“Avtomobil Yolları Dövlət Agentliyi sakinləri zibilin içində saxlayır” - Videoreportaj

“Azərbaycan Avtomobil Yolları Dövlət Agentliyi yaşadığımız ərazidə evlərin plana düşdüyünü deyib evlərin sökülməsi üçün dövlət büdcəsindən milyonlarla pul xərclədi. Qonşu evlər söküldü, bizim evlər qaldı. Sonra planı yarımçıq saxladılar. Agentlikdən soruşan yoxdur, milyonlarla pulu hara və niyə xərclədin?”

Bizimyol.info xəbər verir ki, 60 ildir mövcud olan məhəllənin sakini Rəşad Bayramov bildirib.

O deyib ki, plan yarımçıq saxlanılıb, digər evləri sökülmədi. Sökülən ərazidə abadlıq işi aparılmadığı üçün məhəllə yaşayış üçün yararsız vəziyyətə düşüb.

“3 il əvvəl özünü Azərbaycan Avtomobil Yolları Dövlət Agentliyinin əməkdaşı kimi təqdim edən Azər adlı şəxsin rəhbərliyi ilə bura gələn şəxslər bildirib ki, bu ərazi çəkiləcək yeni yolun planına düşüb. Evlərin ölçüləcəyini və bazar şərtlərinə uyğun kompensasiyanın veriləcəyini vəd verdi”,-deyə Rəşad Bayramov bildirib.

Şikayətçi olan başqa sakinlər də qeyd ediblər ki, daşınmaz əmlakın sahəsi düzgün qiymətləndirilməyib. Yataq və qonaq otağına bir qiymət, hamam, tualet, dəhlizə və evin həyətinə başqa qiymət təyin ediblər. Evini satanlar da satdıqları qiymətə 3 ildir ev tapa bilmirlər.

“Bəzilərini aldadıb kompensasiya verdilər, bəzilərini isə razı sala bilmədikləri üçün məhəlləni yararsız vəziyyətə qoyub getdilər”,-deyə sakin bildirib.

Şikayətçilərin sözlərinə görə, onlar aidiyyatı üzrə mərkəzi icra hakimiyyəti orqanlarına müraciət ediblər. Müraciətlər Azərbaycan Avtomobil Yolları Dövlət Agentliyinə göndərildiyini və bu qurumdan isə cavab ala bilmədiklərini deyirlər.

Zamantv.az