018-ci ildən etibarən isə Bakı şəhər İcra Hakimiyyətinin başçısıdır.

Şahmar Usubov

Xocalı rayon İcra Hakimiyyətinin başçısı Şahmar Usubovun 70 yaşı var. O. 1953-ci ildə anadan olub, Şahmar Usubov 2000-ci ildən bu vəzifəni daşıyır.

Xatırladaq ki, Azərbaycanda kişilərin pensiya yaşı 65, qadınların isə 63-dür.

Bizim.Media