Burda iki yol var: ya xalq Sarqyanın iradəsini qırıb onu kriminal rejimin daşıyıcısı kimi məhv etməlidir, ya da Sarqsyan xalqın iradəsini qurub onların üzərində öz avtoritar rejimini qoruyub saxlayacaq”. Bu sözləri Moderator.az-a açıqlamasında Ana Vətən Partiyasının sədri, millət vəkili Fəzail Ağamalı Ermənistandan baş verən son hadisələrə münasibət bildirərkən deyib. F.Ağamalı qeyd edib ki, Sarqsyan hakimiyyəti əlində saxlamaq üçün bütün vasitələrdən istifadə edəcək:
“Bu gün Qarabağ klanına qarşı yerli ermənilərin ciddi müqaviməti var. Bu kriminal, avtoritar rejimə qarşı Ermənistan xalqının hamısı olmasa da, müəyyən hissəsinin mövqeyi ortadadır. Xalq axıra kimi dayana bilsə, Sarsyan rejiminin həbslərindən və hədələrindən qorxmasalar, ətraflarına bütün Ermənistan əhalisini cəlb etsələr, Sarqsyan və onun tərəfdarları xalq qarşısında ağ bayrağını qaldırmış olacaq. Sarqsyan isə sona qədər öz hakimiyyətini qoruyub saxlamağa çalışacaq. Çünki onun hakimiyyətdən getməsi, Sarqsyanın məhvi deməkdir. Bununla bağlı ortada konkret fakt da var ki, Sarqsyan prezident seçilərkən İrəvanda qırğın törətdi, insanlar xəsarət aldılar, 12 nəfər həyatını itirdi. Beynəlxalq aləm də buna susdu və Sarqsyan daha on il də prezidentlik kürsüsündə oturaraq kriminal rejimi ilə Ermənistan xalqını çıxılmaz vəziyyətə saldı. Təsadüfi deyil ki, Sarqsyan Dağlıq Qarabağda olan öz tərəftarlarını İrəvana doğru cəlb etməkdədir. O, kriminal rejimin söykənmiş olduğu qüvvələrə arxayın olaraq öz hakimiyyətini qoruyub saxlamağa çalışacaq. Burda iki yol var: ya xalq Sarqyanın iradəsini qırıb onu kriminal rejimin daşıyıcısı kimi məhv etməlidir, ya da Sarqsyan xalqın iradəsini qırıb onların üzərində öz avtoritar rejimini qoruyub saxlayacaq”.
F.Ağamalı deyib ki, Sarqsyan hakimiyyətdən getsə, sülh danışıqları sürətlənə bilər:
“Sarqsyanın hakimiyyətdən getməsi sülh danışıqlarının sürətlənməsinə təsir göstərə bilər. Ancaq gərək ki, burda Kremlin göstərişi olmasın. Çünki Moskva işğal olunmuş torpaqlarımızın bu şəkildə işğalda saxlanılmasında maraqlıdır. Rusiya mövcud vəziyyətlə həm Ermənistana, həm də Azərbaycana təzyiq rıçaqlarını əlində saxlayıb”.
Vasif Əlihüseyn
Zamantv.az